شما اینجا هستید: Home بخش های اصلی مقـالـه و تحلیل قارچیچک لری، توتوقلاما، سورغولاما و شیکنجه آلتیندا/ یوروش مهرعلی بیگلی

قارچیچک لری، توتوقلاما، سورغولاما و شیکنجه آلتیندا/ یوروش مهرعلی بیگلی

آچیقلاما: "قارچیچک لری؛ توتوقلاما، سورغولاما و شیکنجه آلتیندا" یازیسی یوروش مهرعلی بیگلی جینابلاری نین زیندان اولایلاریندان، خاطیرلادیغی و قلمه آلدیغی فاکتلاردیر. بو خاطیره یازیسی گونئی آذربایجان میللی حرکتی نین  15 فعالی نین توتوقلاما و سورغولاما سورسی نین بیر بؤلوملرین عکس ائتدیرمکده دیر. میللی حرکت ده بو تیپ یازیلارین یازیلماسی، یاشانان تجروبه لری گلن نسل لره داشیما و میللی فعاللاری توتوقلاندیقلاری زاماندا داها دا تجروبه لی داورانمالاریندا یاردیمجی اولاجاغی نین اینانجینداییق. (یئنی گاموح سیته سی)

---------------------------------------------------------------------------------------------------------------

توتوقلانما

بوغا آیی‏نین (اردیبهشت)20-جی گونویدو. او گون همیشه اولدوغو کیمی، سحر ائرکن سونا ایشه گئتمیشدی. بیز ایسه تاتارلا کنده، گئتمه­یه حاضیرلاشیردیق. آنام گیله، جولفانین سوجا کندینه گئتمک ایسته‏ییردیک.  تاتاری کند آدی ایله یویونماغا هوسلندیرمیشدیم. دئمک اولار بئله حاللاردا اونونلا سانکی آل وئر ائدیردیک. او ایسه اؤزونون یویونماق قرارینی دانیشدیغی ناغیللارلا آچیقلاییردی.

تاتار 1386-جی ایل مهر (اؤلچن) آیی­نین 28ده دوغولوب. دئمک اولار ایکی یاش یاریملی­دیر. آنجاق  اؤزو گؤزلجه ناغیللار دئیه بیلیردی.  ستارخان بابادان بابک بابادان توتموش ناغیللاری سونوندا یاشاسین تراختورا چاتیردی. او گونده اونون ناغیللاری کنده گئتمک هوسی­ ایله باشلامیشدی. "آتاملا گئده­جه­ییک کنده، یولدا دوشمنلر بیزیم قاباغیمیزی کسجک، من قیلینجیمی چکجم ، قویمویاجام آتامی وورسونلار، ستارخان بابا گلجک،.... یاشاسین تراختور، هئئئی­ی­ی...."  ناغیلی دئدییی آنلاردا دئمک اولار هئچ بیر سس ائشیدیلمزدی. هارای سالا سالا اوتاغین اوباش بوباشینا گئدیردی و ناغیلداکی قهرمانلارین حرکتلرینی یانسیلاییردی. ائوده سانکی فیرتینا قوپموشدو. هر شئی اورتالیقدا، اویونجاقلاری، دایاناجاقلار (مخده، بالیشلار) قاب قاجاق و ...

یویوندورماغین نئچه قاتی، اونو گئییندیرمه­یه گرک زامان آییرایدیم. اونو گئیینمه­یه تسلیم ائدن و اؤتریده اولسا ناغیللاریندان آییرماغا، گرک کنده گئتمه­یی اؤنه چکه­یدیم و بیرآز تلسدیریدیم.

ائویمیز صوفیان شهرینده، شهرین اساس خیابانلاریندان بیرینده­یدی (آزادی خیاوانی). شهرین جامع مسجیدینین اوزبه اوزونده. بوراسی گل-گئتلی خیاوان ساییلیردی. باشقا محله­لردن فرقلی اولاراق، بورادا ائولرین قاباغیندا قادینلارین اوتورماسی و یا اوشاقلارین اویناماسین گؤرمک اولمازدی. شهر سیستئمینین یاراتدیغی قونشولار آراسی سویوقلوغا بیز ایللر اؤنجه­دن اؤیرنمیشدیک. اونا گؤره ده بورادا کیمسه ایله قونشولوق موناسیبتیمیز یوخودور. ارنا گؤره ده تاتارین اوینادیغی یئر یالنیز یاشادیغیمیز ائوین ایچی اولوردو. آرا سیرا کنده گئتمک اونون اوچون چوخ هیجانلی اولاردی. ائله کی کندین هوسی اونو بیزیمله آل وئر ائتمه­یه مجبور ائدیردی. بیز آغیر گونلری اؤنگؤرولمیشدیک. هردن تاتارین بیزدن آیری ننه­سی گیلده قالماسی حاقدا اونونلا موعامیله ائدیردیک.

"کنده گئدیریک ، سن ننه گیلده قالاجان، آتا ایله آنادا ایشه گئدجک".

یازیق اوشاق بیلمیردی کی بیر زامان بو ایشه گئتمک ائله اوزاناجاق کی ، آرتیق آتاسین تانیمایاجاق، آرتیق هئچ نه یین باهاسینا ، آتا آناسیندان اوزاق قالماق ایسته­مه­یه­جک، لاپ ان چوخ سئودییی کند اولسون بئله!! بو کند تاتارین منیمسه­دییی کندیدی. کند اونون اوچون ائله ننه سی گیلین ائویییدی. او کنددن باشقا یئرلرین هامیسینین آدی واریدی، آنجاق  سوجا کندی تکجه "كند" آدی داشیییردی اونا.

بیزیم کندیمیز قدیم ناخجیوان چوخورونون ان قوراق یئرلریندن بیریدیر. کندیمیزین دؤرد چئوره سینده اوجا داغلار وار، کمچی، میشاخیر، علمدار داغی، قیلینج داغی، گرگر داغی، اؤنونده ایسه کلله قنده – پیلاوا (پیلوو) اوخشایان کئچی قالاسی، قوزئی یانیندا خان اراز چایی، اونداندا بیر آز قوزئییه دوغرو گئدنده، اینام داغی گؤرونور. بو داغلارین آراسیندا دوشموش ناخجیوان چوخورونون ان قوراق کندی تاتارین ان سئودییی کند ایدی. آشاغا حیَط دئدیییمیز مال حیوان حَیَطی اونا ان دولو حیوان باخچالاری قدر تاماشالییدی. ننه­سی ایله بو حَیَطده تویوخ جوجه لره دن تؤکمه­یه گئتمه­یه ائله هوسله، اوینایاراق گئدردی کی، انسانی یاشاماغا هوسلندیرردی. آنام­دا تاتارین ننه سی اولاراق، بوتون محببتین بو اوشاغا آییرمیشدی سانکی. اوشاقکن آناسینی گؤرمه­دن ایتیرن، تاتارین ننه سی ایندی اونون محببت قایناقلاریندان بیرییدی. تاتارين بئله‌ليكله بو کنده سئوگيسي چوخ دوغاليدي.

تاتارین آت مئیدانی، دؤیوش میدانی اولان صوفیانداکی ائویمیز ایسه ، ایکی مرتبه­لی بیر بینانین ایکینجی قاتییدیر. بو ائوده ائله شیرین و آجی آنلاریمیز اولوب کی، اونو رومانلاردا تعریفله­نن بؤیوک چیفلیکلر و سارای‏لار کیمی اینجه­لیکله هردن بئینیمدن کئچیره‏رم. بورا تاتارین هم خیاللارینداکی دؤیوش مئیدانی اولدو، هم­ده گئرچکده بیر وحشیلیکله دولو جینایتین باش وئردییی مئیدان. بوراسی ساواشین باشلادیغی یئر، دیرنیشین ایلک مئیدانی. بوراسی تاتاریملا آیریلدیغیم و سونرادا یئنی دن قوووشدوغوم – اونونلا یئنی دن اوینادیغیم یئر.

او گون کنده عموغلوم حسن ایله گئده­جه­یدیک. قاباقکسی گون آنلاشمیشدیث کی، سحر ساعات 10-9 آراسی گلیب بیزی گؤتورسون و بیرگه جولفایا گئدک. من اونلارا بیر ایقتیصادی پروژه یازاجایدیم. اونون اوچون جولفایا گئتمه­لی و اونلاردان ایلک وئریلری (دئیتالاری) آلمالیدیم. ساعات دوققوزو کئچمیشدی ، زنگ ائله دی کی، تبریزدن چیخیرام گلیم. یاریم ساعات چکر. منده فورصتی قنیمت بیلیب ایسته­دیم بیر اینترنته باش ووروم. او گونلر اؤرگوتسل(تشکیلاتی) ایشلریمیز چوخودور. بیر یاندان باشقان دوقتور چؤهره­قانینین تشكيلاتدان ایستعفا مساله سی، بیر یاندان اؤرگوتون تبلیغات ایشلری، یئنی یاپیلانما(ساختار)، یو.ان.پی.او یا قاتیلما و اونون خرجینی حاضیرلاما و ... .

بیز ایلیشکیمیز اوچون اورتاق ایمیل آچمیشدیق. هامی­دا بو ایمئیلین شیفره­سی واریدی. هر کس هر هانسی شهرده اولور اولسون، ان آزی هفته­ده ایکی دؤنه او ایمئیله گیریردی و اؤز فیکرینی یولداشلارلا پایلاشیردی. اوزون سوره بیز بو ایشی کافینتلردن گؤروردوک، آنجاق  3 آی اولاردی کی باشا دوشموشدوک کافینتلر گوونسیزدیر و یازدیغین نه وارسا ضبط اولور. اونا گؤره ائوه داشینمیشدیق. بو دوروم بیزیم یازیشمالاریمیزی کئچمیشدن داهادا چوخالتمیشدی. بئله اولموشدو کی من گونده نئچه دؤنه اورتاق ایمئیلیمیزه باش ووروردوم. گونئی آذربایجان میللی اویانیش حرکاتی-گاموح” سونرا‌لار ایسه توتوقلاما‌دان سونرا باش وئرن اولای‌لارا گؤره تشکیلاتین آدین دییشه‌رک “یئنی گاموح” قویدوغوموز اؤرگوتون، مرکزی کومیته‌سی‌ايدیک بیز. تشکیلاتیمیز یاریم گیزلی تشکیلات ساییلیردی. ایرانین اؤزل باسقیجی (ایختیناق) دورومون نظره آلا‌راق، دؤنه دؤنه ایستسکده، آشکار چالیشماق اوچون هله دوزگون قرار وئرنممیشدیک.شخص اولا‌راق آشکار چالیشساقدا، اؤرگوت( تشکیلات) اولا‌راق گیزلیگیدیک. البته میللی فال‌لارین چوخو بیزلرین بیر نئچه‌سین تانیییردی‌لار. اوگون ده، یولداشلارا یازاجاغیم قونولارین باشلیغین بیر کاغاذدا یازمیشدیم. کاغاذی گؤتوروب بیلگی سایار اولان اوتاغا گئتدیم. تاتاردا دالیمجا گلدی. یئنه ده او شیرین سسی ایله، منی باشا دوشورجه­سین دئدی: "آتا بیلگی سایار اوخویورسان؟"

دئدیم : " هه آسلانیم، سن کایلویا باخ. منده ایشیمی گؤروم، سونرادا گئدک کنده"

بیلگی سایارین اؤنونده کی اوتوروقدان منی اؤزونه ساری دؤنده­ررک یئنه­ده اوزومه شیرین شیرین باخیب  دئدی:

آتا! سن کامپیوتئل اوخویورسان ، منده کایلویا باخیم، سولادا گئدخ کنده؟

دئدیم: هه آسلانیم ، گئت! تئز ایشلریمی گؤروم، گئدک ننه گیله.

بئله حاللاردا ، تاتارین ایلیشمه­سی منی داریخدیریردی. تئز ایسته­ییردیم بیر سؤز دئیه­م مندن اوزاقلاشا. او ایسه منله چئشیتلی بهانه­لرله یئنه­ده دانیشماق ایسته­ییردی. سونرالار بو آنلارا چوخ حئییفسه­نیردیم. ندن گیره­وه­لری قاچیردیمدا، تاتاریما آرتیق واخت قویمادیم!

تاتارلا ائله اوغراشماقدایدیم تلفون چالیندی. بیر زنگدن سونرا قیریلدی. دئدیم بلکه عموغلوم قاپیدادیر، تک زنگ ائدیر کی قاپیدایام. چیخدیم کوچه­یه باخدیم، کیمسه­نی گؤرمه­دیم، قاییتدیم ائوه. یادیما گلن بودور کی سونرا اؤزومده زنگ ائتدیم، گؤتورمه­دی. هر حالدا ائله اؤنمسه­مه­دیم. قاییتدیم بیلگی سایارین باشینا. قاپی زنگی چالدی. عموغلومدور دئیه، داها هئچ آیفونداندا سورمادیم کیم اولدوغونو. پنجره­دن­ده ائشییه باخمادیم. بیر باشا قاپییا گئتدیم، تاتار دا منیم آردیمجا.

قاپینی آچدیقدا حسنی گؤردوم. ال سیخیشدیق. چوخ واخت‌لار گئیدیگی یاریم قول آلا کؤینه‌یین گئیمیشدی.حسن همیشه­کی حسن دئییلدی. هئچ نه دانیشمادی. ساری قیوریم ساچ‌لاری کیمی، گؤزلوک آلتین‌داكي بالاجا گؤزلری نیگران و پوزقونودو. همیشه گولر اوز داوراناردی حسن. تاتاری تئز قوجاقلاییب، کندیمیزدن دانیشاردی. آنجاق او گون ایدمانچی عموغلومون قول‌لاری سوست گؤرونوردو.  گؤردوم یانیندا باشقا بیریسی وار. حسن سانکی دونموشدو. سوردوم کی بو کیمدیر؟ اوله حسن جاواب وئرمه­میش اوجابویلو سوغون جاوان آدام همن گیردی ایچری. دالینجا 4 نفر باشقاسیدا سوخولدولار ایچری. ایکینجی ایچری گیرن آدامین 50 یاشی اولاردی، کت شالوار گئیمیشدی، اوزونده سئیرک ساققالی واریدی. من اونو قاباقجا گؤرموشدوم. اونو گؤرجک ایطلاعات مامورلاری اولدوقلارین آنلادیم. ایکینجی ایچری سوخولان آدام تئز بیله­ییمدن یاپیشدی، یوخاری پیلله­لره ساری باخاراق، دئدی دینمه، سونرا ائله آرا .وئرمه­دن منی قاباقجا گیرنین آردینجا چکدی. دالیمیزجادا باشقالاری و حسن گلیردیلر.  من قاباقجا 4 دؤنه توتولسامدا، بونلارین ائله­جه بیردن ایچری گیرمکلری آغیر استرس یاراتدی. اوره­ییم گوپ-گوپ گوببولداییردی. بیر آنلیغا سانکی بوغازیمدا قورودو. بیله­ییمدن یاپیشان مامور سوروشدو کی : ائوده آدام وار؟

سسیم تیتره­یه­رک دئدیم : یوخ.

تاتار گلن قوناقلارین قاباغینا گئدردی. اونلاردا هامیسی بیزدن چوخ، تاتاری دیندیرردیلر. آنجاق  بو دؤنه آرا قاپیدا دوروب، هوروت هوروت باخیردی. یئرینده دونموش کیمی­ایدی. آرا قاپییا گیرنده تاتار قورخماسین دئیه، اونو قوجاغیما آلماق ایسته­دیم، مامور آجیقلی آجیقلی دئدی: "يئري! اؤزو گلر"

حسن ده بو آندا منیم یانیما گلیب چاتمیشدی. سالوندا دوزولموش اوتوروقلاری گؤستریب، دئدیلر:

-          اوتورون یئریزده، دینمیین. ساکیت اولون.

 جاوان مامورلاردان بیری بیزی قانداللاماق ایسته­دی. یاشلی اولان دئدی:

-          ایستمز اؤزو هر شئيي بیلیر. اول دفعه­سی دییل.

سونرا منه بیر کاغاذین بوجاغیندا آدیمی گؤستردی. دئمک ایسته­ییردی کی حؤکم واریمیز.

هله  گیره­وه تاپیب تاتارین اوزونه باخمامیشدیم. اوتوروقدا منیم قوجاغیما قیسیلمیشدی. تاتار چوخ اوسلو (عاغیللی) بیر جوجوقدور. منجه او گلنلرین پیس آداملار اولدوغون باشا دوشموشدو. اونون ناغیللاریندا قاباقجالار پیس آداملار اولسادا، ایندی گئرچکلیکده پیسلری گؤروردو. تاتارین و حسنین او آندا نه­لر دوشوندوکلرینی بیلمیرم. آنجاق  منی دوشوندورن یالنیز، یوخاری اوتاقداکی بیلگی­سایاریدی. قوللوق اوداسیندان 4 پلله چیخیردی بیلگی سایار اولان اوتاغا. بیز بو ائوی کیرایه (کؤده) ائدنده ، بو اوتاغی چوخ به­یه­نمیشدیم. ائوه بیر گؤزللیک وئرمیشدی.  آنجاق  ایندی منه کابوس کیمیدیر. بیلگی سایار آچیق ایدی و بیزیم هامیدان گیزلتدیییمیز اورتاق ایمئیل آچیغیدی. "وای اوتاغا گئتسه­لر، ایمئیلی گؤرسه­لر، اوشاقلار هامیسی بیلینه­جک!!" دئیه اوره­ییم چیرپینیردی. "کاش اورا گئتمه­سینلر!! اولابیلر مگر، گؤره­جکلر یقین، وای ده­ده فلش مئموری ده اوردادیر! یازیلاریمی بیلگی سایارین اؤزونده ساخلامازدیم، بو فلشه ووراردیم کی بیر زامان گلیب توتسالار، اللرینه بیر شئی دوشمه­سین.!! ایندی اونلار هامیسی اوردادیر" بو فیکیرلر و قایغیلار بئینیمدن کئچرکن بیر چؤزوم یولو تاپدیم و همن ایشه کئچمک  ایسته­دیم.

تئز یاخیندا اولان ماموری سسله­دیم:

"آغا من تووالته گئتمک ایسته­ییرم"

آلچاق بوی، بیغین ساققالین قیرخمیش ، قارنی یوغون مامورون قالین دوداقلاری همن آچیلدی، آشاغیلاییجی باخیشلا منه باخیب دئدی:

"اوتو یئرینده، دبشمه(ترپنمه)، آپاراجييوخ اويدا سیچاسان، سورادا پوخووو یئدیرده­جيييخ اؤزووه"

ائوئین اورا بوراسین آختاران مامورلارین بیرآن باخیشلاری بیزه ساری دؤندو. باشچیلاری کیمی گؤرونن یاشلی کت شالوارلی مامور اودانین آراسیندا ده­ویکه­رک دئدی:

"کامپیوتر هايدادی؟"

اوره­ییم توکولدو سانکی، اودغوناراق دئدیم: اوسته

سانکی بو آنی گؤرمک ایسته­میردیم. گؤزلریمه بیر آن دومان چؤکدو. یئنی­دن تووالت مساله سین دیله گتیردیم:

"آغا منیم دستشوییم وار"

منیم ائو ایشلریندن تکنیکی تعمیرات فیلان ایشلریندن هئچ باشیم چیخماز. ان چوخ باجاردیغیم ایش، ائوده لامپ دییشمک اولار. آنجاق  نئچه گون اؤنجه بیلمیشدیم کی، ائشیک قاپیسیندان گلن پیلله لرین سونوندا و آرا قاپی نین آردیندا ائوین ایشیقلارینین فیوزی وار. اونلاری وورماقلا ائوین بوتون ایشیغی کسیلیر.

"بئله اولورسا بیلگی سایاردا اؤز اؤزونه سؤنر و اللرینه بیر شئی چاتماز. بونو توالت بهانه سیله گؤرمک اولار. توالتین قاپیسی دوز آرا قاپییا آچیلیر. اورا چاتارسام، بونلاردان لاپ چوخ اولسا بیر ایکی نفر یانیمدا اولار.  اونلاریدا خاپدان ووروب و یا ایته­له­ییب، پیلله یولونا چیخیب ، فیوزلاری کئچیرتمک اولار" دئیه پلان تؤکوردوم. بوتون بونلار بیر ایکی دیقه­نین اولایلاری و فیکیرلری‌ايدی.

من بیر ایکی دؤنه توالت ایسته­دیکده ، حسن بیلدیکی اورادا بیر شئی وار. اونا گؤره اودا ایشه گیردی. اؤزونو قایغیلی گؤستررک دئدی:

"حاج آغا سیز آلله ایجازه وئرین بو گئتسین دستشویی یه ، بونون بوغارسیقلاری دویونله­نر بئله اولسا. قاباقجادا بیر دؤنه بئله اولوب"

بئله دئینده لاپ جاوان مامور خوروز کیمی اورتایا آتیلدی. قیوریم ساچلاری و یئنه­ده قیوریم قارا اوزون ساققالی واریدی. بللی ایدی کی اؤزونو لاپ موخلیص گؤسترمک ایسته­ینلردندیر. "سن لال اول" دئیه باغیردی.

آچیق قارا کت شالوار گئیمیش باشچی کیمی گؤرونن مامور بو دؤنه سانکی بیر یئنی شئی بولموش کیمی:

"قوی دستشویی­یه باخیم گؤيوم اويدا نه وار. چوخ دئدین کنجکاو اولدوم" دئییب توالته ساری یئریدی. قالانلاردا ائوی اختاریردیلار. قاپیدان اؤنجه ایچری گئچن اوجا بوی جاوان  مامور آرتیق بیلگی سایار اوداسینا گیرمیشدی و بیلگی سایارین اؤنونده­یدی. بو آندا منه ساری دؤنوب سوروشدو:

"موبایلین هايدادی؟"

من هئچ دوشونمه­دن دئدیم: "اوستده، قوی گلیم وئریم"

بایاقدان آختاردیغیم گیره­وه اؤزو یارانمیشدی. تاتار قوجاغیمدا اوست اوتاغا دوغرو یئریدیم. قاپیدان ایچری گیردیکده، مامور بیلگی سایارین آرخاسیندا اوتورموشدو. الی دؤندرده (ماوسدا) تزه جه بیلگی سایارین مانیتورونا باخماقدایدی. اوتاغین دیبینده، ساغ الده، خیاوانا باخان پئنجره نین یانیندا بیلگی سایاری یئرلشدیرمیشدیک. اوتاق کیچیک اولدوغونا ، قاپی ایله اوتوروقدا اوتورموش، بیلگی سایاری قورتدالایان مامورون 2 متیر آراسی اولاردی. فلش مئمورینیده گؤروردوم، کامپیوتره تاخیلمیشدی.آنجاق  اؤنجه­لیک بیلگی سایارین اؤزویدو. دوغوردان موبایلی آختاریر کیمی اؤزومو گؤستررک ، اویان بویانا باخا باخا بیلگی سایارا یاخینلاشدیم. مامورون سول یانین-پنجره­یه ساری اولان یئری گؤستره­رک دئدیم:

"باخ گؤر اوردادیر؟"

ائله مامور دؤنوب سولونا باخاندا ، تئز کئچدیم بیلگی سایارین دالینا و تلفون سیمی ایله الکتریک سیمین ایکیسینده پریزدن چکدیم. بیلگی سایار کابوسو بیر آن ایچینده باشیمدان اوچدو. آنجاق  باشیما یئنه­نلرده بیلگی سایارین سؤنمه­سی کیمی بیر آندا اولدو. قارنی یوغون جاوان مامور  قالخیب منی ووراناجان قالانلاری دا گؤز قیرپمادان تؤکولدولر باشیما. بئش ایلان چالمیش مامورون یوموراقلاری ، تپیکلری باشیمی، بوینومو، بیله­ییمی، انگیمی، قابیرقالاریمی ازمکده­ایدیر. تاتایرن قیشقیرتیسی ایله  مامورلارین سؤیوش وئرمه­لری بیر بیرینه قاریشمیشدی. حسن،  مامورلار وحشی­جه­سینه بئش یاندان باشیمی تپیکله­دییی حالدا، آلتیمدا قیشقیران تاتاری چکیب چیخارتدی. مامورلاردان بیرینین الی باشیمدا شینمیشدی دئیه­سن. اونا گؤره او دیشی ایله اورا بورامی قاپیردی. ساغ قولومو ائله ییغمیشدی آغزینا کی، اوستوندن بیر ایلدن آرتیق کئچسه­ده قولومدا دیشینین یئری قالیر. بئش مامورون ووروب ازمکده­کی یاریشلاری سونا چاتدی. هامیسی نفسدن دوشدو.

ترسه قاندال وورا بیلمه­سه­لرده ، قولومو چکیب دالدا باغلامیشدیلار. قانداللاری ائله چکیب ییغمیشدیلار کی ، اتیمه کئچمیشدی. نئچه آی بیلکلریمده دویونله­نن قانجیمالار (قان لخته سی)قالیردی، سونرالار ایسه یئنی قانداللامالار بو قارا قانجیمالاری تزه­له­ییردی.

منی پیلله­لردن سورویوب گتیردیلر آشاغی. گؤزوم تاتاری آختاریردی. اوشاق ساریلمیشدی حسن عمی­سینین قوجاغینا. اونون اؤزونوده، اوسته­لیک آتاسیندا دؤیموشدولر. اوشاقلاری نورمال حالدا بیر باشقاسی وورسا ، آتالارین سسله­یرلر. آنجاق  تاتارین آتاسیندا دؤیموشدولر. بو دوروم ائله بیر آجی دورومودور کی، تاتار آناسینی او گون گون اورتادان سونرا گؤردوکده، بیرینجی دئیه­جه­یی بئله اولموشدو: "آنا، آداملار منی ویلدیلای، قیچیمی آغلیتدیلال، آتانیدا ویلدیلال.

الی سینان مامور قاش قاباقلا گاه الینه گاه منه باخیردی. او بیر دؤنه­ده منی قاباقجالار قانداللامیشدی. ماراقلیدیر کی او زاماندا اونون قاش قاباغی پئشمان کیمی یئرینن گئدیردی.

1383(2004) –جو ایل، بیزی تبریزدن تهرانا آپاران مامورلارین بیریده ائله بو قاشقاباقلی الی سینان مامورودو. او زامان تهراندان – ائوین زیندانیندان بیر ای سونرا بیزی یئنیدن تبریزه گتیررکن ، یولدا بیزه امر ائتمک ایسته­ییردی و بیز بونلارین قاباغیندا سینمادیغیمیزا گؤره اکبر بی آزاد ایله منی قانداللادیلار. بو مامور او زامان بیزی قانداللاسادا رئیسلری نئچه کیلومتر یول گلدیکدن سونرا قوللاریمیزی آچدی. همین زامان بو مامور تبریزه­جن قاشقاباقلی گلدی. ائله ساندیق کی پئشمان اولوب. آنجاق  سن دئمه ائله بونون همیشه کی ایشی ایمیش.

مامورون الینین سینماسی کومیک گؤرونوردو. منده اویونو اودموشدوم. یامان دیزیمه ووروب گولمه­ییم گلیردی. آنجاق  اللریم دالدا قانداللیدی. مامورون قاش قاباق تؤکمه سی کئچن ایللری آندیردی بیر آن. ائلچین بی حاتمی­نی، رسول بی قهرمانی، اکبر بی آزاد و قارداشیم تایماز. سانکی اونلاردا ائوده­ایمیش. مامورلارین بیرینین سسی منی اؤزومه قایتاردی.

-         "ماهواره ده گوناز تی وی یه باخارسیز؟"

تلوزیون میزینین ایچیندن اویدونو (ماهواره نی) آچان مامورون سوروسونا یالنیز بیر جاواب واریدیر، او آندا:

-         "بس نمنه ، هارا باخاجاییق کی، بلی ائله یالنیز اونا باخاریق"

من اؤزوم بو تئلئویزیونا چوخ آزا‌راق باخانلاردانیدیم. آنجاق بورادا گرک ائله لاپ شیرین شیرین بونو دئییدیم.

ایچیندن یانان مامور دیشین قیساراق دئدی:

-         "آپاراریخ اويدادا باخاسان"

سؤزونو آلای ائدیجی بیچیمده اولسادا من آلدیرمادیم(باش وئرمه­دیم). داها هئچ استرسیم یوخودور.

بدنیمین اورا بوراسی ، باشیم، بوینوم، قابیرقالاریم ازیلسه­ده ، ایچدن چوخ راحاتیدیم. دئدیم:

-         "ماهواره نی نییه آپاریرسیز؟ من یئنه­ده آلاجام، او سیزین ایشیز دئییل. بوش یئره منه ایقتیصادی زیان وورمایین!"

منیم گولرک دئدییم بو سؤزلر قیوریم ساققاللی  جاوان مامورو  بیر داها اوستومه جومدوردو. یومروغونو باشیما دایایاراق دئدی:

-         "یئکه دانیشما ها"

من یئنه آلای ائدیجی (مسخره ائدیجی) گولوشله، اوجا سسله دئدیم:

-         یورولمویوبسوز؟ یئنه وورون!

کؤک آلچاق بوی ائنلی دوداق مامور دئدی:

-         اؤتور اونونکو سونرا بللی اولار. بونلار دیل پهلوانیدیلار.

بو آندا تاتاری قوجاغیندا ساخلایان عموغلوم دا دیللندی:

-         "والله من هئچ ایسراییل فیلیسطین مساله سینده­ده بئله بیر شئی گؤرمه­میشم. سیز بوردا کؤرپه اوشاغی تپیک التینا سالیرسیز"

ساققاللی جاوان مامور خوروز کیمی جومدو حسنه ساری. حسنه بارماغینی اوزاداراق دئدی:

-         "گه قاباغا گؤوم سن کیم سن ؟ تئلفونووودا وئر منه گؤوم ، دییه­سن سنی ده آپاراجییخ"

من حسنین آپاریلماسین، یئرسیز ایلیشمه­سینی ایسته­میردیم، باشیملا ایشاره ائدرک اونون سوسماغینی ایسته­دیم. حسن، ده­ده­مین (بؤیوک بابامین) داییسی نوه­سی ایدی. آنجاق  بیز ائلاتلارین آراسیندا بو ایلگی ائله­ده اوزاق قوهوملوق دییلدی. بیز ائله عموغلو ساییلیردیق. بیزیم طایفانین جاوانلاری چوخونلوقدا آذربایجانین میللی حاقلارینا و میللی حرکتینه اینانیرلار. حسن­ده اونلارین ایچینده لاپ ایلک قبول ائدنلردن اولوب، اؤزونه گؤره ده چالیشمالاری اولموشدور. آنجاق  بورادا آرتیقدان توتولماسینا گرک یوخودو.

ائوین هر یئرینی آختاردیلار. کیتابلیغیمیزدان اللرینه کئچن کیتابی ییغیب تؤکدولر آشاغی. بیر چانتایا باسیب سونرادا مندن ییغدیقلاری لیستین آلتینی ایمضالاماغیمی ایسته­دیلر. سیرادان (عادی) شعیر کیتابلاری ، علمی کیتابلاردان ، اؤزللیکله لاتینجه اولان نه واریدیسا هامیسینی ییغدیلار. سی دی لری، شکیل آلبوملارین، بیلگی سایاری، شکیل کامئراسین، بوزقورد هئیکل لرین و بونلارا بنزر نه واریدی ییغدیلار.

یاشلی مامور قولومون قاندالین آچاراق دئدی:

- آیيی فیکر بئینیوه چاتماسین ها اؤزون زیان ائلييرسن.

من دینمه­دیم. قاباقجالاردا اؤیرنمیشدیم کی لازم دئییل هر نه یه جاواب وئرم.

گئتمک زامانیدی. ائوین هر یانین تؤکوب داغیتمیشدیلار. مامورلارا دئدیم:

-         اطلاعات اداره­سیندنسیز؟

بیری دئدی: هه نئجه مه‌يه؟

-          اوندا پالتار گؤتوره بیلرم؟ چوخ قالمالی اولاجام حتماً"

-          هه آلت پالتاری گؤتوي ، آیری شئی لازیم دئییل.

سسیندن ائله دویولوردو کی سانکی داها حیرصی سویویوب. منیمله دردداشلیق ائدیر!!!

بلکه­ده من داها ایسته­میدیم کؤتک یئیم اونا گؤره ده داها آتماجالی دانیشمیردیم. سونرالار بو حاقدا اؤزومه اصلا ایجازه وئرمیردیم. بیر آندا بئله دوشونموردوم کی آز کؤتک یئییم و یا تئز قورتاریم. آنجاق  ایلک آنلاردا ندنسه ، هردن بو ایستک داورانیشلاریمی ائتکی­له­ییردی.

بیر دست آلت پالتاری گؤتوردوم. سونرادا تاتار و حسنه ساری گئتدیم کی، اونلارلا ساغوللاشیم. بایاقدان مامورلارلا دیک دیک دانیشماغیما باخمایاراق ، تاتارا ساری گئتدیکده کؤورلدیم. گؤزلریم یاشاردی. آغلاماق گوجوره­ییردی سانکی. ایچیمده بوغدوم. آنجاق  یالنیز بیرجه سؤز دئیه بیلدیم

"تاتار!"

بو سؤزجوکله هم تاتاری سسله­دیم، هم حسنی. همده قالان ساغوللاشما سؤزلرین بو کلمه­دده اؤزتله­دیم(خلاصه ائتدیم). تاتارین سوچسوز (معصوم) گؤزلرینه باخانمادیم. حسن آیاق اوستده دورموشدو. اییلدیم تاتارین اوزوندن اؤپدوم. همیشه ائشییه گئتمک ایسته­ینده قوجاغیما آتیلیب "منده گئدیرم" دئین اوشاق آصلا دینمیردی. سانکی هر نه یی بیلیردی. ساده­جه باشین سالمیشدی آشاغا و هئچ نه دئمیردی. اینجه آنجاق  گوجلو اللرین الیمه آلدیم، ال سیخیشماسی اولاراق. سونرادا قالخیب، حسن­له اؤپوشدوم. داها دالی باخمادیم.

آرا قاپینی کئچیب، پیلله لری آشاغی یئنرکن، حسن تاتار یانیندا منه یاخینلاشدی. الینی چیینیمه قویوب ، اوزومه اوزگونجه باخاراق دئدی:

"بی پول یانیندا اولماسا وئریم ها"

دئدیم: یوخ

 سونرا پیچیلتی سوییه سینده بیر سسله دئدیم:

" تئز اوشاقلارا خبر ائت. بیرده دئ کی مندن هئچ جوره نیگران اولماسینلار."

بونو دئمکده ایسته دیم یولداشلاریمیز مؤحکم ایشلرینده اولسونلار و مندن هئچ نه­یین چیخماماسین اینانسینلار.

قاپیدان ائشییه چیخدیقدا ایکی ماشین واریدی. بیریسی بیر پژو 405 ، بیریسیده آرخاسی یوکلوک اولان تویوتا. منی 3 نفر پژو ماشینا میندیردیلر، وساییلی ایسه باشقا ماشینا. کوچه­یه چیخدیقدا بیر یان یؤره­یه باخدیم کیمسه باشا دوشمه­میشدی. یان یؤره ده آزاراق گؤروننلر ایسه اؤز ایشلرینده­ایدیلر. آنجاق  سونرالار قونشولاردان چوخو منه دئدیلر: "او گون بیز بیلمیشدیک، سنه خبر وئرمک ایسته­ییردیک...."

الیمده بیر نایلون توربا ماشینا ساری گئتدیم. بو منیم ایندی ماددی سرمایه­م ساییلیردی. البته اونون دا کنترولو اؤز الیمده اولمایاجاقدیر. میللتیمیزین یئرآلتی و یئر اوستو وارلیقلاری کیمی. طالعی باشقالارینین الینده.

آرابایا مینرکن ، سون دؤنه اولاراق دؤنوب قاپیمیزا باخدیم. تاتار عموغلوملا قاپیدایدی. حسنین قیافه­سیندن یئنیلمیشلیک، یازیقلیق تؤکولوردو. تاتاردا اونون الیندن یاپیشاراق ، منی سوزوردو. مندن اوزاق قالماق ایسته­مه­ین تاتار، ایندی منیم بیلینمز بیر یولجولوغومو ایزله­ییردی. گؤزلرینده بیر کیتاب سؤز واریدیر. سانکی گئرچکدن منی بیر گئدر –گلمز ساواشا گؤندریردی. سانکی دئییردی بو حاقسیزلیغی یئرده قویمارام. او، زورلا آیریلماغی ایلک دؤنه کوبودجاسینا دادیردی. نلر دوشونوردو او آندا تاتار؟ کاش او باخیشلاری اوخویا بیلسه­یدیم. او یالنیز باخیردی. یوردو تالانمیش بیر ایگیدین یوردونا پوزولموش اوباسینا باخدیغی کیمی، بلکه باخیردی. اونون سوچسوز گؤزلری، "منیم آتام سینماز، منیم آتام یئنیلمز" دئییردی. او گؤزلر میللتیمیزین مظلومییتینی، یئنیلمز ایراده­سینی (ایستنجینی) ، سؤنمز اومودونو چاغریشتیریردی (تداعی ائدیردی). او گؤزلر 7 آی 10 گون منیم ایلهام (اسینلنمه) قایناغیم اولدو. او گؤزلره آند ایچدیم "سونونا قدر دیرنه­جم". ان آجی و آغیر آنلاردا او گؤزلر منه باخیردی. من سینمیش و یئنیلمیش حالدا او گؤزلره بیرداها باخانمازدیم. او مندن اوغور ایسته ییردی. او مندن شرفلی بیر یاشام ایسته­ییردی. ائله بیر گوج واریدی کی او گؤزلرده، یالنیز بیرجه آن باخا بیلدیم. بوتون وارلیغیمی سیلکه­له­دی. او سون باخیشلاردان انرژی امه­رک، بوزقورد نیشانی گؤستررک ، اوغلوم تاتاردان آیریلدیم. مامورلار منیم بوزقورد گؤسترمه­می گؤرمزدن گلدیلر. بلکه­ده آرزولادیلار کی "کاش قوللارین باغلایاردیق، کاش گؤزلرین ده، آغزین دا باغلایاردیق! اوندا نه ائده­جه­یدی؟"

صوفییان تبریز یولو

ماشین یوللاندی. 3 مامور منی اؤنجه صوفیانین محکمه­سینه آپاردیلار. آرخادا آردیمجا نیگران قالان بیر کؤرپه، کؤتو خبری آز سونرا دویاجاق بیر عایله و یولداشلار. اؤنومده ایسه بیلینمز بیر ساواش. ایشکنجه، قارانلیق، آیریلیق و ... .

بو آندان بئله آرتیق یالنیز ساواشا دوشونمه­لیدیم. گؤز اؤنومده ایسه ایندیلیک فلش مئموری فیرلانیردی. "اونون ایچینده نه­لر وار؟... نه دئمه­لییم؟ ..." دئیه دوشونوردوم. آرا سیرا مامورلارین آتماجالی سؤزلری بئله ، منی پیلان جیزماغیمدان اوزاقلاتمیردی. اؤنومده نئچه سئچه­نک واریدی. سئچه­نکلر حاقدا و هر بیرینین نه قدر جاواب وئرمه­­سی حاقدا دوشونوردوم:

"دئیه بیلرم هئچ منیم دئییل، اؤزوز منیم وساییلیمین ایچینه قویموسوز! ... اونون ایچینده اولانلاردان اؤزومو تام خبرسیز گؤستره­بیلرم... غخط! من آخی گؤتورولن وساییلا قول چکمیشم، اونلارین ایچینده فلش مئموری­ده واریدی... بو سئچنک منی آرتیق دؤیوامه­یه آپارار... گرک باخام گؤرم ده­یری اولان بیر شئیین اوزه­رینده دیرنم. هرنه­یی دانماق اولماز آخی. گرک ائله مساله­لری دانام کی ده­یری اولا... بونودا دانماق اولار، آنجاق  اونون ایچینده­کیلری بیر تورلو یوزا بیلرم... دئیه بیلرم اونلارین بیر سیراسین اینترنتدن گؤتورموشم، قالانین دا ائلچین ایمئیلیمه گؤندریب، اوردان سئیو ائله­میشم. آخی بئله اولدوغو حالدا دئیه­جکلر او ایمئیلین آدرسین دئ، اوندادا بیر شئی تاپیب دئیرم.... دئیرم من میللتچییم گاموح اؤرگوتونه­ده ماراقلانیرام. گؤروم نه ائدیرلر و بونا اوخشار سؤزلر دئمک اولار... بیرده­کی گرک ائله ائدم کی اونلارین قاباغیندا آشاغی قونومدان دانیشمایام. نه­یی اوزه­ریمه آلسام اوستونده دایاناجام و تسلیم اولمایاجام، هر شئیی ساوونماق لازیمدیر... اونلار منیم اوغلومو گؤزومون قاباغیندا او دوروما سالیبلار. بونلارین قاباغیندا سونوناجان دیرنمک لازیم، اونلار  بئله آلچاق حرکتلرله منی تسلیم ائدنمزلر... هه گرک پولچوکلو سندلری ائلچینه باغلایام، قالانلاری ایسه ساوونام... بیرده گرک کئچمیشده­کی کیمی ائله ائدم کی، اؤرگوتون ایچریده اولماسینی دانام..."

ائلچین حاتمی منیم 13 ایللیک دوستومودو. میللتچیلیک ایللرین بیرگه باشلامیشدیق. خودافرین بؤلگه‌سین‌دن اولان بو یولداشیملا ایلک دؤنه رشت بیلیوردوندا تانیش اولموشدوق، ائله ایلک گؤروشوموزدن آذربایجانلا باغلی دانیشمیشدیق. 10 ایلدن چوخ بیرگه موباریزه ائتمیشدیک بیرگه ایکی دؤنه توتوقلانمیشدیق. عایله­وی گل گئدیمیز واریدی. ایندیده تورکییه یه گئدیب، اورادا سیغینماق ایسته­ییر. بوردا هر نه­یی اونونلا ایلگیده یوزماق اولار. او قاباقجا 1383-جی ایلده بابک قالاسیندا توتولدوغوموز زامان اؤزو توتولموش بایراق‌لاری فداکارجا بوینونا آلمیشدی، آنجاق ایندی اونون فداکارلیغینا گرک یوخودور، اؤزوم چوخ شئیی اونون باشینا ییخابیلردیم.اونونلا سیرداشیدیق. بونو هر کس بیلیردی. بورادا منیم دادیما یاخشی چاتاردی. اونونلا ایلگیمیزین اولماسی نورمالیدی. دانماغا گرک یوخودور. هر نه یی اونون کانالی ایله یوزا بیلردیم.

بو دوشونجه­لر اوره­ییمین دؤیونتوسون چوخالدیردی، آنجاق  سونوندا اؤزومه داها آرتیق گووه­نیردیم. "منیم اونلارین الینده اولان بیریجیک بلگم فلش مئموری­دیر. اونودا یوزا بیلرم. دئمه­لی هئچ ندن نیگران اولمازلار. منیم توتولماغیم اوشاقلارا یئنی­دن اورک وئرر، ایشلمه­یه آرتیق دورتوله­نرلر (انگیزه تاپارلار) ، دوقتور چؤهره قانلی نین آیریلماسین کؤلگه­یه سالار بو مساله و اونون اؤرگوتدن گئتمه­سی تشکیلاتیمیزی پیس دوروما آپارماز..." دئیه، یئنه­ده بئینیمده گزمکده­ایدیم. بو آندا آرتیق صوفیان دادگاهینین ایچینه کئچمیشدیک. دادگاها قدر اوزانان خیابانلاری نئجه کئچدیییمیزی هئچ بیلمه میشدیم. هر شئی سانکی قاباقجادان حاضیریدی. مامورلارین بیری ایله قاضی نین اوتاغینا گیردیک. بیر جاوان ماللایدی. همیشه اولدوغو کیمی قاضی نین اؤنونده موتهم اوچون اوتوروق واریدی. بیرینده اوتوردوم، یاشلی ماموردا منیم ساغ یاینیمدا دووارین دیبینده کی اوتوروقدا اوتوردو. قاضی گاه منه گاهدا اؤنونده­کی کاغیذا باخاراق منیم ندن توتوقلانماغیمی آچیقلاییردی. دانیشیغیندان بللی اولدو کی تبریز محکمه سیندن گؤروله­نیب بو ایشه. دئمه­لی من تبریزه آپاریلاجام. بو بللی­ایدی، آنجاق  بیر شئی یاخشی ایدی کی اطلاعات قانونی پروسئسی (سوره­جی) کئچیرمک فیکرینده­ایدیر. بو منیم اوچون توختاخ ساییلیردی. دئمه­لی منی ایت- بات ائدنمزلر. بیرده­کی لاپ بو قانونی سوره­جی کئچیرمه­سه­یدیلرده  من میللی حرکتده اوقدر تانینمیشیدیم کی ایت بات ائلمک اولاناقسیزیدی.

