شما اینجا هستید: Home بخش های اصلی بیــانیــه دوکتور لطیف حسنی نین ایراندا اوخوللارین آچیلیش گونو موناسیبتینه، تورک اوشاقلارینین آنا دیلینده تحصیل حاققیندان محروم ائدیلدیکرینه اعتراض اوچون، سوکوت آکسیاسینا باشلاماسینی اعلان ائدرک، ایران پرئزیدنتی حسن روحانی یه آچیق مکتوب!

دوکتور لطیف حسنی نین ایراندا اوخوللارین آچیلیش گونو موناسیبتینه، تورک اوشاقلارینین آنا دیلینده تحصیل حاققیندان محروم ائدیلدیکرینه اعتراض اوچون، سوکوت آکسیاسینا باشلاماسینی اعلان ائدرک، ایران پرئزیدنتی حسن روحانی یه آچیق مکتوب!

سایین ایران پرئزیئت جناب دوکتور روحانی!

 

 

سالام و سایغی ایله،

هر شی دن اؤنجه اورمو گؤلونون اوزوجو دورومونا دیققت ائتدیینیزدن میننتدارلیغیمی بیلدیرمک ایستیرم. اومورام سیزین دوولتینیز، سورونو امنیتی مسئله لره باغلامادان، اورمو گؤلو بوحرانینی کونترول ائتمه یه چالیشاجاقدیر. عینی حالدا سیزین سئچکی کامپانیاسیندا، ایراندا اولان میللی مسئله ایله باغلی سؤزلرینیز نیسبتا تقدیره لاییق دیر. تبریز شهرینده آنایاسینین 15-جی و 19-جو اصل لرینین ایجرا اولونماسی کیمی وعده لرینیز و هابئله آزربایجان تورکجه سینه دیل قورومو یارادیلماسینا سؤز وئرمه یینیز، ایرانین باشقا بؤلگه لری ایله موقاییسه ده سیزی آذربایجان شهرلرینده اورتالاما داها آرتیق سس قازانماغینیزا گتیریب چیخاردی و بئله لیکله سیزین بیرینجی دؤورده پزئزیدنت لییه سئچیلمه یینیزده تورک شهرلریندن آلدیغینیز سس اساس رول اوینادی. ایندیسه جناب پرئزیدنت، مکتبلرین آچیلیشینا بیر نئچه گون قالیر. مهر آیینین بیرینجی گونو ایراندا یاشایان ملیت لر اوچون مرکزی حاکمیت وریندن اوشاقلارینین آنا دیللرینده یوخ، باشقا بیر دیلده ائییتیم آلماغا مجبور ائدن بیر سیستمی آنیمسادیر. بو ائیتیم زورونلودور و بونا اعتراض ائدنلر آغیر جزالارلا قارشیلاشیرلار. سیز حقوقچو اولاراق، یاخشی بیلیرسینیز کی، هانسیسا ائتنیکین آنا دیلینده تحصیل آلماقدان محروم ائدیلیب، باشقا بیر دیلده تحصیل آلماق مجبوریتینده قالماسی ایرقچیلیق و مودئرن شوونیزم گؤسترگه سی دیر. عئینی حالدا بیلیرسینیز کی آنا دیلده تحصیل حاققی انسان حاقلارینین تمللریندن ساییلیر. بونلارا باخمایاراق بیز تورکلر و باشقا فارس اولمایان میللتلر (عرب، کورد، بلوچ و ...) مهر آیینین بیرینجی گونونده ائولادلاریمیزی حاکیم ائیتیم سیستئمینه تاپشیرماقلا اونلارین چشیتلی یوللارلا کیملیکلرینین تحقیر اولماسینا شاهید اولوروق. بو تحقیرلرین اولومسوز (منفی) ائتکیلری بو انسانلارین یاشاییشلارینین سونونا قدر سورور.

 

جناب پرئزیدنت!