ایتهاملاری سیرالادیقدا بللی اولدوکی، قانونسوز (غیری قانونی) پان تورکیست تشکیلاتلارا اویه اولماقدا اونلارین ایچینده­دیر. بو منیم اوچون یاخشی بیر بلیرتگه (نیشان) دئییلدی. بو مساله گؤستریردی کی اونلار بیلیرلر کیمی توتوبلار. آنجاق  من اؤزومه آلدیرمادیم. قاضی نین آچیقلانماسیندان همن سونرا باشلادیم دانیشماغا:

"جناب قاضی من آذربایجانچی­یام میللتیمی سئویرم، ایندیکی دورومدا بیزه ایران ایچینده آیری­سئچکیلیک اولور، فارس منطقه­لرینه گؤره بیزیم طرفیمیزه از سرمایه آیریلیر، ایشسیزلیک فارس منطقه لریندن قات قات  چوخدور، اؤز آنادیلیمیزده تحصیل ایمکانیمیز یوخدور... بیلیرسیز کی آنادیلینده اؤیرنیم هر اینسانین حاققی دیر. بونو ایندی بوتون دونیا قبول ائدیر، ایرانین دا عضو اولدوغو یونسکو سازمانینین علمی آراشدیرمالاریدا گؤستریر کی، انسان اؤز آنا دیلینده، آیری دیلدن داها یاخشی اؤیره­نیر...

منیم همیشه اولدوغو کیمی سسیمین تونو اوجایدی، دانیشیقدادا چالیشمیردیم قاضی نی نظرده آلام، بیر عادی انسان و یا میللتچی­یه دانیشاندا ایشلتدییم کلمه لری (سؤزجوکلری) ایشله­دیردیم، اؤزوده سانکی بیر نوطق ائدیرم (سؤیله­و یاپیرام). مامور بو آرادا یالنیز منی سئیر ائدیردی. اؤز اؤزونه نه­لر دوشونمه­سی بللی اولماسادا، هم منیم بئله دانیشیغیما شاشیرمیشدی (تعجوب ائتمیشدی) همده محکمه نین تئز بیتمه­سینی ایسته­ییردی.  بلکه­ده اؤز اؤزونه دئییردی: تئز اول قورتار، سنی اونسوزدا آپاراجاییق..."

جاوان قاضی اؤزونو دوغوردان بیر قاضی کیمی گؤسترمک ایسته­ییردی، سانکی بونون الینده بیر یئتکی (صلاحیت) وار:

"منده ائله اؤز هوییتیمی ساخلاماغا علاقمندم، آما هر شئیین یولو وار، گؤروسن کی ایندی رئیس جمهوروموز ایکی واحید تورکو اوخوماغی دانیشگاهلاردا آزاد ائله­دی..."

من آرا وئرمه­دن اونون هر دئدییینه کسگین جاوابلار وئریردیم. بیلیردیم اونون الینده بیر ایش یوخ، آنجاق  "ائله لاپ بورادان باشلامالییام، اؤزومو ساووناجام، اینانجلاریمی تام ساووناجام، هئچ بیر ایتهامی قبول ائتمه­یه­جم و هئچ نه­یی بوینوما آلمایاجام، چالیشاجام دانیشیغی باشقا یئرلره یؤنلدم، گرک مظلوم قوزو کیمی بوینومو چیینیمه قویمایام، من روحیه­می قورومالییام، نئجه اولورسا..." دئیه دوشونوردوم.

دئدیم: "بیزیم حاققیمیز ایکی واحید درس دئییل، اگر عدالت وارسا گرک فارس دیلینه آیریلان بودجه بیزیم­ده دیلیمیزه آیریلسین، اگر فارس دیلینین اوخونماسی اجباری­دیرسه گرک بیزیمکیده اجباری اولسون، اگر فارس دیلی اؤلکه­نین رسمی دیلیدیرسه گرک بیزیمکی ده رسمی دیل اولسون..."

قاضی بئله منطیقلرین قارشیسیندا دانیشیق قونوسون دییشیردی:

"مساله بودو کی، سیزین ساده­لیییزدن دوشمنلر استفاده ائلییر..."

یئنه سؤزونو کسرک دئدیم:

"آغای قاضی! دوشمنلر بیزیم ساده­لیییمیزدن یوخ حاکمییتین داورانیشلاریندان سوءاستفاده ائدیرلر. بیزیم حرکتیمیز تام میللت حرکتیدیر و ایندییه­کی هئچ بیر داخیلی و خاریجی عامیل اونو اؤز یولوندان آییرانماییب. هئچ جوره بیزی تحریک ائدیب، ایسته­مه­دیییمیز مئیدانا سالانمادیلار..."

قاضی سؤزون سونونو بیر آچیقلاما ایله بیتیردی:

"سیزین قیئری قانونی تشکیلاتا عضوییتیز اوچون تبریز طرفیندن حؤکمِ بازداشتیز وار، من ایندی بونا وثیقه یازانمارام، گئدین تبریزه اوردا امنیتی مسئوللارین تحقیقیندن سورا، مصلحت اولسا وثیقه اینن بوراخاللار"

محکمه­دن سونرا مامورلار منی تبریزه ساری آپاردیلار. صوفیانلا تبریز آراسی 30 کیلومئتره یاخیندی. بیلینمیردی بو یولو بیرده هاچان گئری دؤنه­جم. یول بویو دیندیرمه­نی (بازجویی نی) وئریله­جک حؤکمو، اؤرگوتون گلجه­یی، آنامی، سونانی و تاتاری دوشونوردوم. آرا سیرا مامورلارین سورولارینا دا جاواب وئرمه­لی اولوردوم، آنجاق  چالیشیردیم بو جاوابلامالار قیسسا اولسون. دیندیرمه یئتیرجک باشلایا بیلردی. اونا گؤره­ده سؤزلریمی دوزنه سالمالیدیم. "اونلار منی نییه توتوبلار؟" دئیه بیر سورغو بئینیمدن بئله کئچمیردی. منی دوشوندورن یالنیز نئجه داوراناجاغیمیدی. "نه ائتمه­لی­یم کی هم اؤزومو قورویام، هم یولداشلاریمی اوزه چیخارمایام، همده اونلارین قارشیسیندا سینمایام، حرکته آزاجیقدا اولسون بئله زیان دیمه­سین... گرک هئچ بیر یاپدیغیم و یاپمادیغیم ایشین آلتینا گیرمه­یم، اؤرگوته باغلی اولدوغومو منطیقلر گتیررک دانام، گرک هئچ کیمسه حاقدا اونلارا ده­یرلی ساییلان بیلگی وئرمه­یم، گرک آجیقلانمایام- حیرصلنمه­یم، گرک تحریک اولمایام... ان اؤنملیسی گرک ائشییه چیخماغا و آزاد اولماغا دوشونمه­یم. " ماشیندا گؤزلریم ائشییه باخیردی، قیراقدان باخان بیریسی اولسایدی، ائله حساب ائدردی کی من داریخیرام و یا سون دؤنه اولاراق آزاد دونیانی گؤرمک ایسته­ییرم، سونرادا منی قینایاردی کی، آخی هانسی آزاد دونیا؟!! آنجاق  او گوندن او یاریم ساعاتلیق یولدان سونرالار هئچ نه یادیمدا قالمامیشدی. منی آپاران دوشونجه­لریدی، مامورلار ایسه منی دوشونجه­لریمه گؤره آپاریردیلار.

آنا تبریزه گیرمکده­ایدیک ، کوچه­لرده دولاشان اینسانلارا باخیردیم. هر کس ایشینده­ایدیر. بئله حاللاردا "من کیمه گؤره موباریزه ائدیرم ؟" سورقوسو هر کسین باشینین اوستونده فیرلانابیلر. آنجاق  من ایللر اؤنجه بو سورغونو یانیتلامیشدیم. من آزاد و شرفلی یاشامی ، دینج آما بویوندوروق آلتیندا سورونمه­یه اوستون بیلیردیم. بو سورغویا یئنی­دن جاواب آختارماغا گرک یوخودور. بو دؤنه منی ائودن آپاریردیلار و بو بیرآزجا اؤزو ایله استرس گتیرمیشدی. آناما، تاتارا، سئوگیلیمه و یولداشلاریما دوشونوردوم. اونلارا سون دؤنه اولاراق اؤز ایچیمده دانیشیردیم. دریندن نفس آلاراق اونلارا سؤز وئریردیم. وحشیجه داورانان مامورلارا اولان نیفرتیم ، منی اؤزلم دولو دویغولاردان بیر آنلیغا ساواش آلانینا آپاریردی...

مامورلارین بیرینین سسی منی بیرداها اؤزومدن چیخارتدی:

-         چشمبندی (گؤزباغین) وور گؤزووه، باشینی سال آشاغا!"

بو دوروم منه تانیشیدی، بیز بئله­لیکله تبریز حافظ خیابانینین اطلاعات اولان کوچه­سینه گیریردیک. 1381-جی ایلده بیزی تبریز دوستاغیندان بورا گتیرنده، چوخ چالیشمیشدیم آدرسی اؤیرنم، نئچه دؤنه ساوولماغی، نئچه دیقه ماشینین یئریمه­سینی بئله او زامان یادیمدا ساخلاماق ایسته­ییردیم. آنجاق  بو دؤنه داها هئچ گرک دویموردوم. بیز تام سیاسی و مدنی بیر ساواش یوروتمکده­ایدیک. منیم اوچون هئچ­نه­یین تزه­لییی یوخودو. مامورلار، اونلارین حرکتلری، سؤزلری و بئله اویونبازلیقلارین هئچ بیری اورکودوجو دئییلدی. دئمک اولار بو دورومدان باشلایاراق دیش دونیاسیندان باغلانتیم کسیلمیشدی. یئنی بیر مئیدانا گیریردیم سانکی. دیشاریدا هرنه­ایله ویداعلاشمیشدیم. بورادا نه­قدر قالاجاغیم تام بلیرسیزیدی. اونا گؤره دیشارینی دوشونمکدنسه ، بورانی نئجه سورمک اؤنملیدی.

ماشین دایاندی، سانکی اورادا اولان زیندانبانلار منی گؤزله­ییرمیشلر. من هله باشیمی قالدیرمادان قاپینی آچدیلار. بیریسینین سسی ایله بیلدیم کی ماشیندان یئنمه­لییم. یئندیم یئره. زیندانبانلارین بیری یانیما کئچیب قولومدان یاپیشدی. سسیندن قوجا کیشی­ایدی. بو سس منه تانیشیدی:

-         "یاالله دوز یئری!"

گؤزباغی گؤزومده­ایدیر، آنجاق  آیاغیمین قاباغینی گؤره بیلیردیم. زیندانبانین سسی ایله هایانا گئده­جه­ییم بللی اولوردو:

-         "پیلله­دیر، گؤزله!"

پیلله­نی ائندیم آشاغی. سالونا بنزر اوتاقدان یاواش یاواش ساوولوردوق. قاشلاریملا آزاجیق قاوزادیغیم گؤزباغینین آلتیندان چئوره­نی سوزدوم.اوزه­رینده کامپیوتر اولان بیر نئچه میز ، بیر نئچه دمیر کمد. بیر بیرینین یانینا دوزولموش بیلگی­سایارلار باخیشیمی اؤزونه چکدی. بونلارین چوخون توتولانلارین ائویندن گتیرمیشدیلر. اوزرلرینده یازیلان آدلار بونو گؤستریردی. بیزیمده بیلگی­سایار یقین اوردایدی. آنجاق  گؤره­نمه­دیم. حاجی سسله­دیییمیز قوجا زیندانبان ائله چکیردی کی، آرتیق بیر شئی گؤرمک اولموردو. گؤزو باغلی ایکن یئریمک و چئوره­ده باشقا مامورلارین ایزلمه­سین دویماق ماراقلی­ایدی. بیر اسیر کیمی اؤزومو دویوردوم. قولوباغلانمیش، ایللرله قاچاق اولان بیر ساواشچی کیمی. اولو بابکین فیلمی یادیما دوشدو. اوردا کی، اونو قولو باغلی خلیفه­نین یانینا گتیریرلر. قهرمان اسیر دوشسه­ده ، هله ساواش بیتمه­ییب. بو ساواشی هم اؤزو، همده یولداشلاری سورمه­لیدیرلر.

قاباغیمی دوزگون گؤرنمه­دیییمه گؤره، یئریشیم دولاشیردی. آددیملاریمی تئز تئز گؤتورنمیردیم. بیردن بیره کور اولاراق دونیایا باخماق چوخ چتیندیر. ایسته­مدن، بیلینمز یولو ساقینجاایله(احتیاطلا) گئدیردیم. دئمک اولار گؤز باغین باغلادیغیم آندان، قارانلیق بیر یولا آیاق قویموشدوم. هر آن چوخ قورخونج و بیلینمز بیر اولای باش وئره­بیلردی. گلجه­یی گؤرنمه­مک بورادا تام اؤز آنلامین تاپیردی. دوغوردان گلجک قارانلیغیدی. داها هئچ نه­یه دوشونموردوم، یالنیز نئجه آددیم آتماغیمی دوشونوردوم.

حاجی­نین سسی ایله بیر پیلله یوخاری چیخدیم. سالونا اوخشار اوتاقدان ساغا دؤنه­رک، بیر دار یولاغا کئچدیک. باشیمی آزاجیق قاوزادیم. بورا تام تانیشیدی. دیندیرمه اوتاقلاری سالونون سول یانیندا یان یانا دوزولموشدو. بیرینجی اوتاغی کئچدیک، ایکینجی اوتاغا چاتاندا ، حاجی­نین ایته­لمه­سی ایله سولا دؤنمه­لی اولدوم:

-         "کئچ ایچری"

چیراغی یاندیردی. بیر مئتیر یاریم ائنی، ایکی متیر بویو اولان داریسقال بیر اوتاق . بو اوتاق منه تانیشییدی. سانکی هئچ نه دییشمه­میشدی. اوتاغی باشا باش موکتله سوواموشدولار. هم تابانی، همده بوتون دووارلاری موکتلییدی. اوتاغین ایچینده ایکی اوتوروق واریدی. اوتوروقلار ایکیسی­ده دووارا ساری باخیردی. من یئریمی بیلیردیم، کئچیب دووارا یاخین اولان اوتوروقدا اوتوردوم. آرخامداکی اوتوروقدا ایسه، بیلدیییم قدر دیندیرمن (بازجو) اوتوراجاقدی. زیندانبان منی اوتورتدوقدان سونرا، قاپینی قاپاییب، گئتدی. ماراقلا بیرآزجا گولومسه­یرک دووارلارا باخدیم. اوتوروغون اوزه­رینده یازیلمیش سؤزلره، قاباقجا توتولانلارین الله دان یاردیم ایستمه کیمی یازیلارینا، هر یانا بیر گؤز گزدیردیم. سونرادا دؤندوم دووارا ساری. دؤنوب دووارا باخماق، ایکی آددیم گؤتوروب قاپینین آلتینداکی جیریقدان ائشییه گؤز گزدیرمک، اینسانا سانکی جسارت وئریر. بیر اوشاق اویونونادا اوخشاییر. مدرسه (اوخول) زامانی شولوقلوغو اوزه­ریندن آنبارا سالینان اوشاقلارین چیخیش یولو آختارماسین چاغریشدیریردی(تداعی ائدیردی). دجللیک ائدیرسن، همده دانلاما (تنبیه) اوداسیندا یئنیدن دجللیک یاپاراق، بیر یئنی اویون چیخارماق ایسته­ییرسن سانکی. دووارین اوزه­رینده ده یازیلار یازیلمیشدی. سالون هله سس­سیزیدی. مامورلارین پیچاپیچین بئله ائشیتمک اولوردو. اوزومه باغلانان بو قاپی، هله­ده زیندان یئری وئرمیردی. هله اویونا اوخشاییردی. اؤز اؤزومه نئجه داوراناجاغیملا باغلی قرار وئریردیم. باشیمی دیک توتاراق اؤز اؤزومه دئییردیم:

" گرک بیر آددیم­دا گئری گؤتورمه­یم. اصلا تسلیم اولمام. هئچ جوره ایش­بیرلیک فیکرینی، اونلاری آلدادیم دئیه قبول ائتمه­یه­جم. سونونادک میللی حرکتیمیزی ساووناجام. تعهد فیلان وئرمه­یه­جم. ائشییه چیخماغا تلسمه­یه­جم..."

بونلاری دوشونرک، اوتاغین ایچینده اویان بویانا گئدرک، سانکی نوطق ائدیردیم. یومراغیمی هردن دویونله­ییر، هردنده گؤستری بارماغیملا بیر یئری گؤستره­رک دانیشیردیم. آراداکی بؤیوک ائنلی سالونلا، دیندیرمه اوتاقلارینین سالونو آراسیندا ایکی قاپی واریدی. گل-گئت اولان زامان قاپیلارین آچیلیب اؤرتولمه سسینی دویماق اولوردو. زیندانبان و مامورلارین ایاق سسلرین بئله ائشیتمک اولوردو. بو آندا دیندیرمه سالونونا گیرمکده اولان آیاق سسلرین دویدوقدا ، تدز یئریمده اوتوردوم. زیندانبانیدی، آنجاق  قاباقکسی قوجا زیندانبان یوخ، بیرآز جاوان گؤرونن اللی یاش جیواریندا گؤزلوک وورموش کؤک-قارنی یوغون بیریسییدی. بیر کاغیذ قاباغیما قویدو، سونرادا بیرآز ادا ایله دئدی:

-         "پهلوان ! موشخصاتویاز، وساییللریویده بورادا لیست ائله! سونرادا پالتاریوی دییش"

زیندان پالتاری دئییلن، اوزه­رینده ترازی شکیلی اولان اؤزل قوخولو پالتارلاری صندلین دایاناجاق یئرینه آتدی. داورانیشجا ارکه وین اوشاقلارا اوخشایان بو زیندانبان، سانکی چوخ اؤنملی بیر ایش گؤرورجه، دیققتله هر شئیی یوخلاییردی. یازیلاریمی اوخویاراق دئدی:

-         "ائودن گؤتورولن وساییلی یوخ، بورادا وئردیین وساییلی یاز، نه ایش گؤروبسن؟"

بایاقدان قالمیشدیم فلش مئمورینین قایدینا. لیستین ایچینده اونو یازمامیشدیم. جیبیمده­کی پولومو، باشماقلاریمی، اوست گئییمیمی چیخاریب بیر توربایا ییغدیم. قوخولو زیندان پالتارلارین تاخدیم اینیمه. آرتیق دونیا مالیندان اینیمده اولان گئییمیمی بئله ایتیرمیشدیم. قالیردی اوره­ییمده سئوگیم، اینانجلاریم و بئینیمده اولان فیکیرلریم، هابئله ایطلاعات قووه­لرینین بیلمک ایسته­دییی بیلگیلر. اونلار اصلینده بونلاری مندن آلماق ایسته­ییردیلر. اوره­ییمده اولان سئوگی و اینانجلاریمی مندن آلسایدیلار، دئمک اولار بئینیمده­کیلریده آلاجاقدیلار.

من بونو قاباقجا اؤیرنمیشدیم. توتولمادان اؤنجه ایطلاعات ساخلوولاریندا(بازداشتلاریندا) اینسانلارین سینماق ندنلری حاقدا بیر یازی یازماق ایسته­ییردیم. ایندی ایسه دوشوندوکلریمی اؤزوم یاشامالی اولاجاقدیم. بیر میللتچینی نئجه اؤز یولوندان دؤندرمک اولار؟ بیر انسانین اوره­ییندکی درین اینانج و سئوگینی نئجه اوندان آلماق اولار؟ ندنسه آرا-سیرا واخت بولدوقدا بونلارادا دوشونوردوم. زیندانبانین وئردیی کاغاذی دولدوردوم. آدیم، سوی آدیم، آتامین آدی، توتولماغیمین ندنی، قاباقجالاردا توتولوب توتولماماغیم، یاشیم، خسته­لیییمین اولوب اولماماسی، عایله دوروموم و بونلارا بنزر وئریلرله دولدوردوم کاغاذی. توتولماق سابیقمه گلدیکده، 4 دؤنه توتولسامدا یالنیز ایکیسین یازدیم. بونلارین بیرینده منی ائوین دوستاغیناجان آپارمیشدیلار، آنجاق  آدیمی دییشیک دئدیییمه گؤره منی تانیمامیشدیلار. من او زامان – دئمکده 1385-جی ایل خورداد اولایلاریندا (مای اولایلاری) تهراندا توتوقلانمیشدیم. ایران ایلامی مجلیسینین اؤنونده توتولدوقدان سونرا، بیزی تهران آگاهی ایداره­سینین مرکزی بؤلمه­سینه آپاردیلار، او زامان. ایچری گیردیکدن باشلایاراق تام سون آنا قدر آدیمی دییشیک دئدیم و اوزه­رینده دایاندیم. اؤز یانیمدا بئله دوشونموشدوم کی، بونلارین اساس آداملاری ایندی آذربایجاندادیلار. قالان مامورلارین منی تانیما احتمالین آز دوشونوردوم؛ بیر یانداندا بیلیردیم بونلارین سیستئملری دئییلن قدر گوجلو دییل. 95 نفر توتوقلانان واریدی. 20-30 نفری بیر ماشینا دولدوروب، ائوین دوستاغینا آپاردیلار. او زامان قاباقکی دؤنه توتولماغیمدان فرقلی اولاراق، توتولانلاری تک آداملیق اوتاقلاردا یوخ ، 3 نفری بیر اوتاغا وئریردیلر. اوتاقداشلاریما دئمیشدیم آدیمی دییشیک وئرمیشم. هر نه­یی گؤز اؤنونه آلمیشدیم. دئییردیم بیردن بیلسه­لر، دئیه­رم "قورخومدان دییشیک وئرمیشم". آنجاق  منیم اؤنگؤزوم دوز چیخدی. گئجه دیندیرمه­یه آپاریلیرکن اؤزومو لاپ ساوادسیز بیر ایشچی کیمی آپاردیم. سورغولارین آراسیندا یاتیردیم. داها دوغروسو اؤزومو یوخولوغا ووروردوم. سانکی منی ائله تصادوفی توتوبلار. سانکی یانیلیبلار. سورولارین جاوابین یازدیقدا ، خطتیم و قوردوغوم جومله­لر تام ساوادسیز اولدوغومو گؤستریردی. او گئجه ساعاتلارجا سورن یوروجو دیندیرمدن سونرا، هر آن اوره­ییمدن کئچیردی، ایندیجه قاباقکی دؤنه­کی شکیللریمی گتیریب قاباغیما قویاجاقلار و اونون اوچون بیر یاخشی کؤتک یئیه­جم. آنجاق  ائله اولمادی. گئجه­نی بیر تهر یاتدیق، سحری گون، ناهاراجان 60 نفری بوراخدیلار. منده درده دیمزلر ایچینده­­ایدیم. بو اولایی سونرالار میللتچی یولداشلاریما تعریفله­سمده  ایطلاعات مامورلاری ندنسه هئچ واخت اوزومه گتیرمه­دیلر.

ایطلاعات سللولاریندا کئچمیشی و گلجه­یی یاشاماق، ایندیکی دوروما دوشونمکدن داها یئی گلیر. تاپدیغیم هر گیره­وه­ده یا کئچمیش آنیلاردا گزیردیم، یادا گلجه­یی دوشلریمده (خیاللاریمدا) قوروردوم. اوتوروقدا اوتورورکن دایاناجاغینین اوزرینده یازیلان قیسسا سؤزلره گؤزوم باخسادا، فیکریم اوزاقلاردایدی. من اینانیردیم کی گوونلیک مامورلارینین اوسته­سیندن گله­بیلرم. اونلارین الینده قامچی (شاللاق) ، باتوم (ده­یه­نک)، قاندال (دستبند)، گؤز یاشاردان گاز، شوک آپاراتی و ... اولسادا، منیم سئوگی و اینانجیمین قارشیسیندا ساییلمازدیلار. اونا گؤره، آرخایینیدیم کی اوداجام. اؤزللیکده دوزگون دؤیولدوکدن سونرا، داها ایجازه وئرمزدیم اونلار یوموشاقجا منیمله داورانیب، ایسته­مه­دیییم مئیدانا آپارسینلار منی. من مامورلارلا سیییق سیییق دانیشماقدانسا، اونلارلا دیدیشمه­یی سئویردیم. ایندی ایسه اونا یاخشی یاتاق ساغلانمیشدی. اونلار منیم گؤزومون اؤنونده 2 یاشلی اوغلومو او گونه قویموشدولار. داها تسلیمییته هئچ یئر یوخودو. یوموشانماق و اویون اویناماغا دیمزدی. گؤزلوکلو زیندانبان قاپینی آچیب دئدی:

-         "چشمبندیوی وور گل"

دیک دوردوم آیاغا. اوره­ییمین دؤیونتوسو بیرآن چوخالدی. دریندن نفس آلاراث گؤز باغین ووروب، یئریدیم.

یئنه­ده قولومدان یاپیشاراق دالینجا چکدی، دیندیمه یادا یاتاق اوداسینا آپاریردی. بلیرسیزلیک (ایبهام) ایطلاعات اوتاقلارینین دییشمز قایداسیدی. بونو ایلک باشدان دئنمک اولور. یاشام باشاباش بلیرسیزلیک اولسادا، بورادا استرسین چوخ اولدوغونا گؤره اونو داها آیدین دادماق اولور.

زیندانبان بیر پیلله ائندیردیکدن سونرا ساغ الده بیر اوتاغا آپاردی منی. بیر بؤیوک قیرمیزی پرده واریدی و بیر شکیل کامئراسی. گؤزباغین چیخارتدیم. قاباقدان و یانلاردان شکیلیمی چکدی. سونرادا بارماقلاریمدان ایز گؤتوردولر. عؤمرونده توتوقلانمایان بیریسینه بارماق ایزی آلماق اؤزو بیر قورخولو آشامادیر (مرحله­دیر). ایران کیمی اؤلکه­ده ، سابیقن اولدوسا –بارماق ایزین اولورسا- دئمه­لی داها ایش تاپماق کیمی ایجتماعی مساله­لرده ده­ده­ن یاندی! آنجاق  منیم بارماق ایزیم 9 ایل اؤنجه­دن هئی آلینماقدایدیر. دئولت ایشینینده چوخدان داشین آتمیشدیم. بئله ایشلری اؤزومه باداق (آیاقدان توتان) کیمی ساییردیم.

حاکمیت هر آن ، کئچینه­جه­یین ساییلان ایشی، هدله­مه قایناغی- ضعف نوقطه­سی کیمی قوللانیر ایراندا. گؤره­سن منی نه ایله هده­له­یه­جکدیلر! آتا-آنام، سونام، تاتاریم، باجی قارداشلاریم و ... بونلارین هر بیرینی گتیرمکله منه باسقی وئره­بیلردیلر. آنجاق  من بوتون بونلاری گؤز اؤنونه آلمیشدیم. هر کسین اؤزونه گؤره سئودیکلری – عایله­سی وار. اوندا بس کیم موباریزه ائدجک. اصلینده ائله سئودیکلریمیز اوچون بو موباریزه­نی سورمه­لیییک.

زیندانبان یئنی­دن دیندیرمه اوتاغینا گتیردی منی. آزجا گؤزله­دیم، سونرا یئنی­دن قاپینی آچدی و ناهار گتیردی. بیرایشلیک (یکبار مصرف) قابدا دوسو و اوزرینده قیما خوروشتویدو. قاشیغی الیمده قالدیقدا الیمین چوخ اینجه تیتره­مه­سینی دویوردوم. بو تیتره­مه بیر ساعات اؤنجه یئدیییم تپیک و یومراقلارین تیتره­مه­سیدی. اصلا آجلیغیم یوخودو. بوینوم و انگیم ائله آغریییردی کی، ائوده اولسایدم بلکه نئچه گون یئمک یئینمزدیم. آنجاق  بوردا یئمه­لیدیم. "گرک قویمویام بدنیم ضعیف­له­یه. نه وئرسه­لر نه قدر اولسا یئمه­لییم" دئیه دوشوندوم و یئمه­یه باشلادیم. یئمک دئمه، عذاب دئه. بیر قاشیق دویونو اودونجا، جانیم چیخیردی. اصلا چئینمک ایمکانیم یوخودور. آغزیمی بئله، آچانمیردیم. آز آز قاشیقدا گؤتوروب، چئینمه­دن اودوردوم. یانسماا قویولان بیر لیوان سو اولماسایدی، هئچ نه یئینمزدیم. آنجاق  بیلمیردیم بوردان بئله­کی گونلریم بوندان یاخشی اولاجاق یوخسا داهادا پیس؟ اوناگؤره ایمکان وارکن اؤزومو قورومالیدیم.

یئمک بیتدی. اوغورلو بیر ساواشدیر سانکی. همن سونرا زیندانبان گلیب منی آپاردی. ایکی قاپینی کئچدیکدن سونرا، تئز ساغ الیمده اولان قاپییا ساری ایته­له­دی. یئکه بیر اوتاغیدی. بیر ماسا و قاباغیندا دووار دیبینده بیر اوتوروق. ماسانین قاپییا ساری اولان یانیندا دا نئچه اوتوروق واریدی. بوراسی کسین دیندیرمه اوتاغیدی. آنجاق  قاباقجا بورانی گؤرمه میشیدیم. آرا سالونلا دووار بیریدی بو اوتاق. سالوندا دانیشانلاری ائشیتمک اولوردو. گئتدیم اوتوروقدا اوتوردوم. دریندن بیر نفس آلدیم. ایندیجه گلجکدیلر. دیرسه­ییمی اوتوروغون دایانتجاغینا دایاییب، الیمی چنمه­مه دایایاراق، حریف و یا حریفلری گؤزله­دیم.  قاپی آچیق اولدوغونا دؤنوب آرخاما باخانمیردیم. 15-10 دیقه چکئی. آیاق سسلری قاچیدان ایچری گیردی. نفس سسلری ایله آیاق سسلری بیر بیرینه قاریشدی. بیر آندا 7-6 نفرین آرخامدا اولدوغونو دویدوم."وای ده­ده نه خبردی؟" بونلار نه توتدوقلارین دوشونورلر؟ بوتون گوجلری ایله توکولوب گلیبلر کی منه قاچماق یئری قویماسینلار" . آرخادا پیچیلداشدیلار. منیم اوره­ییمین دؤیونتوسو سورعتله چوخالماقدایدی. بو گؤزلمک و بلیرسیزلیک چوخ استرسلیدی. تاق، تاق تاق، ... سسی ایله دیندیرمنلرین بیری منه یاخینلاشدی. اوزوم دووارا ساری و گؤزلریم باغلیدی. آنجاق  دویا بیلیردیم چوخ یاخین اولدوغونو. سول یانیمدا، آزجا داللیق دایاندی. اؤزومو بیر نئچه یوموروق و تپییه حاضیرلادیم. بیر آندا سسلندی:

"خوب آآیئ مهرعلی بیگلو! حالین یاخجیدیر؟"

-          یاخشییام

بیر آه چکدیم، نفسیمی بوشالتدیم. دوداقلاریمی آزجا بیر بیرینه سیخاراق، دیشلریمی قیساراق باشیمی دیکله­دیم. ایکینجی سورونو، ایچیمده بازجویا گولرک گؤزله­دیم. بو منیم نئچه ایللیک اؤیرندیییم تکنیکدیر. من همیشه اؤز یانیمدا بازجولارا گولردیم. اونلارین منیمله داورانیشلارینین هانسی هدف داشیدیغین بیلدیییمه گؤره ، اویون اوینامالاری گولونجویدو و منده اؤز یانیمدا اونلارا گولمه­ییمله اؤزومه گوونج وئریردیم.

بازجو (دیندیرمن):

-          "سواللاریما دقیق جاواب وئریسن ، دیققت ائله ها، بولار سنه بیر تست کیمی­دی، صداقتیوی ایمتحان ائله ماغ اوچون"

اؤز یانیمدا دئدیم "گؤر آلداتماییبسان!؟"

بازجو: آدین؟

-          بیلیرسیزدا!

بازجونون سسی یاواش یاواش تانیش گلیردی، آنجاق  هله تام بیلمه­میشدیم، کیم اولدوغون

-          بیز هر شئیی بیلیروخ ، سن سعی ائله دوز دییه­سن.

آدیمی دئدیم: "آیت مهرعلی بیگلو"

بازجو آرا وئرمه­دن دئدی:"آدیوی کامیل دئ."

منیم سیجیللی­ده آدیم آیت الله" دیر. آدیمی کامیل دئمکدن لاپ اوشاقلیقدان اوتاناردیم. آنجاق  بونلار ندنسه اونو کامیل ایسته­ییردیلر. بیرداها کامیل آدیمی دئدیم. سونرادا آتامین، آنامین، قارداشلاریم و باجیلاریمین آدین، نه ایش گؤردوکلرینده سوروشدو. بونلاری آرا وئرمه­دن دئییردیم. سونرالار باشا دوشدوم کی، اونلار بو ساده سورولارین آراسیندا ایسته­دیکلری بیر سیرا سورولارا جاواب آختاریرلار. بو چوخ ساده بیر تکنیک اولسادا، دیندیرمه­نین ایلک آنلاریندا هیجان قویمور آنلاماغا. عمواوغلانلاریم،  بی بی اوغلانلاریم، دایی اوغلانلاریم و خالا اوغلانلاریمی ، ایشلری ایله بیرگه سوروشدو. کوره­کنیمیز، داییم اوغلو ائلشنه گلدیکده ، اونون ایشینی بیلرکدن یالنیش دئدیم.اونا گوره کی ایسته میردیم، اونون ایش یولداشلارینین دا آدی اورتایا گلسین، یئرسیز اونلارا باش آغریسی یارانسین. ائله بودا بیر گیره­وه اولدو بازجونون مئیدان اوخوماسینا:

-          "سواللارا دوز جاواب وئر ، خاطالاری بیر بیر یازیرام"

بئله لیکله ایسته ییردی "هر نه یی بیلیریک، یالان دئینمزسن" ، دئسین. آنجاق  بو تصادفی بیر سونوجودو. اونلار باشقا شئی ایسته­ییرمیشلر. داییم اوغلانلارینین ایچینده مورتاضا جعفرپورو دئینده، بیر آن دایاندی. حرکتیندن و پیچیلتی سسیندن همکارلاریله اشاره ایله دانیشدیغین دویدوم. مورتاضانین تورکجه آدی ائلچین دیر. او رشت بیلیم یوردوندا اؤیرنجیدی. اورادا واختی ایله منیم گیریشیمله آچدیغیمیز "قوپوز" درگیسینین ، اونلار داوامچیلاریدیلار. اونون میللتچی اولدوغون کسین بیلیردیلر. آنجاق  ایسته­میردیم اونون اوزه­رینده اؤزل پیلانیمیزیدا بیلسینلر. بیز گنج قووه­لری اؤرگوتون بیرینجی دایره­لرینه یئرلشدیرمک ایسته­ییردیک، ائلچین­ده اونلاردان بیریدی. بو حاقدا اینترنتده اولان ایلیشکی سیستئمیمیزده دومان بی (سجاد رادمهر) آچیقلاما وئرمیشدی. آدای ائتدیییمیز شخصلر حاقدا بیرر بیرر یازمیشدی. ائلچین حاقدا دوغرو دوزگون تعریفله­دیکدن سونرا، اونون هله چوخ جاوان اولدوغونو دئمیشدی و یازمیشدی کی هله­لیک اونون اوچون تئزدیر. شوک اولارلار و سونوجو دئپرسلییه چاتار. آخی هله لیک اؤرگوتو تصور ائتدیکلری کیمی گوجلو گورمه سه لر، خیال قیریقلیغینا اوغرایارلار. اونلار چوخ انرژیلیدیلر و ... .

سن دئمه بو یازیلار هامیسی اونلارین الینده­ایمیش. ائله بیرینجی گون دیندیرمه­سینده من بونو بیلدیم. آنجاق  نئجه بیلدیکلرین آیلارجا دیرندیکدن سونرا یاواش یاواش مامورلارین یانیتلاریندان آنلادیم. اونلار دئمه­لی دایی اوغلو بی بی اوغلولاری ساناماقدا اؤز سئزیلرین (حدس لرین) اونایلاماق ایسته­ییردیلر. ایکی گون سونرا بونو باشا دوشدوم. من بیرینجی گون طبیعی اولاراق گیزلتمک ایسته­دیییم بیر سیرا مساله لر اونلارین ایلگیسینده دییلدی. اونلار اللرینده­کی دیتالاری (وئریلری) چئک ائلمک ایسته­ییردیلر. یوزده یوز آرخایین اولماق اوچون.

بازجو آرا وئرمه­دن سورولاری سوروشوردو. دئمه­لی هر دؤنه اوچون اللرینده یازدیقلاری سورولاری تئز تئز سوروردولار کی، فیکیرلشمه ایمکانی اولماسین. بئله لیکله اؤنمسیز سورولارین آرخاسیندا هدف گودوردولر.

-          آغا سن روزمره (گوندلیک) فعالیتلریوی بیزه بیر توضیح وئر! سحر دوراندان آخشاماجان نه ایش گؤررسن؟

سسی ایتتهاملا دولویدو. باشا دوشدوم کی دئمک ایسته­ییر سنین بوتون گونون میللتچیلیکله کئچیر. واختینی آلان ایشیز یوخ و ... آنجاق  ایطلاعاتدا هر باشا دوشدویونو اوزه گتیرمک لازیم دئییل. اؤزومو او یئرده قویماراق دئدیم:

-          سحردن ناهاراجاق اوشاق ساخلییارام، ناهاردان سونرادا اؤز ایشلریمه باخارام.

-          "هه او اؤز ایشلرین نه­دی؟"

بونو دئیه­رک سسینده آزجا آلای ائتمک (تحقیر) آزجادا آجیقلانماق دویولوردو. اونلار اؤز ایشلریمی یاخشی باشا دوشوردولر. منده هئچ اؤزومو او یئرده قویمادان دئدیم:

-          ائله آل وئر، ائو ایشلری، بئله دا

-          نه آل وئر ائلیرسن؟

چوخداندیر من آل وئر ایشلریمین بیر سیراسین گیزله­دیردیم. اونا گؤره کی همیشه دوشونوردوم بونلار قویماز من یاخشی قازانج الده ائدم. ایشیمه باداق آتارلار. اونا گؤره ده نتیجه وئرمه­یه­جک ایشلری تلفوندا دانیشاردیم، قالانلارین یالنیز گوونلی بیلدیییم اینترنتده و اوز-اوزه گؤروشده دانیشاردیم. کیمسه­یه ده بو حاقدا آرتیق سؤز دئمزدیم. اینانمیشدیم کی بیریسینه یارامایاجاق بیلگی وئرمک هم اونون اؤزونه هم منه زیانلیدیر. آنجاق  داها بورادا او ایشلری گیزلتمه­یه گرک یوخودو. او ایشلر هامیسی من ایچریده اولان زامان یاناجاقدی، ائله­ده اولدو.

دئدیم: " سیمان، روب، مئیوه، .... بئله دا"

یئنه ده سوچلاییجی بیر سسده دئدی:

هانسی گؤمروکدن؟ هانسی شیرکت آدینا؟ بولارین هامیسین کامیل دئ!

-          هله لیک بیر یوک وورمامیشام، تزه­جه ایش آلیناجاقدی کی سیز توتدوز.

بیر آز آلای ائدیجی سسله دئدی:

-          بس هاردان کئچینیرسن؟ آرواد ایشلیییر سن ییییسن؟

من جاواب وئرمه دیم. اؤز یانیمدا دئدیم "گرک تحریک اولمایام، اونلار بورادا هرنه دئیه بیلرلر".

منیم یئریمه باشقا بازجولاردان بیری دئدی:

-          اره گئدیب دا

یالاندان گولوشدولر و پیچیلداشما یئنه باشلادی. دیندیرمن یئنه سوروشماغا باشلادی:

-          خوب، کیملرینن گؤروشرسن؟ یولداشلارین کیمدی؟

-          ائله ایشله باغلی آداملارلا، بیرده کی میللتچی یولداشلاریملا.

بونو دئمکله اونلاری ایسته دیکلری مئیدانا چکمک ایسته­دیم.  بو بیرباشا سورولاری جاوابلاماق دولاییجا وئریلن سورولاردان آسان گلیردی.

-          کیملردی او یولداشلارین؟

بورادا عمومی قایدانی گؤزله­یه­رک حرکتده آدلیم اولانلاری سیرالادیم.

"ماحمود فضلی، حسن دمیرچی، اکبر آزاد، حسن راشدی، علیرضا صرافی"

باشیمی بوللایاراق، سانکی ائله لاپ ایسته­دیکلرین دئمیشم دئیه، دئدیم:

"ائله بئله دا، بوتون میللتچی لری دوشنده، گؤره­رم. "

قاراداغ لهجه سینده دانیشان باشقا بیر بازجو یئنه مئیدانا گیردی:

-          بیلیر کیملری دئسین، تای اولاردان مشهور آدام یوخدی؟

باشقا بیریسی بیر آز یوخاری قونومدان "دییه­جک، یاواش یاواش او دئییلمیینلری ده دییه­جک" دئدی.

آیاق اوستده­کی بیرینجی بازجو یونه­ده اتهاملی سس تونو ایله سوروشدو:

-          ماحمود فضلی ایله آخیر واختلار نییه تئز تئز گؤروشورسوز؟

دئدیم: "یئر آلیب ائو ایشلمک ایسته­ییریک، اونا گؤره تئز تئز گؤروشوروک"

بیرداها قاراداغ لهجه سینده اولان ، اوتوروقدا اوتوردوغو حالدا سوروشدو:

-          آیدینی هاواخت گؤروبسن؟

بیلدیم کیمی دئییر، بوغازیم قورودو بیر آندا. آیدین خواجه ای ایله گؤروشمه ییمیز ساکی گیزلی ایدی. او ایکی دؤنه منه ائشیکدن زنگ ائتمیشدی. تلفوندا آدینی دئمه دن تانیمیشدیم، آنجاق  دئیه سن بونلاردا تانیمیشدیلار.

دئدیم: نه ایدین؟

اهرلی اؤزو جاواب وئردی:

-          دوستون آیدین خواجه­ای دا

من اودغونمامیش بیرینجی بازجو هوببولدو اورتایا:

-          هه نییه اودغونوسان؟ سو گتیریم بیله­وه؟

باشیمی فیکیرله­شیرم دئیه، آزجا یوخاری قالدیردیم. الیمی چنمه قویاراق دئدیم: "سجاد رادمهر زندان دان چیخاندا گئتمیشدیم گؤرمه یینه، اوندا اودا آتاسی گیل ایله گلمیشدی.اورادا گؤرموشم. اوندان بویانا گؤرمه میشم.

ائله سؤز آغزیمدان قورتارمامیش اهرلی دئدیییمیز بازجو عصبلشدییینی گؤسترمک اوچون نفسینی بورنوندان پوفله­یه­رک اوستومه یومولدو. بوینومون دالیندان بیر مؤحکم شاپالاق ووردو. آجیقلی سسله قیشقیردی اوستومه:

-          اوغلان بورا یالان یئری دییل. آخیر دفعه آیدینی هاواخ گؤروبسن؟

دینجلیییم پوزولدو بیر آن. داها بایاقکی کیمی رئلکس جاواب وئرمک یادیمدان چیخدی. و ائله منده اوجا سسلی جاوابلادیم:

-          دئدیم دا سجاد گیلده گؤرموشم.

اهر لهجه لی باشیمین اوستونده دوراراق دئدی:

-          آیین 28-اینده  راهنمایی ده (راهنمایی خیابانین دئییردی) کیمی گؤروبسن؟

یئنه ساوونما (دیفاعی) سسله دئدیم: "بیلمیرم"

ایکی شاپالاق داها بوینوما دیدی. ائله ووروردو سانکی دوغوردان عصبلشیب، آنجاق  منه اؤنملی دییلدی. منیم آیدین لا ایلیشکیم بیلینمه­مه­لیدی. اهرلی دئدیییمیز بیرداها آچیقلاما وئردی، "مرندده­یدین، ساعات 8-ده گلدین آیدین لا گؤروشدون، گئجه ساعات 10 دا دا دؤندون ائوه"

بونو دئمکله اووجون آچدی. بیلدیم کی یالنیز تلفونا قولاق آسیبلار. اونا گؤره کی  منی ایزله­سه­یدیلر، بیلردیلر کی مرند ده یوخ، ائوده صوفیاندایدیم. آیدین تلفون دا سوردوغو زامان ائله همیشه کی گوونلیک قایداسینا اویاراق ، یئریمی دوز دئمه میشدیم. اونلار ایسه ائله بو سسی ائشیتمیشدیلر. دئدیم:

-          او گون، آیدین زنگ ائتمیشدی، آنجاق  من گؤروشه گئتمه دیم.

وئردیییم جاواب دوزگون یانیت دییلدی، اونا گؤره کی آیدینی توتسایدیلار و اوندان دا بو سورونو سورسایدیلار، بیلینه­جه­یدی کی بیریمیز یالان دئییریک و اونون آردینجا بیله­جه­یدیلر کی بو گؤروشده نه ایسه وارمیش. ائله گرگین حالدا، استرسلی ایکن، دوغرو قرار وئرمک چتین دیر. سونرالار دوشونوردوم کی، گرک قاباقجادان هر شئی چیزیله، یوخسا گرک هئچ جاواب وئرمه­یه­سن. بیرآز آرتیق دؤیولمه یی گؤزه آلاسان و سؤزلره دوشوندوکدن سونرا جاواب وئرسن.

بیرینجی بازجو آرایا گیردی، منی ووران بازجونو سانکی ساکیتلشدیرمک ایسته دی.

-           حاجی بیر دیقه، خواهیش ائلیرم

سونرا منه دؤنه­رک بیر داها :

-          دئدیم کی صداقتینن گل قاباغا. بولار هامیسی سنی تئست ائلمک اوچوندو. بیز هر شئیی بیلیریک. یالان دئمک فقط اؤز ایشینی چتینلشدیرر. سنی مراسیمدن زاتدان توتمییبلارهااا، ائودن گتیریبلر. اطلاعاتدادا هئچ کسی یئرسیز توتمازلار. اونو بیل کی هر شئی الیمیزده. یوخسا سنی گتیرمزدیک.

بیرآزجا دایاندیلار. سونرا بیرینجی بازجو یئنیدن دیله گلدی:

- یاخشی بوتون شهرلرده کی یولداشلارینی سای.

بو سورویا دئمک اولار حاضیرلیغیم واریدی. ساده جه منی اوشوندورن تلفونومداکی آدلاریدی. من او آدلارین چوخونا اؤز تلفونوملا زنگ ائتمه­سم ده ، یانیمدا اولسون دئیه آدلارین یازمیشدیم. بو آدلارین بیر سیراسی شیفره لی یازیلسادا، اونلار حاقدا سورسایدیلار، بیلیردیم کی چتینلیییه دوشجم. چتینلیک دئدیکده ایسه آرتیق دؤیولمه­ییدی.

بیرداها سسلندی:

-          هه دئ گؤرک تهراننان باشلا

اؤزومو بو سورویا دویارلی (حساس) گؤسترمه­دن باشلادیم تلفونلا ایلگیده اولدوغوم یولداشلارین ادین سیرالاماغا.بو آدلاری اونلار کسین بیلیردیلر. منیم تلفونوم ایللردی کی ایزله نیردی و من بیلرکدن اونو دییشمیردیم، آرتیق حساس اولماسینلار دئیه.

هر شهرده ایسه اونلارین ماراقلاندیغی آدامین آدین بیرینجی یا ایکینجی ساییردیم کی منیم گیزلتمک ایسته دیییمی دویماسینلار.

دئدیم: سعید نعیمی، حسن راشدی، علیرضا صرافی، لطیف حسنی، اکبر آزاد، یوسوف فرزانه.

 باشیمی قالدیرمیشدیم یئنه فیکیرلشیردیم. بو آندا یالنیز گیزلتمک ایسته دیییم آداملارین آدی یادیما دوشوردو. آردیجا اونلاری سوروشسالار، نه دئیه­جه­ییم حاقدا قیسساجا پلانلاما یاپیردیم کی، بازجو یئنه سوروشدو:

- سعید نعیمی اینن آخیر واخت هاچان گؤروشوبسن؟

منیم اوچون بو سؤزه دوغرو جاواب وئرمک اؤنملی دییلدی. آنجاق  سن دئمه بونلار باشقا شئی دالینجادیلار. بونو 2-3 گون سونرا باشا دوشدوم. اونلار بایرام تعطیللرینده کیمین سعید بی­له گؤروشدویونو و اونونلا دانیشدیقلارینی قالان یولداشلارا ایله­تدییینی بیلمک ایسته ییردیلر. بو یازیشما اونلارین الینده­یدی. اونلار آرخایین اولماق ایسته ییردیلر کی "مار بی " همان یوروشدور. بونلار دانیلاسی سؤزلر دییلدی. من اونلاری گیزلتمه­یه هئچ گرک گؤرموردوم. سعید بی نعیمی ایله بایرام گونلری گؤروشموشدوک، گزی­یه گئتمیشدیک، تلفوندا بو حاقدا دؤنه­لرجه دانیشمیشدیق.

بازجو آرا وئرمه­دن یئنه سوروشدو:

-          سعید­له ائله ایکیز گؤروشدوز؟

-          هه دا

-          نه­یه گؤره دانیشدیز؟

بوراسی چوخ دا اؤنملی اولماسا، سعید چوخ قابارماسین دئیه، گیزلتمه­لیدیم.

-          ائله بئله، اؤزوموزدن، ایشلریمیزدن و سیاسی خبرلردن

بازجو کئچدی باشقا سورویا

-          زنجان، اردبیل، مرند... سای دا

اؤز اؤزومه دئدیم یاخشی اولدو بونو آتلادیق. سن دئمه هله سعید حاقدا ماراقلانمیرلار. او سونرانین­کیدیر. هله لیک بونلار اللرینده کی سندلرله، منیم دانیشیقلاریمی توتوشدورماق ایسته ییرلر. من ایسه اؤز یانیمدا سورولاردان یایینیرام.

سعید نعیمی ایله 1380-جی ایللردن یولداشیدیق. اونونلا یوکسک لیسانسیمیزی بیر بیلی یورددا اوخوموشدوق. خانیمی سعیده خانیملادا بیزیم سونا یاخین دوستودولار. اونا گؤره عاییله­وی ایلگیمیز واریدی. سعید آزربایجانین اوجان(بوستاناوا) بؤلگه‌سین‌دن اولسا دا، اوزون ایللری‌دیر کرجده یاشاییردیلار. میللی حاق‌لاریمیزی لاپ سون اوخول(دبیریستان) دؤنمین‌دن باشا دوشموش و زنگان بیلیوردونا گیردیک‌دن بو حاقدا چالیشمیشدی. من گؤردوگوم زامان‌دان، او ایش باجاران، هامی ایله ایلگی‌سین ساخلایان، موستقیل و اینصاف‌لی دئیه بیلجییمیز بیر سیاسی چالیشقانیدی. بیزیم اؤرگوتده اولماسادا، چوخ یاخین ایلگیمیز واریدی. بیز بیر ایل توتولمادان اؤنجه آچیق چالیشماق ایسته­دیییمیز زامان، آچیق چالیشما تشکیلاتینا سعیدی ده نظرده آلمیشدیق. بو حاقدا یولداشلارلا یازیشمالاریمیزدا اطلاعاتین الینه دوشموشدو.

قالان شهرلرده تانینمیش آداملاردان بیر نئچه سین سایدیم. ائله تپکی گؤسترمه­دیلر. اورتالیق ساکیتلنمیشدی بیر آنلیغا. بیردن یئنه هجوم باشلادی. پیچیلداشما، آردیجا یئنه­ده بازجونون باشیم اوستده دوروب، اتهاملی سسله سورغو سورماسی:

-          خاریجده کیملرله ارتباطین وار؟

دئدیم: "یالنیز ائلچین حاتمی ایله"

بورنوندان نفس اؤتوره­رک:

-          داریوش حاتمی نی دئییرسن؟ اوننان نئجه دانیشیرسیز؟

-          ایمئیل ایله یازیشاریق.

-           هانسی کافینتلردن یازیشارسان؟

بوراسی بیزیم اوچون سون زامانلار سورون اولموشدو. بیز اؤنجه لر کافینت لردن یازیشاردیق. آنجاق  سونرالار دویموشدوق کی کافینتلر گوونلی دییل و اورادا ایشله­نن هرنه یازیلیر. اونا گؤره اؤزل بیلگی سایارلارلا یازیشماغا قرار وئرمیشدیک. ایکی آیدان چوخودو بو قراری اویقولاییردیق. بونو نظرده آلاراق دئدیم:

"من ایمئیل ایله کیمسه ایله ایلیشکیم اولماز، یالنیز ائلچین حاتمی ایله سون زامانلار ائودن یازیشمیشام"

آغزیمدان چیخمامیش یورودو اوستومه:

-          بس تبریزدن حاکیم ایله یازیشان کیم دیر؟

هئچ دوشونمه­دن دئدیم:

-          "من نه بیلیم، او بیر آل وئرچیدیر. چوخلاری­ایله ایلگیده اولابیلر"

حاکیم ناخجیوان جولفاسیندان اولان، یاخین دوستوم و ایش امکداشیمیدی. او قوزئی آذربایجاندا اؤنجه لر خالق جبهه سیندن اولموشدو و بوتؤو آذربایجانچی، ائلچی بی چی بیرییدی. گونئی­یین میللی حاقلارینا چاتماسی اوچون هر زامان دوشونموشدو و بو حاقدا ایللر اؤنجه­دن بیزیم آرامیزدا دانیشیقلار اولموشدو. 1378-جی ایلدن اونونلا تانیش اولموشدوق. ائله او زاماندان اونونلا میللی مساله حاقدا ایلیشکیمیز واریدی. گونئی آذربایجانین میللی حاقلاری و قاراباغین آزادلیغی اورتاق ایسته­ییمیزیدی. اونونلا عایله­وی گل گئدیمیز واریدی. من قوزئی آذربایجانا گئتدیییم زامان همیشه اونونلا اولاردیم. اودا بورا گلدییی زامان بیزده قالاردی. اونونلا اوزده یالنیز اقتصادی ایلیشکیمی ساخلامیشدیم، میللتچیلیک ایلگیلریمیزی گیزلی ساخلایاردیق.

باشیما بیر یومروق چالاراق ، اوجا سسله چیغیردی اوستومه:

-       ای اوغلان سفئه­لمه بس آغری قاراداغلی ایله کیمین تبریزده ارتباطی وار؟

آغری قاراداغلی دا بیزیم تشکیلاتین باکیدا نوماینده­سییدی. منیم اونونلا ایمئیل یولو ایله ایلگیم اولوردو هردن.

یومراغین دیمه سی ایله منیم هجوملا یاناشماغیم یئنه باشلادی:

-          من نه بیلیم آغری ایللر بویو بوردا اولوب. چوخلاری ایله ایلیشکیسی اولابیلر. من ائشیکده کیمسه ایله ایلگیم یوخ.

بازجو بیرآز دالی چکیلیب، اوتوروقدا اوتوردو. نفسین بیرداها بوراخدی. سانکی آجیقلانیب و الیندن بیر ایش گلمیر. قالانلاردا تام سوسقو ایچینده دایانمیشدیلار. اونلار نئچه ایلدیر منیمله اوغراشیردیلار. منی یاخشی تانیییردیلار. آنجاق  یئنه ده بوتون تئکنیکلرین دئنه­مک ایسته­ییردیلر.

توتوقلانمانین ایلک آشاماسیندا، توتوقلونون اوستونه یورومک، آردی آردینا سورولار وئرمکله، دؤیمکله، چیغیرماقلا، دومسوکلمکله باسقینی آرتیریب طرفین آغزیندان بیر شئی­لر آلماق اونلارین اوتوروشموش ایشلریدی. اؤزل‌لیکله بیرینجی دفعه اولا‌راق توتوقلانماغین ایلک آنلاری چوخ اؤنملی‌دیر. چونکو بازجولار توتوقلانانین تجروبه‌سیزلیک، ایسترئس و قورخوسون‌دان ان چوخ فایدانی آپارماق ایستییرلر. بئله تجروبه‌سیز یولداش‌لارا هر شئی اولدوغون‌دان داها قورخونج، دهشت‌لی و اومود قیریجی‌دیر. اصلینده بودا ایطیلاعات قوه‌لری‌نین ایستیی‌دیر و بوتون اولاناق و ایمکانلارییلا بونو آشیلاماق ایستییرلر. او جمله‌دن، بوتون دیندیرمه سورجینده، حتی بئله کئچیت سالون‌لاریندا توتوق‌لانانین گؤزلری‌نین باغلی اولماسی، ائشیک دونیایلا هر تورلو ایلگی‌نین قیریق اولماغی، زامان سورجینده اونلارا توتوقلانانین بئینینده ایستدیک‌لری دونیانین یاراتماغینا ایمکان وئریر. بئله‌لیکله ان کیچیک مسئله‌لر حتی اوتاق‌لارین داریسقال‌لیغی، بازجولارین بیله‌رک‌دن سس‌لرینی بئله قالینلادیب باغیرماق‌لاری و ... اونلارین عظمتینی و سنین حقیر اولدوغونو آشیلاماق ایستییر. ایلک دیندیرمه‌لرده، هده قورخو گلمکله، معین تئکنیک‌لرله، او جمله‌دن، توتوقلانانین ان گیزلی بیلگی‌لرین‌دن، بیر نئچه سینی دییشیک بهانه‌لرله اورتایا آتماقلا و بئله‌لیکله هر نیی بیلدیک‌لرینی آشیلاماقلا، توتوقلانانین بئینین ده کی گوون‌لیک دوزنی پوزماق ایستییرلر. بو حال‌لاردا آرخاداکی بازجولار توتوق‌لانانین بیلر بیلمز دیلین‌دن قاچیردیغی سوزلردن نوت گؤتوره‌رک سونراکی پراسئس‌لرده ائله بو سؤزلری باشقا فورمادا اؤزونه خرجلیرلر و یا باشقا سوال‌لار بیچیمینده سورارلار.  اونلار منه دوشونمه­یه گیره­وه وئرمک ایسته­میردیلر. بئله حاللاردا یانیلماق چوخ اولور. آنجاق  منیمده قارشیلیقلی اولاراق هجوما کئچمه ییم و هرنه­یی دانماغیم، بو تکنیکی بوشا چیخارتمیشدی. بئله آندا ناغیل قوشماق اولماز. الک قلبیر ائتمک اولماز. یالنیز هرنه یی دانماق گرکیر.

بازجو بیرآز یوموشاق سسله کئچدی هده­لمه­یه:

-          بیلیرسن دا هارا گلیبسن؟

من هله اونون چاغیردیغی مئیدانا گیرمه­میشدیم، هله دیک باشلیق ائدیردیم:

-          بیلیرم

باشیمی گئرچکدن­ده دیک توتموشدوم، سانکی اونلارا "نه ائدجکسیز، ائدین" دئییردیم.

بازجو بیرآزجا آلای ائدیجی سسله ، یوموشاقجا دیللندی:

-          بورا او گؤردوکلریندن دییل. بورادا سندن یئکه­لر گلیب، پئشمان نامه یازیب گئدیب. سنین او دیلیوی ائله آچاجاییق ها. او باشینداکیلاری گرک آچاسان. یوخسا ایللر بویو بوردا قالمالیسان. یوخسا قهرمانلیق ائدیرسن؟ ائله کی خانیمین گلدی بورا اوندا بولبول کیمی دنیشاجان. یا سنه ائله شئی­لر مهم دییل؟! دئییللر آخی سن دئییبسن من آرواد اوشاق زاد سایمارام، هه؟

بو آندا آجی آجی هیریلدادی، سانکی منه قئیرتسیزسن دئمک ایسته ییردی و منی هم تحقیر همده تحریک ائتمک ایسته ییردی. مندن جاواب گلمه­دییینه آردین توتدو:

-          هه آآی (آقای) رهبر، اوشاغیوین سسی قونشو سللولدان گلنده دانیشاجاقسان. سن هله کئیسن. بیلمیرسن نه اولوب. بیلمیرسن باشیوا نه­لر گلجک!

بازجونون دئدییی هر سؤز فیکریمی ایکی یئره گؤتوروردو، بیریسی اؤنجه دوشوندوکلریمه، من توتوقلانمادان اؤنجه اطلاعات سللوللاریندا سینما ندنلری حاقدا آراشدیرما یازماق ایسته ییردیم. بو حاقدا اوخودوقلاریمی و تجروبه لریمی توپلاماقدایدیم. دئیه­سن اوخودوقلاریمی بیرداها تجروبه ائتمه­لیدیم. بازجولار هر هانسی بیر آددیم آتاندا، تئز دوشونوردوم کی بو هانسی تکنیک دی و نه ایسته ییرلر بونونلا. بیر یانداندا اونلارین بو ایرنج هده­له­مکلری منی ائوه گؤتوروردو. سونایا، تاتارا. من اؤزومو تانیییردیم. اونلاردان اؤترو جانیمی وئرمه یه حاضیر اولسامدا، اونلارلا منی تسلیم ائتمک اولمازدی.

قاراداغ لهجه سینده دانیشان بازجو فیکیرلریمین آراسینا گیردی:

-          سنین بو آتیلیب دوشمه­­یین اولده طبیعی­دیر. ائله سندن قاباقکیلاردا بئله اولوب. آنجاق  اونو بیل کی بورادا سنی تمیزله­یه­جه­ییک. ال ایچی کیمی صاف اولوب گئدجکسن.

الین آچمیشدی. قالین گوده اللری واریدی. یئییب ایچیب قیزارمیشلار کیمی، اللری قان چاناغی کیمی ایدی. امکداشینا دؤنه­رک دئدی:

-          حاجی بونلار دیل پهلوانی دی. همکارلاریمیزی گؤندرنده ایشیییب، اؤزون باتیریب. عورضه سی اولسا، گؤردویو ایشلری دؤشون وئریب قاباغا، بوینونا آلاردا. بولار کیشی دییل کی، ائله سیاسی موباریزده شاه زامانینداکیلاردی. بولار جین شارپین انقلابچیلاریدیلار دا. بیلیسن سنین کامپیوترینندن نه­لر تاپیلیب؟ اولارینان سنی دوز مله­ده­جئییح.

بونلارین دورتولمه (تحریک) اولدوغونو بیلیردیم. جاواب وئرمه­ییم گلیردی، بتردن. آنجاق  اؤز اؤزومه دئییردیم، قوی دانیشسینلار. اونلانیشدیقجا اللرینده نه لرین اولدوغو آیدین اولاجاق. من گرک قانی سویوق اولام بورادا. بیر آندا یئنه ده پیچاپیچ دوشودو. آرخامدا نه ایسه دانیشیردیلار. بیرینجی بازجو یئنه سوروشدو:

-          بَی  قاموح (اونلار گاموحا قاموح دئییردیلر، اؤزوده بیزه زورلا بونو دئدیرتمک ایسته ییردیلر) حاقدا بیزه دانیش. برنامه­لریز حاقدا، نه ائلییه ­جیدیز؟

بو سورویلا بوینوما قویماق ایسته ییردیلر کی "سن گاموحچوسان"، آنجاق  من بونو دئمه­مه­لیدیم. بیز بو حاقدا بیر دؤنه بهبود بی قلیزاده نین اؤنریسی ایله دانیشمیشدیق. او زامان بهبود بی دئییردی "بیز گرک بوندان بئله توتولساق، اؤرگوتوموزو ساووناق. داها دانماغا گرک یوخ، چون اونسوزدا هزینه وئریریک، نییه اؤز آدیمیزلا چیخیش ائتمه­یک کی؟" او زامان بو اؤنری آرخاسیندا اولان دوغرو تحلیل‌لره گؤره یاخجی و بؤیوک بیر آددیم حساب اولوردو، آنجاق اؤرگوتوموز هله‌لیک تام حاضر اولمادیغینا گؤره اونا حاضرلیق آپارمالییدیق. اوناگؤره ده من بورادا دامالیدیم. باخمایاراق کی من بیلیردیم بونلار یوزده یوز منیم گاموحچو اولدوغومو بیلیرلر. آنجاق  سوییه­می و رولومو بیلمه­مه­لیدیلر. اونا گؤره کی بیرینجی بو حاقدا قرار وئرمیشدیک و ایکینجیسی منیم بوینوما آلماغیملا چوخلارینین آدی اورتایا گلجکدی و اونلاردا توتولاجاقدیلار.

بهبود قولیزاده بئینیمدن کئچدی. قوشاچایدان اولان بو یولداشیمین او زامانکی سؤزلرین بیر داها آندیم. "آچیق موباریزه نین ایلک دؤنه اؤنریسین وئرن بهبود بی ایندی بورادا اولسایدی نه ائدردی. او دیسیپلینلی آدامیدی. کسین اؤز شخصی فیکرینه باخمایاراق قراریمیز اساسیندا حرکت ائدجه­یدی."

من گاموحدان بوروق وئریب، میللی حرکتی ساوونماق ایسته دیم:

-          گاموح و باشقا قوروملار خاریجده 5-3 نفرلیک قوروملاردیلار. بیز میللتیمیزین حاققین ایسته ییریک. بو حاق وئریلمه­یینجه گئری اوتورمایاجاییق. بو ایستکلرین گاموح و باشقا قوروملارادا دخلی یوخدور. بو میللتین ایسته­ییدیر

-          نه حاققی؟ بوردا نه حاققی وئریلمیرکی؟ اؤز دیلینده کیم قویمور دانیشاسان؟ بودور ائله بوردا بیز  آذری دانیشیریق.

موباحیثه اوره­ییمجه ایدیر. اونلار تام حاقسیزیدیلار و بئله تارتیشمالاردا همیشه گئری اوتورماق یا اوزاق باشی دؤیمک زوروندا اولارلار. دئدیم:

-          بیز تورکوک. آذری سؤزون سیزین آغزیزا قویوبلار.

بونو دئینده دیک دوردو آیاغا. الین شاپالاق ووراجاق کیمی گتیردی بوینومون دالینا، آنجاق  وورمادی، بوینومون دالیندا ساخلایاراق دئدی:

- احترامو ساخلا کی احترامووو ساخلایاراق.

دورمادان جاواب وئردیم

- نه احترامی؟ سیز نه بیلیرسیز احترام نه دیر؟ انصاف نه دیر؟سیز ایکی یاشیندا اوشاغی تپییینن ووروب قوجاغیمدان سالیرسیز.

بو آندا باشقا بیر مامور یئریندن قالخدی. یوغون سسی ایله، اؤزونه یوخاری حدده گوونجینی گؤستررک ، اؤزونو رئیس کیمی گؤستررک ، قاباغا گلدی:

-          سن بیلیسن نه ائلیییبسن؟سن اؤزوندن چیخیبسان. سن آیتی یوروش ائدیبسن، زهرانی سونا، اکرمی بیلمیرم دورنا. سن بیلمیسن کی، بو آددار آللاهین یاراتدیغی کاملترین دیلده دیر.  حسن، حسین، محمد، زهرا بونلاری دییشمک بیلیسن یانی نمنه؟

جاوابلادیم:

-          بونلار عربجه آدلاردیر. بیزیمکیلرده تورکجه دیر. بونلار هامیسی آللاهین یاراتدیغی دیللردیر و هامیسی آللاهین نیشانه سیدیر.

خوروزلاناراق تئز جومدو اوستومه:

-          الله گولوده یارادیب، پوخودا. سنین دانیشدیغین دیل هامیسی واریداتی دی. باکی دیلیدی. بیلیسن دا باکی نین نه­یی مشهوردی؟

بو آدام اؤز دیلین پو... کیمی گؤروردو. داها بونونلا نه دانیشماق اولاردی. الین بئلینه ووروب آددیملاییردی.  هردن سؤز دئیه­نده بیر آنلیق دؤنوردو منه ساری. سانکی بیر سارای­دا پادشاه دیر و بیر ایری قاپیسینا گتیریبلر. من ایندییه دک بئله­سین گؤرمه میشدیم. اؤزون دین آدامی کیمی، قرآنی ازبر بیلن و اونون تفسیرینه وارمیش کیمی گؤستریردی. اونا گؤره منه ائله گلدی کی بو سیپاهدان گلمه­دیر.

احمدی نژاد حاکمیتیندن سونرا اطلاعاتدا دییشمه­لر اولوب، ائشیتمیشدیم. یقین بودا اونلارین بیریدی. بیر داها سوروشدو:

-          باکی نین نه یی مشهوردی؟

قالمیشدیم بئله­سی ایله نئجه یاناشمالییام. بیلیردیم کی بو سیپاهدان اولانلار آنجاق  دؤیمه یی بیلیرلر. اونا گؤره ده مساله منیم اوچون حل اولموشدو. من دوشوندوم کی، هله لیک بونلارا بیر شئی اؤیرتمک اولماز. بونلار ماموردو. پول آلیرلار مندن سؤز آلسینلار. بونلار یئنی دن گلیب بیزی قبول ائتمزلر. گرک ساده جه اؤز قیرمیز چیزگیلریم ایچینده حرکت ائدم و بونلارا بیلگی وئرمه­یم. دئدیم:

-          باکی­نین اینجه صنعتی، موسیقیسی، نفتی، اؤزل هاواسی...

تئز گیردی سؤزومه:

-          یوخ بیلمه­دین فیکیرلش

اویون اویناییردی سانکی. دئدیم:

-          بیلمیرم سیز نه یی نظرده توتورسوز. آنجاق  من بیلنی دئدیم

بللی اولدو کی، اؤزون آلچالدا‌راق، منی ده تحقیر ائتمک ایسته ییر، هم ده ان چیرکین شکیلده، منیم اؤز دیلیم‌دن، اؤز میللتیمین بیر پارچاسینا اینسانا یاراشمایان سؤز دئدیرتمک ایسته ییر::

-          بس نییم دییه بیلمیسن؟ بس سن نجور پانتورکسن؟ قوی دئییم دا اؤرگن. باکی نین قورومساغی مشهوردو.

دئدیم: ائله او دئدییین هر یئرده وار. تهراندادا وار، اصفاهاندادا، کرماندادا.

یئنه منی سیندیماغا جان آتاراق، دئدی:

-          یوخ هر یئرین اؤز حددی وار. باکی قورومساغی قدیمنن مشهوردو. ایندی سن اولارین دیلین دانیشیسان. سن بومی دیلیمیزی بوشدوییب گئدیب قورومساخلارین دیلین دانیشیسان. بوردا سنه دیل اؤرگه ده جم.

گئرچک‌دن داها آدئرنالین داشماقداییدی، آنجاق اؤزومو ساخلامالییدیم، سینیرلریمه حاکم اولمالییدیم، او اؤزو بیله‌رک‌دن بئله دانیشیردی، منی سینیرلتسین یادا سیندیرسین. دینمه دیم، ساده‌جه درین‌دن بیر نفس چکدیم، بو سولوق آلما ایچیمی سویوتماسا دا ، اونا اولان آجیغیمی اورتایا قویدو.

یئنه هاوالاناراق سؤزونون آردین توتدو:

-          سن موسلمانسان؟

-          هه، موسلمانام

-          شیعه سن؟

-          هه

-          بس موجتهیدین کیمدیر؟

-          هئچ کس

-          به نجور شیعه سن؟

دئدیم:

- منیم اوچون بوراجان ائله بیر دینی سوال قاباغا گلمه ییب کی قرآن دان باشقا آیریسینا موراجیعت ائتمه­لی اولام.

آزجا سوسوب، تئز سؤزو دییشدی:

-          ایندییه­جن انتخاباتا شرکت ائدیبسن؟

-          یوخ

آجیقلی آجیقلی یئنه سانکی بیر جاوان اوغلانی قدیم موعللیملر کیمی دانلاییر:

-          به نییه؟

دئدیم:

-          اونا گؤره کی بورادا شورای نگهبان وار. آزاد سئچکی یوخدور. من آزاد بیر سئچکی اولمایینجا اؤزومو آلدادانمارام. ریاکارلیقدا ائدنمرم

تئز هوببولدو مئیدانا:

            - نمنه؟ سئچکی؟ او نه دیر؟ گینه باکی دیلی دانیشیرسان کی؟ دییه­جکسن انتخابات. قورومساخ دیلی یوخوموزدو بوردا.

            بو آدام منی تحقیر ائتمک اوچون اؤز دانیشدیغی آنا دیلینه، کیم‌لیگینه و اینسانی وارلیغینا- همده فارس بازجولارین یانیندا- قورومساق، پوخ و ... دئییردی. اونا گؤره چوخ سؤزلرین آلدیرمیردیم، سایمیردیم. ساده­جه دوشونوردوم اونون ایسته­دییی کیمی گرک اولمایا. من اؤزومو داهادا اوجالاردا گؤرمه­لیدیم. بونا چوخلو ندنلریم واریدی. بونلارین هامیسیندان اؤزومو ساوادلی گؤروردوم. البته بیزه گرکن آلانلاردا. بونلارین هامیسیندان داها درین اینامیم واریدی یولوما. من آرتیق بیر میللت اوغروندا ساواشیردیم، اونلار ایسه خالقین جاوان‌لارین توتماقلا، ساتقین‌لیقلا، ایشکنجه ائتمکله، قارین بسله ییرلر.......

            رئیس بازجو بیرداها دیللندی:

            - بس ائله مونافیقلرده اونو دئییرلردا

            دئدیم: ائله اونلاردا سیزین کیمی دین دن قورآن دان دئییرلردا.

            یومولدو اوستومه، بوینوما بیر آغیر شاپالاق ووردو:

            - لال اول، لال اول

بیرداهادا شاپالاق ووردو. موفته پولدان یئییب، شیشه­نلرین باشییدی. اللری ائله آغیریدیر کی، بئینیم سیلکه­لندی. او گون گون اورتادان قاباق عملیات مامورلارینین یومراق تپیک ایزلری هله جانیمدایدی. بوینوم دؤنموردو اویان بویانا. انگیم کیلیتلنمیشدی. آنجاق  بونون یومروقلاری بئینیمی سیلکه­له­ییردی. آردی آردینا سؤیوش وئریردی:

            - سنین بؤیویونده بورادا یئکه دانیشیردی. بوردا آدام ائله دیم اؤتوردوم.

شاپالاقلار، یوموروقلار دایاندی. من آرتیق بیلیردیم کی ایش چتیندیر. بونلار هله باشلاماییبلار. بوتون ایشکنجه لر بئینیمدن کئچیردی. ساعاتلاریدی دال با دال سورولار، هده لر، آلچاتمالار، سوچلامالار، تلقینلر سورمکده­ایدی.

رئیس دئییلن مامور آرالاندی. اهر لهجه­لی شؤعبه مودورو یاخینلاشدی:

-          گاموح دا کیمی رهبر ائدجئهسیز؟

بیلدیم کی بوینوما قویماق ایسته ییر. من اوناجان گاموح دا وار اولدوغومو دانیردیم. آنجاق  بازجو ائله سورو ووئریردی سانکی من هرنه یی قبول ائتمیشم. من اورادا بازجولارین بوتون تکنیک لرینه اؤزل آدلار وئریردیم. بو آدلاندیرمالار هم منیم قارشی تپکیمی بللی ائدیردی همده اونلاری سونرالار قالان یواداشلاریما چاتدیرماق اوچون یادیمدا ساخلاماغا ایمکان وئریردی. بو تکنیکی بلوف و تلقین تکنیکلری آراسیندا یئرلشدیرمیشدیم.  هر حالدا بلوف اولور اولسون، دوز اولور ا ولسون من دانمالیدیم، دئدیم:

-          من ائشیکده­کی ماجرالارا ائله اؤنم وئرمه­رم. من آنجاق  گاموحون گنل سیاستین به­ینمیشم. اونلارا گؤره هئچ ایش گؤرمه­میشم.

-          سن بیر ایش گؤرمه­میسن کی، سنین تکجه قلمین، بئینین، و رابیطه لرین (ایلگی لرین) ایشلیییب. هله دئ گؤروم هانسی ایمئیل گروهلارینا عضوودون؟

من اؤزومو یئنه او یولا ووردوم. یاواش یاواش گئدیردیلر بلگه چیخارماغا. آنجاق  نه اولسادا من دانیلانلاری دانمالیدیم. دئدیم:

-          بیر نئچه ایمیل گروپو وار، اونلارا عضو اولموشام. هئچ چوخونادا فورضت ائدیب باخمارام. داک، آذرنیوز و باشقا بئله گروپلار.

بازجو یئنه اؤزونو هرنه­یی بیلن کیمی گؤستررک و سانکی منه آتماجا آتیرجا دئدی:

-          اونلاری دئمیرم، اؤز گروپوزو دئییرم.

بوغازیم قورودو آنجاق  آرا وئرمه دیم:

-          ائله بونلار هامیسی آذربایجان قروپلاریدیردا

-          اؤزون بیلیرسن نه یی دئییرم، به بونا شبکه دئیرلردا. اؤز آرازدا اولانلاری دئییرم، داک-ی زادی بوشلا.

او کیچیک آن ایچینده هرنه بئینیمه گلیردی. گؤره­سن بونلار نئجه بو مساله­نی بیلیب؟ ائودن یازیشمالاریمیزمی اللرینه کئچیب؟ و ...دئدیم:

-          بو ایمئیل گروپلارینا سیز نه دئییرسیز دئیین، آنجاق  او قوروپلارا هر کس عضو اولابیلر. اونلاردا خبر و مقاله یازیلیر.

بازجو دریندن بیر آه چکدی. داها دانیشیغین دالین توتمادی. بیر آز سونرا یئنی دن باشلادی:

-ماشاءالله سن بوتون یوللاری بیلیرسن، تشکیلات یارادیرسان، اوتاق قورورسان، موذاکیره ائلیرسن. آچیق فعالیته تئوری وئریرسن.

بونلاری دویاراق باشیم شیشیردی سانکی. بونلاری نئجه ساوونماق اولاردی و نئجه دانماق." یوخ من هئچ نه یی آلدیرمایاجام، قوی نه دئییرلر دئسینلر. نئجع ثبوت ائدجکلر؟" اؤز یانیمدا دوشوندوم کی "من اوتمایاناجان اوزده قالمایاجام، هرنه یین آلتینا ووراجام. اوشاقلار ائشیکده مندن بونلاری گؤزله­ییرلر. یوخسا من اونلارا نه دئیه­رم؟"

منیمله بیرگه اونلاردا سکوتا گیردیلر. دالدا یئنه پیچاپیچ باشلادی. واراقلانان کاغاذلارین سسی توفان کیمی بئینیمده توز دومان سالماقدایدی. نه­لر وار اللرینده گؤره­سن، دئیه دوشونمکده­ایدیم. بیرده کی منیم ائشیکده اولان ایلگیم یالنیز ائلچین دیر. اونونلا هرنه یی  یوزابیله­جه­یدیم. بیلگی سایاریمدان نه چیخسا اونونلا یوزماق اولاردی. ائله بو آندا، پیچاپیچین ایچینده مرکزی کومیته سؤزو قولاغیما دیدی. اوره­ییم تؤکولدو سانکی. او آندا بیر آنلیق مئیداندان قاچماق ان بؤیوک استراتژی اولابیلردی. آنجاق  اونلار مئیدانی بوراخان دییلدی. بیرینجی بازجو سانکی منه بیر فورصت وئردی قاچماغا:

-          سنین علی قهرمانی ایله موشکولون نه دیر؟

یاخشی فورصت ایدی اساس مساله دن قاچماغا. اوسته­لیک من بو مساله نی گؤزله­ییردیم. بو علی قهرمانی مساله سی آیلارجا بیزی اینجیتمیشدی. آنجاق  بو آندا اونون اورتایا گلمه­سی منی سئویندیردی. علی قهرمانی بیزیم بؤلگه­نین گولفرج کندیندن دیر. اونلار علمدارین ماشین آرخی دئییلن محله­سینده یاشاییردیلار. من بو آداملا باشقا بیر دوستو ایله بیرلیکده، 9 ایل اؤنجه­دن تانیش ایدیم. بولوت دئدیییمیز جبرئییل شکری آدلی همین محله­دن اولان یولداشی و اونونلا  ایلک دؤنه بیر شنلیکده تانیش اولموشدوم. همین شنلیکده من آزجا میللتچیلیک حاقدا دانیشدیم. بونلاردا ماراقلیمیشلار و منیمله گلیب گؤروشدولر. او زاماندان ایلگیمیز باشلادی. بونلار ساواشقان و دلی قانلیدیلار. اونا گؤره ده میللی مساله نی قبول ائتدیکلری حالدا، همین ایللرده یامان درده ده­ین گؤرونوردولر. بیز ساواشا احتیاجیمیز واریدی. ساواش روحییه لی انسانلاردا داها الوئریشلی گؤرونوردو. اؤزللیکله شخصاً من اؤزوم بو حاقدا یامان یانیلمیشدیم. بونا چوخ سونرالار چاتدیم. من باشا دوشدوم کی، بیریسی اؤز هم­یئرلیسینه قارشی و یا میللتچیلیک دوشونجه­سین قبول ائتدییی حالدا ، بو دوشونجه­نی قبول ائتمه­ینلره قارشی کوبودجاومدنی انسانا اویمایان بیر داورانیش سرگیله­ییرسه، یارین بو قورالسیزلیق بیزیم اؤزوموزه­ده یؤنه­له بیلر. بو گون اورتاق موخالیفیمیزه قارشی اخلاقا سیغمایان، مدنییته سیغمایان داورانیش اورتایا قویان بیریسینه ، یارین موخالیفی ائله من اولابیلرم. آنجاق  نه یازیق کی میللی حرکتین کؤرپه اولدوغو زامان، کیم بیر قولایجا میللتچیلیک فیکرین ساوونوردوسا، اونو باغریمیزا باسیردیق. علی قهرمانی شخصاً منه خیانت ائتمیشدی. آنجاق  اونون بو داورانیشی بیزیم بؤلگه اوشاقلارینا بؤیوک ائتکی بوراخمیشدی. ائله منیم اؤزوموده ائتکیله­میشدی. میللتچیلیک آدین داشییان هرکسه اینانماق و اونا گوونمک، آرتیق سورو آلتینا گئتمیشدی. منیم ایده­آللاریمین بیری اوچموشدو. بیر بیریمیزین الیندن توتماغی گؤره­و سانیردیم. ائله اونا گؤره ده اونو ایشسیز گؤردویوم حالدا اونا اقتصادی ایشله باغلی تکلیف وئرمیشدیم. تاپشیردیغیم پولو، منی آلداداراق آتمیشدی. بو مساله نی بیر یاخین دوستو منه آچمیشدی. اونون بو ایشه گیرمه­سینین سببین دئدیکده ، معتاد اولدوغونو منه دئمیشدی. او دئییردی کی علی قهرمانی دئییرمیش: "من نئچه ایلدیر آذربایجانا چالیشیرام، ایندی حاققیمی آلمیشام، یوروشون پولون قایتارمایاجام." بیز بو مساله نین دالین توتدوغوموز حالدا علی قهرمانی منی هده­له­یرک مئساژ یازمیشدی. او مئساژدا منی هده­لمیشدی کی " گئدیرم اطلاعات اداره­سینه و بوتون اوشاقلار حاقدا اورادا دانیشاجام". او زاماندان من پولومون دالین توتماقدان واز کئچدیم. همده بؤلگه­ده کی فعالیتیمیز دایاندی. هر آن بو حاقدا سورقولانماغی گؤزله­ییردیم و ایندی زامانی گلیب چاتمیشدی. من ائله دوشونوردوم کی، لاپ او یالاندان دا منی هده­له­سه، بیر گون بونو اطلاعاتا چاغیریب هرنه­یی سوروشا بیلرلر و او زامان نه اونون ایلقارینا اینانماق اولاردی نه­ده­کی اطلاعاتی او آلدادابیلردی. اطلاعات یقین سوروشاجایدی کی، نه­یی بیزه دئمک ایسته­ییردین؟دئدیم:

-          سیزین آدامیزدی دا، اؤیرتدیز منیم پولومو یئدی.

بازجو آجیقلاناراق دئدی:

-          او قودوق کیمدی کی بیزیم آدامیمیز اولا؟ گتیررم بورا او زامان هرنه­یی بولبول کیمی سایار اوزووه. اوندا دیلین آچیلار. او پوللاری هاردان گتیرمیشدین؟ بللی دیردا پول پایلیییرسان، یوخسا بیر نفر لات لوت کی هئچ نه­یه اعتقادی یوخدور، آدام اونا پول تاپشیرار؟!

بو علی قهرمانی نین مساله سی آچیلدیقدا بازجونون کیم اولدوغو بللی اولدو. او قاباقجالار جولفا اطلاعات اداره­سینین مودورویدو. او زامان منی ده 2-3 دؤنه چاغیرمیشدیلار. اونو یاخیندان گؤرموشدوم. آدین "رضا عبدی" اولاراق دئمیشدی بیزلره. ائشیتمیشدیم همین آدام تبریزه گئدیب. ائله علی قهرمانی گیلدن ائشیتمیشدیم بونو. آنجاق  بیلمیردیم بورادا بازجو کیمی، اؤزوده بیرینجی دیندیرمن (بازجو) کیمی اولابیلر. اؤزومو بیلمزدن گلدیم. دئدیم:

-          اونلارین هامیسین بیلیرسیز. من آل وئر ائدیرم. نئچه ایلدیر ایشله­ییرم.

اهرلی بازجو:

-          ائرمنیستاندان اسلحه گتیره­جه­یمیشلر حاجی! تیریئک ساتاجاقمیشلار!!

تئز تپکی وئردیم:

-          بیر معتاد آدامین، دئیه­سن سؤزو سیزه داها کئچرلیدیر.

بیرینجی بازجو آزجا اؤزونو باشادوشن گؤستررک دئدی:

-          به ائله دئیرلردا. لات لوتو ییغیسان دؤوره­وه، جلسه قوروسان. بئله اولاردا آخیری. او سنی پرستیش ائدن آداملارین هامیسی ائله دیر. اونلاردا بیر بیر اوزه چیخاجاقلار. ائله او بؤیوکلریزده بئله­دیر. ایسته­سم آچام گؤررسن نه­لر اولوب.

بو آندا آرخادان باشقا بیر بازجو منه یاخینلاشدی. یازدیغی بیر سورغونو قاباغیما قویدو. بیرآز آلای ائدیجی گولومسمه کیمی سسلر گلدی. سانکی منی بو سورغو ایله تسلیم ائدجکلر. دوغورداندا سورغویا باخدیقدا گؤزوم قارالدی. ایسته­مه دیم قلمین الیمده تیتره­مه­سین گؤره­لر. اونا گؤره سورویا بیر نئچه دؤنه باخدیم. دوداقلاریمی اؤنمسیز سوالدیر دئیه قاچیرتدیم. بو سورو ائله بئله سورو دییلدی. دوز منیم گیزلتمک ایسته­دیییم قالانی هدف آلمیشدی. سوال فارسجایدی طبیعی کی. آنجاق  تورکجه سی بئله اولوردو:

آشاغیداکی مستعار (تاخما) آدلارا گؤره آچیقلاما وئر.

1-مار بَی 2- خود بَی  3- سام بَی  4- تار بَی  5- کار بَی  6- قوش بَی  7- اور بَی 8-یاخ بَی

سوال اؤنومه گلمزدن اؤنجه آرخادا اهر لهجه­لینین پیچیلدیسین دویموشدوم. مرکزی کمیته آدی قولاغیمدا زینگیلده­ییردی. بو ادلار گئرچکدن مرکزی کومیته­میزین تاخما آدلاریدی. آنجاق  قالانی نئجه؟ اونلاری نییه یازماییبلار؟ هله لیک یالنیز اونلارین سورغوسون آتلامالیدیم. اؤز سورولاریما سونرا جاواب تاپابیلردیم. قاباقجالار اوخودوقلاریم و تجروبه­لریم (دئنه­ییملریم) منه دئییردی کی، دؤزسن اؤز سواللارینا جاواب تاپارسان. دؤزمه­لیدیم کی بو آدلارین هاردان گلدییی اورتایا چیخا. آنجاق  هاردان گلمه­ییندن آسیلی اولمایاراق دانمالیدیم. ائله بو دوشونجه­ده­یدیم، رضا عبدی بیر داها باشیمین اوستونه گلدی. آنجاق  بو دؤنه الینده بیر باشقا کاغاذ ساللایاراق. کاغاذی اؤنومه توتدو. سانکی داها دانماغا بوتون یوللاری باغلایاجاق کیمی، اوجا و سوچلاییجی (اتهام ائدیجی) سسله دئدی:

-          بیلیرسن سنین ائویندن نه­لر تاپیلیب؟ باخ! برلمه! سواللارا صادیقانه جاواب وئر! یوخسا ایشین چتین اولاجاق. گؤرورسن؟ بونلار نه دیر؟

کاغاذلار بیزیم ائودن گتیریلمیشدیر. بیلگی­سایارین اؤنوندن. او گون دومان بی ساوالانا و باشقا قوروم اویه­لرینه یازاجاقلاریم حاقدا کیچیک نوتلار گؤتورموشدوم. او نوتلار باشقا زامان هئچ نه­یی ثبوت ائتمزدی. آنجاق  ایندی دیرنمیشدی بوغازیما. کاغاذدا بو سؤزلر یازیلمیشدی: "تار بی، اور بی، همدان حئساب نومره­سی، گوونلیک، بایراق". بو سؤزجوکلر اوستدن آشاغا یازیلمیشدیلار. باشقا سؤزلرده واریدی آنجاق  اونلاری قارالامیشدیم. باخجاق سؤزجوکلرین هامیسی بئینیمده یازیلدی. بیرده کی چوخ اوزاغین یازیسی دییلدی. من ائوده ائله شئی­لری ساخلامازدیم. بونلار ایش اوستده توتولموشدولار. او گولله یه اوخشایان کلمه­لره باخاراق، اوره­ییمین چیرپینتیسینا رضا عبدی­نین سسی قاریشدی:

-          هه، بو یازیلار نه دی؟ بیر بیر توضیح وئر!

-          اونلاری ائلچینله یازیشدیقدا نوت گؤتورموشم.

اوستومه چیغیردی:

-          نه ائلچینی؟ نه یاپیشیبسان بو ائلچین دن؟ اوننان یازیشاندا نوت نییه گؤتوروردون؟

سؤزو بیتمه­میش جاوابلادیم:

-           ایسته­ییردیم اونون دانیشیقلارینا جاواب وئریم دا. یادیمدا قالسین نه دئیه­جم.