 آذربایجانلی وطنداشلار ایللر بویو اؤز ایلکین و اینسانی حاقلاری او جومله دن آنا دیلده تحصیل حاققینی الده ائتمک اوچون مدنی یوللارلا چالیشیب، اعتراضلاریمیزی یوموشاق و خشونتدن اوزاق متودلارلا گؤسترمیشیک. اما تاسوفله اؤلکه نین امنیتی –قضایی و سیاسی سوروملولاری بو ایستکلره، اؤنم وئرمدن رژیمه قارشی تبلیغات آپارماق، میللی تهلوکه سیزلییه قارشی تشببوث، قانونسوز قروپ یاراتما و ... کیمی اتهاملارلا توتوقلاییب، ایشکنجه ائدیب، زیندانا محکوم ائدیبلر.

گونوموزده گلیشیم و تهلوکه سیزلیک یؤنتیمی بیلمینین وورغولادیغی کیمی، مودئرن دونیادا آرتیق امنیت آدینا، باسقی و اینکارلا میلیونلار انسانی ایلکین حاقلاریندان محروم ائتمک امکانسیزدیر. بیر چوخلو امنیتی اورقانلاردا مسئولیت سابیقه نیزی نظرده آلاراق یاخشی بیلیرسینیز کی آذربایجان آیدین دوشونجه لی و ضیالیلاری ایللردیر بو باسقی لارین آلتیندا هزینه لر اؤده مکده دیرلر. بو سیستئماتیک باسقی لارین هئچ بیری آذربایجان میللی فعاللارینین گئری چکیلمه یینه سبب اولماییب کل هئچ، ترسینه گونو گوندن ساییلاری آرتیب، اعتیراضلاری گئنیشله نیبدیر. بو اعتراضلاردان بیری دهاؤلکه نین ائیتیم سیستئمینه قارشی سیمبولیک اولاراق، مهر آیی نین بیرینده آذربایجانلیلارین اؤز ائولادلارینی مکتبلره گؤندرمه مکلریدیر. منیم باغلی اولدوغوم حزب و باشقا دوستاقدا اولان آذربایجان میللی فعاللاری دا بو اعتراضلارین بیر پارچاسی دیر. باخمایاراق کی، یئنی گاموح حزبینین باشقانی اولاراق مرکزی کومیته اویه لری ایله بیرلیکده عدالتسیزجه سینه 9 ایل زیندان حؤکمونه محکوم اولموشوق، حالن سورگون ائدیلدیییمیز رجایی شهر دوستاغیندان، تورک اوشاقلارینین آنا دیلینده ائییتیم حاققینی ایصرارلا طلب ائدیرم. سیزدن بو یولدا جیددی و عملی آددیملار آتماغینیزی ایستیرم.

هابئله بیر آذربایجانلی کیمی گؤره ویم بیلیرم کی اؤز اعتراضیمی بو کولتورل ژئنوسایدا آچیقجاسینا بیلدیرم. بو آماجلا مهر آیینین بیریندن 3 گونه کیمی سکوت آکسیاسینا باشلایاجاغام. بونو دا وورغولاییم کی رجایی شهر دوستاغیندا تلفوندان محروم اولدوغوموز اوچون، ساده جه دوستاقدا اولان دوستاقلیلار و مسئوللار  بو آکسیایا شاهد اولاجاقلار. اومورام بو مدنی اعتراضلار ایراندا یاشایان میللتلرین انسانی حاقلارینا سایماز قالان اینسانلارین اویانماسینا سبب اولسون. منیم سیزدن بکله نتیم بودور کی منیم سکوتوما راغمن، سیز مرکزی دوولتین، ایراندا یاشایان میللتلرین حاقلارینا قارشی سس سیزلییی  سیندیراسینیز. آچیق گئرچکلری دانمادان، میلیتلرین آیاقلانمیش و تاپدالانمیش حاقلارینین الده ائدیلمه سی ایستیقامتده دقیق و زامانلی پیلانلار اورتایا قویاسینیز.

اؤنجه دن سیزهاوغورلار و اسنلیکلر آرزو ائدیرم.

لطیف حسنی

دبیرکل یئنی گاموح

رجایی شهر دوستاغی- شهریورین ایگیرمی بئشی 1392

 

 

سایت http://yenigamoh.com ارگان رسمی تشکیلات "یئنی گاموح" (جنبش نو بیداری ملی آذربایجان جنوبی) می باشد. نشر مطالب این سایت با ذکر منبع بلامانع است.

جهت ارتباط سریع با ما، می توانید با آدرس زیر تماس بگیرید. info@yenigamoh.com