باشیما دالدان بیر یومروق ده­یدی:

- یاخشی بو سؤزلرین معناسی نه­دیر؟

چکیلدیم اوتوروغا دایاندیم. اللریمی نیطق ائتمک آماجی ایله قیفیللادیم بیر بیرینه. دریندن بیر نفس آلدیم. باشلادیم ناغیل دئمه­یه. من تاتارا چوخ قوشما ناغیللار دئمیشدیم. ناغیللاریم بیتمزدی. اوزالتدیقجا اوزاناردی. ایندی ایسه منی دؤیه­رک ناغیل دئدیردیردیلر. من دئیه بیلمزدیم کی، تار بی تهراندان آزاد بی دی، اور بی اورمودان علیرضا عبداللهی (ائلیار بی) دیر. دئیه بیلمزدیم همدان دا بایراق آسیلماقلا باغلی همدان سؤزون یازمیشام، حئساب نؤمره سی یاشار بی کریمی نین حئساب نؤمره سیدیر، یو.ان.پی.او گؤروشونه چهرقانلی بی یین گئتمه­سی اوچون ییغدیغیمیز پوللاری او حسابا تؤکه­جکدیک و دئیه بیلمزدیم کی بایراق سؤزون یازمیشام ، بایراقلارین آسیلماسی ایله باغلی پیلانیمیزی یازام. بونلاری اودمالییدیم. دئدیم:

-          ائلچینله دانیشاندا دیشاریدان گیلئیله­نیردی. هامیدان. اونا گؤره ائشیکده­کیلرله باغلی دانیشیردی. بیر سیراسینین آدین چکیردی. منده اونلارین آدین قئید ائتدیم کی سونرا ماراقلانام گؤرم کیمدیلر. ائلچین بی دئییردی او یازیشمالاریندا اور بی تاخما آدیلا یازیشار. باشقاسینین آدی آیتاشیدی، اودا تار بی آدی ایله یازیشار. حساب نومره­سی ده من ائلچینه دئدیم کی اوردا پول سورونو اولسا حساب نومره سی وئر، عایله­نله دانیشیم، اونلاردان آلیب تؤکرم. ائلچین دئییردی بو ائشیکده یئنه بایراق داعواسی دوشوب، اونا گؤره بایراق سؤزون یازمیشام کی او حاقدا فیکیرلشم، فیکریمی دئیه­م. بیرده ائلچین دئییردی همدان دا اؤیرنجیلردن توتولوب. اونلاری تانیماغیم حاقدا سوروردو.

سؤز تامام اولدو. رضا عبدی منیم یالانیمی چیخارماق ایسته دی:

-          همدان دا کیمی توتوبلار کی؟

الیمی بیرداها چنه­مین آلتینا دایادیم. سانکی بورادا هئچ بیر شوبهه­لی (قوشقولو) و قئیری عادی بیر شئی یوخدور. گؤزباغینین آلتیندان دیندیرمنلرین حرکتین ایسته­مدن ایزله­ییردیم. بو آندا اهرلی دیلله­ندی:

-          دورما دی یاز. سنین او دانقازلیغیوی بوردا دوزلدریک. او بئینیوی آچمالیسان.

ائله دئینده بئینیمدن بیر سؤز کئچیردی: "نئجه اولسادا بئینیمی آچماق اؤز الیمده­دیر". باشلادیم یازماغا. تاخما آدلارین اوچو حاقدا یازدیم. اور بی عسگر اورهان، تار بی آیتاش، مار بی دومان ساوالان (سجاد رادمهر) دیر. قالانی حاقدا ائشیتمه­میشم. اصلینده مار بی من اؤزومودوم. بونو بیلرک بئله یازدیم کی ساکی اونلاری چاشدیریم.

دومان ساوالان بیزیم مرکزی کومیته نین دیرلی عضولرینده نیدی. او خییوودان اولان ساوالانین (شهرام رادمهر) قارداشییدی. 1387-ده آذربایجان اؤیرنجی حرکاتی اولاراق (آذوح) توتوقلانمیشدیلار. اودا 3 آیدان چوخ بورادا تکلیک سللوللاریندا قالمیشدی. او طامانلار من اونونلا بیر باشا ایلگیمی گیزلدردیم. آنجاق  ایندی او آرتیق سوئد اؤلکه سینده­یدی و هرنه­یی اونون باشینا سالماق اولاردی.

آز سونرا کاغاذی قاباغیمدان گؤتوردولر. اونلارجا او کاغاذین هئچ دیه­ری یوخودو. الینه آلیب اوخودوقدان سونرا دئدی:

-          موطمئن­سن بونلار ائله بو آداملاردیر و قالانین تانیمیرسان؟

-          ائلچینین دئدیکلری بودور. منده اوندان ائشیتمیشم.

بو آندا قاپی آچیلدی . بیر نریلتی سسی گلدی. جلادلاری، دئولری آندیران بیر سس: "اؤؤؤؤؤوووووو"

رضا عبدی دؤندو سسه ساری و منه سؤز آتماق آماجی ایله دئدی:

-          نئجه­سن حاجی؟ شام ییدین؟

بورولتولو سس فیسیلدایاراق جاواب وئردی:

-          هه یئددی پورس

-          ایندی حاضیرسان­دا ایشه؟ بونو زئرزمییه آپارابیلرسن؟ بیر ازیشدیره­سن؟

فیسیلتی ایله نریلتی دولو سسله قاپی آچان بیرداها سسلندی:

-          هه، قوی گئدیم اوبیریلرین ایشین بیتیریم گلیم.

گؤزلویوردوم ایندی زاریلتی، قیشقیرتی و آغلاماق سسی سالونو آز سونرا بورویر. یئرآلتین تصوور ائدیردیم. رحمتلیک امانی نین خاطیره لری بئینیمده جانلاندی. اونودا آپاریب، یئرآلتیندا دؤیموشدولر.  70 گون اطلاعاتدا قالمیشدی. بازجوییلرده آتیشماسی، آیاقلارینا وورولان شاللاقلار، اوسته­لیک شاللاغین باشی دویونلو اولماسی، امانی بی­یین آیاقلارینین بو دؤیولمه­ده سینماسی... هامیسی بیر آندا بئینیمده جانلاندی. اونونلا ایلک دؤنه تبریز زیندانیندا 1381-ده گؤروشموشدوک. 5 ایله یاخین بو دوستاقدا قالمیشدی. سونرادا زینداندان چیخدیقدان بیر سوره سونرا، یولداشلارین قراری و منیم دانیشماغیملا، رحمتلیک امانی بیزه قوشولموشدو. گاموحدا یئنیلیکلرین باشلاماسینین ایلک آنلاریندان اودا واریدی. قالسایدی ایندی اونون دا آدی بورادا اولاجاقدی....

آدئرنالیندیر کی سیزماقدایدی(ترشح اولماق). بدنیم اویوشوب آچیلیردی. آنجاق  ائله بو تصوورلرین ایچینده یولداشلارا دانیشدیقلاریمدا یادیما دوشدو. من گوونلیک قونولاری حاقدا دانیشاندا دئیردیم گرک قولوموزدا کسیلسه سؤز وئرمه­یک. سونا یادیما دوشوردو. من اونون گؤزوندن دوشه­بیلردیم و تاتار. او گلجکده بوتون بونلاری بیلمه­یه حاقلیدی. "اؤزوم سینسام، بو سوسول نونور، بئجردن زاماندا تاتاری نئجه یئتیشدیره­بیلردیم؟!" یومراغیمی دویونله­دیم، "هایدی دؤیوشه دوغرو" دئییب، اؤزومو حاضیرلادیم. اوتاقدان بیر بیر بازجولار چیخدیلار. دؤنوب آرخاما باخماق ایسته ییردیم. آنجاق  ساده­جه آشاغا اییلیب ، گؤزباغینین آلتیندان باخا بیلردیم. آرخادا گؤره بیلدیییم قدر کیمسه یوخودو. 20 دیقه­یه یاخین گؤزله­دیم. بازجویی اوتاقلاریندا و گئنلده اطلاعات اداره سینده بو گؤزلمک یامان استرسلی اولور. آرا-سیرا اؤزومو اله آلماق اوچون یورقون گؤزلریمی یوموب، اؤزومو بیر آغیر ساواشا هوسلی کیمی آپاریردیم. آرتیق بوردا باشقا سئچیم یوخودو. من دیرنمه­یی سئچمیشدیم. گرک سونوناجان گئد­ه­یدیم. بو هله ال قیزدیرماغیدی. 20 دقیقه سونرا اهرلی بازجو ایچری گیردی:

-          هه نه دئییرسن؟ فیکیرلشدین؟ اؤزون بیل ها، من تجروبه­مه گؤره دئییرم بونلاری. بورادا هئچ کس سؤز آپارابیلمز. گرک هرنه­یی دئییب، گئدسن. ایندی داها اشرف دهقان زامانی دییل. ایندی سیاسی لر گلرلر هر سؤزلرین بیر ساعاتین ایچینده یازیب، گئدرلر. بوردان چیخاندان سونرا تانیشلاریندان حتماً واردا، سوروش گؤر ائله دئییرلر یا یوخ. نه ایش گؤروبسن کی؟ گاموح ائله بیر شئی دییل کی، بوردا طرف گلیر نئچه ایل مونافیقلره ایشله­دیکدن سونرا تؤبه ائلیییر گئدیر یاشاییشینین دالینجا. ایندیده گؤرورسن دا، بیز بوتون حؤکملری تعلیقی وئریریک. هئچ اونادا گرک اولماز، بیز بیلسک بیر نفر دوغوردان پئشمان اولوب. من هئچ دئمیرم ها فعالییتیوی دایاندیر. یوخ. آنجاق  گرک بو تشکیلاتدیر، قوروهدور، بونلاری بوراخاسان. اؤزووو یئرسیز اینجیتمه، ایناد ائلمه، بونو بیل کی، سنی ائودن گتیریبلر. بوردا بیری حاقدا معلومات اولماسا ائودن گتیرمزلر. نه­یین وار یاز، تؤک یوکو بئلیندن، چیخ گئت ائوینه، ائشییینه. من ائله داریوشا دا دئدیم او زامان. بیلیرم بو تشکیلاتی جوزوه­لردن اوخویوبسان، حیس ائلیرسن گرک اونلار کیمی حرکت ائدسن. باخ هانسی حیزبی ایسته ییرسن بوردا آچیب تؤکوم. هامیسی گلیب بوردا مه­لئییب گئدیب. او کیتابلاردا یازیلانلار افسانه دیر.

آردی آردیندان دانیشیردی. هردن آرا وئریردی مندن بیر سؤز ائشیده، آنجاق  من دینمیردیم. سونوندا سون سؤزون دئدی:

-          یاخجی ایندی کاغیذ گتیریرم یاز، گتیریم؟

-          من سوردوقلاریزین هامیسین جاوابلامیشام.

آزجا دالی چکیلیب، آل-وئرده دببه ائدنلر کیمی منی دیه­رلندیریرجه اؤزل لهجه ایله دئدی:

-          باخ اولمادی دا تای! ائله دئینده، منه توهین ائلیرسن. تشکیلاتا(اطلاعاتا)  توهین ائلیرسن. یا دئ کی بیلیرم دئمیرم، یادا آچ هرنه­یی یاز، چیخ قوی گئت. ایندی دئییرم گتیرسینلر شام یئیه­سن. بیر یاخشی عاغیللی دوشون. سونرا یازارسان. کاغیذلاری بورا قویورام.

بونلاری دئییب، اوزاقلاشدی. بیرآز سونرا یئمک گلدی. گون اورتا یئدیییم هامیسی قارنیمدا دویونلنمیشدی. آنجاق  یئنه بوتون عذابینا باخمایاراق یئمه­یی یئدیم. یئمک سونراسی یئنه هرنه یئنیدن باشلادی. هده­لمه­لر، دؤیمه­لر، تحقیرلر(آلچاتمالار)، تلقینلر، تقصیرلندیرمه­لر و سوچلو اولماغیمی کسین گؤسترمک، بلوفلار و اوسماخلاتمالار (دیله توتمالار) گئجه سونونادک سوردو. دانیشیقلاری تیکراری اولسادا ائله یورولمادان سوروشوردولار. من دانماقدان، یوخ دئمکدن یورولدوم، آنجاق  اونلار هردن بیر یؤنتم ایله (مئتود ایله) همن سورولاری یئنیدن سوروشوردولار. سونوندا سون هده­لمه­نی اهرلی بازجو ائدیب، گئتدی:

-          بورا باخ، بیزیم ایشیمیز بودو. یورولمایاجاییق. یئری گلسه آیلارلا گئدیب یاتاجان سللولدا، بیزه هئچ نه اولمویاجئه. آخیردا اؤزون چاغیریب، سؤزلرینی دئیه­جن. ایندی گئت یات، فیکیرلش، صاباح گئنه دانیشاجاییق. البته بیلیرسن دا بورادا هر شئی مرحله مرحله قاباغا گئدیر. قالیب سنه. اؤزون هرنه­یی تعیین ائلیرسن.

دئییب، چیخدی، بدنیم دؤیولمکدن و بئینیم سؤیولمکدن ازیلمیشدی. اوجا بویلو، اورتا یاشلی (50 یاشی اولاردی)، قولاغی ضعیف ائشیدن گؤزتچی بیر آز سونرا ایچری گیردی. ائله قاپینین آغزیندا دایانیب، چاغیردی : دور گل!

اوز گؤزوندن آجیلیق تؤکولوردو. بلکه ده گئجه او واختاجان اویاق قالماسینی منیم اوزومدن گؤروردو. هرحالدا چشمبندیمی (گؤزباغیمی) ووروب، دوردوم آیاغا. سول قولومدان یاپیشدی، اورتا سالوندان کئچیریب، قاباقکی ایللر گؤردویوم  بالاجا حَیَطدن کئچیریب، یاتاق سالونونا کئچیردی. نئچه ایل کئچسه­ده هرنه تانیش گلیردی. ساغا دؤنوب، دار سالوندا، ساغ الدن اوچونجو اوتاغا یاخینلاشدی. یاواشجا گؤزتچیدن سوروشدوم:

-          باغیشلایین دیشلریمی یویا بیلرم؟

گؤزتچی آجیقلاناراق گؤزون برلدیب پیچیلدادی:

-          کیشی­نین اوغلو گئجه ساعات 2 دیر. نه میسواکی؟ گیر یات!

قاپی منیم اوچون آچیغیدی. اوتاغین متیریاریم ائنی و ائله اوقدرده بویو واریدی. باشماقلاریمیدا چیخاریب اؤزومله ایچری آپارمالیدیم. قاپینین سول الینده بیر بالاجا موکت تیکه سی­نین اوستونه قویدوم باشماغیمی. تزه ائویمین بوتون اشیالاری قاپیدان گیرنده سول بوجاقدایدی. بیر بالاجا سو گویومو، بیر بالاجا سوفره و بیرایشلیک (یکبار مصرف) قابدا بیرآزجا قند. اوتاغین یان یؤره سینه باخدیم. سونرادا یورقونلوقدان و ازگینلیکدن  دولایی یاتاجاقلاریمی حاضیرلادیم. کؤینه­ییمی چیخاریب، یاستیق ائتدیییم قوخولو پتونون اوستونه سالدیم. اوستومه سالدیغیم پتونودا دؤشومه قدر چکدیم. گؤیه اولدوزلارا باخار کیمی، باخیب، یاتماق ایسته­دیم. آنجاق  بورادا نه اولدوز واریدی، نه­ده قارانلیق. قاپی­نین باش طرفینده بیر چیراق یانیردی. بو چیراق گئجه گوندوز دئمه­دن یانمالیدی. بورادا گئجه گوندوزو قارانلیق یوخ، بازجولار تعیین ائدیردی. یاتماق ایسته­ییردیم آنجاق  اوره­ییم کئچیردیییم دیندیرمه­نین استرسیندن گوپ گوپ گوپبولدویوردو. یادیما گلیر کی بیر زامان ایدمان ائدن زامانلاریم، منیم اورک دؤیونتوم دیقه­ده 48 ایدی. آنجاق  ایندی 120 نی آشمیشدی. بونو بیرتهر آزالتمالیدیم ، یوخسا یاتماق اولمازدی. قوللاریمی یانیما سالیب، دریندن آردی آردینا نفس آلیب، تؤیشه­دیم. بدنیمی تام بوشالتدیم. گؤزلریمی یوموشاقجا یوموب، ساده جه نفس سسلریمه دوشوندوم. استرسی دایاندیرماق اولموردو. 20، 30، 40، و آردی آردینا نفس چکدیم. جاواب وئرمه­دی. ایسته­مه­دیییم مساله­لرین اوستو آچیلماقدایدی. بلکه ده آچیلمیشدی. من ایللر بویو نئچه دؤنه توتوقلانسامدا، بیر سیرا مساله لری گیزلی ساخلامیشدیم. ایندیسه بازجولارین آتماجالاری اونلارین اوزه چیخدیغیندان خبر وئریردی. نه ائتمه­لیدیم؟ نئجه یوزمالیدیم؟ سونوناجان دیرنمه­لیدیم می؟ بورادا بیر استراتژی اولوشدورمالیدیم یوخسا کیچیک کیچیک سورولارلا منیم یالانیمی چیخاراردیلار. گئجه نی سحره­جن واخت واریدی. آنجاق  هرنه­دن اؤنجه بو قارا گؤی استرسی آرادان قالدیرمالیدیم. قاباقجالار دئنه­میشدیم کی زیندانی، اؤزللیکله انفرادینی خیاللارلا کئچیرمک ان یاخشی یولدور. خیاللاریملا (دوشلریمله) ائله واخت اولموشدو کی تهراندا، ائوین دوستاغیندا بیر گونو گئجه­یه قدر بیر صحنه­ده یاشامیشدیم. ایندی تام زامانیدی. گؤزومو یوموب گئتدیم کئچمیشلره، سئوگیلیم سونا ایله یاشادیغیمیز آنلاری گزمه­یه. ان گؤزل، ان هیجانلی خاطیره­لره جومدوم. اونونلا یاشادیغیمیز اوقدر شیرین آنلار واریدی کی، بیر ایلیمه بس ائدردی. آنجاق  تلسمه­مه لیدیم. بیر بیر، آستا، آستا اونلاری یاشامالیدیم. دوشلریمی (خیاللاریمی) مینیب گئتدیم یوخویا. بیلمیرم نئچه ساعات چکدی یاتاناجان. آنجاق  قاپینین آچیلماسی ایله دیک دوردوم آیاغا. همشه اؤز یوخو سیستئمیمدن راضیدیم. نورمالدا سحر دویونجا یاتاردیم، آنجاق  ایسته­نیلن زامان گئجه نئچه­ده اولسا، ارینمه­دن دیک دوراردیم آیاغا. قوجابابامین منه تاپشیریغینین اوچوندن بیرینی سوزده یوز منیمسه­میشدیم. "ارینمه، اوتانما، اینانما". من هئچ نه­یه ارینمزدیم، آنجاق  اوتانماق و اینانماغا گلدیکده همشه آخساییردیم. منه ده­ینلرده ائله آلدانماغیمدان و یئرسیزجه اوتانماغیمدان ده­یمیشدی.

گؤزتچی­نین حؤصله­سیز سسی ندن آییلتدیغیمی بللی ائتدی. اونسوزدا بو اویاتماق تانیشیدی منه:

-          دستماز، دستشویی

قاپینی یارییا قدر آچمیشدی. دوردوم آیاغا و بازجونون ایکینجی گؤستریشی ایله گؤزباغیمیدا ووروب، دمپاییلریمی (شپیتلریمی) گئییب، چیخدیم سالونا. سولا ساری گؤزتچینین یؤنتمه­سی ایله یئریدیم. سونرا ساغا دؤنوب، بالاجا آچیق بیر قاپیدان باشقا کیچیک بیر سالونا گیردیم. بوراسی توالت و حامام سالونویدو. سول الده حاماملار (3حامام) ، ساغ الده ایسه توالتلر. گؤزتچیلر بیر بیر بیزی گتیریب، توالته اؤتوروب، گئدیب باشقالاریندا گتیرردیلر. ائله ائدردیلر کی کیمسه کیمسه­نی گؤرمه­سین. توالتلرین قاپیلارینین قاباغیندا دیش فیرچالارینین یئری واریدی. اورادا فیرچالاری سایماقلا بیلمک اولوردو نئچه نفر اؤزوندن باشقا توتوقلو وار. من دؤرد میسواک سایابیلدیم. توالتدن قاییداندا ایسه ، گؤزباغیمین آلتیندان بیرداها قالدیغیمیز یئرین کوروکیسین یوخلادیم. ایلک باخیشدا یاخشی باشا دوشمک اولموردو. آنجاق  سونرالار بیلدیم کی سول الده 4 بؤیوک اوتاق وار، 12 متر فرش یئین ، ساغ الده ایسه بیر نفرلی اوتاقلاردی. 5 اوتاق واریدی. دیب اوتاقدا گؤزتچیلردن بیری گئجه یاتیردی، بیرینجیاوتاقدا دوقتور هردن زیندانیلره باخیردی. آراداکی 3 اوتاق ایسه بیرنفرلیک اوتاقلاریدی. دئمک اولار بؤیوک اوتاقلارا وئریلنلرین دورومو باشقالاریندان یاخشی اولوردو. اورایا گئتمکله دئمک اولوردو کی، ایشین یونگولدور. بؤیوک اوتاقلاردا، 3-4 نفری بیر یئره وئریردیلر. آنجاق  آدام آز اولاندا تک ده قالانلار اولوردو. بونلاری زامان کئچدیکجه باشا دوشدوم. یوخسا قاباقجا بوتون اوتاقلارین بیرنفرلیک و کیچیک اولدوغونو سانیردیم.

گؤزتچی منی اؤز یئریمه گتیریب، قاپینی بیرداها باغلادی. بورادا هر هانسی اوتاغا گیردینسه، همن آردینجا قاپی باغلانیر. ایندی دوشونمه­یین زامانیدی. من اؤز ساوونما خطیمی چیزدیم. اوتاغین ایچینده اویان بویانا گئدیب، اؤز استراتژیمی بللی ائتدیم. بورادان بیر قهرمان کیمی باشی اوجا چیخماق ان باشلیجا آماجیمیدی. بونون اوچون اؤرگوتون آچیلماسینی اؤنله­مه­لیدیم. اؤزومه نه اولورسا اولسون تشکیلاتیمیز آچیلمامالیدیر. بو آماجلا نئجه داوراناجاغیمی خیردالیقلارا باخمادان بللی ائتدیم. یوخسا خیردالیقلارین هامیسینا جاواب تاپماق اولمازدی. اونلارین ایستکلرین اؤنجه بللی ائتدیم، سونرادا اؤز ایستکلریمی و اوندان سونرا نئجه داوراناجاغیمی. اونلارین ایسته­یی:

1-     اؤنجه منی سیندیرماق

2-     سونرا منده اولان بیلگیلری آلماق(یولداشلاریم، پیلانلاریمیز و ...)

3-     او بیلگیلری و منی حرکته قارشی قوللانماق

بونا قارشین من سینمامالیدیم، بیلگی وئرمه­مه­لیدیم و اونلارا هئچ بیر استفاده یئری قویمامالیدیم. سونرادا بو هدفلره چاتماق اوچون نئجه داوراناجاغیمی بللی ائتدیم. هرنه­دن اؤنجه اؤزوم اؤزومه سؤز وئردیم کی کسین بورادان چیخماغا دوشونمه­مه­لییم. بورادان چیخماغا دوشونرسم، تلسه­جم، چالیشاجام نئجه اولورسا چیخیم و بودا منیم سینماغیما، بیلگی وئرمه­ییمه گتیریب چیخارار. من آرتیق یئنی بیر دونیایا گیرمیشم، بورادا یاشامالییام، بورادان قیراق نه وارسا، هامیسی هله­لیک بیتیب. بورادان باشی اوجا چیخسام، یئنی­دن او وارلیقلارا قوشولابیلرم یوخسا اونلارین هئچ بیرینین دیه­ری اولماز. من بورادان ائشییه هئچ ایش گؤره­نمه­رم، یالنیز گؤره­جه­ییم ایش، هرنه­یی اؤرگوتله باغلی دانماقدیر. بو حاقدا نه اوتانمالییام، نه آلدانمالییام، نه­ده اونلارا گوونمه­لییم. حتی تام بلگه­لی، سندلی سؤزلرینی ده رد ائتمه­لییم. بورادا هئچ کسه گوونمه­مه­لییم. آتماجالارین آلدیرمامکالییام(سایمازدان گلمه­لییم). بلوفلارین سایمامالییام. اؤزومو او یولا وورمالییام. لاپ بیر یئرده آغزیمدان بیر سؤز چیخدی و یا بیر یالنیشلیق ائتدیم، سونرا لازیم دییل اونون آلتیندا قالام. هرنه­یین آلتینا وورابیلرم. لاپ اؤز یازیلاریمی دانابیلرم. ال یازیلاریمی بئله. ایمئیل­لریم بئله و حتی مئساژ و تلفون سسلریمی. بونلار بئله­لیکله منیم بوینوما بیر شئی قویانماسالار، کئچه­جکلر هده­له­مه­یه. ائله دوننندن هده­له­ییرلر. هده­لردن قورخمامالییام. اونلاری اویقولاسالار (هده­لره عمل ائتسه­لر بئله)، تسلیم اولمامالییام. قورخمامالییام، سونو اؤلومدو. سونرادا اولو بابکین سؤزلرینی اوتاقدا آتدیملایاراق تکرارلادیم:"بیر گون ازاد یاشاماق، قیرخ ایل بویوندوروق آلتیندا اینیلدمکدن یئی­دیر". "قورخاق گونده یوز یول اؤلور، ایگید عؤمورده بیر یول" و ... .

آلچاتمالارینا (تحقیرلرینه)، یامان دئمه­لرینه فیکیر وئرمه­یه­جم. اونلار بیلیر کی من کیمم. دئدیکلری آلچاقجا سؤزلر ساده جه منی سیندیرماق اوچوندور. یعنی بیرینجی هدفلری اوچون. یوخسا من بونلارین هامیسیندان هم بازجویی مئتودلاریندا، همده ساواددا اوستونم. بونلار اوشاق موشاقدیلار. بیده­کی حیرصلنمه­مه­لییم. ترسینه اونلاری حیرصلندیرمه­لییم. اونلار سینیرلنه­جکلری زامان (حیرصلننده) چوخ شئیلری بایدیراجاقلار. من سوچلو دییلم، اونلار دونندن هئی چالیشیرلار منی گوناهکار کیمی گؤسترسینلر. من حاق یولوندا چالیشیرام، بونا فخر ائدیرم، اونا گؤره اونلارین بو حاقدا تلقینلری منه تأثیر ائتمه­مه­لیدیر. دؤزمه­لییم. من آنجاق  دؤزمکله هرنه­یی آشیراجام.

اوتاغی ائنی بویونا یوخ او بوجاقدان بو بوجاغا آددیملاییردیم، هئچ اولماسا دؤر بئش کیچیک آددیم آددیم اولا، تئز تئز دؤنمه­یم. ائله کی ساواش استراتژیسین بللی ائتدیم ، تاکتیکلره فیکیر وئرمه­دن، احتیماللارا فیکیر وئرمه­دن، قالانین ائله آنا خطه تاپشیردیم. چون بوندان آرتیق پیلان یاپماق اولمازدی. آنا خط بللی اولدوغو حالدا قالانین چؤزمک اولاردی. سونرا هرنهیی بللی ائتدیکدن سونرا سانکی آرتیق دؤیوشه حاضیر اولموشدوم. راحاتلامیشدیم. بئل بوخونوم آغریییردی، پیلانیمدا بللی ایدی. اونا گؤره بیر آزاد اوزانیب، یئرده فیکیرلشمک ایسته­دیم. سونایا، تاتارا و یولداشلاریما دوشوندوم. اونلارلا خیالیمدا دانیشماغا باشلادیم. سؤز وئردیم کی اونلارین یانینا باشی اوجا قاییداجام. دئدیم داریخمایین، دئدیم آرخایین اولون مندن. تاتاری ایگیدجه بؤیوده­جه­یینه سؤز آلدیم سونادان. اونسوزدا او بونو یاخشی باجاریردی. بو دشونجه­لرله نئچه ساعات کئچدی. سالونون قاپیسینین آچیلماسینی ائشیتدیم. گؤزتچیلر سحر یئمه­یین گتیرمیشدیلر. بیر بیر قاپیلاری آچدیلار و 7 آی هرگون ائشیده­جه­ییم سؤزلری تکرارلاییردیلار (یئنه­له­ییردیلر):

-          چؤرک بیردنه، ایکی دنه؟ لیوان گتیر چای تؤکوم، قندین وار؟ و ...

بو انسانلار نئجه بو ایشلریندن یورولموردولار؟ بونا قالمیشدیم. بیر عؤمور گؤردوکلری ایش عئینی ایشدیر و یاپدیقلاری جینایت. بونلار نئجه گئجه­لر یاتابیلیردیلر؟ نئجه ائولرینده عایله­لرینین اوزونه باخابیلیردیلر؟؟؟

منیمده قاپیم آچیلدی، چؤرک و یاوانلیغی آلدیم. چای ایشمیرم دئدیم، من آلیشقانلیق(اعتیاد) گتیرن نه وارسا  اوندان ساقیناردیم (پرهیز ائدردیم). اونا گؤره ده ایللر اؤنجه­دن چای ایچمه­یه بئله عادت ائتمه­مه­یی پیلانلامیشدیم. آنجاق  سحر یئمه­یی زامانی ائوده چای ایچردیم، بورادا ایسه اونادا یوخ دئمک ایسته­دیم. او گوندن گؤزتچیلر هر یئمک اؤینه­سی، بو سؤزو تیکرارلاییردیلار:

-          سنده کی چای ایچمزسن!

من بیرینجی سحر یئمه­یین نیسگیل ایله یئدیم، هر سحر سونا ایله، تاتارلا بیرگه یئمک یئیه­ردیک. بوگون تک یئییردیم. من دوزگون یئمک مجبورییتینده­ایدیم. آنجاق  بیلیردیم کی بوگونلر سونانین بوغازیندان چؤرک گئتمیر. یقین نیگراندی. یئنه­ده سوروملولوق حیسسی قاباریب، اؤزون اورا بورا ووراجاق. تاتاردا کی او گوندن سونرا بیلمیرم داها نه دورومدادیر. او آجی صحنه یقین بیر عؤمور اونو ائتکی­له­یه­جک. یومک بیتدی. اورادا هر گون سحردن آخشاماجان، گئجه یاتاناجان رادیو آچیغیدی. آنجاق  سحرباشیلار 2-3 ساعات رادیونو آچمیردیلار. بو ساعاتلار باشقا سللوللارداکیلارلا دانیشماغا ان اویقون زامانیدی. آنجاق  دانیشاندا گرک گؤزله­یردین کی هرآن هرنه ائشیدیله­بیلر. قونشو اوتاقلاردا اوچ نفر باشلادیلار بیر-بیری ایله دانیشماغا. قاپینین آشاغا بؤلومو هاوا گئت گلی اوچون نرده­لیدی. آنجاق  بو بارماقلیقلارین اراسیندان اییلیب دانیشارکن ساده­جه قاپینین قاباغین گؤرمک اولوردو. منده اییلیب قاپی­نین جیریغیندان باخاراق اونلاری دینلمه­یه باشلادیم. بیرینجیسی آغلاییردی.،اورکدن آی دئیه­رک آه چکیردی. ای وای اؤلورم، الله، ... کیمی سؤزلری آجیناقلی سسله تیکرارلاییردی. بونلار اوچ یولداشیدی. بیر رپ موسیقی حاضیرلادیقلارینا گؤره توتولموشدولار. بیر بیرینین آدلارینی سسله­ییردیلر و آغلایانا دئییردیلر:

-          موقاویمت ائلییه­جه­ییک ها

سونرادا پرودنده­لرینه گؤره دانیشیردیلار. "نه­یی بیلیرلر، نه­یی بیلمیرلر"

تآسسوف حیسسی سسلرینده قاباریقیدی. قونشو اوتاقلارین بیریندن باشقا بیریسی اونلارا قوشولدو. بللی اولدو کی بو یولداش میللتچیدی. اورمو گؤلو اعتراضلارینا گؤره توتولوب. اونلاردان سوروشدو:

-          تورکویودو؟

-          یوخ فارسیدی

اوغلان اؤز تورکچولویونو اورتایا قویدو:

-          هئچ اولماسا تورکو اوخویایدیز دا

-          انشاءالله گلن دفعه

منده دانیشیغا قوشولدوم. اؤنجه میللتچی اوغلانلا دانیشیغا باشلادیم. اؤزومو اونا تانیتدیم. بیرآزدا اونون تانیدیغی آدلیم آداملاری تانیدیغیمی دئدیم. آرا آچیلدی و او منه گووه­نرک دانیشماغا باشلادی. دئدیم کی سسیمیز ائشیدیله بیلر، آنجاق  قورخما دانیش. ائله دانیش کی ائشیتسه­لر سنه آرتیق بیر یوک گتیرمه­سین. بیرده هئچ کسه، حتی منه گوونمه.

 دئدی:

-          اؤلورم دوز. کامپیوتریمده هرنه وار.

-          نه وار کی؟

-          هرنه، مقاله، فیلم، عکس

من اونا ساده­جه اورک وئرمه­لیدیم:

-          اونلارین اؤنمی یوخدور. منیمده کامپیوتریم دولودور. اونلاری قاباردیرلار کی گویا بیز نه ایسه گوناه ایش گؤرموشوک. قورخما اصلاً ، هرنه یی دیفاع ائله. گؤرمه­دییین ایشلریده اصلاً بوینووا آلما. فیلمدی، شکیلدی، لاپ بئله مقاله دی، اؤزون یازسان دا دئ اینترنتدن گؤتورموشم. تکجه تشکیلاتا باغلی اولدوغووو دئمه. بیر تشکیلاتا باغلی دییلسن؟

-          یوخ، هئچ تشکیلاتا باغلیلیغیم یوخدور.

-          اولسون لاپ باغلی اولساندا بورادا دانمالیسان. منه­ده تشکیلات اتهامی ووروبلار.

-          هانسی تشکیلات

بیلدیم کی حرکتدن خبری وار، آنجاق  بورادا دانیشماق اولمازدی، دئدیم:

-          اوراسی اؤنملی دییل. اؤنملی اودور کی من گرک رد ائدم. آدین نه­دیر؟

-          حوسئین

-          سوی آدین نه­دیر؟

او دئدی کی بس تاخما آدین دئییرم، دئدی: "دومان"

دئدیم:

-          بی آصلان کیمی دایانمالیسان، من 5-جی دؤنه­دیر توتولورام. هئچ ایش گؤره­نمزلر. ایدمان ائدیرسن؟ هر گون ایدمان ائت. چیخماغا دوشونمه، سنین پروندن یونگولدو. یاخشی یئییب، ایچ.

-           منیم قورتاراجاغیم یوخدور.

-          بی سنینکی­نین اون قاتی منده وار. نئچه گون سونرا گئدیرسن زیندانا. ائشیکده گؤروشه­ریک انشاءالله

-          من طالقانی اوشاغییام، انشاءالله گؤروشریک  و ...

اونون بیرینجی دؤنه­سیدی. آنجاق  یاخشیدی. ائله او چتین دورومدا اؤز یولونا اینانجیندان واز کئچمه­میشدی، بؤیوک ایشیدی. اونون داشیدیغی استرس بیرینجی دؤنه اوچون چوخ طبیعی دی(دوغالیدی). بیرده کی هم اؤزو بئله دوشونوردو کی چوخ قورخولو ایشلر گؤروب، همده کی بازجولاردا اونا بونو آشیلامیشدیلار. او ساده­جه هویوخموشدو، اینانیردیم کی سینماز. سونرا گؤردوم اونو. من چیخاندا بیزه گلمیشدی. اؤزو دئییردی کی او آز دانیشیغیمیز اونا چوخلو اورک وئریب. دوزو بودور کی اونونلا دانیشماق منیم اؤزومه ده یاخشی تأثیر بوراخدی. رپ اوخویانلارلادا دانیشدیم. من تجروبه­لیدیم، گرک هرکسه اورک وئریدیم. اونلارادا ائتدیم. اونلارا دانیشماقدا تأثیرلی اولموشدو. او آزجا دانیشیق اونلارین یادیندا قالمیشدی. سونرا زینداندا اونلارین بیری ایله گؤروشدوم. 3 آی زیندان وئرمیشدیلر. چوخ یاخشی اوغلانیدی. بیزیم حرکته ده ماراقلانمیشدی. اؤزو دئییردی کی اون گون اطلاعاتدا قالیبلار، آنجاق  او 10 گونده داغیلیبلار. بونو آچیق اعتراف ائتمه­سینی به­یه­ندیم. بللیدی اونلار اؤز یوللارینا اینانمیردیلار. یوخاری انگیزه­لری (دورتولری) یوخودو. اونا گؤره 10 گون 10 ایل قدر کئچه­بیلردی. بیز او 20 دیقه­لیک دانیشمامیز حاقدا زینداندا، 2-3 ساعات دانیشدیق. گئرچکدن ایکیمیزه ده خوش تأثیر بوراخمیشدی. اؤزللیکله سونرادان همن آداملاری گؤرمک چوخ ایلگینج (جالیب) اولور.

رپچیلره دانیشارکن گؤزتچیلر تؤکولدولر سالونا، بیر بیر بیزی آپاردیلار حَیَطده و توالت سالونوندا دانیشدیردیلار. بو بیردن ائشییه آپارماق اؤزلویونده استرسلیدی. قولومدان یاپیشیب، یئیین توالته ساری آپاریلارکن ، ایسته­مدن اوره­ییم تاپبیلدادی. گؤزتچی منی دووارا دایادی. قوجا کیشینی قاباقجالاردا گؤرموشدو. گؤزلری سورمه­لی کیمیدی. آلنیندان و گؤزلریندن بللیدی گونده نئچه ساعات عیبادت ائلیر. الین باشیمین اوستونده دایادی دووارا، سونرادا هرشئیی بیلیرجه­سینه دئدی:

-          اولارا نه دئییردین؟

سانکی باغچادا اریک، چاققالا ییغارکن توتولموشام! بوغازیم قورودو بیرآندا. دئدیم:

-          هئچ نه، من هئچ کسینن دانیشمامیشام. بیر سسلر ائشیتدیم، آنجاق  بیلمه­دیم کیم ایدی.

سسیمدن و اوزومون قیزارماسیندان بللیدی یالان دئییرم. ائله او اؤزوده اینانمادی. منی هده­له­دی کی بیرداها بئله اولسا تنبیه اولاجام. آنجاق  من بیر دؤنه یوخ، دؤنه­لر تنبیه اولدوم.  بو دانیشماقلار اوستونده هردؤنه نئچه ساعات ترسه قاندال (دستبند) یئدیم. دؤیولدوم. آنجاق  اؤزومه دانیشماغی بورج بیلدیییم زامان، بو تنبیه لری گؤرمزدن گلریدیم. چالیشیردیم دانیشماغیم بیلینمه­سین، کؤتک یئمکدن، اؤزللیکله ترسه دستبددن هئچ خوشوم گلمیردی. آنجاق  چوخ زامان توتولوردوم. بو باخیمدان داها اوزوم آچیلمیشدی. ساوونماغا یئر یوخودو، ساده­جه هردؤنه دئییردیم: "کئف احوال ائدیردیک!"

ایکینجی گون گون­اورتادان سونرا منی اطلاعات اداره­سیندن زیندانا گتیردیلر. بیلیردیم بو تئزلیییه بوراخمازلار، آنجاق  زیندانا آپارمالاری منده بئله بیر کیچیک احتمالدا یارادیردی کی ، اولابیلر بازجویی قورتاریب!!!

آنجاق  بو ایستک دولو احتمال دوز چیخمادی. اونلار منی زیندانا بارماق ایزی آلماق اوچون آپاریردیلار. دئیه­سن بورادا قانونا عمل ائدیردیلر!! گرک اداری بروکراسی­یه عمل ائده ایدیلر. آنجاق  زیندان یولوندا باشقا بیر اولای­دا باش وئردی. زیندانین اوزبه اوزونده بیر چایخانا وار. اورادا ساخلاییب، بیریسینین اورادا اولماسینی یوخلادیلار. ندنسه اوره­ییمه دامدی کی آیدینی آختاریرلار. بایراقلارا گؤره می؟ بیلمیردیم آنجاق  بازجولارین دانیشیغیندان، بیرده سون زامانلار حساس ایشیمیزدن بو بئینیمه چاتیردی کی آختاردیقلاری آدام آیدین خوجالیدی.

آیدین خوجالی قاباقجادا آذربایجان اؤیرنجی حرکاتی (آذوح) قوروجولاریندان اولاراق توتوقلانمیشدی. آنجاق  اونون بیزیمله سیخ ایلگیسینی بیلمه­مه­لیدیلر. او تبریزده دوغولسادا، خوجالی ائلینده نیدی. چوخ سئومه­لی اوغلاندی. 23 یاشی اولاردی. اوجا بوی، ائنلی کورک و قارا قاش گوزلی بیر اوغلان. ایلک دؤنه دومان گیل ایله ائلچی‌نین ائوینده گؤرموشدوم اونو. ائله ایلک گؤروشده بینمیشدیم. ساوادلی، ایستی قانلی و گولر اوزلو اولماسی بیر یانا، اونون جدی‌لیگی و دیسیپلین‌لی داورانماغی، منی قدیم موباریزلرین یادینا سالیردی.  اونو مندن او حساسلیقلا سورمالاری، اوره ییمه بیر قورخو سالمیشدی کی آیدینی دا توتاجاقلار. اونون بو تئزلییه ایکینجی دؤنه اولاراق توتولماسین هئچ بیریمیز ایستمزدیک.

او گون زینداندان قاییتدیقدان سونرا گئجه­یه قدر گؤزله­دیم، بازجولاردان خبر اولمادی. گئجه هر آن گؤزله­ییردیم کی آپارالار بازجویی یه. آنجاق  ایکینجی دؤنه اولاراق بازجویی­یه گئتمه­ییم اوچونجو گونه قالدی.

اوچونجو گون

اوچونجو گون سحر یئمه­ییندن آز سونرا ، گؤزتچیلرین بیری قاپینی آچدی:

-          هواخوری، چشمبندیوی وور گل حَیَطه

اطلاعاتدا اولارکن نورمال گونلر هر گون یاریم ساعاتدان بیر ساعاتا قدر ساخلووون (بازداشتگاهین) حَیَطینه هاوا آلماق اوچون چیخاریردیلار. بو ایش یالنیز اؤزل زامانلار دایاندیریلیردی. او زامان کی آرتیق توتوقلونو اینجیتمک ایسته­ییردیلر، حَیَطه چیخارماماق دا اونون بیر بؤلومو اولوردو. حیه­ت مربع شکیلده متیرلیک بیر یئریدی. بورایا چیخاندا سللوللاردا اولدوغو کیمی، زینداندا اولدوغونو باشا دوشوردون. ایکی قات تیکینتی قدر اوجالیقدا اولان دووارلاری واریدی. تاوانیندا ایسه (سقفینده) بیر دمیر بارماقلیق آراسیندان گؤی گؤرونوردو. گؤی بورادان اؤز گؤزللییین آزاجیق گؤستره بیلیردی. هاوا آچیق اولاندا بولودلاری گؤرمک اولاردا. آنجاق  اورادا اولارکن بیز هئچ واخت آی اولدوز گؤرمه­دیک. هاوایا چیخاردیقلاری زامان آخشام ساعات دؤرد-بئشه قدر اولوردو. بو زامان ایسه اولدوزلاری گؤرمه­یه ایمکان یوخویدو. گؤیه ساری باخارکن، ندنسه همیشه آزادلیق، اونون اوغروندا ساواش و ان گیزلیجه­سی بورادان بیر زامان نئجه قاچماف انسانین بئینینه گلیردی. بو ایش اوچون ان آزی ایدمانچی اولماق گرکیردی. اوسته­لیک بورادان ساغلام چیخماق اوچونده ایدماندان واز کئچمک اولمازدی. همیشه حیه­ته چیخدیقدان آز سونرایا قدر بو آزادلیق و اونون حسرتله دولو دویقولارینی یاشادیقدان سونرا، ایدمانا باشلایاردیم. اوگون بیرینجی هاوا آلماق گونومودو. سالوندان ائشییه چیخاناجان گؤزباغیمی وورمالیدیم. حَیَطه چیخارکن گونش ایشیقلاری گؤزومو قاماشدیردی. گؤزتچی آردیمجا قاپینی باغلاییب، اؤز سالونلارینا کئچدی. اورانیندا قاپیسینی باغلادی. همیشه اولدوغو کیمی گؤیه ساری باخدیم. حَیطین دؤرد بوجاغینداکی کامئرالاردا باخیشیمی چکدی. بورادا هرشئی کونترولدادیر. بیر ایکی دؤنوم بالاجا حَیَطی دولاندیقدان سونرا ایدمانا باشلادیم. سونرادا داها آرتیق فیکریم آچیلسین دئیه، میللی اویونلاریمیزلا اوغراشدیم. سن دئمه بونلار هامیسی منی ایزله­ییر. منیم او دورومدا رقص ائتمه­ییم بونلارا یامان آجیق گلمیشدی. سونرالار بو مساله­نی اؤزلری آچدیقدا، دوشونوردوم گؤره­سن من اؤزومو بورادا نئجه آپارمالییام، سایماز یوخسا دالغین؟ اوزگون­مو؟ یوخسا... ؟

بیر ساعاتا یاخین هاوالانمادان سونرا، یئنیدن یاتاق سالونونا قایتاردیلار. گؤزباغیمی ووروب ایچری کئچدیم.  آزجا حَیَطده (آولودا) اولماغیم، تزه هاوا آلماغیم، ایچری­نین نئجه اولدوغون بیرداها انیمساتدی. ایچری گیره­رک سانکی بوغونتولو، بورکولو و قوخولو بیر یووایا گیردیم. سالونو بیرداها گؤز آلتی ایزله­دیم. اؤز سللولوما گلیب چاتاناجان هر یئری بیرداها سوزدوم. ایچری گیریب، اوزاندیم، بیرداها نه­لر دانیشاجاغیم حاقدا دوشوندوم. بو دؤنه بیر آز خیردالیقلارادا دوشوندوم. یولداشلاریما، کیملر حاقدا نه دئیه­جه­ییمه، هانسی ایشلری قبول ائده­جه­ییمه و ... بیرر بیرر دوشوندوم. اؤز یانیمدا قرار وئردیم کی بوروشوق سورولارا لازیم دییل ائله همن جاواب وئرم. دوشونمه­یه زامان قازانمالیدیم. بو ایش کؤتک یئمه­ییمه ده گتیریب چیخارسا، گیره­وه قازانمالییام، ائله سللولون اؤزونده­ده فیکیرلشمک اوچون زامان آلمالییام. بوندان یاخشیسی دا بودور کی، بیر گون تام بیلمزدن گلیب، سللولدا دوشوندوکدن سونرا، جاواب حاضیرلایام.  اونسوزدا اونلار بیر سورونو بیر دانیشیقدا باغلامیرلار. واخت اولور کی بیر سورونو بیر آی آردی آردینا و تیکرار ائدرک سورورلار.

بیر ایکی ساعات دوشوندوم، آرا-سیرا باشقالاریندا هاوا آلماغا یادا بازجویی­یه آپاریلدیقلارین ایزله­ییردیم. گؤزتچیلرین سسیندن، هردنده زیندانیلرینکیندن بیلمک اولوردو هارا آپاریلیرلار. اورادا اوجا دانیشماق چوخ اؤنملیدیر. گؤزتچیلر ایسته­ییر سن دینمه­سه­سن. اوردا کیملرین وار اولماسی بیلینمه سین دئیه. آنجاق  زیندانیلر کیملرین اولدوغون بیلمه­یه ماراقلانیرلار. بوراسی تام خبرسیزلیک یئریدیر. اونا گؤره­ده هر کیچیک خبرین دیه­ری وار. هر کیچیک حرکتین باشقا یولداشلارا اولوملو یا اولومسوز ائتکیسی وار. اوجا دانیشماق چوخ دیه­رلی ایشدیر. اوجا دانیشماقلا هم کیم اولدوغونو باشقالارینا خبر وئریرسن، همده یاخشی دانیشماقلا اونلارا اورک وئریرسن. اصلینده اوردا هرشئی سنی ائشیک‌دن قیرماغا چالیشیر، یالنیزلیغی و اومودسوزلوگو آشیلاییر و بو تسلیمیته گئدن یولدور. تک توتولان آداملار اؤزللیکله سیاسی اولمایانلار همیشه بو قایدانی پوزورلار. اونلار تام بازجولارین دئدییی کیمی داورانیرلار. آنجاق  بوراسی قایدالارین سیندیریلاسی یئریدی. بورادا بوتون قورال قانونلار بیزیم یوخ، اونلارین خئیرینه­دیر. اونا گؤره ده بو قانونلاری باجاردیقجا پوزماق گرکیر. اونلار دئییرلر کی، اوجا سسله دانیشمایاجان، باشقا سللوللارلا دانیشمایاجان، ...  بو اقتصادی مساله لر اوستده توتولانلار تام اونلارین دئدییی کیمی حرکت ائدیرلر. اؤزلرین سیندیریرلار. آغلاییرلار. الله اورادا یادلارینا دوشور. ائشیکده جاماعاتین قانین سورانلار اورادا دینلی ایمانلی اولورلار. بازجولاری هرشئیلرینه حاکیم بیلیرلر. یالواریرلار اونلارا. وورهای آند ایچیرلر، حتی یئتکیسیز، اختیارسیز گؤزتچیلره بئله یالواریرلار، یالتاقلانیرلار. او 7 آی اون گون ایچینده من بوتون بونلارین اوخشارجا حرکت ائتدیکلرین گؤردوم و دویدوم. آرتیق بیلیردیم طرفین هانسی سؤزو یالاندیر. هاچان آند ایچجک، دؤیولنده نه ائدجک، تلفوندا عایله­سینه نه دئیه-جک و ... بو دییشمز قوراللاری یالنیز میللتچی لر و باشقا ایناملی سیاسی توتوقلولار سیندیریردیلار. اونلار اؤزلرین حاق بیلیردیلر، توتولماقلارینا اؤیونوردولر، اونا گؤره­ده بازجولارین اوستونه گئدیردیلر. یانلیز اینامسیزلار باشقا زیندانیلر کیمی حرکت ائدیردیلر.

ناهاردان سونرا سللولومون قاپیسی اچیلدی.  ازبر ائتدییی سؤزلرین بیرین دیلینه گتیردی:

-          بازجویی، چشمبندیوی وور گل

بو سؤزو ائشیدرکن، چوخ آز حاللاری چیخماقلا همیشه اوره­ییمده بیر ایستی آخین دویوردوم. اوره­ییم آزجا دؤیونوردو. حیس ائدیردیم ایستی بیر قان و یا باشقا بیر سیزی (ترشح اولونان بیر شئی) اوره­ییمدن بیر آندا آخیر هر یانیما، آ«جاق سونرالار بیلدیم کی 90% زیندانیلر بازجویی­یه گئتمه­میش توالته گئتمک ایسته­ییرلر. منیم اوچونده اولده بئله­یدی. سونرالار بو حیسسیمی یئندیردیم. توالت حیسسی گلسه­ده، بونو گیزله­دیردیم. بیلیردیم کی بو فیزیولوژیک دییل، عصبی تپکی­دیر.

گؤزباغیمی ووردوم ، توالته گئتدیم. سونرادا بازجو قولومدان یاپیشیب، اورتا حَیَزدن کئچیردی. دیندیرمه سالونونا چاتمامیش آراداکی گونیش سالوندان کئچنده، گؤزباغینین آلتیندان یان یؤره­ده دایانان آداملارین آیاقلارین گؤردوم. من ایچری گیررکن هامیسی سوسموشدو. حیس ائدیردیم، منیم نئجه یئریمه­ییمه­دده باخیرلار. اونا گؤره آددیملاریمی یئیین گؤتوردوم. باشیمی دیک توتدوم. بئله گؤزو باغلی آپاریلماق هر آن بیر شئیه ایلیشمک احتمالی، هر آن سنی آرخادان ووراجاقلار قایغیسی انساندا آشاغیلیق حیسسی یارادار. آنجاق  بو حیسسه یالنیز اوجاگؤیول­لولوک، اؤزگوونج (اعتماد به نفس) قالیب گلیر. سن اؤزونو بیر قهرمان کیمی آپارمالیسان. اونلار سنی توتماقلا اؤز ضعیفلیک لرین اورتایا قویوبلار. سن حتی ییخیلماغیندان بئله اوتانمامالیسان. بو ایشه هم گولمه­لیسن همده هر آددیمدا برکیمه­لیسن. سن بئله دورومدا فخر ائتمه­لیسن. بو آنلار تایسیز آنلاردیر. هر آداما قیسمت اولماز. سن چوخ قوتسال انسانلار ایچینه گیریبسن آرتیق. هر آددیمین اونلاری تیتره­دیر. هر گون آرتیق قالمان بونلاری چؤکورتمه­یه دوغرو آپاریر. بونلار گئرچکدیلر. اونلار بو گئرچکلری گیزلتمک ایسته ییرلر. اونلار اؤز اودوزماقلارین قلبه کیمی گؤسترمک ایسته ییرلر.

آراداکی گئن سالونون هممن سول الینده بؤیوک دیندیرمه اوتاغی وار. گئن سالونون اوز به اوزونده تلفون اوتاغی، اونون یانیندا شکیل چکمه و فیلم گؤتورمه اوتاغی. ساغ الده ایسه، 4 کیچیک دیندیرمه سللولو. بو سالوندا من 5 آیا یاخین تک قالدیم. اورادا تک قالماغیم چوخ چتین اولسادا، یاخشی اولوملو گیره­وه­لر یاراتدی منه. دئمک اولار او آرادا توتوقلانان انسانلارین چوخونون دیندیرمه­سین ائشیتدیم. کیملرین گلیب گئتدییینی دویدوم  و تزه گلن یولداشلارلا دانیشیب یئترینجه اونلارا نه­لر اولدوغونو آنلاتدیم. باخمایاراق کی بو دانیشماقلار منه آغیر باشا گلدی. بؤیوک دیندیرمه اوتاغینا گیردیم. 8-10 متر اولاردی. یئنه­ده دووارین دیبینده بیر اوتوروق قویموشدولار. بیر ماسا اونون دالیندا و ماسانین بو یانیندا 4 باشقا اوتوروق. دئمه­لی یئنه­ده بازجولارین سایی چوخ اولاجاقدی. یئتیریب اوتوردوم صندل­ده. آیاقلاریمین یئنه­ده تیتره­مه­سین دویدوم. اونلاری گیزلتمه­یه چالیشدیم. بو دؤنه قاباقکینا گؤره داها راحاتیدیم. آرتیق اورانی تانیییردیم، بازجولارین سسی تانیشیدی. سورولار دا هابئله، آنجاق  یئنه­ده سسیمده تیتره­ییش اولماسین دئیه، دریندن بیر نئچه دؤنه نفس چکیب، بوشالتدیم. بازجولار قوشون کیمی بیر بیر ایچری گیردیلر. هرآن گؤزله­ییردیم ائله دانیشمادان دؤیمه­یه باشلاسینلار. بیرآزجا سوسقونلوقدان سونرا بازجولار دیله گلدی:

-          خوب، آای مهرعلی بیگلو فیکیرلشدین دا. ماشاءالله رقص ائلیییسن. بیر بیر یولداشلاریوی گتیرجم بوردا حَیَطده آرالاریندا اوینایاسان، هامیسی­دا سنین اوزووه توپورسون، دئسینلر آیت باید برقصئ.

آزاجیق آلای ائدیجی گولومسمه ایله دئدیم:

-          فارسجا دئیه­جکلر؟؟

-          نئینر تورکو دئیرلر. اوغول هاواختاجان قالماق ایستییسن؟ دئیه­سن هئچ خانوادن یادیوا دوشمور؟ بیلیرسن آنان گیل نه وضعده­دیر؟ بیلیرسن خانیمیوین­دا جلب حؤکمون آلمیشیق؟ اؤزون ایندی هرنه­یی دانیشماسان، گئت گئده چتینلشجک. دونن قویدوق فیکیرلشه­سن کی عاغلین باشینا گلسین. ایندی حاجی گلجک. بیز اونا قول( سؤز) وئرمیشیک کی سن دانیشاجان. گؤردوکلریوی یازاجان. هامیسین. سوال سوروشمامیش. سونرادا بیر امضاء ووروب گئدجن. قالانین ائشیکده گؤروشوب، دانیشاریخ.

اؤز اؤزومه بو دانیشدیقجا دئییردیم گؤر آلداتماییبسان؟! اوشاقسیز سیز هله، منیم اوچون گولونج گلن تکنیکلرین بیر بیر یئنه ایشه سالدیلار. اؤنجه بیرآز هده­له­دیلر. ووراجاییق، آساجاییق، کسه­جه­ییکريال عایله­نی گتیره­جه­ییک... سونرا بیرآزجا تلقین ائتدیلر، گویا کی من هرنه­یی دانیشماغا حاضیرام، بوگونده دانیشماسام، صاباح دانیشاجام، بورادان کیمسه دانیشمامیش گئتمز، گویا منیم یالانلاریمی بیلیرلر، ... بیرآزجا بو هده­له­مکلرین تنبیهه چئویردیلر. دئمکده دؤیوردولر. بلوف ووروردولار. دئییردیلر هرنه­یی بیلیریک. منیم گؤردویوم ایشلرین هردن بیرین آتماجا کیمی آتیردیلار کی گویا هرنه­یی بیلیرلر، اونلار بو مساله­ده اؤزللیکله باشقا دوستلاردان آلدیقلاری بیلگیلری اورتایا آتارلار. یئمه­یه نه دئییبسیز لاپ اونودا یولداشلارین دئییب، و ... بوتون بونلار منی دیله گتیرمک اوچونویدو. من ایسه بونلارا فیکیر وئرمه­دیم. اونلار منی گوناهکار کیمی گؤسترمک اوچون منیم یاپدیقلاریمی شیشیردیدیلر.  هردنده منی دانیشماغا تحریک ائتمک اوچون یاپدیقلاریمی اولدوقجا کیچیلدیردیلر کی، من ائله حئساب ائدیم کی اؤنملی بیر شئی یوخدور. من بونلاری دئمکله هئچ نه اولمایاجاق و ... .

اوگون قاباقکی مساله لردن باشقا یئنی بیر قونونوندا اوستون آچدیلار. هادی موسوی و دومان ساوالانین (سجاد رادمهر) اؤلکه­دن چیخماسیندا منیم رولومو اورتایا قویدولار.

هادی موسوی کلئیبردن اولان بیر اؤرگوت یولداشیمیزیدی. باکی­یا گئتمیشدی، سونرادا باکی دان بیلینمه­ین سببلره گؤره دیپورت ائتمیشدیلر ایرانا. او ایسه بورادا بیر سوره بیزیم یاردیمیمیزلا گیزلی قالدیقدان سونرا، قاچاقجا تورکیه یه گئتمیشدی. بونون مساله سی دیپورت اولدوغونا گؤره او زامان مئدیایا شیشمیشدی. مسئله قاباقکی توتوقلانما‌لاردا آچیقلانمیشدی و یولداش‌لار بو حاقدا منه اولان‌لاری دئمیشدی‌لر. آنجاق من بیر سیرا ندن‌لره گؤره ، اونون گیزلی ساخلانیلماسیندا و اؤلکه‌دن چیخاریلماسیندا اؤز رولومو قاباقجا آچیلماغینا باخمایا‌راق دانمالییدیم.  دومان ساوالان ایسه خییوودان اولان مرکزی کومیته میزین اویه سییدی. اونونلا ایلک دؤنه اؤیرنجی زامان‌لاری تبریزده گؤروشموشدوک.1382-83 جی ایللرده. سونرا‌لار ایسه رسمی اولا‌راق اؤرگوتوموزون اساس مؤهره‌لرین‌دن ساییلیردی. بو شوخلوقچول، قورورلو و اوجا بوی یولداشیمیز بئله چتین آنلاردا چوخ جدی و پروقرامچی بیریسی ایدی. آذربایجان اؤیرنجی حرکاتی اتتهامی ایله توتولدوقدان سونرا، تشکیلاتا اؤزل دورومون آچیقلایاراق، اونون اؤلکه دن چیخماسی ایله راضیلاشمیشدیق. اونون خاریجه چیخماسی، دیشاریدا داغینیق دورومدا اولان اؤرگوتوموزو یئنی‌دن توپارلاماغا یاخشی بیر ایمکان ساییلیردی.  اودا هادی کیمی قاچاق چیخمیشدی.

-          هادی موسوی نی نئجه چیخاردین؟ کیملرین کؤمه­یی اولدو؟ کیملردن پول آلدیز؟ هاردا ساخلادیز؟ و ... ریز جزئییاتینی (خیردالیقلاریناجان) توضیح وئر!

بو سورونو وئرمکله سانکی منیم بوینوما قویوردولار کی هادی­نین چیخاریلماسیندا منیم رولوم وار. بیده­کی سانکی بونلار هرنه­یی بیلیر. من ایسه بونون آلتینا گئتمک ایسته میردیم. منیم قبول ائتمه­ییمله باشقالارینین دا آیاغی آچیلاجاغیدی. بیرده کی ائله اؤزومه جورم کیمی دیرلندیرجکدیلر. دئدیم:

- من اونون آدین ساده­جه اینترنتده گؤرموشدوم او زامان، سونرادا ائشیتدیم تورکیه­یه گئدیب. قالان مساله لریندن خبریم یوخدور.

بازجو دریندن بیر آه چکدی. بو آه قم قوصصه آهی یوخ، نیفرت و آجیقلانما آهی­دی:

-          اؤزووو ووروبسان لاپ ....

یئنه درین نفس چکدی، دئمه­دی اؤزومو هارا وورموشام، سونرا:

-          باخ آغای آیت ، بیز بوتون بونلاری بیلیریک، بونلار ساده­جه سنین صداقتیوی یوخلاماق اوچوندور. سن دئییسن به بونلارین نه ارزیشی وار؟ ائله او زامان بیز سیزی توتابیلردیک. هادینی تهراندا مئترودا گؤتورنده، ائویزده ساخلایاندا، تاریما یوللایاندا، داریوشون ائوینه گتیرنده... ، هه نه دییسن؟ قالانین دا دیییم؟ بیز ایسته­سک سیزین هامیزی بیر بیر یووازدان چیخارداریق ائشییه. آخی سیزین بیر اهمییتیز یوخدور کی نیظاما. سیزدن یئکه­لری بیز یئره سورتموشوک. دییسن بس نه یی ساخلاییرسان؟ قهرمانلیق ائلیرسن؟ ایندی او قهرمانلیقلار گئدیبدی. سیزین بؤیویوزو بوردان اؤزوموز یوللامیشیق ائشییه. گلیب ائشیکده جیرماغینا باخما کی. سن دییسن بس سجادین ائشییه گئتمه­یین بیلمیردیک؟ ائشییه آپاران آدام دا بیزیم آدامیدی. سیزین بیزه اهمیتیز یوخدور کی. دییسیز به کیمسیز آخی؟ گئت دوعا ائله کی ایندی وضعیت فرقلنیب. یوخسا بوردا مَلَدردیک سنی. البته دوزمللی اؤزونو آپارماسان یئنه او ایشلر یئرینده­دیر. بیز قویماریق کی نیظاما سیزین کیمی­لر خطر یئتیرسین. آخی سیز اود اولساز کیمی یاندیراجاقسیز؟ یالنیز اؤزوزو و عایله­زی بدبخت ائلیییرسن. بیلیرسن ایندی سنین اوشاغین نه گونده؟ بیلیرسن اونودا گتیره­جه­ییک بئله گئتسه؟ قونشو سللولدا اوشاغیوین سسی گلسه، یالواراجان دانیشماغا. گه تی حاجی اونو.

حاجی­لارین بیری بیر بازجویی کاغاذی گتیردی. کاغاذ قاباقکی ایللرده یولداشلارین بیرینین یازدیقلاریدی. باش طرفین قاتدادیلار کی کیمین یازیسی اولدوغونو ساکی بیلمه­ییم. یازینی گؤزومون قاباغینا توتدولار، اوخوماغیمی ایسته­دیلر. هادی­نین چیخاریلماسینا گؤره­یدی. بو حاقدا یولداشلار منه دئمیشدیلر. اؤنا گؤره حاضیرلیغیم واریدی. بو چوخ اؤنم‌لی مسئله‌دی کی ایطیلاعات شیکنجه‌سی آلتیندا هر هانسی ندنه گؤره بیر مسئله آچیلیبسا، اونو بیرینجی فورصتده یولداش‌لارا یانسیتماغی گؤرو ساناسان، بونا دا بؤیوک ظرفیت لازیم و حتی بیر معنا‌لی دئسک، قهرمان‌لیقدی.. من بیلیردیم بو حاقدا منیم آدیم اورتادادیر. آنجاق  باشقا ندنلره گؤره، اؤزللیکله بیرسیرا باشقا یولداشلارین آیاقلارینین اورتایا آچیلماسینا گؤره بو مساله­نی دانمالیدیم. من نه یازیلدیغینی بیلیردیم. اونا گؤره هئچ اوخومادان نه دئیه­جه­ییمه دوشوندوم. دئدیم:

-          بورادا هرکسدن هرجوره اعتراف آلابیلرسیز. هئچ بیرینین دیه­ری یوخدور. بورادا هرکس هرنه دئیه بیلر. بونلار ساده­جه بهانه­دیر بیزی آرتیق اینجیتمه­یه. اؤز یولوموزدان واز کئچتیرمه­یه. هادی قاچاق آدامیدی. نه اوچون اونو ائله هاوا لیمانیندا توتمادیز؟ بیرده بو سؤزلری بیلیردیزسه، ندن او زامان بونون ائشییه گئتمه­سینین قاباغین آلمادیز؟

-          اونلارین هامیسینین واختی وار. ایندی گؤتور یاز.

-          دئدیم کی من بو حاقدا هئچ ندن خبریم اولماییب.

بازجو حیرصلندی:

-          یاخشی بیز سنی بورا بو آداملارین اعترافینا گؤره چاغیرمیشیق. ایندی اولاردان شکایت ائله، بیزده اونلاری توتوب گتیرک.

-          سیز شیکایته یئتیرنسیز؟

بازجو آرخایینلیقلا دئدی:

-          هه، سن یاز

-          اوندا بس ائله اوولجه منیم اوشاغیمی دؤینلردن شیکایتیم وار. اونلارین مساله­سینه یئتیرین سونرادا قالانینا باخاریق.

بو حاقدا آتیشما نئچه ساعات سوردو. اهر لهجه­لی دیندیرمن بیر بازجویی کاغاذی قاباغیما قویدو. کاغاذدا بیر نفر تهران آغ تورپاق محله سینین فعاللارینین آدییدی. همن بیلدیم کیمدی. آنجاق  اؤزومو او یئرده قویمادیم. یازدیم کی اصلا تانیمیرام بونو. بو آدامین آدین باشقا یولداشلارین قاباقکی ایللرده­کی دیندیرمه­لریندن چیخارمیشدیلار. هادی­نین مساله­سینده اونون دا رولو اولموشدو. بازجو بیرداها آجیقلا سوروشدو:

-          بو آدامی تانیمیسان؟

-          یوخ دا، تانیمیرام. کیمدیر کی؟

آجیق دولو بیر سسله "بللی اولار سونرا انشاءالله" دئییب، اوزاقلاشدی. سونرا کئچدیلر سجاد رادمهرین قونوسونا. اونون ائشییه چیخماسیندادا منیم رولوم حاقدا سوردولار. یئنه بلوف ووروردولار کی هرنه­یی بیلیرلر. آردیجا اونون گئتمه­ییندن خبرلری اولدوقلارینی­دا دئدیلر. اهر لهجه­لی بازجو یئنه اؤزلرینی گوجلو گؤستررک دئدی:

-          ایسته­سه­یدیک توتاردیق. لاپ برنامه­سی قویولدوغو زاماندا هرنه­یی بیلیردیک. سیزین هرنه­ییز الیمیزده­یدی. ایسته­سه­یدیک زامانیندا توتاردیق. بیز سیزی 5 ایلدی ایزله­ییریک. ایندی زامانی گلیب توتولاسیز. بورادا آرتیق سیزی بوراخماق اولمازدی. یاواش یاواش الدن چیخیردیز. اونا گؤره­ده گرک یئنیدن الیمیزه قاییدایدیز. کیمدیر کی او سجاد اوندان اؤترو اؤزووو اذییته سالیرسان؟ موباریزدیر ساکی هه؟ پوخ یئییر او موباریز اولور. موباریز کیسی کیمی ایچریده قالیب ساواشین آپارار. بیز هرجوره­سین گؤرموشوک. آدام وار گلیب اؤلومه قدر دایانیب. موباریز بیژن جزنی کیمی اولار. سؤزونون اوستونده دایانار. تای بیر کیش­نن دوروب قاچماز ائشییه. خالقین سندین بوردا گیروو قویوب ائشییه قاچماز موباریز. سیز گؤر اؤزوزو کیملردن اؤترو دردسره سالیرسیز. اولان احمد اوبالی بیلیرسن کیمدیر؟ بیلیرسن هاردان یاللانیر؟ بیلیرسن او نئجه آدامدیر هئچ؟

بونلاری دئمکده منی تحریک ائتمک ایسته­ییردی. ایسته­ییردی جاواب وئرم یا حیرصلنم. بلکه­ده منده قوشولام اونا و بو دئییلن آداملاری پیسله­یم.  هر حالدا من یئری گلمه­یینجه سوسمالیدیم. دیشاریداکیلارین دالینجا بوللو دانیشاندان سونرا بیر نئچه سورو وئردی. یازیلی اولاراق بیرنئچه نفره موناسیبتیمی ایسته­میشدی. دومانی بیر دؤنه گؤردویومو دئدیم. بیرحالدا کی اونونلا ایللر بویو یواداشیدیق. آنجاق  بونلاری گیزلی ساخلادیغیمیز اوچون یالنیز اوزه چیخانلاری دئمه­لیدیم. من ایسه یالنیز بیر دؤنه بونو اوزه چیخارمیشدیم. اودا اونون دوستاقدان چیخدیغی زامان. بیرده­کی ائلچین گیلده بیر دؤنه تصادوفن (چیخادان) گؤرموشدوم. بونلاریدا یازدیم و اوستونده دوردوم. احمد اوبالی­یا گلدیکده بئله بیر سورو قویموشدولار:

-          سیز احمد اوبالی­نی نه­قدر تانیییرسیز؟ اونون فیکیرلرین و شخصیتین به­یه­نیرسیز یا یوخ؟ اگر اونون به­یه­نمیرسیزسه حاضیرسیز اونون حاققیندا دانیشیغیز اولا؟

بیز سلیقه اولاراق احمد بی اوبالی­گیل ایله آزاجیق فرقیمیز واریدی. اؤزل اولاراق منیم اونلارین سیاسی توتوملارینا همیشه اینتقادیم (ائلشتیریم) اولموشدو. آنجاق  بوراسی بئله اختلافلارین اوزه چیخاریلماسی یئری دییلدی. بورادا اونلار بیزیم یانداشلاریمیزدیلار. ایکی اساس ندنه گؤره دوستاقدا اولارکن میللی حرکتده هئچ کیمه قارشی اولومسوز یازماق اولمور. بیرینجیسی اونا گؤره کی بو یازیدان و اولابیلسین دانیشیقدان میللی حرکتیمیزه قارشی استفاده اولونابیلر. دئمکده منطیقی اولاراق میللی یولداشلاریمیزدا کیمسه­یه قارشی بیر کلمه بئله یازماق ایسته­میرسن. آنجاق  اوندان داها ائتکینی بودور کی گئرچکدن قییمیرسان. اورادا من گوناذ تی وی و اؤزل اولاراق احمد اوبالی گیل­لرله اولان فرقیمیزی گئرچکدن اونوتموشدوم. هامیسی دوغماییدی.

-          گوناذ تی وی آذربایجان میللتینین اویانماسینا و اؤز حاقلاری ایله تانیش اولماسینا گؤره چالیشیر. بو حاقدا من اونلاری حاقلی بیلیرم و بو ایشلری دیه­رلی دیر. آنجاق  شخص اولاراق اورداکیلاری تانیمیرام. شخصیتلری حاقدا تانیشلیغیم یوخدور.

بازجو بونو اوخویوب، سانکی دوداغین به­یه­نمزجه بوزوب، بورنوندان نفس پوله­یرک دئدی:

-          تانیمیرسان؟اولابیلر به­یه؟ بیز سنه دئییریک دا کیمدیر؟ هارا باغلیدیر؟ هانسی ایشلری گؤروب! او آلچاق، حیاسیز....

چوخ آرخایینجا دیرندیم:

-          بونو سیز دئییرسیزدا. اؤزوز بیلین آللهیز بیلسین. آنجاق  من اونلارین دئدیییم ایشلرین اونایلاییرام.

باشیمدان بیر یاریمچیق یوموراق دَیدی:

-          دئییرسن یانی بیز یالان دئییریک دا؟! هه؟؟

یئنه باشیمی قالدیردیم گؤسه. دریندن نفس آلاراق سینه­می بوشالتدیم. داها دینمه­دیم. قیشقیردیلار اوستومه، دینمه­ییمه، یازماغیما و اونلارین دئدییی کیمی حرکت ائتمه­ییمه گؤره بیر نئچه ساعات اویون سوردو. منیمسه سؤزلریم تیکراریدی:

-          من بورادا هئچ کیمه قارشی بیر کلمه بئله یازمارام. احمد اوبالی­نی تانیییرسیز، گئدین اؤزوز نه یازیرسیز یازین. سیزین قاباغیزی آلان یوخدور کی.

او گئجه­ده ساعات اون ایکی­یه قدر دیندیرمه سوردو. سونوندا یئنه هده­له­دیلر کی ، گلن دؤنه کامپیوتریم قوساجاق هرنه­یی. اوناجان اؤزوم دانیشسام یاخشی اولار. یوخسا داها اونلارین الیندن منی قورتارماغا بیر ایش گلمه­یه­جک!! سانکی بونلار منیم یار یولداشلاریمدیلار!!! منی قورتارماغا چالیشیردیلار! گئجه گتیردیلر یاتاق سللولونا. او گئجه دیشلریمی فیرچالادیم. یورقون اولدوغوما و ایشلر ایسته­دیییم کیمی گئتدییینه راحات یاتدیم.

4-جو گون گؤزتچی گون اورتا حَیَطه آپاردیغی زامان، دئدی ایندی آپاراجام آنان گیل ایله دانیشاسان. من ایسه دئدیم: یوخ دانیشمیرام. ناراحات اولارلار. ایسته­میرم بونو. گؤزتچی بیر ایکی دؤنه اصرار ائتدی. سونوندا داها چوخ حساس اولماسینلار دئیه قبول ائتدیم کی گئدیب دانیشام. آناملا دانیشدیم. اونون اوزگون، نیگران سسینی ائشیتمک چتینیدی. اؤتن دؤنه­لر توتولدوقدا اونون نئجه یاری جان اولدوغون گؤرموشدوم. آنامین بئله حاللاردا بیر گیلئی­لنمه مئتودو دا واریدی. او گیلئی­لنمه سسی قولاغیمدایدی. دوغوردان آدامی اوچوردابیلردی او گیلئی­لنمه­لر. او یاشامیندا چتینلیک چکمیش بیریسییدی. بونو گؤزلری، اللری، اوزو و ... دئییردی. ایری گؤزلریندن محببت یاغیردی، آنجاق  اوزگون اولدوغو زامان، همین گؤزلر آدامین اوره یین اویاردی. اوره­یی یوخاییدی. تئز آغلایاردی و آغلاماسی قوندارما آغلاماق دییل ایچدن اولاردی. اونو بئله اوزگون گؤرمک و ائشیتمک اولدوقجا زوردو.آنجاق  من بو چتینلیکدن داها چوخ ایسته­ییردیم اوشاقلارا بیر ساو (پیغام) چاتدیریم. بیلسینلر کی مندن سؤز چیخماز. آرخایین اولسونلار و ایشلری سورسونلر. اونا گؤره بیر ایکی دؤنه دئدیم کی اولسا خانیمیملا دانیشیم. گؤزتچی ایسه بونو رد ائتدی. دئدی کی یالنیز آنان و آتانلا دانیشابیلرسن. حَیَطده دولانما ایشی بیتدیکدن سونرا گؤزباغیمی ووردوم و یئنه اورتا سالوندان کئچیب، تلفون اوداسینا چاتدیق. بیر ماسا اوستونده کؤهنه بیر تلفون واریدی. اؤنجه بیر کاغاذ قویدولار قاباغیما دانیشما ساعاتین و کیم ایله دانیشماغیمی یازدیلار. نومره­نی مندن سوروب، اؤزلری توتدولار. آرخایین اولدولار کی آنامدی. سونرا دسته­یی وئردیلر منه. آنامین مهریبان سسی نیگرانلیقلا دولویدو. گؤزلرینین ایشیلتیسی اؤنومده­یدیر سانکی. او مهریبان گؤزلر بیزه همیشه سیغینما یئری اولموشدو. آنام چوخلو آنالار کیمی بیزیم دوشونجه­لریمیزی قبول ائتسه­ده، اوغلونون زیندانا دوشمه­سین ایسته­میردی. اوسته­لیک منیم بو زیندانا دوشمه­ییمی اونون سؤزونه باخماماق کیمی­ده دیه­رلندیریردی. سانکی من اونلاری بو اذییته سالماقلا سوچلویام. هله ائل ایچینده آبریمیزدا گئدیب بلکه! اونا گؤره چوخ واخت بو حاقدا گیلئی­لیک ائتمیشدی. آنجاق  او گون یاخشی دانیشدی. او آناییدی. بیلیردی بالا نه­قدر شیرین اولور. اونا گؤره هرنه­دن اؤنجه منه تاتارلا باغلی اورک وئردی. دئدی کی کنده آپاریبلار تاتاری، اوینویور و ...

-          آییات (آناملا آتام منی بدله چاغیرارلار) یئرین نه­جوردو؟ وورورلار هه؟؟

آنام لاپ پروفسیونال داورانیردی اطلاعاتدا اولارکن. توتوقلونو قویمازلار دانیشماغا، اونا اؤنجه هده قورخو گلرلر. نه دانیشماغین دئیرلر. اوسته­لیک اوستونده دورارلار کی باشقا سؤز دانیشماسین. آنجاق  ائوده­کیلره بونو یاپامازلار. ائوده­کیلر گرک بئله حاللاردا ائله سؤز سوروشالار کی ایچریده اولان هه، یوخ دئمکله سؤزون دئیه­بیلسین. آنجاق  من دئمک ایسته­مه­دیم منی دؤیورلر. چون بو دؤیمه­لر بیر یاندان ائله بیر شئی دییلدی، باشقا یاندان دا ایسته­میردیم گلن دؤنه دانیشیقلاردا حددن آرتیق قیسیتلاسینلار. قویماسینلار دانیشام و ... ، دئدیم:

-          اؤنملی دییل، نیگران اولما آنا. یاخشییام. سونایادا دئ من تام یاخشییام . سیز اصلا داریخمایین، بیرده بو اداره­یه دادگاها زادا گئدیب، اؤزوزو اینجیتمه­یین. ائله شئی­لرین فایداسی یوخدور.

منی دورتمه­له­دیلر کی تئز قورتار. 30 ثانیه بیتدی، آناملا ساغوللاشدیم. بیلیردیم کی ائله آنجاق  تلفون بیتنه­جن اؤزون ساخلایا بیلیب. سونرا همن آغلایاجاق. آنجاق  ایندی اونو دوشونمه­یین زامانی دییلدی. من ایسته­میردیم اونلار کئچمیشده­کی یالنیشلاری بیرداها ائتسینلر. اونلار اؤزللیکله آتام یئنه دوشه­جکدی دادگاهلارا، تانیش آختارماغا کی گویا منی چیخارتسینلار. من بو حاقدا قاباقجالار چوخ دئمیشدیم. آنجاق یئنه بیلیردیم کار کسمز. یان یؤره­دن هره بیر سؤز دئیه­جک. بیری فیلان اداره­ده، فیلان پاسگاهدا، اطلاعاتدا و یا دادگاهدا تانیشینین اولدوغونو دئیه­جک. آتام گیلده اورکلری دورمایاجاق و یئنه ده اسیر اولاجاقلار. اؤلکه­ده تام فئوداللیقدان قالان تانیشبازلیق و بئله­جه قانونلاری آیاقلاماق تؤزه­سی (عورفی) هله­ده قالیر. تانیش تاپماق، پول یئدیرتمک، چوخ تأسوفله بیزیم اهالینین آچاری اولوب سانکی. قانون یوللاری ایله کیمسه اؤز حاققینین آلینماسینا اینانماییب، بوتون بونلاردا گئرچک ندنلر اولسادا، آنجاق  بیزیمکیلر بیلمیرلر کی، داها تانیش تاپماق اطلاعات ایشینده فایدا وئرمز. بیز حاکمیت­له طرفیک. بو مساله ده بیریجیک ایش گؤرمک اولورسا، اودا مدنی اعتراضلاردیر. عایله­لر و حرکتچیلر یولداشلاری توتولدوغو زامان گرک مئیداندا اولالار. خبر یایالار. اعتراض میتینگلری اولا و بئله­لیکله سیرادان بیر توتوقلانمانی بؤیوک بیر گیره­وه­یه چئویره­لر. آنجاق  نه یازیق کی بو اولمور. یادیما گلن یالنیز بیر دؤنه بئله بیر ایش اولوب. بیز 21آذر گونو 1381-جی ایلده شبسترده توتولان زامان یولداشلاریمیز بیرلشمیش میللتلر تشکیلاتی نین تهرانداکی نوماینده­لییینین قاباغینا ییغیلمشدیلار. او زامان ایشین من ائتکیسین ایچریده گؤردوم. حرکته و توتولان انسانا یارییاجاق، بئله ایشلردیر. دادگاهلاردا اسیر اولماق و عقده ای (کامپلئکسلی- دویونجکلی) انسانلارا یالواریب، اونلارین اؤنونده آلچالماق ان بؤیوک ضربه دیر.

نه ایسه، آناملا آیریلدیق. گؤزل دویغولار وارلیغیمی بورودو. گلدیم یاتاق سللولونا. اؤنجه بیرآز اوزاندیم،آنامدان آلدیغیم دویغولارلا خیاللارا ساری اوچدوم. بو دوستاقدا هرنه­یین دیه­ری بیلینیر. بورادا باشقا زامانلار دیه­رین بیلمه­دییین ؛زامانین، انسانلارین و باشقا وارلیقلارین قدرین بیلیرسن. آناما دوشوندوم. همیشه چالیشمیشدیم اونا الیمدن گلنی ائدیم. آنجاق  الیمدن گلن دئدیکده، بؤیوک ایشلری گؤزه آلدیغیمدا کیچیک گؤرونن ایشلری اونوتموشدوم. باشقا زامانلار اونون گؤروشونه گئتمه­یه چوخ فورصتلری قاچیرمیشدیم.  اونونلا دانیشماغا. من اونلارا چوخ ایشلر گؤره بیلردیم، آنجاق  گؤرمه­میشدیم. آنجاق  بو دؤنه بئله بیر ایشلره یئر قویمامالیدیم. دوردوم آیاغا، یئنه اوتاغین ائنین بویون آددیملادیم. ایدمان ائله­دیم و نئجه اؤزومو آپاراجاغیملا باغلی، هابئله چیخدیقدان سونرا نه­لر ائده­جه­ییمه دوشوندوم. بیرآز بو احوالاتی یاشادیقدان سونرا یئنه آناما ایسته­مدن قاییتدیم. اوزانیب یئنه اونون قوجاغینا گئتدیم. سونایا و تاتارا، ییلمازا، تایمازا، دورنایا، مارالا، ائلمانا و آتاما دوشوندوم. من بونلارین هامیسی حاققیندا نه­لر ائده­بیلردیم کی ائتمه­میشدیم. بیرداها دوشوندوم کی بوراسی قنیمتدیر. اؤزومه بیرداها باخمالییام. یئنی بیر یاشام باشلامالییام، من بیر ایده­ال انسانا، کامیل بیر انسانا چئوریلمه­لیییم. هر کسه اؤرنک اولمالییام. سونایا دوشوندوم، او گئرچکدن منیم ان بؤیوک شانسیمیدی. اوندان چوخ شئی­لر اؤیرنمیشدیم. او سؤزون اؤز آنلامیندا بیر یاشام یولداشی، بیر حقیقی میللتچی، بیر گؤزل انسانیدی. انسان ندن اؤزونون ان چوخ سئودییی انسانلاری بئله، حیاتدا اینجیده بیلیر. من سونادان، آنامدان و تاتاردان اوتانیردیم ایندی. اونلارین یانینا قاییتماغا بیر آن تئز اولماسینین دا دیه­ری واریدی. آنجاق  من سینیب، اونلارین یانینا گئتسه­یدیم، آرتیق هئچ نه­یه دیمزدی. بیر عؤمور اؤزومدن اوتاناردیم. اونلارین یانینا آرینمیش، تمیزلنمیش و آلنی آچیق بیری کیمی گئتمه­لیدیم. من نه­یه باشا گلیرسه، دایانمالیدیم.

آلتینجی گون

ایکی گوندور بازجویی دن خبر یوخدور. بو ایکی گونون هر آنی بازجویی­یه گئده­جه­ییمی گؤزله­یرک کئچیرمیشدیم. بیلگی­سایاریمدان نه­لر چیخاجاق، اونلار حاقدا نه­لر دئیه­جه­یم کیمی دوشونجه لرله بو ایکی ایل قدر کئچن ایکی گونو کئچیرمیشدیم. 6-جی گون اورتادان سونرا یئنه دیندیرمه­یه آپاردیلار. اوگون منی اؤرگوته باغلاماق اوچون ، بیرده کی منی سوچلو گؤسترمک اوچون، بیلگی­سایاردان تاپدیقلارین گتیردیلر. اوسته­لیک فلش مئموریمده کی لاپ درد اولموشدو. اؤنجه کامپیوترده کی یازدیغیم سایت و ایمئیل آدرسلرین لیستین قاباغیما قویدولار. بو  سایتلارا من آرا سیرا باخاردیم. ایمئیل آدرسلرینه ده ایمئیل یوللایاردیم. آنجاق  کامپیوترده او یوللادیقلاریم یوخودو. بونو بیلیردیم. اونلار ایسه ساده­جه زیلله­میشدیلر بو ایمئیل آدرسلرینه:

-          بو آدرسلر کیملردیر؟ اونلارلا نه ارتباطین وار؟

نئچه یوز آدامین ایمئیل آدرسیدی. اونلار بو آدرسلر مساله سین قابارتماقلا نه ایستدیکلرینی بیلمیردیم. بلکه ائله بو قابارتما مساله­سییدیر و منده سوچ حیسسی یاراتماق اوچون. آنجاق  من اونلارین ایسته یینه باش وئرمه دن اؤز خطیمی چیزمیشدیم. اورادا هرنه­یی دانماغا گرک یوخویدو. دئدیم:

-          بو آدرسلری ایمئیل قروپلاریندان گؤتورموشم، لازم اولان زامان خبر یوللویام.

اوستومه قیشقیردی:

-          نه خبری؟

قیشقیرماسینا اؤنم وئرمه دیم. چون بورادا ائله اؤنملی مساله یوخدور. دئدیم:

-          آذربایجانا عایید خبردا. نه خبری اولاجاق کی؟

آزجا دوروخدولار. سونرا بیریسی پرینت آلدیقلاری آدرسلری اؤنومه قویدو. بیر نئچه سینین آلتین جیزمیشدی. اونلاری گؤستررک سوردو:

-          بو آدام کیمدیر؟

-          تانیمیرام

-          نه­؟

قیشقیردی اوستومه و آردیجا یومراق، شاپالاق دولو کیمی باشیمدا دانقیلدادی. بیر داها باغماغیمی ایسته­دی. آد تانیش گلیردی. آنجاق  من ندن آرتیق بیر بیلگی وئرمه­لیدیم کی اونلارا؟ ائله دئدیم:

-          یوخ تانیمیرام

بورادا بیر مساله نی بوینونا آلمادینسا گرک سونوناجان گئدسن. یوخسا اونلار آنلاسالار کی، دؤیمکله نه­یی ایسه بوینونا آلاجاقسان، او زامان ایش آغیر اولار. من اوگون هر هاردان سوردولار، دانمالی یئرلری سونوناجان داندیم. دانماغا گرک اولمادیغی مساله لری ایسه بوینوما آلدیم و ساووندوم. هردن بیر سیرا سؤزلر اولوردو هوسلنیردیم کؤکوندن دانیم، دئییم اؤزوز کامپیوتره قویوبسوز. آنجاق  گؤروردوم کی یوخ کؤتک یئمه یه دیمز. یاخشیسی بودور کی اونلاری بوینوما آلیب، آنجاق  مودافیعه ائدم. بیر سیراسیندا باشقا یئرلره یوزام. بیریسینده فلش مئموری دن چئشیتلی شهرلرده آسیلمیش بایراق شکیللرین چیخاریب، اونو سوردولار. دئدیم:

-          اونلاری ائلچین منه گؤندریب.  گویا شهرلرده دومانین ایسته یی ایله گاموحچولار آسیبلار.

من دئیرکن دالدان بیر پیچیلتی گلدی:

-          یالان دئییر

آرخاسیجا باشقا بیر یازی چیخاردیلار. دوقتور چؤهره قانلی نین استعفا مکتوبویدو. دئدیم:

-          ائلچین یوللاییب اونودا، اوخومامیشام هله. اونا گؤره فلش ده سئیو ائله میشم کی سونرا اوخویوم. بازجولاردان بیری سوروشدو:

-          نییه استعفا وئریر؟

-          بیلمیرم

-          بس ائلچین بونلاری دئییر، عللتینده دئسین دا

-          من ماراقلانمیرام ائشیکله، اونا گؤره هئچ سوروشمارام

بئله جه سورقولامالار سوروردو. حیس ائدیردیم وورماقدان دا یورولوبلار. آرا سیرا منطیقله منی تسلیم ائتمک ایسته ییردیلر. آنجاق  من دئییلمه­یه­جک اولان بیر مساله واردیسا، نئجه منطیقلی اولسایدیدا، تسلیم اولموردوم. بیر چیخیش یولو تاپیب قاچیردیم. گرکمه­ین مساله لره هئچ توخونموردوم. بو تکنیکین آدین قویموشدوم "میسماق". دئمکده لازیم اولمایان مساله نی لاپ اؤنمسیز اولسادا آچمیردیم. اونا گؤره کی، اؤنمسیز مساله نین ایچیندن باشقا بیر اؤنملی اولانلار چیخابیلردی. بیرده کی اونلارا بیر کلمه ده اولسون، اؤزلرینین بیلدیکلریندن آرتیق بیلگی وئرمک ایسته­میردیم. بیر مساله نی بوینوما آلیردیمسا، اؤنجه یوزده یوز آرخایین اولوردوم کی ، کسین بیلیرلر اونو. اوندان سونرا باخیردیم اؤنملی اولماسینا. کسین بیلدیکلری شئی اؤنملی اولسا هئچ اونودا قبول ائتمیردیم. اؤزنک اوچون اونلار بیلیردی من مرکزی کومیته­نین اویه­سی­یم. آنجاق  اونلارین کسین بیلمکلری منی قبول ائتمه یه گتیریب چیخارمیردی. ائله ایشلری بوینوما آلیردیم کی مندن سونرا باشقاسینین آیاغی ایلیشمه سین. او گئجه نی بیر تهر بیتیردیک. سونراکی دیندیرمه 3 گون سونرا اولدو. دئمه لی دوققوزونجو گون.

اونلار آرا وئرمکده هم یئنی وئریلری (دئیتالاری) الده ائتمک ایسته ییردیلر، همده منی سارسیتماق و داریخدیرماق ایسته ییردیلر. اطلاعاتدا بوش بوشونا اوتوروب سللولدا بازجویی گؤزلمک اؤزو بیر ایشکنجه دیر. چوخلاری ائله بو آشامادا سینیرلار. اؤزلری اؤزلرین ایچریده یئییرلر. داغیلیرلار. آنجاق  منی یاشادان چوخ شئی لر واریدی. خیاللاریم، آرزولاریم، پیلانلاریمیز و دؤزومله اؤزومو آریندیرماق (تمیزلمک) ایسته یی. بونلار منی دؤزدوروردو. خیاللار و یاشادیقلاریما او قدر دالیردیم کی هئچ نه یی، رادیونون قیژیلتیلی سسین بئله ائشیتمیردیم. بورادا شاعیر شهریارین شعرینین بیر بندینده کی تصویر منیم دورومومو آچیقلایا بیلردی. او کئچمیشی آناراق بئله دئییر :

بیر سینئما پرده­سیدیر گؤزومده

تک اوتوروب سئیر ائدیرم اؤزومده

گئرچکدنده هردن قوردوغوم تصویرلرده ائله جوموردوم کی، تام گئرچک کیمی اونون لذتینی دویوردوم.

دوققوزونجو گون

دوققوزونجو گون دیندیرمنلر منیمیالانیمی چیخارماق ایسته­ییردیلر. بونونلادا اللرینده­کی اورتاق ایمئیلیمیزی منیم بوینوما قویماق ایسته­ییردیلر. بو مساله­نی دیندیرمه­نین باشلاماسیندان آز سونرا باشا دوشدوم و اؤزومو تام کؤنزلیییه ووردوم. اونلار منیم تلفون دانیشیقلاریم و آچیق ایمئیلیمده اولان مساله لرله گیزلی ایمئیلده اولان مساله لری توتوشدورموشدولار. بیر سیرا مساله لری من تلفوندا آچیقجا دانیشمیشدیم. اونلار گیزلتمه­لی مساله دییلدی. آنجاق  همن مساله لره گؤره گیزلی ایمئیلیمیزده ده یازیشمامیز اولموشدو. گیزلی مساله ایله آچیق مساله نین قاریشماسی بورادا منی کیریخدیرمیشدی. بازجو مندن سوروشدو:

-          ایندییه جن ماشین آل وئری حاقدا باکی دا کیمسه ایله دانیشمیسان؟

بو مساله نی دانماغا نه گرک واریدی، نده دانماق اولاردی چون تلفوندا اونون حاقدا دانیشمیشدیم. دئدیم:

-          هه، اولوب.

و بیرآزدا بو حاقدا دانیشدیم. من دئییردیم به آوارا بیر سؤزدو، اونا گؤره بیر آزدا داها آرتیق دانیشیردیم. سن دئمه منیم بو آرتیق دانیشماغیم ائله بونلارین ایسته ییدیر. بیربئله دانیشماقدان سونرا بونون آلتینا وورماق اولاردیمی؟ بازجو سوروشدو:

-          بو حاقدا دوقتور عبداللهی ایله دانیشیبسان؟

-          هه

-          یازیشیبسان دا؟

بیرآن بیلدیم مساله نه دیر. بیز بو حاقدا اورتاق گیزلی ایمئیلیمیزده یازیشمیشدیق. تئز دئدیم:

-          یوخ یالنیز اس ام اس وورموشام اونا.

دوزو هئچ اونا بو حاقدا مئساژ یازمامیشدیم. آنجاق  اونلار بو یالانی چیخارانمازدیلار. یعنی اونو ائله اؤنملی بیلیب دالیجا اولمازدیلار. بازجو دوروخدو، بیلدی سؤزدن یاییندیم، بیرداها سوردو:

-          اس ام اس دئمیرم. ایمئیلده هئچ یازیشمامیسان؟ یاخشی فیکیرلش ها. من ایسته میرم بئله کیچیک مساله لردن اؤترو یالان دانیشاسان. باخ گؤرورسن دا هله هئچ نه یوخدور. سن قورخوندان دانیرسان. نییه بئله اولکورسن؟ بورادا نه وار کی؟ آل وئردی دا، بیز سنی آل وئر اوستونده زیندانا وئرمییه­جه­ییک کی.

-          یوخ من دانمیرام کی، بو حاقدا یالنیز دانیشمیشیق، ایمئیل فیلان یازمامیشیق.

یازینی دقیق هانسی کافینتدن یازدیغیم بئله یادیما دوشدو. هانسی ایمئیلین اوستون آچیردیلار، تاریخینه­جن بئینیمده جانلانیردی. بیلمیرم دوستاغین وئردییی گوجودو، یوخسا بو آنیمساما (یادا سالما) یئته­نه­یی قاباقجادا واریمیش، بورادا اؤزون گؤسترمه­یه باشلامیشدی. هرحالدا اونلار اللرینده کی ایمئیلی آچماقلا ، اونون ایچینده نه­لر اولدوغو تامامیله یادیما دوشوردو. بازجو بیرآز دوروخدو. آرخادا بیریسی اؤنونده کی کاغاذلاری واراقلاییردی. بازجو سوروشدو:

-          آلپای کیمدی؟

آلپای بی ، جاواد عباسی ایدی. اونون تلفون نومره سی جیب تلفونومدا واریدی. دوزدو کی بیز اونونلا ایلگیمیزی اولدوقجا گیزلی ساخلاییردیق، آنجاق  بو تام گیزلی دییلدی. آرا سیرا او منه زنگ ائتمیشدی. بیرده کی او توتوقلانمیشدی دا. اونا گؤره تانینمیش، توتولموش بیر آداملا منیم ایلگیم اولماسی ائله­ده ایراق دییلدی. اونونلا بیرلیکده ماکیدا بیر تویدا اولموشدوق. فیلیم چکیلدییی بیر تویدا. اونا گؤره دئدیم:

-          جاواد عباسی، سلماسلی دیر.

بازجو چوخ ایلیملی شکیلده سوروشدو:

-          آخیر دفعه اوننان هاواخت گؤروشوبسن؟

جاواد عباسی سالماسلی اولسادا اوزون سوره ماکیدا قالمیشدیلار. ائله اورادا اولان زاماندان ، دئمه­لی 1380-جی ایللردن ایلگیمیز واریدی. بو ایلگینی ایلک گوندن گیزلی ساخلامیشدیق.گئت گلیمیز هامیسی گیزلی اولوردو. 1385-جی ایلین خورداد اولایلاریندا توتوقلانمیشدی. او زاماندان سونرا فعالیتی چوخ قیسیتلی (محدود) اولموشدور. بیز آرا –سیرا اونا باش ووروردوق. آنجاق  هله لیک اونون جیددی ایش گؤرمه یه حاضیرلیغی یوخودو. یولداشلاردا اونو بو حاقدا گؤزله ییردیلر. آنجاق  اومودوموز کسیلمه میشدیر. باتی آذربایجانداکی یولداشلاریمیزی ساهمانلاماق ایسته­دیییمیز زامان یئنی دن جاواد بی گوندمه گلدی. قرار اولموشدور من اونونلا گؤروشوب، یئنی دوزنلمه میز حاقدا دانیشام. اونو دوقتور عبداللهی گیله قوشام و اونلار بیرداها ایشه باشلایالار. من جاواد بَیی ماکیدا بیر تویدا گؤرموشدوم، بو حاقدا اونونلا دانیشیب، راپورون ایمئیل ایله دوستلارا چاتدیرمیشدیم. اونو سونرالاردا بیر دؤنه گؤرموشدوم، آنجاق  او گؤروش گیزلی اولدوغونا ، یانی خبرسیز گلدیکلرینه گؤره من ائله ماکی گؤروشون دئدیم کی هئچ اولماسا سیخ سیخ گؤروشدویوموزو و اونونلا سیخ ایلگیمیزی دویماسینلار. آنجاق  ائله سن دئمه اونلار ائله ماکیداکی توی گؤروشون ایسته ییرلر. بازجو آرا وئرمه دن سوروشدو:

-          تویدا اوندان باشقا داها کیمله گؤروشدون؟

باشا دوشدوم کی پلدشت لی صابیر بیت اللهی نی دئییر. آنجاق  من اونلارین پیلانین بیر بیرینه وورمالیدیم. تام ایسته دیکلرینی دئمه­مه­لیدیم. بو ایش اونلارین آنالیزلرین بیر بیرینه ووراجاقدی. دئدیم:

-          باشقا ائله توی ییه سینه تبریک ائتدیم.

بازجو الینده کی کارتی آچدی:

-          صابر بیت اللهی نین نئجه، اوردا گؤرمه دین؟

-          یوخ اونو سونرا جولفادا قارپیز بوستانیندا گؤردوم.

صابیر بی بیر سوره جولفادا قارپیز اکمیشدی. او سوره­ده بیر دؤنه اونونلا گؤروشموشدوک. من صابیرله گؤروشدویومو گیزلتمه دیم، آنجاق  ماکیدا آلپای بی ایله بیرگه اولماغیمیزی داندیم. بئله لیکله اوخ داشا دَیدی. من بو گؤروشو تصدیق ائتسه­یدیم، ایمئیل و منیم یازدیغیمی قاباغیما قویاجاقدیلار. بونو آز سونرا باشقا بیر ایمئیل ایله ائتدیلر. بازجو سوروشدو:

-          سن اؤز ایمئیلیوی یاز بورا. دقیق اولسون ها

یازدیم:sevin23@yahoo.com

بو آدرسی هر کس بیلیردی، آچیق ایشلریمی اونونلا گؤرردیم. سونرا بازجو بیر پرینت قاباغیما قویدو. ساوالان (شهرام رادمهر) بی، اورتاق ایمئیلده مندن بیر ایمئیل آدرسی ایسته میشدیر کی یازی گؤندرسین. منده یازمیشدیم: گیزلی دییلسه، sevin23@yahoo.com آدرسینه گؤندر ائودن باخیم. بو یازینی کافینتده یازمیشدیم. ایندی قاباغیمدا، گؤزومون اؤنونده بازجونون الینده سیلکه­له­نیردی. نه ائتمک اولاردی؟ من بیلیردیم بو هانسی ایمئیلین ایچیندن گؤتورولوب. اونو یازدیغیم زامان داها نه­لر یازدیغیم دا گؤز اؤنومه گلدی. دئدیم:

-          نه اولسون کی؟ بو نه­یی گؤستریر؟

بوینومون دالیندان بیر نئچه شاپالاق یومراق دَیدی:

-          زهریمار اولسون، بو گؤرسه­دیرکی سن چوخ قانمازسان.سن بایاقدان عادی بیر ماشین آل-وئری آلتینا گئتمیرسن کی بو ایمئیلین آلتینا گئتمییه­سن. دئییرسن بس هاراجان گئدجن؟

دئدیم:

-          اؤزوز یازیبسیز بونو. منیم آدیم، آدرسیم هاردا اولسا دئمه لی ائله من یازمیشام؟؟

داها دورمادیلار. وورها وور دوشدو گل گؤرسن.

او گون بونا اوخشار بیر ایمئیل ده آغری قاراداغلیدان گؤستردیلر. منی اؤز آدیملا خیطاب ائدیب، بیر ایستکده بولونموشدو.  اونوندا آلتینا گیرمه دیم. آغری حاقدا، اونونلا هاچان گؤروشدویوم، نه­لر دانیشدیغیم حاقدا بوللو سورولار اؤنومه قویولدو، آغری ایله آصلا ایلگیم اولمادیغینی و یالنیز اینترنتده گؤردویومو دئدیم. او گون دؤیمکلردن سونرا، یئنه اهر لهجه لی مامور باشلادی منطیقلرین اورتایا قویماغا. کئچمیش موباریزلردن دئمه یه ، منیم عاغیلسیزجا حرکت ائتدیییمی ثبوت ائتمه یه، ایشیمین یونگول اولدوغون، ساده جه داورانیشلاریمین اونو آغیرلاتماغین دئمه یه و ...

اونونجو گون

بازجویی اوتاغیندا گؤزو باغلی اوتوروقدا اوتوروب، گؤزله ییردیم. قاپی آچیلدی، تاق تاق تاق ، بیریسی رسمی و قورورلو بیر یئریشله یاخینلاشدی. الین آتیب گؤز باغیمی گؤتوردو. گؤزومه ایشیق دوشدویونه بیر آن یاخشی گؤرمه دیم. آنجاق  سونرا تانیش بیر گولومسمه نی گؤروب، بیلمه­دن آیاغا دوردوم. سونرا بو سایغیلی آیاغا قالخماغیما چوخ پئشمان اولموشدوم.

-          سلام، کئفین قارداش؟ سن هارا بورا هارا؟ بابا بیز سنی آیری یئرلرده گؤرمک ایسته ییردیک، به بوردا نییه؟

قاباقجا جولفا اطلاعات اداره سینین سوروملوسو رضا عبدی ایدی. سالاملاشدیم. اوتوردوم یئریمه، دئدیم:

-          بیلمیرم هئچ نه­یه گتیریبلر.

بازجو لاپ یاخین آدامیم کیمی داورانماق ایسته ییردی. دئدی:

-          منه دوستلار دونن گئجه دئدیلر. دئدیم گلیم گؤروم بو قارداشیمیزی نییه توتوبلار؟ نه ائده بیلریک؟

اؤز یانیمدا دئدیم آی یالانچی، گؤر کیمه فیلیم اویناییر. او نئچه گونویدو منی دیندیرنلرین بیرییدی. ایندی باشقا لهجه ایله منیمله دانیشیردی. دئدیم:

-          ساغ اولون دا، زحمت چکیبسیز.

بونلار دؤیمکله آلانمادیقلارین، یوموشاقلیقلا آلماق ایسته ییردیلر. منیم قایدیما قالارجا دئدی:

-          ائوه زنگ ووروبسان؟

-           هه، ایکی دؤنه

-          اولسون ایندی دانیشارام، قویارلار بیرده زنگ ائلرسن. والله دوستلار دئدیلر سنین دوستوندو گل دانیش بلکه سنه هرنه­یین دوزون دئدی!

اؤز اؤزومه دئدیم: "منیم دوستوما باخ!!" دئدیم:

-          آخی بیر شئی یوخدور کی دئمه­یه.

گوله گوله مییانا لهجه­سینه بنزر بیر لهجه ایله دئدی:

-          یوخ دا ، بونلار بیر سؤز دئییرلرسه، بیل کی بیر شئی لر بیلیرلر. هر حالدا من ایسته دیم ائله بیر کئفیوی سوروشام. سونرادا ایسته­سن ائله او سواللاری من یازیم، جاوابلییاسان. بلکه کؤمهلیق ائتدیک تئز قورتاردی انشاءالله.

بورادا هامی انسانا کؤمکلیک ائتمک ایسته­ییر کی، داها آرتیق چوخورا دوشه­سن!! منیم جاوابیمی گؤزلمه­دن سوالین وئردی:

-          دئییرسن ائله بو سئچکیلر شوراسیندان باشلایاق. اونو بیر یاز، کیملر واریدی، هاردا گؤروشدوز؟ کیم نه دئدی؟ کیم هانسی تشکیلاتین وریندن گلمیشدی، ... ؟

بونلار بئله اؤنمسیز مساله لردن باشلاییب، زیندانینی دانیشماغا وردیش وئررلر. بیر آندا گؤرسن کی ائله یاواش یاواش اؤنملی مساله لری ده باشلاییبسان دئمه یه.

قاباقجا یازدیقلاریمی بیرداها یازدیم، یالنیز حسن بی دمیرچی­نین اوجاق درنه­ییندن اولدوغونو دئدیم. بو هامییا بللی­ایدی، بونو هئچ یئرده دانمازدیلار. بازجو یازیمی اوخودو و دئدی:

-          چوخ خولاصه یازیسان. آداملارین یاریسین یازماییبسان، گؤروش یئرلریزی و ... ، بیرده کی اوردا اؤز دانیشیقلاریویدا یاز دا. سن اوردا قاموحون نوماینده­سیدین دا. بالاخره سنین دانیشیغین اوبیریلردن فرقلی اولاردی.

منیم بوینوما قویماق ایسته ییردی، دئدیم:

-          یوخ، اورادا کیمسه هانسیسا تشکیلاتی تمثیل ائتمیردی.

کئچدی ایکینجی سورویا و هادی موسوی ایله دومان ساوالانین خاریجه چیخماسی حاقدا سوردو، ائله گؤستریردی کی سانکی ائله سورولار بونلاردیر، من جاواب وئریب، گئدجه­یم. من ایسه تکرار جاوابلاری یازدیم. سونوج اولمادی. گئجه ساعات 12 اولموشدور. تلفون وورماق ایسته­دیییمی سوردو. بورادا توتوقلویا نه وئرسه­لر اونو میننت کیمی دیه­رلندیریرلر. سانکی امتیاز وئریرلر و اونون قارشیلیغیندا گرک سن نه ایسه وئرسن. اونا گؤره گرک اونلاردان هئچ نه ایسته­مه­یه­سن. ایسته­سنده حاق کیمی ایسته­یه­سن، اونلاردان مرحمت و یا یاردیم کیمی یوخ. دئدیم:

-          اولسا زنگ ائدرم نیگران قالماسینلار. اولماسادا کی هئچ

تلفونو گؤتوردوم. اویاندان سن دئمه هامی بیر تلفون سسی گؤزله­ییرمیشلر. بیر زنگ چالمامیش سونا تلفونو گؤتوردو:

-          الو، یوروش!

سسی هرزامانکی کیمی تیترک، آزجا استرسلی و نیگران و باشا باش سئوگی و محبتله دولویدو. من بو سسین وورغونویدوم. بو سس منیم بوتون وارلیغیمی ائتکیله­ین بیر سسیدی. اونونلا ائله کؤوره­لردیم کی، بیر آندا دؤیوشکن روحومو، شاعیرانه بیر مئیدانا گؤتورردی. تلفون دالیندا بو سس منه ان حزین موسیقیلردن قات قات یوخاریدا اولاردی. آنجاق  ایندی، بو سسدن کؤورلمکدنسه ، گوج آلمالیدیم. اوسته­لیک اونلارا گوج وئرمه­لیدیم­ده. سونادا بو حاقدا اؤز گؤره­وین باشا دوشوردو. او قاباقجالاردا بئله آنلاردا اؤزل کؤورک حیسلرینه مئیدان وئرمز، جیددی بیر ساواشچی کیمی منیمله دانیشاردی. آردی آردینا تاتارین یاخشی اولماغین، کنده گئتدیکلرین و ائشیکدن آتام آنام گیلین گؤردوکلرینه گؤره آزجا راپورت وئردی. دئدیم:

-          جانیم من یاخشییام. هئچ ندن نیگران اولمایین، بیده کی آتام گیله تاپشیر بو اداره­لره گئتمه­یی بوراخسینلار.

بیلیردیم سونا نیگراندیر. آخی بیلیردی کی، منیم فلش مئموریم و کامپیوتری آپاریبلار. آما نه­قدر دئسمده آرخایین اولماقلاری چتیندیر. سونوندا یاواشجا سوروشدو:

-          چوخ چتین دییل، اینجیتمیرلر؟

-          اؤنملی دییل جانیم. نیگران اولمایین.

ساغوللاشدیق. اوره­ییم بوشالمیشدی سانکی. گؤزتچی یاتاق هوجره­سینه گتیردی. اوزاندیم و سونانین سسینه مینیب، سئوگی دولو آنلاریمیزا گئتدیم. اونونلا ایلک تانیشلیغیمیزا، سئودیییم آنلارا و بو سئوگینی آچدیغیم گونلره. اونون درین سئوگی‌لی گؤزلرینه، دالغا‌لی ساچ‌لارینا و توتارلی اللرینه دالدیم. نه­لر یاشامیشدیق بیز. بیزیم سئوگیمیز باشلایاندان آردی آردینا منیم توتولماقلاریم اولموشدور. آنجاق  بونلار بیزیم موتلولوغوموزو آلانمامیشدی. کرج­ده اولارکن، بیر اوتاقلی و ائله بوتونلوکده بیر اوتاغی اولان بیر ائو توتموشدوق. دونیا مالیندان ساده­جه بیر کؤهنه سویودوجو، بیر کؤهنه قاز اوجاغی، بیر دست­ده یاتاجاق واریمیزیدی. سونرالار بیر کامپیوترده آلمیشدیق. آنجاق  همین آنلاردا موتلویدوق. موباریزه­یه دوشونوردوک و یاشاییردیق. ائله ایندیده پیس دسسلدی. بیزیم سئوگیمیزی داهادا درینلشدیرن و یاشامیمیزا آنلام وئرن بیر اولای باش وئرمیشدی، بیز دوستاق سئوگیسی یاشاییردیق بیردها. قاباقجالار دوستاقدا سونایا یازدیغیم شعرلر، اطلاعاتین الینه دوشسه­ده ، اوره­ییمیز یئرینده­ایدی. یئنسدن منی شاعیر ائدجک آنلارین ایچینده­یدیم. آنجاق  بدنیمین ازیکلییی بونا هله­لیک یول وئرمیردی. من ساده­جه دوشلریمین قوجاغیندا اویویا بیلردیم.

12-جی گون

سون دیندیرممم چرشنبه گئجه سی اولموشدو (اود گونو). ندنسه اوموردوم آرتیق بو رضا عبدی­نین گلمه­سی ایله بونلار یوموشاق داوراناجاقلار و ائله ائرته­سی گون بیتجک هر شئی. بو حیسسیمه بیر تورلو قالیب گلسمده، آرا سیرا قاپیلارین آچیلماسیندا دیندیرمه­یه آپاریلاجاغیمی گؤزله­ییردیم. آنجاق  بیر گون آرا وئریلدی. ایلک گونلرده بیر گون آرا وئریلمه­سی، بوش بوشونا سللولدا گؤزلمک هم یامان داریخدیریجی اولور، همده استرسلی. اونا گؤره کی، نه­لرین اوزه چیخاجاغی حاقدا هر آن بیر قورخو چوغلاییر آدامی. منیم قاپیمین دیندیرمه اوچون آچیلماسی، جوما گونو گئجه ساعات 12-یه قالدی. بو ساعاتدا قاپینین آچیلماسی، گؤزتچی­نین پ.زق.ن باخیشی یاخشی نیشانه دییلدی. اؤزومو اله آلدیم و بازجولوق اوداسینا گیردیم. اوتورماقلا، ائله دالیمجا تانیش بازجو گیردی. اوزو گولومسه­میردی و اؤزون جیددی بیر بازجویی­یه حاضیرلاییردی. گلیب گؤزومو آچدی و سول یانیمداکی دووارا دایانیب، الین قوینوندا باغداشلایاراق دئدی:

- بیلمیرم خبرین وار یا یوخ، بیرده کی هاردان خبرین اولاجاق سن بورداسان دا. بیزیم همکارلار گاموحون مرکزین ووروبلار. یولداشلاریزین هامیسین توتوبلار.

سؤزلرین دوروقساناراق دئییردی. اوزومه باخمیردی آنجاق  آرا-سیرا خبرین وئردیی بو آجی اولایین تأثیرلرین گؤرمک اوچون دؤنوب اوزومه باخیردی. اوزومده هئچ نه گؤسترمک ایسته میردیم. بوغازیم قوروموشدو، آنجاق  اودقونموردوم کی بیر شئی باشا دوشمه­سینلر. بونلارین سؤزلرینه اینانماق اولمازدی، آنجاق  آردیجا دئدیکلری باشیمی دؤندوردو:

-          همکارلار ایکی گوندو هر شئیی چیخاریبلار. من دئییردیم بس ائله فقط انتخابات زاد مسئله سیدیر. آنجاق  ایندی همکارلار هرنه­یی دئدیلر منه، آیدین و نعیم ایله باغادا بایراق دوزلتمه­ییز، اونون 5 عددین سنین جولفایا آپارماغین، قالان 10 بایراغی آیری یولداشلاریزین شهرلرده آسماسی و ...

بو سؤزلر هامیسی بازجولوغون سونوناجان قولاغیمدایدی. اورادا هئچ نه یادیمدان چیخمیردی، یالان دئدیییم سؤزلر درنه دؤنه سوروشولسادا، یادیمدان چیخمیردی. بو سؤزلر ائله بئله بلوف دییلدی. اوشاقلاردان کسین توتولانی واریدی. آنجاق  من یوزده یوز آرخایین اولمایینجا بلوف حساب ائتمه­لیدیم. یولداشلارین بیرر بیرر توتولماسینا، الیمه دوشن بیلگیلرله آرخایین اولمایینجا اینانمیردیم. یا سسلرین ائشیتمه­لیدیم یادا باشقا یولداشلاردان اونلارا گؤره کسین بیلگی آلمالیدیم. هله لیک بو سؤزلردن ائله ایلتمک ایسته ییردیلر کی، آیدین یادا نعیم و اولابیلر ایکیسیده توتوقلانیب. آنجاق  یوزده یوز آرخایین اولمایینجا بونلاری تام بلوف سایمالیدیم. یوخسا اونلارین توتولماسین دوز سایماق ، اونلارین بیلدیکلرینین اوزه چیخماسی آنلامیندادا اولابیلردی. بودا منی یئرسیز اونلارا آچابیلردی. یعنی من بئله حساب ائتسه­یدیم کی آیدین یا نعیم توتولوب و دانیشیب، اوندا اؤزومو یالانچی گؤسترمه­ییم دئیه، اونو دئیه بیلدیکلرینی دئیه­جکدیم. بودا زحمتسیز اونلارا امتیاز وئرجکدی. اونا گؤره گرک هامیسین بلوف حساب ائدیدیم. بیرده کی توتولسالاردا دانیشمادیقلارین سانایدیم.  یوخسا اونلاردان قاباق اؤزوم دانیشاردیم و اونلاری ایشه قویاردیم. اورادا یولداشینی اؤزوندن برک حساب ائتمک لازیمدیر. یوخسا هم اؤزون همده یولداشین آز زاماندا آچیلابیلرسیز. باشاباش موثبت فیکیرلشمه­لیسن یولداشلارینا گؤره. انسان اوردا ایسته­مه­دن بازجولارین آشیلامالاری­ایله یولداشلارینا پیس باخماغا ماراقلانیر. ایشلرین اوزه چیخماسین اونلارین باشینا سالماق ایسته­ییر،بیلمه­دن. بونا قارشی دایانماق و یولداشلارینین موثبت اؤزللیکلرین سونوناجان یاددا ساخلاماق لازیمدیر. اونلاری اورادا سئومه­یه داها آرتیق احتیاج وار.

نعیم بی احمدی، آیدین خوجالی، بونلار ان دیرلی یولداشلاریمیزدانیدیلار. نعیم­ده آیدین­ کیمی تبریز بیلی یوردونون اؤیرنجیسییدی. خییو شهریندن اولان بو یولداشیمیزین سرتلییی دیپلومات اولدوغونو، یوخاری گوونجله دانیشماسین چوخ سئوردیم. اونون توتولماسین هئچ ایسته­میردیم. توتولسادا دیره­نه­جه­یینه اینانیردیم. آیدین دا کی هم ایناملی هم تجروبه­لییدی. بیلیردی نئجه دانیشماغین و نییه بونلارا اولومسوز باخمالییدیم کی؟ اونلارین کسین دیرنه­جکلریناؤن سانیب، یولا چیخدیم.

بازجو دئدیکلرینین ائتکیسین گؤرمه­دیکده، آرتیق بیلگیلر وئرمه­یه باشلادی. آرخامداکی باشقا دیندیرمن ده بو ایشده اونا یاردیمجی اولدو:

-          همکارلاریمیز بوتون شهرلرده کی یولداشلاریزی توتوبلار، قالانلاریندا بو گونلر توتاجاقلار، رده پایین یولداشلاریزی. البته سن دانیشسان و بیزیمله یولا گلسن اونلارین توتولماسینا گرک قالماز. هرشئیی  سنله حل ائدریک. ایندی دوقتور عبداللهی اورمودان، لطیف حسنی کرج دن، اکبر آزاد تهران دان، او میاندابداکی نه دیر؟ هه، بهبود قلیزاده، شهرام رادمهر مشکیندن (خیاودان) آیدین تبریزدن. قالانلارین دا دئییم؟

بونلار بو آدلاری سایماقلا منیم بئینیمده یازیلیزدی، اوسته لیک اؤز یانیمدا دئییردیم:دئیه­ین هله قالانلارین بیلمیرلر. بئله دوشونوردوم کی بونلاری ساده جه منی سیندیرماق اوچون دئییرلر و قالان آدلاری مندن آلماق اوچون. هله کی یاشاری، آراز اردبیللی نی و باشقا یولداشلاری دئیه سن بیلمیرلر. اونلار هرشئیی بیلمه­یینجه، هرشئیی اوزه چیخارمایینجا منیم آچیلماغا حاققیم یوخدو. نه­یی بیلیرلر نه­یی بیلمیرلر سوروسو یاواش یاواش جاوابلانیردی. آنجاق  اونلار اؤزلری جاواب وئرمه­یینجه من بئله حساب ائتمه­لیدیم کی هئچ نه­یی بیلمیرلر. هئچ کیمی گتیرمه­ییبلر. بازجولار کارتلارین بیر بیر چیخارداراق ، آرا سیرا منی هم تحریک ائدیر ، همده تاماهلاندیرماق ایسته ییردیلر. اهرلی بازجو یئنه مئیدانا گیرمیشدی.

-          گؤردوندا دانیشمادین یولداشلارینی گتیردیک. بیلیرسن  اونلارا نه ظولم ائله دین؟ هله سنین اوشاغین کیچیک دیر. اونلارین ایچینده آدام وار کی 14 یاشیندا قیز اوشاغی وار. بیلیرسن بو نه دئمکدیر؟ سن کیشی اولسان بئله ایشلره ایجازه وئرمزسن کی، عورضن اولار، کاغاذی آلیب هرنه یی یازارسان. سندن موباریز اولماز کی. موباریز اؤزون وئرر قاباغا دئیر آغا بیز بویوق، من هرنه یی دئییرم، ایندیده سیزدن ایستیییرم تای اولاری توتمیاسیز! بیزده آدامیق دا بیلیریک نه ائلییک. بیلیرسن توتماقدان خوشوموز گلمیر کی ، واللاهی اؤزوموز سیزدن چوخ ناراحاتیق. الان من سندن داها چوخ ناراحاتام. بالاخره آدامیق دا. ایندی من ایسته­سم هر دیقه ائویمه اوشاغیما زنگ وورابیلرم، دوزدور ائله بو بازداشتگاهین اؤزو سیخیجیدیر. آنجاق  ایسته دیییم زامان ائویمه گئدیرم، سنده قالیبسان بو دؤرد دووارین آراسیندا. سن دئییرسن بس بیز بوندان خوشحالیق؟ یوخ والله ناراحاتیق. بیزده ایسته ییریک تئز سن هر شئیی قورتاریب گئدسن ائوینه ائشییینه. بوردا قالماغیوین بیزه نه خئیری وار؟ یئرسیز هزینه دن سووای.

او دانیشدیقجا ایشلتدییی تکنیک لر بیر بیر بئینیمده جانلانیردی. تحریک، تطمیع، تحقیر، تقصیر،... بونلارین هامیسی منی دانیشدیرماق اوچوندور. اونلار پول آلیردی کی گئجه نین بو واختی منی دانیشدیرسینلار. منده سایمازیانا، سانکی بونلارین دئدیکلرینین هئچ بیرین ائشیتمیرم،دئدیم:

-          ایسته­میرسیز بوردا قالیم، ندن بوراخمیرسیز؟

اهر لهجه لی دانیشیغینین دالین توتدو:

-          بس ائله بئله اولماز کی گؤروسن کی من نه بلوف وورورام ، نه یالان دئییرم. هرشئی اورتادادیر. سن بونو دانان یئرده من آخی صاباح تهرانا نه دئیه­جم؟

بیر صندل گتیریب، یانیما قویدو، صندلین دایاناجاق یئرینده اوتوردو. ایکی ساعاتدان چوخ قولاغیما منطیقلرین اوخودو. من داندیقجا: "باخ اولمادی دا، بئله دئیهنده من حساب ائلیرم بیزی ائششک حسابلیرسان" دئییردی. ایلیشمیشدی، ساریلمیشدی، ال چکمیردی. کند قیزلارینی ائلچیلیک زامانی قاندیرماق ایسته­ین و  هه­جییی آلاناجاق من اؤلوم سن اؤلمه، منه گؤره ، فیلان کسه گؤره قبول ائت دئیه یالوارانلار یادیما دوشوردو. سؤزلری منطیقلییدیر آنجاق  منیم منطیقیمله اویموردو. من دیرنمه­لیدیم. یوخسا گلجکده کیمخ دیرن دئیه بیلردیم؟ منه بللی اولموشدور کی بیزیم ایمئیلیمیز هاچاندان هاچاناجان بونلارین الینده اولوب، سونرادا بیزی ایتیریبلر. آنجاق  بونو یولداشلارا دئیه­نمزدیم. کیمسه بونو قبول ائتمزدی کی اونلار چوخ شئیی بیلیرمیشلر. منیم یازیمی یولداشلارین بیرینین قاباغینا قویسالار، او آندا نه حالا دوشرلر، دئیه دوشونوردوم. اونلارا منه تای بلوفلاردان چوخ ووراجاقدیلار، آنجاق  اونلاری ایناندیرماغا منیم بیر یازیم یئتردی. اونلار منیم بیر یازیمی گؤرسه­یدیلر، ائله حساب ائدردیلر کی هرنه منیم آچیلماغیملا اورتایا چیخیب، اونا گؤره دیرنمه­لیدیم. بازجو منیم گؤزوم آچیق اولدوغونا ، اوزونه بیر بورونلوق (آغزین، بورنونو اؤرتن) وورموشدو. گیره­وه دوشدوکجه باشینین توکلرینین فورمونو، بوی بوخونون، گؤزلرین و سسین یادیمدا ساخلاماق ایسته­ییردیم. یالوار یاخار، یوموشاق هده­له­مکلر بیتدی و سونوج وئرمه دی. سونوندا دئدی:

-          من گئدیرم، داها دالینجا گلمییه­جم. گلسه­لرده آیری همکارلار گلجئه. او زامان منی آرزولایاجان. هر زامان ایسته­سن اؤزون چاغیرارسان. آما گئت یاخشی فیکیرلش، گون کئچدیهجه هر شئی کورلانیر و سورالار داها سنه کؤمهلیق ائلییه­نمییه­جم.

اوزاقلاشدی و منیم جانیم دینجلدی. او گون دؤیولمه­دیم، آنجاق  آلدیغیم خبرلر سارسیدیجییدی. یاتاقدا یولداشلارا دوشوندوم، کیملر گئرچکدن توتولوب؟ بونلارین الینده قاباقکی ایمئیلیمیز وار، تزه ایمئیلدن خبرلری یوخدور. کاش آیدین گیل بلوف یئمه­یه­لر، آلدانمایالار. اونلاردا منیم کیمی دوشونه­بیلرمی گؤره­سن؟ یوخ هاردان دوشونسونلر؟ اونلاری بئله باشا سالاجاقلار کی ، من هر نه یی دئمیشم، او زامان ایناندیرماق اوچون یئتر کی مار بی­دن ، کار بی دن، و بونلارا اوخشار تیکه لردن بیرین اورتایا قویسونلار. کاش اونلار بیر نئچه گون دیره­نه­لر. او زامان یا من بیر گیره­وه تاپیب اونلارا نه­لر اولدوغونو چاتدیرارام، یادا اؤزلری باشا دوشرلر. اونا گؤره کی بونلارین اددعالارینین یوزده یوز یالان اولماسی چیخار بیر ایکی گون سونرا. اونلار دانیشدیقجا بیلگیلرینین سوییه سی بللی اولور و بایدیرمالاری هرنه یی اورتایا قویور. گئجه ساعات ایکی ایدیر.یاتانمیردیم. نئجه یاتماق اولاردی. سواللار و اونلارین وئردیکلری بیر بیر بئینیمده جانلانیردی.

ناماز واختینا یاخین منی اویاتدیلار. هارا آپارماق ایسته دیکلرینی سئزمک اولمازدی، آنجاق  کسین خوش بیر یئره آپارمیردیلار. او گئجه منیم یئریمی دییشدیلر. بازجویی سللوللاریندا ایکی پتو وئردیلر، یاتدیم. پتولارین بیری آزالمیشدیر. سوفره، گویوم و قند قابیدا یوخ اولدو. دئمه­لی بو بیر اویاریدیر. آنجاق  انملی دییلدی. بو اونلارین ضعیف اولدوغون گؤستریردی. سایمادان یاتدیم.

بازجویی اوتاقلاری باشقا بیر نفرلیک سللوللارینین یاریسی بویدادیر. قوللاریمی آچاندا ائنی قدر اولوردو. اوزاناندادا بویومدان آزجا اوزونودو. بو کیچیک یئرده هاوالارین ایستی زامانی بئله ایدمان ائلمه­یی دایاندیرمادیم. داها رقص ائلمک اولمازدی. 5 گئجه گوندوز بورادا گؤزلمه­لی اولدوم. بو اونلارین ان یوموشاق باسقی مئتودلاریدی. بورادا هر آن استرسدیدیم، هر آن منی ایزله­ییردیلر. کامئرالارلا یوخ، گلیب قاپینین باخینجاسیندان باخیردیلار. بورادا بیریسین ساده­جه باخیشلادا محدود ائلمک اولار، فیکری اؤزون آچیقجا گؤستریردی. گئرچکدن قادینلار بیزیم توپلومدا نه­لر چکدییینی بئله یئرده دویماق اولوردو. باخیشلار زیندان قدر انسانی سیخابیلیر.

بورادا بازجویی مئتودلارینین و قوللاندیقلارینین نئچه سینی بیر یئرده یاپیردیلار. کونترول ائدیردیلر، هر گون نئچه ساعاتدا بیریسی گلیب، قاپیدا یئرلشن باخینجادان 10-15 دقیقه ایزله­ییردی منی، بو ایش ان چوخ زهله تؤکن ایشلریندنیدیر. بیریسی انسانی گودرکن اونا هئچ تپکی گؤسترمه­مک چوخ زور اولور. اونونلا یاناشی اونلار بو ایشله منی هم فیزیکی همده روحی (پسیکولوژیک) باخیمدان سارسیتماق و ضعیفلتمک ایسته ییردیلر. گونلرجه دار بیر یئرده اوزانیب، دورماق و هر آن نه­لر باش وئره­جه­یینی گؤزلمک چوخ چتین، داریخمالی و یوروجودور. آنجاق  بورادا من دؤزومومو سینامالیدیم. دؤزمه­لیدیم، اوقدر کی سونوندا سینان و یورولان اونلار اولسون. اورادا باشا دوشدوم کی دؤزمک ان بؤیوک گوج اؤیه­لریندندیر. دؤزوملو انسانلار ان گوجلولر ساییلابیلرلر. صبریمی، دؤزومومو قیرماق ایسته­ییردیلر، من ایسه دؤزومله اؤزوموو داهادا برکیدیردیم ، داهادا اوره ییمی سیغاللاییردیم. اؤزومو ، اؤز چاتمازلیقلاریما دوشونوردوم، اوموردوم بو دؤزومله بوتون کیرلریم تمیزلنه­جک. من بورادان چیخاندا، آرینمیش، گول کیمی چیخاجام. داها هئچ زامان کیرلنمه­یه یول وئرمه­یه­جم. قوتساناجام دؤزوم شرابی ایله.

بو دار هوجره­ده اونلار همده منی باشقالاریندان آیری سالمیشدیلار. انزوا، بوجاقلاماق، قیراقلاماق اونلارین تکنیک لریندن دیر. بونو یاخشی بیلیردیم. آنجاق  بورادا نه اولدوغونو قاورادیم. بئله انزوادا اولارکن، انسان هر یئردن قیریلیر، دونیاسی کیچیلیر، اؤزونو یاخشی آپارانماسا ایستکلریده کیچیلیر، دیه­رلریده. آزاد دونیاداکی ایده­آللاری بورادا کیچیک ، دیری قالماغا لازیم اولان ایستکلرله دییشمک ایسته­ییرلر. بیرده کی بورادا انسان یالنیز بازجولاری و گؤزتچیلری گؤرور، اونلارین ایچیندن یاخشی چیس آیریمی یاپیر، بیرین یاخشی دیه­رلندیریر، اونا اعتماد ائتمک ایسته ییر و اونون دیندیرمه­یه گلمه­سینی ایسته ییر، باشقاسیندان ایسه آجیغی گلیر. بیر حالدا کی بونلارین هامیسی بیر بئزین قیراغیدیرلار. هامیسینین هدفی زیندانینی سیندیرماق و استفاده ائتمکدیر. بورادا ائشیتدیکلرین و آلدیقلارین یالنیز اونلارین وئردیییدیر. ائشیکده نه­لر باش­وئدییینی بیلدیرمیرلر. اونلار ائشییی ایسته­دیکلری کیمی گؤستریرلر، بونا گرک اینانمایاسان. گرک قاباقجا بللی ائتدییین گؤره­وی یئرینه گتیرمه­یه چالیشاسا. اونلارین وئردییی بیلگیلر اساسیندا یئنی وظیفه اؤزونه سئچمه­یه­سن. من نه اوزه قالماق ایسته­ییردیم، نه اومیددن دوشن­ایدیم. قالیردی فیزیکی باخیمدان ضعیفلمک. اونلار بونو ائده بیلردیلر، آنجاق  من الیمدن گلدییی قدر بونا یول وئرمه­مه­لیدیم؛ ایدمانلا، یاخشی یئمکله. بونا یول وئرمه­سه­یدیلرده اؤنملی دییلدی. گوج اصلینده ساغلام دوشونجه­ده، تمسز و گوجلو اینامدا، دؤزومده و گوجلو اراده­ده­دیر. اونلار منیم اراده­می قیرانمازدیلار. اورادا و زینداندا اقتصادی جورملره گؤره گلمیش چوخ بوینو یوغونلارین ازیلدییینی، یئره سورتولدویونو گؤرموشدوم. بلکه ده اونلارین بازجویی سینی منه ائشیدیردیلر کی ، منه ده بیر گون اونلار کیمی سیناجاغیمی آنلاتسینلار. آنجاق  من بیلیردیم کی او اوزده بوینو یوغون بوغو بورمالار ، ایچدن نه قدر بوشدولار. یوخسا اینسانین فیزیکی گوجو 6-5 گونده اریییب گئدر. آنجاق  روحن گوجلو اولان، اینامجا درین اولان بیریسینین گوجون آلماق چتیندیر. 5 گئجه گوندوز بئله جه کئچدی. من یاواش یاواش آیلارجا بئله قالاجاغیما اینانیردیم داها. 17-جی گئجه گلیب چاتدی.

17-جی گون

17-جی گئجه ساعات 9دا گؤزتچی قاپینی آچدی. من آرتیق دیندیرمه اوتاقلاریندایدیم، آنجاق  بؤیوک دیندیرمه اوتاغینا آپاردیلار. اهر لهجه لی بازجو گیردی ایچری:

-          نئینه­د­ین؟ فیکیرلشدین؟ کاغاذ گتیریم یازاسان؟

-          یوخ، هرنه یی یازمیشام دا، داها نه یازاجام کی

قاپینی اؤرتوب، قاییدیب گئدرک دئدی:

-          سنین ائله حاققیندیر. قال چورو بوردا

یاریم ساعات سونرا یئنیدن قاییدیب گلدی، دوروب باشیمین اوستده دئدی:

-          ایسته دیم سنه بیرداها فورصت وئریم. بیلیرسن هئچ نه­لر اولوب؟ یولداشلاریوین هامیسین گتیرمیشیک. اونلار آیری یئرده دیر. ایسته میریک سن اونلارلا دانیشاسان. هانسین ایسته­سن گتیریم بازجوییسینه باخ.

-          لازم دییل

آجیقلیجا جاواب وئردی:

-          به نه ایسته ییرسن؟ بیر ایکی گونده کئچسه داها سنین یازماغینین فایداسی اولمایاجاق. هامیسین توتموشوق. بیرجه پیر بی قالیر. پیناری دئییرم، اودا قیزد اولدوغونا دئدیک هله قالسین گؤره نه اولور. ایندی سن دوزمللی حرکت ائلمه­سن اونادا باعث اولاجان. اوندا مجبور اولوب اونودا توتاجاییخ.

"وای ده ده پیناریدا بیلیبلر. یامان پیس اولدو. به بونو هاردان چیخارتدیلار. بو کی اللرینده یوخودو. اوشاقلار یقین آلدانیب. آنجاق  نئینر، بونلار بیلسه­ده گرک منیم اعترافیملا کیمسه یی گتیرمه­یه­لر. بو بیر وازکئچیلمز گؤره­ودیر." بونلاری دوشونرک اوره ییمده فیرتینا قوپموشدو. پینارین توتولماسین هئچ ایسته میردیم. "اونون آتاسی، آناسی، ایشی، ... هامیسی دیه­ر بیر بیرینه. آتا آناسی مذهبی عایله دیلر. بیر قیزین توتولماسین بو راحاتلیغا قبول ائتمزلر. قوهوم آراسیندا یقین چوخ پیس دوروم یارانار. گؤره سن بیر نئچه گون گیزلنه بیلر؟! یوخ، ایشی وار آخی..." اوره ییمدن کئچیردی کی بازجو دوردو آیاغا، قاپینی قاپییاراق، اوزاقلاشدی.

پینار منیم بالدیزیمیدی. سونا‌دان کیچیک باجی‌لاری. من اونو 1380-جی ایلدن ائله میللی حرکتده تانیمیشدیم. جسارتی ایله، سوروملولوغو ودیکباش‌لی‌لیغی ایله تانیناردی. قاباقجا دا بیر دؤنه توتولموشدو. ائله او زامان دا دیرنمیین گؤرموشدوم. بو آلچاق بوی گرگرلی قیزین، چوخ بؤیوک ایراده‌سی واریدی. بیلیردیم کی اونو آلداتماق دا اولماز، آنجاق توپلومون دیرلرینه گلدیکده، او بیر قیز ساییلیردی و بئله‌جه اونون توتولماسی‌نین ائتکی‌سی داها چوخ اولا‌جاقدی، آیله‌له‌سینه. اخلاق ایلکه‌لری‌نین چاتیشماسی زامانیییدی. هانسی دیرلی وارلیق اوغروندا هانسیسا دیردن گؤز یومما‌لی زامان. بو آنلار قرار وئرمک چتین اولور. من پینارین توتولماسین ایستمیردیم، آنجاق هر کسی سین‌دیرا‌جاق بئله آراج‌لاردان قوللانابیلردی‌لر اونلار. او زامان داها موباریزه‌یه یئر قالمازدی.  

بؤیوک آلینماز بیر قالانین بیر دوواری ییخیلارسا، "آرتیق هرنه بیتدی" دئیه، انسان تسلیم اولماغا حاضیرلاشار، قالانین دیه­ری او دووارین ییخیلماسی ایله گؤزدن دوشر. آنجاق  اصلینده بئله اولمامالیدیر. سونوناجان دیرنمک گرکیر، هئچ نه یی بوش بوشونا وئرمه­مک لازیم. بیر عسگر قالیرسا، اونونلادا یئنیدن باشلاماق اولار. "یوخ ، اؤرگوتده بیر نفر بئله تانینمامیش قالسا، اونا گؤره ده دیرنمه­لییم" دئیه قراریمی یئنیله دیم. هئچ نه یی بونلارا اوجوز وئرمک لازیم دییل. گؤزتچی منی یاتدیغیم دیندیرمه اوداسینا گؤتوردو. ائله تزه جه قاپینی باغلاییب گئتمیشدی، بیر تانیش سس قونشو اوتاقدان فیکریمی اؤزونه چکدی.

-          آغا بیر سوپورگه وئریرسیز بورانی سوپوروم؟

سسیده اؤزو کیمی هاردا اولسا تانینان، یولداشیمیز اکبر بی آزادی تزه­جه گتیرمیشدیلر. قالدیغی یئر بازجویی سللولو اولدوغونا باتیغیدی. اورانی تمیزلمک ایسته ییردی. گور، اوجا سسی قولاغیمی اوخشادی. من بیلن اونون موسیقی یئته­نه­یی چوخ اشاغی سوییه ده­یدیر آنجاق  ایندی اونون سسیندن نئجه ده گؤزل حیسلر آلدیم. بو اوره یی و اراده سی جاوان قوجا یولداشیمیزین بورایا گلیب چیخماسینی اصلا ایستمزدیم. آنجاق  ندنسه سانکی ساواشدا بیر یئنی های گلمک کیمی اولدو اونون سسی. "اده وور گلدیم" . 

اکبر ازاد اوجا بوی، 50 یوخاری یاشلی، آغ ساچلی و آغ قالین بوغلی شاهسون یولداشیمیزیدی. او خییوو طرفیندنیدی، آنجاق لاپ اوشاقیکن تهرانا کؤچنلردن ایدی. اوزون ایللر آذربایجان دیلی و وارلیغی اوغروندا چالیشمیش بیریسییدی. اونونلا قاباقجادا دوستاق یولداشی اولموشدوق. 1383-جی ایلده ، بابک قالاسیندا بیزی توتوقلادیقدان سونرا ائله بورایا گتیرمیشدیلر. بیز بیر بیریمیزی دوغرو دوزگون ائله او زامان تانیمیشدیق، اوندان قاباق، ایللرله بیر بیریمیزی گؤرسکده. بوراسی گئرچکدن انسانلاری تانیماغین لاپ یاخشی سیناغیدیر. آزاد بی ایله بیز بورادان یاخین یولداش اولموشدوق. اونون دایاناجاغینا، دیره­نه­جه­یینه اینانیردیم. بیلیردیم اؤزون یاخشی آپاراجاق. گؤزتچینین آیاق سسلریندن، سالوندان چیخدیغینی دویدوم، همن آزاد بی ایله ایلگی قورماغا و اونا چاتدیرمالاری تئزلیکله چاتدیرماغا آتیلدیم. اوزاندیم قاپینین آغزیندا، آشاغاداکی جیریقلاردان آزاد بیی سسله دیم، نه قدر چالیشدیم جاواب گلمه دی. دوشوندوم بلکه ایسته میر دانیشاق، آنجاق  منیم دئیه­جکلریم واریدی. او بیلمیردی بورادا نه­لر اولوب. مار بی، تار بی و  ... بونا تای آدلاری قویسایدیلار قاباغینا، شاشیراردی. او زامان نه دوشونردی؟ خیال قیریقلیغینا اوغرامازدی می؟ گرک اونا دئییدیم کی بونلارین الینده ساده جه بیر سیرا ایمئیل یازیلاری وار. اونلاری تام دانابیلریک. دیرنمه­لیییک سونوناجان. آنجاق  اوندان جاواب چبخمادیغینا، دولاییجا چاتدیرماق ایسته دیم. گؤزتچینی چاغیرماق بهانه سی ایله اونا سؤزلریمی یئتیرمک ایسته­دیم:

-          حاجی! آی حاجی! بابا بس بونلار هاردا قالدی؟ آی حاجی! عجب ایشه قالمیشیق ها! یئمه ایچمه، سانجیلان. آی حاجی آخی من نئیله میشم کی، 17 گوندور بورایا سیخیبسیز؟ حاجی! حاجی! بابا اؤزوزده گؤردوز دا من هئچ نه­یین صاحابی دییلم. آخی منی ائویمدن نییه توتوب گتیریبسیز؟ یالاندان منه اتهام یاپیشدیریرلار! ایمئیل دوزلدیرلر منه، من هئچ ائشیتمه دیییم آدلاری یاپیشدیریرلار منه...

بئله­جه بیر ساعاتا یاخین ساکی میتدانیردیم، آنجاق  مقصدیم سؤزلریمی آزاد بی­یه چاتدیرماغیدی. سن دئمه هئچ بونلارین هئچ بیرین ائشیتمیر او! اونون قالدیغی سللولون پنکه سی (یئلپییی) اوجا سسله ایشله­ییرمیش و او آنجاق  اؤز سسین ائشیده بیلیرمیش.

 

19-جو گون

یئنه ده ایکی گونودور کی گؤزله ییردیم. یولداشلاری بیر بیر گؤز اؤنومدن کئچیریردیم. کیملرین بیر سوره گیزلنه بیله­جه­یین، کیملرین بازجویی ده نئجه دیره­نه­جه­یین و اؤرگوتو ساووناجاغین دوشونوردوم. ائله پلانلاییردیم کی، منیم دانیشمام کیمسه نی چتینلییه سالماسین. یولداشلارین هر بیرینین اؤزل ، اولوملو جهتلری واریدی، بو اؤزللیکلر بیر بیرین بوتونله­ییردی، ائله اونا گؤره ده سیستملی چالیشماق یارارلی اولور. 19-جو گونده آز قالیردی بیتسین کس ، ساعات دوققوزا یاخین شامدان سونرا گلیب، بازجویی یه آپاردیلار. ایچری گیردیم. آز سونرا آرخامجا اهر لهجه لی بازجو گیردی و هئچ دانیشمادان قاباغیما بیر بازجویی کاغاذی قویدو.  تاخما آدلارین گئرچک آدلاری اؤنومده­ییدیر. آنجاق  یئنه ده بولماجانی یاخشی آچانمامیشدیلار.

-          آشاغیداکی آداملارلا ان سون هاچان ایلگین اولوب؟ اوز یه اوز، تلفونلا، اینترنت، هامیسین بیر بیر یازین:

1-شهرام رادمهر 2-اکبر آزاد 3-علیرضا عبداللهی 4- لطیف حسنی 5- بهبود قلیزاده 6- آیدین خواجه ای 7- حیدر کریمی 8- یونس سلیمانی 9- سجاد رادمهر 10- داریوش حاتمی 11- امیر مردانی 12- ناصر حقی

رضا عبدی دئییلن بازجو داها گلمیردی. او اهر لهجه لی­ده او گون سانکی مئیدان اوخویوردو منه. سانکی "ایندی نه دئیه­جکسن داها؟ دی یاز!" دئییردی. منسه اؤنجه آدلارین هامیسینا بیر باخدیم. "اویون بیتدیمی؟ یوخ بو اویون دییل، منیم هله ده دایانماما گرک وار، بونلار اولابیلر بو آدلاری آچابیلیبلر، آنجاق  منیم یازماغیم بلکه اونلاری توتماغا بیر گرکچه اولا، اونا گؤره ده هله دیرنمک گرکیر. اونلارین بیلگیلری هله ده دوز دییل." دییه دوشوندوم. یونس سلیمانی، حیدر کریمی، ناصر حقی و امیر مردانی نی تانیمیران دئدیم. بهبود قلیزاده نین آدین ائشیتمیشم. قالانلارین ایسه­ده هره­سینه بیر اوزاق گؤروش زامانی یازدیم.

بازجو کاغاذی الیمدن آلیب اوخودو، سونرا تأسف حیسسی گؤستررک دئدی:

-          ایسته ییرسن بیر بیر اونلاری گتیریم یانیندا اعتراف ائتسینلر؟ هامیسیدا دئییر تشکیلاتی سن قوروبسان. هانسین گتیریم؟

هله ده هامیسینین توتولماسی یالان اولابیلردی. من یالنیز آزاد بی­یین سسین ائشیتمیشدیم. یولداشلارلا اوزلشسم ده بیلیردیم نئجه یاناشاجام. اوسته لیک اونلاری گئرچکدن توتموشلارسا منیم بازجویی یازیلاریمی و یا ائله دانیشماغیمی اونلارا گؤستره­بیلردیلر. اونا گؤره چوخ اؤزنلی (دیققتلی) اولمالیدیم. دئدیم:

-          هانسین گتیریسیز گتیرین دا

-          اونلار دئسه­لر سن گاموحون مرکزی کومیته سینین عوضووسن قبول ائدجن؟

-          یوخ بورادا هرکسه هرنه دئدیرده بیلرسیز.

-          گؤرورسن، یئنه کؤنزلیه ائلیرسن، بیلیرسن هئش نه اولوب؟

آزجا دایاندی، قاباغیما بیر کاغاذ قویدو، کاغاذ پینارین جلب حؤکمویویدو. پینارا گووه­نیردیم. بلکه ده او آندا ائله هر کسین توتولماسی دوغال گؤرونوردو، اونا گؤره سویوق سویوق کاغاذی اوخویارکن بازجو دیله گلدی:

-          اونودا گتیردیح. فعلن قویمادیق زیندانا گئتسین، انفرادی یه سالمیشیق. بیلیرسن دا اورا نئجه یئردی؟ اورا کیملری سالارلار؟ باخ اوردا  اوغورلوقنان قتل چوخ تمیز ایشلردیلر. الله گؤرستمه سین موعتاد، فاحیشه و ...

بو دانیشماسی ایله هم ساکی منه مننت قویوردو، همده کی بیر تورلو منی تحریک ائدیردی کی دانیشام. بیرآز دوروقساندی. سونرا قاباغیما پیناردان آلدیغی یازینی قویدو، یازییا باخدیم. خط اونون خططیدی. آنجاق  ائله یئرینه­جن گؤستردی کی اونون نه­یی بوینونا آلیب آلمادیغینی گؤرمه­ییم. سونرادا ایسته دی بیر داها منی تحریک ائتسین:

-          گؤرورسن دا، هرنه یی قبول ائدیب! اؤزوده سللولدا گؤزونون یاشین بئله تؤکور (اووجون آچمیشدی)

 بونو دئمکله منی شوبهه یه سالماق ایسته ییردی کی سانکی پینار هرنه یی قبول ائدیب و اولابیلر من یازینی کامیل اوخویانمامیشام. هر حالدا بو سؤزلر منه ائتکیسیزیدی، دانیشیق آراسیندا دوقتور عبداللهی نین و دوقتور آراز قاراباغلی­نین (لطیف حسنی) سالوندا سسلرین ائشیتدیم. اونلاری تلفون ائتمه یه آپارمیشدیلار. تلفون اوتاغی ایله بازجویی اوتاقلاری بیر بیرینین یانیندایدی. اونلارین ایکیسینین ده سسی خوش گلیردی. ائو ایله چوخ راحات دانیشیردیلار. اونلارین سسینده استرس فیلان گؤرموردوم. اؤزللیکله آرازین بیرینجی دؤنه توتولماسینا باخمایاراق، سانکی مندن ده تجروبه­لیدیر. بورادا هانسیسا ایش گؤرمه یه گلمیشدی سانکی. بوراسی یامان خوش گلدی.

دوقتور آراز (لطیف) کؤکنجه خالخال بؤلگه سیندنیدی. لاپ اوشاقلیقدان اورادان اؤنجه ایرانین شیمال بؤلگه سینه- رامسره- سونرادا کرجه کرچموشدولر. بو کؤچ سوره سینده، ایراندا تورکلره قارشی تحقیر و آیری سئچکیلییی اؤزو دریندن دویموش، 1370-جی ایللردن میللی فعالییته باشلامیشدی. یوکسک لیسانس و دوقتورلوغونو قوزئی آذربایجاندا آلمیشدی. اؤرگوتوموز قورولدوغو آندان بیرگه ایدیک. اونو 1379-جی ایلدن تانیییردیم. آریق، آلچاق بوی، ساچلاری آزجا سئیرلمیش گؤزلوکلو بیریسییدی. 40 یاشیندایدی.گوجلو سیاست بیلن و حقوقشناسیدی. نئچه ایل باکی دا یاشاماق اونون دانیشیق لهجه سینه تأثیر ائتمیش، لاپ اونلار کیمی دانیشاردی. اونون سسین و لهجه سین سئوردیم همیشه. بورادا دا لاپ خوش گلیردی. ائله سانکی ائویمیزده اوتوروب نسیمی نین شعرلرین آچیردی. سانکی فلسفه دن سیاستدن دانیشیردی. آنجاق درینلیکده اولان، هردن­ده بَرَلن گؤزلرین یقین کی ایندی گؤز باغی اؤرتموشدو.

ائلیار عبداللهی­نین ده کی همیشه کی دینج دانیشماسی راحاتلادیردی. او ایسه اورمو شهریندن ایدی. آتاسین ایران-عراق ساواشی زامانی الدن وئرمیشدیلر. 1380-جی ایلدن اونونلا یاخین ایلگیمیز واریدی. دیش حکیمی ایدی. چوخ یوموشاق ، ساکیت بیریسییدی. بورادا اونون ایلیق سسین دویماق بوتون کئچمیشیمیزی آندیریردی.بئله یولداشلارلا اؤلومه ده گئتمک اولاردی.

یواداشلارین گتیریلمه­سی و ائله­جه سسلرینی دویمام منده یاخشی حیسلر یاراتدی. استرسیم و قایغیم بیرآز آزالمیشدی. داها اونلارین توتولماسینین قایدینا قالان دییلدیم. بوردان بئله بیزسیز اؤرگوتون گلجه­یینه دوشونوردوم. گؤزله­ییردیم گؤروم داها کیملر گلیر. دوننه کیمی یولداشلارین توتولماسین آصلا ایسته میردیم، آنجاق  ایندی قولاغیم سسده­ییدیر کی گؤروم داها کیملر گلجک. ندنسه بیر اوشاقلیق اویونونا اوخشاییردی. توپلو (جمعی) توتولماغین اؤزل چتینلییی اولسادا، اؤزونه گؤره هیجانی دا وار. ایلنجه­لی بیر ماجرادیر سانکی.

21-جی گون گؤزتچی بیر وکالتنامه کاغاذی قویدو قاباغیما. وکیل عباس جمالی­نین منیم وکیلیم اولماق ایسته­یی اؤنومده­ییدیر. عباس جما‌لی، آزربایجانین(گونئی) وکیل‌لر اوجاغی‌نین آزا‌راق قورخماز وکیل‌لرین‌دن ایدی کی همین اوجاغین بشر حاق‌لاری کومیسیونونون چالیشقان اویه‌لرین‌دن اولموشدو و ایللرجه سیاسی پرونده‌لره وکالت ائتمیشدی. ایراندا سیاسی پرونده‌لره وکالت ائتمه‌یه جسارت لازیم‌دیر.  من ایران محکمه سیستئمینده ، سیاسیلر اوچون وکیلین اولماسینی ائتکیسیز بیلیردیم. بونا اینانیردیم کی وکیلین اولوب اولماماسینین قاضینین وئره­جه­یی حؤکمده تإثیری یوخدور. آنجاق  اورادا، اطلاعات هوجره سینده بیر وکالتنامه کاغاذینین منه گلمه­سی یاخشی دویقولار یاراتدی منده. بو وکالتنامه ائشیکله باغلانتیییدی. گؤستریردی کی اوشاقلار ایشله ییر. مساله نی اؤرت باسدیر ائدنمزلر.

25-جی گون

ایکی هفته­ییدیر کی زنگ وورماغا آپارمامیشدیلار. آرا-سیرا یولداشلارین بازجوییسین ائشیتمیشدیم و تلفون سسلرینده. آیدینین او گون بازجویی­سین هیجانلا، سئوینجله دینله­میشدیم. اونون بایراق حاقدا مودافیعه سی و چوخ تمکسنله دانیشماسی منی یامان سئویندیرمیشدی. بازجو اونا دومانی پیسله­ییردی. اونون خاریجه قاچماسین قاباردیردی و ... . آیدین حرکتیمیزی، حاق ایستکلریمیزی و اؤرگوتوموزو ساووندوقجا، سانکی بیر فوتبال یاریشماسینا باخاراق، قول وورماق هیجانین یاشاییردیم. آرا-سیرا الیمی دویونله­ییب، "یاشاسین" دئییردیم.

قاپی آچیلدی و گؤزتچی منی تلفون اوداسینا آپاردی. تلفون اوتوروغونون یانیندا، بازجو دایانمیشدی. کئفیمی سوروشدو و دئدی:

-          سن کی اؤز عایله­وین فیکرینده دییلسن، بایاقدان یولداشلاریوین هامیسی زنگ ووروب، اونلار ایسته­دیهلری زامان زنگ ویریرلار، سنین کاغاذینا باخیرام، ایکی هفته دیر تلفونسوزسان. نییه بئله ائلیرسن؟ گل زنگ وور، خانیمینلا دانیش، آنجاق  آیری سؤز دئمه ها. ائله دئ کی کئفیم سازدیر، نیگران اولماسینلار. بیرده گرک منه قول وئرسن کی کیشی کیمی دانیشیاق. لاپ گلرم اوتاغیندا دانیشاریق. بابا چوخ چتین توتورسان ائی. اودور یولداشلارین هرنه­یی دانیشیب، شهرام، عبداللهی، لطیف. هانسین ایسته ییرسن گتیریم یازیلارینا باخ. اونلارین هامیسینا تعلیق وئره­جه­ییح قالاجاسان سن یامان گونه. یقین بوردان هرگون تلفون سسلرین ائشیدیسن دا. هئچ دئمیرسن کی نییه سنه تلفون وئرمیریح؟

من ساده­جه دینله­ییردیم. ایسته میردیم آتیشام. دوغروسو تلفونون یانینا گلمک تاماهلاندیرمیشدی زنگ ائتمه­یه. بیرده کی بونلارلا تارتیشمانین فایداسی یوخویدور. گرک ساده­جه توتوق وئرمه­یه­یدیم. آز، قیسسا و تمکینلی دانیشمالیدیم. گؤردو کی من جاواب وئرمیرم، الین اوزالتدی منیمله عهد باغلاماق ایسته ییر کیمی و دئدی:

-          قول (سؤز) وئر کیشی کیمی دانیشاجان!

من ایسته میردیم دئیم دانیشمیرام و یا کیشی کیمی دانیشمیرام اوناگؤره دئدیم:

-          من کیشی کیمی دانیشیرام ائله

الیمی توتوب سیخدی، اؤزومدن اوتاندیم. آنجاق  الیمی چکمه­دیم، سئوینرک دئدی:

-          یاخشی زنگ ائله گئت اوتاغیوا گلیرم

بازجو یانیمدا دایانمیشدی. تلفونو سونا ائله بیر طنگ چالماقلا گؤتوردو. نیگرانلیق سسیندن تؤکولوردو. دئدیم کی : "کئفیم سازدی، داریخمایین، آتام گیله تاپشیر بیر یئره باش وورماسینلار، اؤزونده تاتارا یاخشی باخ قویما چتین کئچسین اونا". آنجاق  گؤیلوم ایسته ییردی سونا توتولانلاردان خبر وئره، کیملر ایچری­یه گلیب، پینار بوراخیلیب می یوخسا یوخ، آنجاق  بونلاری سوروشماقلا تلفونومو کسجه­یدیلر. او تایداندا سونا بیر سؤز بو حاقدا دئمه دی، سونرا سونانین آناسی دا دانیشماق ایسته دی، بو زامان بازجو دئدی: "آناندیر، نه قدر ایستیسن دانیش" . "اوشاقلار نئجه دیر دئیه سوردوم" آنجاق  او دئدی هامی یاخشیدی. بیلمه دیم سونوندا پیناری بوراخیبلار یا یوخ. هرحالدا تلفون بیتدی و منی سللولوما آپاردیلار. بازجو قونشو سللولا منی آپارتدیردی و اورادا دانیشدیرماغا باشلادی. منه دئمک ایسته ییردی کی آرتیق یولداشلاریندا بیلمه دیکلریمیزی دئییب، اونا گؤره منه آتماجا آتیردی. باشا سالماق ایسته ییردی کی منطیقی یول بو آندا، دانیشماغیمدیر. یوخسا بونلار هامیسی جیبدن گئتمه دیر. باشلادی اورتاق ایمئیلیمیزی سایماغا، سونرادا گؤروش یئرلریمیزه.

-          میاندوآبدا (قوشاچایدا)، اورمیه ده(اورمودا) و اوننان دا قاباق ائلچین گیلین ائولرینده گؤروشلریز اولوب. ماحمود فضلی گیلنن صائب پارکیندا گؤروشوبسوز.

بونلاری دئیرکن بیر سیرا گئرچکلری دئییردی، آنجاق  بیر سیرالاری دا یالنیشیدی. بونلار بیر سیرا مسئله لری بیلیردیلر. قالانیندا بئله آتماجالارلا چیخارماق ایسته ییردیلر. آنجاق  بو گؤروش مساله سی قاباقجا اورتادا دییلدی. توپلوسال توتولمانین چتینلییی بودور. هر شئی یاواش یاواش اورتایا چیخیر. اونلار آددیم آددیم ایرلی گلیرلر. بورادا بیلگیلرین اورتایا چیخماسیندان داها چوخ اؤنملی اولان، اونلارا بیلگی وئرندن سونرا بو ایشی توجیه ائتمکدیر. یاپدیغین یالنیشی دوز کیمی یوزماق ایسته سن، همین آندان داغیلماق دره­سینه ایتله­نیرسن. دئمه­لی گؤروشلرینده بیر سیراسین بیلیردیلر، آنجاق  هامیسین یوخ. اردبیلده کی 1385 ده و اوندان قاباقکی گؤروشلردن خبرسیزیدیلر. اؤز یانیمدا دئییردیم اوشاقلار گرک بو آندا نه­لرین گیزلی ساخلاماسین بیله­لر. هرکس ساخلانماسی گرکن مساله­لری باشا دوشسه چوخ شئی لر اللرینه دوشمز. بیرده من دوشونوردوم کی یولداشلارا گرکن اوچ اساس گؤره­و وار. بو گؤره­ولری یئرینه گتیرسه­لر، ایتکیمیز ان آز سوییه ده اولار. بیرینجیسی دیرنمک، دؤزمک و اونلارین الین اوخوماق. ایکینجیسی اؤزوئریلیک، فداکارلیق و باشقا یولداشلاری دوشونمک، اوچونجوسو ایسه بیر مساله نی بویون آلیرلارسا اونو یالنیز اؤزلرینده ساخلاماق و باشقالارین آیاغین ایشه آچماماق. بونلاری دوشونرک ماحمود گیل ایله باغلی آچیلان سؤزلری گؤزده آلیردیم. گؤره­سن یولداشلار بو حاقدا نه دئییبلر؟ اورمو و قوشاچای گؤروشونه گؤره نه دئییبلر؟ خیاو گؤروشلرین آچیبلارمی؟

بازجو دانیشیقلارین آردی آردینا سؤیکه­ییردی کی منیم دیلیمدن بیر شئیلر توتسون، بوراخماسین. آنجاق  من آلدیرمیردیم. اونون هر بیر سؤزو منی یئنی بیر آلانا آپاریب دوشوندوروردو. 2ساعاتدان چوخ او دانیشدی. منیمده راضی اولماغیمی سوردو و من یئنه هرنه­یی داندیم. یوموشاق دانیشماقلاری دؤیمکدن چتین اولور. اوزده قویماق، اوزه سالماق و منطیق اوزو ایله نه­ییسه قبول ائتدیرمک آداما زور گلیر. بئله آنلاردا سؤز آلتینا قالماماق اؤزو بیر یوخاری انگیزه ایسته ییر. هرآن منیم اؤزومده ده بو انسانا گووه­نمک حیسسی ، اونون منطیقلی دانیشیغینی قبول ائتمک حیسسی بویلانیردی. آنجاق  همن آردیندا دانیشماماغا اولان ندنلریم بیر سئل کیمی اونون یاراتدیغی اییرنج یوموشاقلیق اورتامین پوزوردو. سونوندا بازجو یئنه جاواب آلماییب، دئدی:

-          نه اولدو من قالیب سنی گؤزله ییم یا گئدیم؟ ایستیرم دانیشیغیمیزدان بیر نتیجه آلیم.

سانکی بیر آل وئر اویونودور. سانکی من کؤنزلیک ائدیرم و ایکیمیزین ده قازانجینادیر، گرک دانیشام. بو حیسسلری منیم بیر جاوابیم پوزوردو. او یئنیدن باشلاییردی و یئنه سونوجسوز. سونوندا آجیق ائدیب گئتدی.

28-جی گون ساوالانین تلفوندا دانیشارکن سسین ائشیتدیم.همیشه کی کیمی گور، اراده­لی ووقارلی و داغ روحیه­سی ایله دانیشیردی. یئنه ده تلفون دانیشیغی 2-3 جومله ده بیتدی:

-          سالام، نه وار؟ تبریزه زادا گلمه­یین ها....

ساوالانین بو "نه وار" دئییب کئف سورماسی همشه ماراقلی گلیردی منه. اونون اؤزللیکلری بام باشقایدی. اوندا چوخ جیددیلیکله چوخ شوخلوقچولوق بیر یئرده­یدی. هر آن یئرلرین دییشه بیلردیلر. اوجا بویلو ساوالانین، بادام گؤزلری، قارا بوغلارین آلتیندان گولوشلری یادیما دوشدو. همن اردینجا جیددیلییی، دیسیپلینی و قورولوغو. اؤرگوتچولویوموزون ایلک آنیندان بیرگه­یدیک. بیزدن ایریلانلار زامان زامان اولسادا اونونلا هله ده بیرگه­یدیک.

یولداشلارین تک تکینین سسی ایله کئف ائدیردیم گئرچکدن. اونلارین معصوم قیافه سی، ساغلام ایناملاری و جسارتلری گؤز اؤنومده جانلانیردی. ساوالانین اوزده گؤرونن سرت داورانیشلارینا باخمایاراق، اونون چوخ کؤورک اولماغین بیلیردیم. او موسیقی اهلیدی. اونونلا بیرزامان نه قدر موغام، عاشیق هاواسی اوخوموشدوق. نه گونلر کئچیرتمیشدیک بو کیشی ایله. ان چتین آنلاردا بیرگه اولموشدوق و آیریلمامیشدیق. او بیزیم تشکیلاتین دیسیپلینیدی. بونو بازجولاردا اعتراف ائدیردی. لطیف حسنی نین آغیرلیغیمیز اولدوغونا، فیکیر صاحیبی اولدوغونا اعتراف ائتدیکلری کیمی.

 بو آرا وئریلن گونلر منیم شعیر یازما گونلریمیدیر. اؤتن دؤنه توتولارکن ائوین دوستاغیندا یازدیغیم شعرلر هامیسی سونا اوچونودو. آنجاق  بو دؤنه سونانین دا ایسته­یینی دویاراق بالامیز تاتارا شعیر یازیردیم اوره­ییمده. تاتارین بو شعیرلری اوشاق ایکن اوخویاجاغینا یوزده یوز آرخایین دییلدیم. بللی دییلدی هاچاناجان بورادا قالاق. اونا گؤره هردن اونو بیرداها گؤروب، باغریما باسیب، ناغیل دئمه­ییمی دریندن آرزولاییردیم. "گؤره­سن ایندی نه ائدیرلر؟ سونا یقین همیشه کی کیمی منسیز اؤزونه چتین کئچیریر، تاتاردا آتاسیز سارالیب، سولاجاق" دوشونوردوم. آنجاق  بو اؤزلملی (حسرتلی) دوشونجه­لره چوخ یول وئرمیردیم. شیرین دوشلره (رویالارا) دالیردیم... بو شیرین و هیجانلی آنلاری هر گون یاشاییردیم.

29-جو گون بازجولار دییشمیشدی. ایکی یئنی بازجو گلمیشدی. بونلار خاریجی ایلیشکیلرله اوغراشیردیلار. ایلک اؤنجه اونلارین سورولاری گنل سورولاریدی:

-          خاریجده (آذربایجان، تورکیه، آوروپا و آمئریکادا) کیملری تانیییرسان؟ کیملرله ایلیشکین وار؟ قوهوملاریزدا کیملر چوخ خاریجه گئت گل ائدر؟ قوهوملاریزدا و دوستلاریندان کیملر چوخ دؤولتی-امنیتی اورقانلاردا چالیشیر؟ خاریجه اؤزللیکله آذربایجانا جاسوسلوق ائدن آداملاردان کیملری تانیییرسان؟ اطلاعات اداره سی ایله هانسی یولداشلاریز ایلگیده دیرلر؟ کیملر اطلاعاتین ایسته یی ایله بو اداره ایله گؤروشه گئدیر؟

بو سورولارین هئچ بیرینه موثبت جاوابیم یوخودور. آنجاق  بیر یئری ماراقلیدی، اونلار بیر سیرا میللتچیلری گؤروشه چاغیریردیلار. اونلاردان ایسته ییردیلر کیمسه یه بو حاقدا دئمه­سینلر. بلکه بو سورولار بو مسأله نی چئک ائلمک اوچونویدو. آنجاق  باشقا هدف­ده داشییا بیلردی کی سونرا بیر سیراسی بللی اولدو. یولداشیمیز دومانین دئدییینه گؤره ، اونو بیر نئچه گروپ دانیشدیرمیشدی. اونا گؤره دئدیم بس بیر مرحله نی آتلادیم. ایندی کئچیب خاریجی ایلیشکیلره. سن دئمه بونلارین ایشلری دالدادیر.

30-جو گون

30-جو گون گئجه ساعات 9دان سونرا، گؤزتچیلرین بیر نفرین منه قونشو گتیردییینی دویدوم. آز کئچمه­دن قونشو اؤزون بللی ائتدی. ماحمود بی فضلی نی ده توتموشدولار. ماحمود بی­یین اطلاعاتدا داورانماسی چوخ یوکسس سوییه ده ایدی. اؤزللیکله ائله بو اوجا دانیشماسی، هر بهانه ایله های کوی سالماسی، هر دؤنه مامورلارلا، گؤزتچیلرله اوجا دانیشیب، یولداشلارا ساو گؤندرمه سی و مامورلارلا دیرشمه سی. اونونلا بیرینجی دؤنه 1381-جی ایل بیرگه زینداندا اولموشدوق. ائله او زاماندان دوستلوغوموز درینلنمیشدی. همین زاماندان ماحمودلا ایلیشکیمیز قیریلمامیشدی. او خوی شهریندنیدی. 40 یاشی اولاردی. اوجا بوی، ائنلی کورک بیریسییدی. او ایران-عراق ساواشیندا نئچخ دؤنه یارالانمیشدی. بوغازیندا، قیچلاریندا و قارنیندا هله ده یارا یئرلری قالیردی. بیر دؤنه جبهه ده یارالاندیقدان سونرا، اؤلوب دئیه نایلونا سارمیش قویلاماغا حاضیرلامیشلار. سونرا بیریسی نایلونون ترله­مه­سیندن دیری اولدوغون باشا دوشوب، یئنیدن حایاتا قایتاریلمیشدی. میللی حرکتیمیزده 5 دؤنه توتوقلانمیشدی. ایکی دؤنه سین منیمله بیرگه توتولموشدو. ایندی ده بیر اؤرگوت آدینا توتولموشدوق. او میللی حرکت ده اؤزل بیر اینسان‌دیر. آچیق دانیشماسی، جسارتی و یوکسک ائنئرژی‌سی ایله هامییا تانیشدی. میللی حرکتده ان چوخ تانینان و ان گئنیش ایلیشکی‌سی اولان شخصیت‌لریمیزدندیر. اونون ایلک دؤنه جسارتی منیم اوچون بابک قالاسی یورویوش‌لرینده آشکار اولدو. 1381-جی ایلده قالایا دوغرو شعار وئره‌رک یورویوش یاپدیغیمیز زامان، چوخ ادعا‌لی آدام‌لارین سوسدوغو حالدا، ماحمود بی، اؤنده گئدیر و سلوقان‌لاری رهبرلیک ائدیردی، سونرادا بیرگه 1381-جی ایلده پروفوسور زئهتابی‌نین مزاری اوسته توتولدوغوموز زامان دا اونون جسارتین گؤردوم. چوخ راحت ایلگی قوران، صمیمی و بیردکی سخاوت‌لی بیر یولداشی‌دیر بیزه. ماحمودون ائله ایلک باشدان گؤزتچیلرله گؤزلویونه گؤره دیرشمه­سی منده روح یوکسکلییی یاراندی. "یاشاسین بی" دئییب، گؤزتچیلرین گئتمه سینی گؤزله دیم.

آرا ساکیتلشدی. اییلیب ماحمودو سسله دیم. همن جاواب وئردی. کئفینین ساز اولدوغونو دئدی. سونرادا من ائله ایلک گیره­وه ده اونا بیلدیردیم کی بیزی یئرسیز توتوبلار. دئییرلر گاموح اویه­سسیز. بو حاقدا سندلری یوخدور. ساده جه بیر ایمویل اللرینده وار و ماحمودا قارشی هئچ سند یوخدور. اودا چوخ یوخاری اؤزگونجله دئدی:

-          هن بابایئئئ! بیر ایکی گون ساخلاییب بوراخاجاقلار. نئیله میشیک کی....

سونرا ماحمود بی ده منه ساو وئرمک ایسته دی:

-          دئدیم ساده جه بیرگه چای ایچمیشیک. دوستوق دا...

ماحمود بی او گون یاشار بی کریمی ایله بیرگه­یمیش. اونا گؤره دئییرمیش به من یاشارام. سونرا اؤزومو یاخشی تانیتدیم. اودا سئویندی، چوخ ایستی دانیشدی. آرا وئرمه­دن یولداشلاردان کیملرین توتولدوغونو سوردوم. اودا بیر بیر آدلارین سیرالادی:

-          بهبود، آزاد، آراز، آیدین، ساوالان، بهمن نصیری، پینار

یاشاردا او گون ماحمودلا بیرگه توتولموشموش. بونو سونرالار بیلدیم. من دوشونوردوم یاشار بیر سوره گیزلنه­بیلر. آنجاق ایندی توتولموشدو. اونو بیر اقتصادی ایشین موجویزی ایله باغلی جاوابی حاقدا چاغیریب، آلدادیب توتموشدولار. دئمه لی یاشارین تویو یئنه گئجیکمیشدی. یاشار خویلویودو همداندا اوخوموشدو. 33 یاشی اولاردی. اونونلا دئمک اولار یاشیدییدیق. . او ایکینجی دؤنه اولا‌راق توتولوردو. قاباقجا 1381-جی ایلده همداندا بیر باشقا اؤیرنجی ایله 2 آیا یاخین ایطیلااتدا قالمیشدی.  اوزون ایللریدی تانیشیدیق. اؤرگوت یولداشییدیق. اونون درین فلسفی دوشونجه لری ایله برابر، سیاسی اقتصادی باخیمدان چوخ بوروشوق پلانلاری اولاردی. اؤزونه اؤزل شوخلوقلاشما مئتودو واریدی. بوتون اؤزل چتینلیکلرینه باخمایاراق، گؤروشلریمیزین هامیسیندا اولموشدو. سئوگیلیسی آشقین خانیم یقین ایندی اونا شئعیر یازماقدایدی. "گؤره سن اونلارین تویونو گؤره­جه­ییک" دئیه اؤزله دیم ایکیسینی ده.

پینارین هله بوراخیلماماسینی دویدوقدا اوره­ییم سیخیلدی. سونرا ماحمود بیزه گئتدیکلرینی، سونانین یاخشی روحیه لی اولدوغونو، تاتارین کئفی ساز اولدوغونو و ... دئدی.

ماحمودون کئفی سازیدی، روحیه سی یاخشی ایدی، اونا گؤره منه ده یاخشی ائتکیسی واریدی. اونون گلمه سی ایله چوخ دینج اولموشدوم. سانکی تک دییلدیم. تکلیک (انفرادی) سللولدادا هئچ دییلدیم سانکی. 6 گون اونونلا واخت تاپدیقجا دانیشیردیق. گرکنلری ائله ایلک دیقه­ده دانیشمیشدیق. سونرالاری بیر بیریمیزه اورک وئرمک، شوخلوق ائلمک، ائشیکدن نورمال حادیثه لردن دانیشماقلا کئچیردیردیک. رادیونون کسیلدییی زامان فورصتی قاچیرمادان دانیشیردیق. او بیر آیین اؤنملی خبرلرین ماحموددان آلدیم، دوقتور چؤهرقانلی نین استعفاسینین سایتدا گئتمه سی، بایراقلارین آسیلماسینی، ...

او سوره­ده 32-جی گون و 34-جو گون منی دانیشدیردیلار. ماحمودو ایسه یالنیز ایلک گون دانیشدیرمیشدیلار. منیم دانیشدیرمام هامیسی خاریجی ایلیشکیلره گؤره­یدیر. تیکراری سؤزلری موختلیف آداملار، موختلیف یوللارلا سوروشوردولار.

 

36-جی گون

 

36-جی گون سحر چاغی یئنی بیر قونشونون دا گلمه سینی دویدوم. یاغلی و گور سسیندن، جسارتله، قورورلا دانیشماسیندان نعیم بی احمدی اولدوغونو همن تانیدیم. گؤزتچی گئتدیکده تئز دوواری دؤیدوم. جاواب گلمه دی، اونو منیم د وز یانیما وئرمیشدیلر. آنجاق  ندنسه منیم دووار دؤیمه ییمی ائشیتمه میشدی. اییلیب قاپیدان سسله دیم:

-          نعیم! نعیم احمدی! سنسن؟

جاواب گلدی:

-          هه

جاواب وئردییینه سئویندیم. بورادا جاواب وئرمک اؤزو یاخشی علامتدیر، طرفین قورخمازلیغینی دا گؤستریر، دئدیم:

-          گل قاپینین آغزینا ، تئز

نعیم همن گلدی قاپییا. منی تانیییب، همیشه کی یوکسک کؤنوللویو ایله کئف احوال ائتدیک. هاچان توتوقلاندیغینی سوردوم، بیر گون قاباق گئجه توتولدوغونو دئدی. نعیمی چوخ ایستردیم. اونو گلجه­ییمیزین گوجلو دیپلوماتی بیلیردیم. اونا چوخ گووه­نیردیم. آزجا دانیشدیغیمیزا هیجانلانمیشدیمدا. اونا گؤره اونون تمکینله ، راحاتلیقلا بازجویی کئچیردییینی دویوب دئدیم:

-          یاشا آسلانیم

بو سؤزوم سونرا نعیمله آیدینین آراسیندا دئییب، گولمه لرینه چئوریلمیشیمیش. اونا دئدیم:

-          داریخماها، سونوناجان دیره­نمه­لیییک.

چوخ روحییه وئریجی بیر سسله جاواب وئردی:

-          هن بابا بوردا من کئف ائلیرم.

نعیمه چاتدیردیم کی بیر سیرا اللرینده ایمئیل یازیلاری وار، یولداشلاردان گاموحو قبول ائدنلرده وار، آنجاق  ساوونورلار. بیرده کی نعیمین اؤزونه قارشی هئچ نه یوخدور. پیناری بیرداها نعیم­دن ده سوروشدوم. دئدی:

-          هه، هله ایچریده دیر.

جولفا ، مرند و باشقا شهرلردن توتولانلار حاقدا سوردوم، دئدی:

-          یوخ اونلاردان یئنی بیری توتولماییب.

 آراز اردبیللینی، شوکور قهرمانی نی، مرندلیحسین عباسی نی ده سوروشدوم. سوروشدوغوم آدلارین هامیسینی دئییردیلر گتیره­جه­ییک. ندنسه توتولمایینجا قالان اوشاقلارین گتیریله­جه­یینه اینانمیردیم. بونون پیس ائتکیسی یوخودور منه. نعیم توتولانلارین آدین سایارکن، بیردن منیم قاپیمی آچدیلار. سونرادا نعیمینکین. بیزی دؤیمه یه آپاردیلار. اللریمی دالدان باغلادیلار اوتوروغا و دویونجا ووردولار. نئچه ساعات آغزیمی یاپیشقانلا (چسب ایله، توتقال ایله) باغلادیلار. گؤزلریمی گؤزباغلارینین نئچه­سی ایله ساریدیلار. من ایسه دئییردیم هئچ نه دانیشمامیشام و ... .

اوندان سونرا نعیمی اورادان آپاردیلار. قونشولارین بیرین ایتیردیم آنجاق  دانیشمامی دانیشمیشدیم.

37-جی گون بیرداها دانیشدیردیلار. او گون رئیس کیمی ایرلی سوردوکلری آغ ساققال، قارنی یوغون بیریسی اؤزل اولاراق منی دیندیریردی. اونون بیرینجی گون سسین ائشیتمیشدیم. اؤزونو چوخ یوخاری آدام کیمی آپاریردی. اؤزونه آرتیق گوونله دانیشیردی. اؤزوده تورکجه­ده ساوادلی اولدوغونو دئییردی. آنجاق  ساده جه قورآن آیه لرین ازبریدی. باشقا ساحه لرده ساوادی چوخ آشاغییدی. دؤیمکله اؤز فیکرینی قبول ائتدیرمک ایسته ییردی. هئچ جوره بیزیم فیکیرلرین قانونی و منطیقی اولدوغون قبول ائتمیردی. مندن ایران آنا یاساسینین 15-جی اصلینه گؤره سوروشدو:

-          دئمیرسیز به یه اصل 15-ی ایستیرسیز؟

دئدیم: یوخ

الینده بیر قانون کیتابی واریدی. اونو گتیرمیشدی منه گؤستره 15-جی مادده نه دیر قانوندا. اددعا ائدیردی کی گویا بو مادده اجرا اولونور. بیر آن دوروخدو. اوموردو ائله من دئیه­جم 15-جی مادده نی ایسته ییریک.  بیرداها سوروشدو:

-          به نه ایستیسیز؟

دئدیم:

-          بیز دیلیمیزین رسمی اولماسین ایسته ییریک، 15-جی اصلی یوخ.

او بیلدی نه دئدیم، آنجاق  اؤزون آلدیمادان او یولا ووروب، قانون کیتابین منه اوخوماغا باشلاری. 15-جی مادده نی اوخویوردو:

-          ایرانین رسمی دیلی فارسجادیر (زبان رسمی ایران فارسی است)

ائله بو بندی آغزیندان چیخمامیش دئدیم:

-          ائله اوراسی قلطدی دا

بونو دئجک سانکی اونا بیر اود ووردولار. دیک دوردو آیاغا، آرخامدا اودا اوتوروقدا اوتورموشدو بایاقدان. تاپا تاپ دؤشه­دی دالدان باشیما، بوینوما! کؤهولتو ایله های سالاراق باشیما چیغیریردی:

-          قلط جد آبادیندی، قلط اؤزونسن، اوغلان، گئده نین بیری گئده! سن دئییرسن بس کیمسن؟ سنه بوردا بیر درس وئرجم کی، آنان مله­سین دوز. گئده، سن دئییرسن بس بورا هارادی؟

دئییب دال با دال ووروردو باشیما: "آنلامامیشام دئ. سن بیلیرسن او قانونو کیملر یازیب؟ ایمام اشتباه ائدیب؟ رهبر اشتباه ائدیب دئییرسن یانی؟" آردی آردینا دئییردی تؤبه ائتمه­لیسن"

بونلاری دئمکله منیم سانکی بؤیوک بیر گوناهیمی توتموشدو. سانکی من هانسیسا جینایت ائتمیشم، گرک آنلامامیشام دئیم و بئله لیکله بوندان بئله سین او منیم بوینوما مینه! آنجاق  من گئری اوتوران دییلدیم. دئدیم:

-          اشتباه­دیر. کیم امضالاسادا او بورانین شراییطین نظرده آلماییب.

کاغاذ قویدو قاباغیما "یاز" دئدی.  "او دئدیییوی یاز بورا، گؤر باشیوا نه اویون گتیرجم اوننان" دئیه­رک ایسته ییردی منی قورخوتسون. سونرادا منه میننت قویوب باغیشلاسین. آنجاق  ایشی ائله جیددی آلمیشدی کی یازارکن بیرآز دوشوندوم، چالیشدیم ائله بیرشئی یازیم کی دادگاهدا منه قارشی قوللانیلماسین، یازدیم:

-          ایران آنایاساسیندا 15-جی مادده غیرعادلانه بیر مادده دیر. منجه او زامان بئله بیر مادده نین قانونا بوجور یئرلشمه سی اشتباهدیر و ایندیکی حاقسیزلیقلارا مئیدان وئریب.

تئز گؤتوروب باخدی یازییا، قیشقیردی اوستومه:

-          گرک من دئین کیمی یازاسان. یاز گؤروم.

او منی وورسادا اؤزومو تمکینلی آپاریردیم، دئدیم:

-          ایسته ییرسن اؤزون یاز. جورمو نه اولسا وارام.هئچ باغیش فیلاندا ایسته میرم. منی ائله بو دئدیییمه گؤره محکمه یه وئرین.

بونو دئینده آزجا دالی اوتوردو. کؤمکچیسی ایرلی گلدی. اوبیریسینین اوتاقدان چیخدیغینی دا دویدوم. کؤمکچیسی اؤزون یوموشاق آپاران بازجولاردانیدی. رضا عبدی دئییلن بازجو کیمی اودا سونوناجان منی دؤیمه دی. بیرآزدا ادب ده اؤزون یاخشی آپاریردی. آیاق اوستده دوردو باشیمین اوستونده. قوللاری چیرمالییدی. ناماز قیلماغا گئدیردی، دئدییینه گؤره. باشلادی منه اؤز یانیندا اؤیود وئرمه یه کی منی آزجا او سون توتومومدان ائندیرسین. بونلارا موتتهمین سرت توتومو قازانمیر. موتتهم گرک اؤزون سوچلو سانا. یاردیم ایسته یه و ... . باشلادی منه دانیشماغا:

-          باخ بو حاجی بیزیم رئیسیمیزدی، نییه بئله اؤزونو دردیسره سالیرسان؟ او ائلییه بیلر سنه کؤمه­لیح ائله سین. اونون الینده هر اختیار وار. گؤتور یاز اشتباه اولوب، آغزیمدان بیلمه دیم بئله چیخدی. من قانونا اینانیرام. نیظامی قبول ائلیرم. باخ سنه راهنومالیق ائدیرم ها، آیریسی بو ایشی گؤرمز. یوخسا منه نه اولاجاق کی، من بوردا سنه گؤره قالمیشام. سن اولماسان من ایندی ائویمده­یدیم. اؤزونوده دردیسره سالمیسان بیزی ده زحمته. گؤتور یاز منده اونو یوموشالدیم.

بیرآز دانیشیقدان سونرا بیلدیم اویونون بو مرحله سی بیتیب، آنجاق  گرک ائله ائدم کی، نه بون‌لارین قاباغیندا گئری اوتورام، نه ده منی دادگاهدا محکوم ائده‌جک بیر سند اللرینه وئرم. یازدیم:

"من ایران اسلام قانونوندا بیر سیرا دییشمه­لرین گرکلی اولدوغونا اینانیرام. آنجاق  بو دییشمه­لری قانونی یوللا، رفراندوملا ایسته ییریک بیز. بودا او قانونو یازانلارا حؤرمتسیزلیک آنلامیندا دییل. گونون ایستکلری، ضرورتی بئله دیر. "

یازی اوره­ییجه دییلدی، آنجاق  منه ائله ایلتمک ایسته ییردی کی، سانکی من گئری اوتوردوم. بونوندا اؤنمی یوخودور منه. اونلار اؤزلرین، اؤز یالانچی قورورلارین بوشالتمالیدیلار. نامازدان سونرا رئیس بازجو گلدی آرخامدا دایاندی. بیرآز یوموشاق، آنجاق  یوخاری قونومدان دانیشماغا باشلادی:

-          چوخ کؤنزسن. من هئچ باشا دوشمورم سنی. من بوردا سنه کؤمی ائده بیلرم. اوشاقلارا دئیه­رم بوردا گرک انصافی یاددان چیخارتمییاسیز. ایچری گیرنده دستمازلی گیرسیز. سیز بوردا انسانلارین سیرری ایله تانیش اولورسوز. گرک اونو ساخلاماغا بیر عؤمور تعهودوز اولسون. من چوخلارینا بوردا کؤمی ائله میشم. بیر عؤمور گئدیب مووفق اولوبلار. الینی وئرجکسن الیمه سنی قورتاراجام.

الین آرخادان اوزاتدی منه ساری. گؤزلویوردو دؤنوب اونونلا گؤروشم. منده هئچ دینمیردیم. بو اونلارین بیر آددیم گئری اوتورماغییدیر. آنجاق  یئنیدن داها سرت ده دارواناجاقدیلار طبیعی کی. بیلمیرم آرخادا او نئجه باخیردی منه. چون بو اونلارین یوزلر دؤنه موختلیف انسانلارا یاپدیقلاری بیر داورانیشییدیر. آنجاق  منه تزه­لییی وارییدی. من بیر آددیم اونون ایسته دییی یؤنده آتسایدیم، داها ایچیندن چیخماسی چتین اولاردی. من چئورمده اولان اویونلارین چوخونو گؤرموشدوم، بیلیردیم کی بئله آنلاردا اطلاعاتی آلداتماق اولماز. بئله آنلاردا "آلداتدیم" دئمک ، یالنیز اؤزونو توجیه ائتمکدیر. اؤزونه توختاق وئرمکدیر. یوخسا او زامان کی اونلارا هر بیچیمده اولور اولسون، تسلیم اولدون، دئمه­لی اؤلمه­یینی امضالاییرسان. اونلار انسانا بیر تور قوراللار کی اوندان چیخماق اولماز. او الین اوزالتمیشدی، آردی آردینا دا دانیشیردی، منی وسوسه ائتمک ایسته ییردی. ائله کی انساندا هر آن "قوی بونلاری آلدادیم" سونرا اؤز ایشیمده اولارام هوسی یارانیردی. آرا سیرادا بیر آز کیچیک اؤلچوده، اونلارا دوغوردان گوونمک حیسلریده گلیردی. آنجاق  یوخ، بونلار پول آلیر بیزی آلداتماغا. بونلارین ایشی بودور. بونلارین آند آمانلارینا اینانماق حیماقتدیر، دئیه دوشونرک دئدیم:

-          یوخ من کیمسه­دن یاردیم ایسته میرم. ایندییه­ کیمی الله دان سونرا کیمسه یه بوشلو قالماق ایسته­مه­میشم.

الین چکیب دئدی:

-          سن چوخ هوشلو باشلی اوغلانسان. سنین چوخ شئیلرین وار کی منیم اوره­ییمی قیجیقلاندیریر. سنده بیر سیرا پاکلیقلار گؤرورم کی اوره­ییمی اوخشاییر اونلار.  سنین قابلییتین وار دین یولوندا اولاسان. تبریزلی بیر چایچی-چای ساتان واریم. او قیرخ یاشیندان باشلاییب. ایندی ائله موفق انسان اولوب ها، هامییا اولقودور(اؤرنکدیر). سنین لاپ یاخشی واختیندیر. باشلایا بیلرسن. سن اشتباه یولداسان. او درین حیسلرینله ، او بئینینله، سن الله یولوندا بؤیوک بیر انسان اولابیلرسن. من سنه کؤمی ائلرم.

او چتین، باسقیلی-فیشارلی آنلاردا بئله یاردیم بوخچاسی ایله قاباغا گلن بیرینین تاپیلماسی، ضعیفله­میش انسانلارا بیر قاچاق یولودور. اصلینده ایسه توتولماق یولو. بئله آنلاردا انسان هرآن وسوسه اولور تسلیم اولماغا. او چتینلیکلردن قورتارماغا. ان پیس یئریده بوراسیدیر کی بو تسلیمییتی باشلاییب توجیه ائدسن. اؤزونه بو حاقدا حاق قازاندیراسان، اؤزونه توختاق وئرسن. سینماق ائله بورادان باشلایار. یوخسا بیرینین شیکنجه آلتیندا آغزیندان بیر سؤز چیخماسی و سونرالار اونو یولداشلارینا اوزولرک دئمه­سی ایله، کیمسه سینماز و داهادا برکیییر. چیخیش یولو ائله بوندادیر کی بیر یانیلقین (اشتباهین) یا ضعفین اولدوسا، اونو قبول ائدسن، توجیه ائتمه­یه­سن، یوزمایاسان. یولداشلارینا آچاسان و اونو جوبران ائتمه­یه چالیشاسان. بو قهرمانلیقدیر.

بازجو مندن نتیجه آلمادی، ناماز آدینا چیخیب گئتدی و منی دئدیکلرینه چاغیردی. سون اولاراق دئدی کی:

-          باخ بوگونو هئچ یادیندان چیخارتما، سنین 37-جی گونوندور. بو گونه سونرا اولابیلر چوخ پئشمان اولاسان. برعکس (ترسینه) بوگونه موفقییت نوقطه سی (اوغور دؤنگه سی) کیمیده باخابیلرسن.

39-جو گون سورولار یئنه­ده قوزئی­له اولان ایلیشکیلریمیزه گؤره­یدیر. قاباقجا قوهوملاریمیزین بیرینین توتولماسیندان گؤتوردوکلری نوتلارلا مندن سورولار سوروشوردولار. ناخجیواندا، باکیدا و تورکییه­ده اولان بیر سیرا آداملاری یازیردیلار و اونلارلا اولان لاقه لریمی سوروشوردولار. آدلارین بیر سیراسین تانیمیردیم بئله، آنجاق  اصرارلییدیلار کی منیم بو انسانلارلا ایلگیم اولوب. هرحالدا بوتون باسقیلارا باخمایاراق او گونو کئچیردیم.

 

40-جی گون

 

گئجه ساعات 10دان کئچمیشدی. دئمک اولار یاتماق زامانینا یاخینلاشیردی. قونشولوقدا یئنی بیر نفرین گلدییینی دویدوم. نئچه گونودور یالنیز، بازجوییلری دینله­ییردیم ، کیمسه یوخودور قونشولوقدا. آنجاق  دئیه­سن یئنی بیریسی گلمیشدی. گؤزتچیلرین سسیندن ائله دویدوم کی، قونشو خسته­دیر. نئچه جور داوا ایسته­دی اونلاردان و آسپرین اونلارین ایچینده­یدی. اونون اورک خسته­لییی اولدوغو اورتادایدی. گؤزتچیلر گئتجک، دوواری دؤیدوم. همن جاواب گلدی. سونرادا اونو چاغیردیم قاپی آغزینا دانیشماغا:

-          کیمسن؟ هاردان گتیریبلر؟ میللتچیسن؟ من یوروشم.

جاواب چوخ تمکینلی و اورک وئریجییدی.

-          سالام بی، آرازام

سسیندن هله هانسی آراز اولدوغون توتمامیشدیم. سوروشدوم، اودا دئدی:

-          اردبیللی

اونونلا یاخیندان آز گؤروشموشدوک. آنجاق  او آز گؤروشده ، اونون حاققیندا الده ائتدیییم دئییردی کی، بو دیرنن آدامدیر. یوخاری سوییه­ده اؤزگوونجی واریدی. بو اؤزونه اعتماد ایسه بئله یئرده یامان یاخشی اولور. طرفین سینماسینی، قورخماسینی و بلوف یئمه­سینی اؤنله­ییر. کئف احوالدان سونرا تئز گرکلی مساله لری دانیشدیق. ایچری حاقدا اونا بیلگی وئردیم. دئدیم کی سن بورادا کیمسه­نی تانیمیرسان. اودا دئدی:

-          یوخ دا آیدینی کی تانیییرام.

-          اوندان باشقا. قالانلارین دئییرم. نعیم دن سونرا کیملر توتولوب؟

-          موغاندان، اردبیلدن و رشت دن بیر سیرالاری توتولوب.

آدلارین سیرالادی. 37 و 39-جو گونلرین دیندیرمه­سیندن سونرا، بازجولارین دانیشیغی یادا باشقا بیر بلیرتیلر منده بئله بیر قورخو یاراتمیشدی کی ایسته­ییرلر سونانی­دا گتیرسینلر. نئجه دئیه­رلر اوره­ییمه داممیشدی. او گونه قدر کیمسه­دن سونانین توتولماسینی سورمامیشدیم. آنجاق  او گون هامیدان اؤنجه شخص اولاراق سونانین توتولماسی حاقدا آرازدان سوردوم. اودا دئدی:

-          یوخ توتولماییب.

قارداشیم تایمازین توتولماسی حاقدادا سوروشدوم، اونوندا توتولمادیغین اؤیرندیم. سن دئمه ، ائله او گون سونانی توتموشدولار. آرازین خبری اولماییب. آراز اردبیلده توتولموشوموش و ائرته­سی گون سونانی دادگاهدان توتموشلار. اوسته­لیک  3 یاشیندا تاتاری­دا منله گوروشدورمک ماهاناسی ایله ائویمیزده­کیلری آلداداراق توتماق، ایسته­ییرمیشلر.

آرازلا بیلگی آلیش وئریشیندن سونرا اونا اورک وئرمک ایسته دیم:

-          بی مؤحکم اول ها. سونوناجان دیرنمک لازیمدیر.

-          هه بابا ، آرخایین اول

بونو دئینده نعیم یادیما دوشدو، اودا "بورادا کئف ائلیرم" دئمیشدی.

آراز (یونس سلیمانی) اردبیلدنیدی. همداندا اوخوموشدو. اورادا اوزون ایللر چالیشمیشدی و اونونلا بیرلیکده احمد آقایی آدلی یولداشی دا توتولموشموش. ساوادلی، اؤزگوونجلی و دانیشیق باخیمیندان قابلییتلی اوغلانیدی. ایلک باخیشدا، دومانین تعریفلری یادیما دوشدو. اونون لیدئر دئدیکلریندنیدیر. دومان اونو بیر پارتیزان ساواشچی کیمی تانیتمیشدی دا.

دانیشیقین اساس یئرلری بیتمیشدی. خیردالیقلارا یئتیرنده قاپی بیردن آچیلدی:

-          گل ائشییه

گؤزتچی بو دؤنه آرتیق سوروشمادی کیمله دانیشماغیمی، بیرباشا دؤیمه­یه تاپداماغا آپاردیلار. گئجه یاریسی، قولوم آرخادان ترسه قانداللا باغلی دؤیولسمده، اؤز یانیمدا دئییردیم: "دیه­ری وار، آرازا اولانلاری چاتدیردیم. من گؤره­ویمی یئرینه یئتیردیم."

او دانیشماقدان سونرا آرازی ­دا آپاردیلار. یئنه قالدیم قوققولوقو تکلیکده! آنجاق  بوگونلر بازجولاری تک قالماغا آمان وئرمیردیلر. هر گون دیندیرمه واریدی. اؤرگوت مساله لریندن، خاریجی ایلیشکیلردن، ایش مساله لریمدن و ... هرگون آردی آردینا سوروشوردولار.

49-جو گون آخشاماجان بازجویی اولسامدا، گئجه اؤزل بیر بازجویی کئچیردیم. شامدان سونرا آپاردیلار شکیل چکمه اوتاغیندا ، دیبده بیر یئرده اوتورتدولار. ایچری گیررکن 7-8 نفرین اوردا اولدوغون دویدوم. آردیمجادا بیرنئچه سی گیردی. یئنه بوتون گوجلرین بیر آرایا گتیرمیشدیلر. بو نئچه واختی ایشلتدیکلری تکنیکلرین سونوجلارین یقین آراشدیرمیشدیلار. ایندی یئنی بیر مئتودلا اورتایا گلجکدیلر.

رئیس دئدیکلری بازجو منیم یانیمدا اوتورموشدو، قالانلار ایسه دالدا پیچیلداشیر، یادا آتماجا آتیردیلار هردن، رئیسین سؤزونو دستکله­ییر و منی آلای ائدیردیلر (مسخره ائدیردیلر). بازجو دانیشیغین باشلادی ، الینده­کی نوتلارا باخیب، سؤز سوروشور، هابئله منیم کیلریده اورا یازیردی:

-          یاخشی، بورا قدر دئدیک اؤزون دانیش. سنده دانیشمادین. ایندی بیز سندن سوال سوروشاق سنده جاواب وئر.

بو یئکه­پر رئیس دئییلن بازجو، مندن قاباقجالار اؤزل سورو سوروشموردو. ساده­جه دئییردی کاغاذ گتیریم یاز، اؤزون بیلیرسن نه­یی یازاسان. قاریجین آچیب دئییردی : " قارینج بویدا کاغاذ وئرجم یازیب دولدوراسان، بو هله بیزیم الیمیزده اولانلاردیر. بیر سیرا کیچیک مساله لرده وار کی بیزیم الیمیزده دییل، اونلاریدا باشقا کاغاذلاردا یازارسان."  بو اونلارین بیر تکنیکیدی. انسانین بئله حاللاردا بوتون حساس مساله لر گؤز اؤنونه گلیر. یازارسا، اونلاری یازمالی اولور. دئمه لی انسان ایچین ائشییه تؤکور.

ایندی ایسه آرتیق یاسته­ییردی اؤزو دئمیشکن اللرینده اولانلار حاقدا سورسون. دئدیم:

-          سیز سوروشون نه ایسته­ییرسیز. هئچ نه­یی گیزلتمه دن جاوابلایاجام.

-          یاخشی بیزه ایشیندن دئ. نه ایش گؤروبسن ایندییه جن؟ هاچاندان آل-وئره باشلاییبسان، بیر بیر دئ.

بو سورو حاقدا، قاباقجالار دؤیولدویوم زامان، بیلمه­دن موقاویمت ائدیب، بیرآزدا دوز بیلگی وئرمه­میشدیم. اونا گؤره سونرا یالان وئردیییم بیلگیلره گؤره ناغیل دوزلتمیشدیم. اصلینده بو قونو حاقدا بیر شئی گیزلتمه­یه گرک یوخودور. اونا گؤره ائله او دوز اولمایان بیلگیلر اساسیندا اؤرت باسدیر ائدرک جاواب وئردیم. بازجو ایسه لاپ اینجه­لیکلری سوروب، منیم یالانیمی چیخارماق ایسته­ییردی. مئیوه آل-وئریندن باشلادی. قیمتلری، هارادان آلدیغیمی، کیمه ساتدیغیمی، هانسی گؤمروکدن کئچیردیییمی، هانسی داشیما شیرکتی ایله مال ووردوغومو بیر بیر سوردو. بونلاری سوراراق، آرادا آلایجی گولمکلری ایله، ائله اؤزون آپاریردی کی سانکی منیم یالانیمی چیخاریر. اصلینده ایسه من بو حاقدا یالنیز تاریخی دوز دئمه­میشدیم، قیمتلری او تاریخله اویوشدورماق ایسته­ییردیم. آرادا دئییردیم:

-          آخی بو آل-وئر سیزی نییه بوقدر ماراقلاندیریر؟ بوردا نه وارکی؟ سیز دئدیییم انسانلاردان گئدیب سوروشابیلرسیز. بورادا توتدوقلارینیز انسانلاریندا بیر نئچه­سینین منیم آل وئریم حاقدا بیلگیسی واردی، اونلاردان دا سوروشون.

دئییردی:

-          سوروشموشوق. ائله ایش بو آل وئرده­دیر. بیزه بللیدیر سن نه آلیب، نه وئریبسن!! گرک مئیوه، سیمان، روب کیمی ماللارین یانیندا داها نه­لر ساتدیغینیدا دئیه­سن!

-          بیلیرسیز داها نه­یه سوروشورسوز؟ وئرین دادگاها اورادا موحاکیمه اولوم. منیم ایشیمین چییی یوخدور. اؤزمو ساوونماغی باجاریرام.

یئنه­ده مسخره ائدیجی سسله، همکارلارینا دؤنه­رک دئدی:

-          به سندن سوروشمایاق ، کیمدن سوروشاق؟ خانیمیندان؟ یا آناندان؟ بیلیرسن دا اونلارداندا سوروشاجاییق. بیلیرسندا خانیمین بورایا گلسه نه اولاجاق؟ هه­ه­ه­ه ! بوردا دانیشار ، یادا ....

دینمه­دیم: من هرنه­یی گؤزومه آلمیشدیم. اونلارین نه دئمک ایسته­دییی بللیییدیر. قالمیشدی کی ائله اخلاقسیز هده­لرین آشکارجا کوچه بازار دیلی ایله دئسینلر.

مئیوه آل وئریندن نتیجه آلمادی. او آل وئرده پولومو قاچیران ترتردن اولان علی ماحمودوو آدلی بیر آل وئرچینین مساله سینه و اوراداندا او پولو گئری آلماغیما چاتدی. حاکیم صادیقووون آدی اورتایا گلدی. سوروشدو:

-          اونو ایلک دؤنه هاچان گؤروبسن؟ نییه اونا گووه­نیبسن؟ او سنه هانسی یاردیملاری ائدیب؟ سن اونا نه ایشلر گؤروبسن؟ نییه سنه یاخشیلیق ائتمک ایسته­ییب؟ سن نییه اونا گووه­نیبسن؟ ...

بو سورولاری آردی آردینا، منیم جاوابلاریمی آلدیقجا سوروشوردو. 1385، 1386-جی ایللر حاکیمله منیم آل وئر مساله لریم ین باشلاماسی ایللریدیر. آل وئر اصلینده 1386دان باشلامیشدی. اونا گؤره مندن حاکیمین بیزه گلدییی زامان حاقدا سوروشدوقدا ائله 1386نی دئدیم. ائله بو آندا آرخادان تهراندان گلمیش بیریسی یومولدو اوستومه. باشیما بیر نئچه یوموروق ووردوقدان سونرا دئدی:

-          یالان دانیشما. 1385ده حاکیم سیزه گلیب. کرجین فردیسینده­کی ائویزه. فردیس کؤرپوسونده اونو قارشیلاییبسان. هه؟ قالانلاریندا دئییم؟ بونلاری دئدیم کی بیله­سن بیز هرنه­یی بیلیریک. حتی سن بیلمه­ینلریده. او گون حاکیم اورایا تک گلمه­میشدی. سننن تک گؤروشمه­یینه باخما. اونون یانیندا آدام واریدی. ایستییرسن دئییم سونرا اونو هانسی هوتئله آپاردین؟

وئردییی بیلگیلرین بیر سیراسی دوزویدو. آنجاق  گرک اؤزومو ییغیشدیرایدیم. بیر باشا اونون دئدییینی اونایلایانمازدیم. دئدیم:

-          یوخ ائله بیر شئی یادیما گلمیر.

بونو دئجک یئنه تاپداماق باشلادی. یومراقلا باشیما ووراراق دئییردی:

-          گرک یادیوا گله. بو باشیوی آچمالیسان. یوخسا خانیمیننان آچاریق. او مریضی اولان، بیمارستاندا کؤمهلیق ائتدییییز باکیلی کیمیدی؟ هه، گؤرورسن دا بوردا هئچ نه یادیمیزدان چیخمیر، اونا گؤره کی، بورا اطلاعات اداره­سیدیر. سنده گرک هرنه­یی یادیوا سالاسان. یوخسا آیریسی سنین طرفیندن یادینا سالمالی اولاجاق.

بورادا ان اؤنمسیز مساله لریده قاباردیردیلار. قابارتماق، شیشیرتمک تکنیکی آدلاندیرمیشدیم بو تکنیکی. بونونلادا ایسته­ییردیلر من ایشین گئرچه­یینی اونلارین دئدیکلریندن آشاغا توتوب، اونو آچیقلایام. آنجاق  من اؤزومله قرار وئرمیشدیم، یالنیز اؤزوم مصلحت بیلدیییم، اؤرگوتوموزه و یولداشلاریمیزا زیان وئرمه­ین مساله لری بویون آلاجام. اونلارین نئجه داوراناجاقلاری اؤنملی دییلدی منه. او گئجه آل وئر، خاریجی سفرلریم و گؤروشلریم حاقدا بیرر بیرر سوروشدولار. مندن ساعات نئچه­ده ، کیمینله و هاردا و نئجه گؤروشدویوموزو سوروردولار. لاپ خیردالیقلاری دؤنه دؤنه سوروردولار. بئله خیردالیقلارا ایلیشمکلرینده ، نه ایسته­دیکلرین باشا دوشمک اولموردو. آنجاق  من چالیشیردیم اونلارین هدفلرینی آراشدیرمادان ، اؤز خطلریم ایچینده حرکت ائدم. خاریجی سفرلریمده همشه سونانیندا توتولاجاغین نظرده آلیردیم. چالیشیردیم ائله دانیشمایام کی یئرسیز اونودا اینجیده­لر. یا اونون یالانی چیخا. بیز اونونلا باکی و ناخجیوان سفرینده یالنیز گزمه­یه گئتمیشدیک. بو گزیلر ایچینده، اونون خبری اولمادان، منیم بیر سیرا اؤنمسیز گؤروشلریمده اولموشدور. بو گؤروشلری گونئی­دن چیخان هرکس یاشایابیلر. اؤزللیکله منیم کیمی تانینمیش بیریسینه بو گؤروشلر قاچینیلمازدیر. من بو گؤروشلری اؤنمسه­مزدیم، آنجاق  بورادا همین گؤروشلرین اوزرینده دایانیب، منه باسقی یاپیردیلار. بو اؤنمسیز گؤروشلری من هئچ واخت آلدیرمازدیم. خاریجده­کی دوستلاریمیز، اؤزللیکله تورکیه و آذربایجانداکیلارین بیر سیرا بیزدن ایستکلری اولموشدور. بو ایستکلری من یا رد ائتمیشدیم، یادا مرکزی کومیته­ده سسه قویدوقدان سونرا رد جاوابی آلینمیشدی. بو رد جاواب وئرمکلریمیزین ایمئیلی ده اونلارین الینده­یدی. آنجاق  اونلار بو اللرینده اولانلارا راضی اولموردولار. بئله اؤزلرین آپاریردیلار کی سانکی من اؤلکه­یه قارشی هانسیسا ایش گؤرموشم و اونلاری آچمالییام. بیر یانداندا بو اؤنمسیز بیلگیلری مندن آلیب ، باشقاسینا بلوف کیمی خرجلمک ایسته­ییردیلر. بونو تام باشا دوشموشدوم. اؤزللیکله لاپ اؤنمسیز مساله لر بو هدفه لاپ اویقون اولانلاریدیر. بیریسینه بیر یئرده اؤزل بیر آداملا گؤروشدویونو و ناهارا بئله نه یئدییینی دئیه­رلرسه، او آدام بئله فیکیرلشر کی بونلار هرنه­یی بیلیرلر.

 او گئجه دیندیرمه­دن قاییتدیقدان سونرا اوتاقدا اونلارین آتماجالارینا دوشوندوم. اونلار فردیسده حاکیمین منیمله گؤروشدویونو تلفوندا ایزله­میشدیلر. سونراکی وئردیکلری ایسه آزدیرما بیلگیلریدیر. هامیسی یالانیدی. اونلار بونلاری آچماقلا بیلگیلرین هارادان اللرینه دوشدویونو ایسته­مدن منه وئرمیشدیلر. اونلار یالنیز بیزیم تلفون دانیشیقلاریمیزی و ایمئیل یازیلاریمیزی ایزله­میشدیلر. هوتئلده قالماق و اونا بنزر بیلگیلر یالان بیلگیلریدی. حاکیم بورادا همیشه بیزده قالاردی. من تلفونلاری، اؤنمسیز اولدوغونو نظرده آلاراق، ایمئیل­لرین هامیسین دانابیلرم و دانیردیم دا. منی اینجیدن یالنیز سونانین توتولماق احتمالییدیر. بونو اونلارین دانیشیغیندان حیس ائتمیشدیم. بوتون فیکریمی بو مساله آلمیشدی.

50-جی گون سللوللاردا دیندیریلن بیریسینین سسین، داییم اوغلو ائلچینه اوخشاتدیم. اونون توتولماسی لاپ یئرسیزیدیر. آنجاق  سس اونون سسینین تام اوخشارییدی. گئجه­سی بیرداها دیندیرمه­یه آپاریلاندا بازجونون بیر سؤزونده ائشیتمه­ییم، سسین ائلچینین سسی اولدوغونا ایناندیردی منی. او منی تسلیم ائتمک اوچون یئنی بیر یولا ال آتمیشدی. آرخایینجا و قوندارما قورورلا دئدی:

-          بیلیرسندا قوهوملارینین هامیسین توتموشوق.

بو آندا ایلک بازجونون سؤزو یادیما دوشدو. او دئمیشدیر کی "قوهوملارینین هامیسین توتاجاییق" .

 ائلچینین سسینین گلمه­سی، پینارین توتولماسی و باشقا دئدیکلرینین توتولماسی بو بلوفو منه ایناندیریجی ائدیردی. سن دئمه ائلچین توتولماییب و من اونون سسین باشقاسی ایله قاریشدیرمیشام. بو سؤزوندن آرخایین اولماق اوچون ایسته­دیم بیر ائوه زنگ ائدیم. 25 گونویدور کی منه تلفون ائتمک اولاناغی وئرمه­میشدیلر. دانیشیغین آراسیندا دئدیم:

-           منیم آنام خسته­دیر. 25 گوندور ائویمیزله دانیشمامیشام. ایندی اونلار نیگراندیر. اولار بیر زنگ ائدیم؟

سانکی بازجونون آللاهی وئردی. اونلار آللاهدان ایسته­ییردیلر کی موتتهمین (سانیغین) بیر احتیاجی اولسون. بو احتباجا دایانیب، همین شخصی ازیشدیریرلر. او ایسته­یی ، اوز ایسته دیکلری یئرینه گئتمه­یینجه وئرمیرلر. اودموش اویونجو کیمی دئدی:

-          کیمله دانیشماق ایسته­ییرسن؟ بیر کس قالماییب کی ائوده. هامیسین گتیرمیشیک.

اینانار اینانماز دئدیم:

-          بس اونلاری نییه توتوبسوز؟

-          هره نین اؤزونون بیر حدده اطلاعاتی وار. هره بیر حدده­جن بو ایشده گوناهکاردیر. دئیه­بیلرسن کیملری توتموشوق؟

بونونلادا منیم دیلیمین اوجونداکیلاری آلماق ایسته­ییردی. من هر حالدا اونون باخیشیندا بیلیردیم کی کیملر نه ایش گؤروب و کیملری توتماق اؤنملیدیر. اونلاری ایسته­مه­دن دیله گتیره­بیلردیم. دئدیم:

-          بیلمیرم کی، دئییرسیز هامینی توتوبسوزدا

اووجون آچدی:

-          یوخ هامی کی توتولماز. بورا بیز هئچ کسی بی خود(یئرسیز) گتیرمه­ریک.

دوروب آددیملادی، سانکی بیر یئنی فیکیر بئینینه چاتمیشدی و اونو فورمالاشدیریردی. اؤزون بیر ساواش دیزایتئری (طراحی) کیمی آپاریردی. منسه بو ایشینه گولمه­ییم گلسه ده، فیکریمی ائوده­کیلر قاتمیشدی. بیر آندا دؤنوب منه ساری فیکرینی دئدی:

-          بیر سوال وئریرم. اونون جاوابین دوز تاپسان، جایزن وار. ائله بوگون سنه خانیمینلا مولاقات وئرجم. اصلاً گلن 10 گونون هامیسیندا مولاقات وئرجم.

من او زاماناجان، اطلاعاتدا اولارکن گؤروشه گئتمه میشدیم. بونو دئیرکن ائله اوره­ییمه دامدی کی ، سونانی کسین توتوبلار. بورادا اونونلا گؤروشدورمک ایسته ییرلر. بونا دوشونرک اوره­ییمین یاغی گئتدی، دئدیم:

-          بورادا نه گؤروشو؟

-          سنین نه ایشین؟ بوردا من تصمیم توتمورام به یه؟ من گؤروش وئرجم دا. سن دئدیییمه دوز جاواب وئر. دئ گؤروم سنین نظریوه ایندی کیملری توتموشوق، هم قوهوملاردان، همده بوتون شهرلرده­کی دوستلاریندان؟

بو سورونو وئرمکله دئمک ایسته­ییردی کی "سنجه کیملر اؤنملیدیر بیز گئدک اونلاری توتاق". سورونو یازیب قویدو قاباغیما. سوروسوندا بئله بیر آرتیرماسیدا واریدی: "هاردان بیلیرسیز کی همن آداملار توتولوب؟" منده حرکتده تانینمیش شخصلرین بیر ایکیسین یازدیقدان سونرا، سسلرین ائشیتدیییم یولداشلاریندا آدلارین یازدیم. هاردان بیلدیییمه­ده سسلرین ائشیتدیییمی یادا بازجولارین دئدییینی ندن گتیردیم. ایسته­دییین آلانمادی و منیم گؤروشوم باش توتمادی. یامان قارانلیق ایچینده­یدیم. بیلمیردیم کیملر توتولوب عایله­دن. آنام گیلین دورومو اینجیدیردی منی. آنجاق  اؤننمسه­مه­یین فایداسی یوخودور. من ائله سانمالیدیم کی هامینی توتوبلار. بیریانداندا ائله حساب ائتمه­لیدیم کی هئچ کس اونلارین دئدییی کیمی حرکت ائتمز. بونونلادا هم اونلاری ایشه قویمازدیم، هم آلدانمازدیم.

3 گون بئله­جه یولداشلارین دیندیرمه­لرین ایزله­دیم. یولداشلارین دیندیرمه­سیندن ائله آلیردیم کی ، بازجویی آرتیق بیتمکده دیر. اونلار بو آشامادا یا منیم باشیما تؤکولجکلر، یادا هامیمیزی بوراخاجاقلار. ایدمان ائتمه­یی و اؤرگوتله باغلی پیلان تؤکمه­یی بیرگونده اولسون، دایاندیرمیردیم.

53-جو گون

53-جو گون سحر یئمه­ییندن آز سونرا، گؤزتچیلردن بیری – جاوان، اوزون بوی اوغلان- گلیب قاپینی آچدی. بوراقدر گؤردویوم زیندانیلرین هامیسینین بو آدامدان آجیغی گلیر. اولدوقجا اؤز چاتمازلیقلارین، تاپدانمیش ایستکلرین دوسناقلیلار اوزره بوشالتماق ایسته­ییردی.  ماراقلیسی بویودور کی اؤزوده بونا بیر دؤنه منیم یانیمدا اعتراف ائتدی. او توتولان سیاسی زیندانیلری اینجیتمکله، لذت آلیردی. چوخ سئوینیردی و سئوینجین گیزلتمیردی کی، منیم اوزومده آغ توکلر گؤرونور. بئله سانیردی کی چتین زیندان شراییطی اونلاری اورتایا چیخاریب، بونونلا لذت آلیردی. آغزین همیشه اؤرتوردو کی، کیمسه اونو تانیماسین. سانکی چوخ اؤنملی آدامدیر و اونون گؤرونمه­سی هانسیسا تهلوکه دوغورابیلر. کیمسه­نی یاشامیمدا تحقیر ائتمک ایسته­مه­میشم ، آنجاق  اؤزونو حؤکمدار گؤسترن بو بازجولاری بیرده بو بدبخت گؤزتچینی تحقیر ائتمه­ییم گلیردی! بونو آرا سیرا ائدیردیم ده. مامورلار چوخ یئکه یئکه دانیشاندا، سؤز آراسی "من سیزدن اینجیمیرم، آخی سیزین اختیاریز یوخدور کی، مامورسوز. سیزه بویورانلاری اجرا ائدیرسیز ..." کیمی سؤزلر یئدیردیردیم. بودا اونلارا یامان دییردی. آنجاق  سسین چیخارانمیردیلار. بو یازیق گؤزتچیده اؤزون ساوادلی گؤسترمک ایسته­ییردی. هردن حالین توتوردوم، نئچه گون جینقیری چیخمیردی.

او گون سئوینجک قاپینی آچدی. دئدیم بس نه­ایسه اولوملو بیر خبر وار. بلکه بوراخیرلار. آنجاق  2 اوتاق کئچدیکدن سونرا اوچونجو اوتاغا دؤندردی منی. بازجویی اوتاغی اولسادا، اوتورماق اوچون اوتوروقدان خبر یوخودور. آیاق اوستده دایاندیم. ایندییه قدر بازجویی اوتاقلارین بئله بوش گؤرمه میشدیم. گؤزتچی اوغلانین گلمه­سی چوخ چکدی. بئینیمدن هرجور فیکیر کئچیردی. "گلیب دؤیمک می ایسته­ییرلر؟ ، زئرزمینه آپارماق می ایسته­ییرلر؟ ایندییه کیمی هده­له­دیکلری شاللاق، گؤیدن آسماق، شوک وئرمک و ... کیمی ایشکنجه­لره باشلاماق می ایسته­ییرلر؟..." کیمی دوشونجه­لره چوخ مئیدان وئرمه دیم. نه اولورسا یئنیلمه­یه­جه­ییمه قرارلییدیم. آیاق اوستده دووارا دایانیب، حریفلری گؤزله­دیم. آنجاق  ایسته­مدن منفی هیجانلا دولو بیر حالدایدیم. دؤیوش باشلایاجاقدیم سانکی. بو دؤیوشده اوغورلو چیخاجاغیمادا اینانیردیم. آنجاق  یومشاق بیر استرسده یاشاماقدایدیم. بازجولارین بیری قاپینین باخینجاسیندان باخیب دئدی:

-          چشمبندیوی وور دؤن اویانا

گؤزباغیمی ووردوم. گلدی آرخامدا دایاندی. بو بازجو دفعه­لرله منی وورموشدو. قاریشیق بیر لهجه سی واریدی. آزاجیق شبستر لهجه­سی واریدی، دیلیمیزده­کی سس قایداسیندا گؤزله­میردی. منی یئنی بیر مرحله­یه گیرمه­ییمله باغلی باشا سالماق ایسته­ییردی.

-          خوب، آغای آیت یاخشیسان دا؟

-          یاخشییام

سونرادا باکی لهجه­سینی یانسیلایاراق دئدی:

-          یاخشیسان؟ هله یاخشی اولماغیوا چوخ قالیر. دایان بوردا. اؤزوده یئره اوتورماها. بیلیرسن دا بوردا دئدیغیمیز ایشی گؤرمه­لیسن، یوخسا پیس اولار سنه. دووارا باخاجان. بویانا دؤنمه­یه­جکسن و یئره اوتورمایاجاقسان.

دانیشیغیندان، آرخامدا سس­سیز دورماسیندان بیلدیم کی بونلار آیاق اوستده ساخلاییرلار کی، منیم بئلیم ، قیچیم آغریسین، حؤصله­دن دوشوم، دانیشماغی ترجیح ائدیم (یئیله­ییم). اوشاقلیق اویونلاریمیزدان بیلیردیم کی، ان ساده ایشی، اؤرنک اولاراق قولو بیر ایکی ساعات یئرله موازی (قوشوت) ساخلاماق نه­قدر چتیندیر. هم عصبی باخیمدان همده بدنین فیزیکی طاقتی باخیمدان بیر سوره سونرا دؤزولمز اولور. آرتیق دؤزوم سیناغی باشلامیشدی.

آرخامداکی مامور هردن یادیما سالیردی کی "یئره اوتورماها ، بوردایام" ، بئله لیکله تئز تئز یادیما سالماقلا، آیاق اوسته دورماغین چتینلییین آرتیرماق ایسته­ییردی. ایلک بیر ایکی ساعاتدا هر آن باشقا بیر ایش گؤزله­ییردیم. آنجاق  سونرا گؤردوم دئیه­سن ائله هرشئی ساده­جه آیاق اوستده دورماقدیر. گؤزتچی یئمک گتیردی، ایسته­دی اوتوروقدا گتیرسین اوستونده اونوروب، یئمک اوچون، بازجو قاباغین آلیب دئدی:

-          نه صندلی گتیریرسن؟بونون صندله لیاقتی یوخدور. قوی ائله آیاق اوستده یئسین. آدام دییل کی بو، آدام کیمی رفتار ائدیلسین بوننان.

گؤزتچی یئمک الینده منه یاخینلاشدی. دئدیم:

-          یئمیرم، آپار.

گؤزتچی بیر سؤز دئمه­دن اوزاقلاشدی. اوتاقدان چیخدی. آردیجا بازجو چیخدی. بیر آنلیغا آجلیق ائیله­می (اعتصابی) بئینیمدن کئچدی. من بو آجلیق آکسیاسی ایله هئچ واخت راضی اولمازدیم. بونون فایداسیز اولدوغون دوشونوردوم. ایکی دؤنه یولداشلارین ایسته­یی ایله مجبورن آجلیغا باشلامیشدیق، آنجاق  هئچ بیرینده بیر اؤونه­دن آرتیق اولمامیشدیر. دوروم دییشمیشدی و آجلیق بهانه سی اولمادیغینا باشلاییب، یئمیشدیک. بیر دؤنه 1381-جی ایل 21 آذر گونو توتوقلاندیغیمیزدا، تبریزده، بیر دؤنه­ده 1383-جو ایل تهرانین ائوین زیندانیندا. آنجاق  بو دؤنه بئله حقارتله یئمک یئمه­یه دیمه­زدیر.

آز سونرا قاپی آچیلدی، گؤزتچی بیر اوتوروقلا ایچری گیردی. اوتوروغو یئره قویوب، یئمه­یی اوستونه قویدو. هئچ بیر کلمه دئمه­دن اوزاقلاشدی. دوشونمه­یه گرک قالمامیشدی. باشلادیم یاواش یاواش یئمه­یه. سون ایللرده ان چوخ یوخسوللوغوم زامان یوخسوللوغو اولموشدور. آنجاق  بورادا زامان اولدوقجا بولودور. بیرینجی دؤنه اولاراق زامانی اؤلدورمک ایسته­ییردیم. آنجاق  یئمه­یی اوزالتماغین بیر حددی وار. یئمک قورتارجاق، بازجو گیردی ایچری، آجیقلی آجیقلی دئدی:

-          دور آیاغا

بئینیمدن سؤزونه باخماییب، یئره اوتورماق ایسته­یی کئچیردی. آنجاق  سونرا دوشوندوم کی بو بیر شیکنجه­دیر. بونا دؤزمه­لییم ساده­جه. شیکنجه­نین قاباغین آلماق اولماز. اونلار ائله بیر ایشلر گؤره­بیلرلر کی، من قاباغین آلانمایام. بیر آزجادا واخت، ناماز زامانی آلدیم. نامازدان سونرا آخشاماقدر، آرخامدا دوران بازجولار نئچه دؤنه دییشدی. اونلار آرتیق بیر سؤز دئمیردیلر. ساده­جه هردن کئفیمی سوروردولار. آیاقلاریمین آلتی، بالدیرلاریم و آزجادا بئلیم آغریماغا باشلامیشدی. آنجاق  بونلارا دؤزمک چتین دییلدی. گئجه شامدان سونرا جاوان بیر بازجو گلدی. اؤنجه چوخ دینج بیر سسله کئفیمی سوردو:

-          کئفین سازدی؟ ایسته­ییرسن بیر قول قیچین آچیلسین؟ دئییرلر آخی ورزشکارسان (ایدمانچیسان)!

بیرآز دوروقساندی. سونرا اؤزونو بیر روانشناس (پسیکولوق) کیمی آپاراراق اؤنمسیز گؤرونن گؤستریشلرین وئرمه­یه باشلادی:

-          یاخجی باشلا. 500 دفعه.بشین پاشو گئدجکسن(اوتوروب دوراجاقسان.) گئده-گئده سای ها، باخیرام، بیردنه ده گئشمییه­جن.

قاپینی باغلاییب، باخینجاسیندان منی ایزله­دی. بونو آز سونراسی دویوردو منه.  باشلادیم اوتوروب دورماغا. اؤتن 53 گون ایچینده بو ایشی اؤزوم چوخ یاپمیشدیم. بودلاریم حاضیریدی. آنجاق  500 دنه چوخ آغیریدی. 100 دفعه اوتوروب دوردوقدان سونرا بودلاریمی آووشتورماقلا، اونلارین آغریدیغینی گؤسترمک ایسته­دیم. بیر آز دایاندیم کی گؤرم سؤزلرینه باخمایاندا نه ائدیرلر؟ همده کی گوجومو باشقا اویونلارا ساخلاماق ایسته دیم. آنجاق  ائله تزه­جه دایانمیشدیم قاپی آچیلدی. جاوان بازجو تئز اؤزون آرخاما چاتدیردی. قولاغیما هده­له­ییجی سسله فیسیلدادی:

-          500 دئدیم، 500 دفعه گئتمه­لیسن. یوخسا چاغیرارام گلرلر بو حالیندان پئشمان ائلییرلر. من بوردا لاپ یوموشاقلارییام. سعی ائله آیریسینین گلمه­سینه باعث اولمایاسان. باشلا، دایانما، 500 اولاندا اؤزون چاغیر.

 

 بونون پیچیلداماسی اوبیریلرین قیشقیرماسیندان ائتکیلییدیر.

 اؤز یانیمدا دوشوندوم کی "قوی هله بیرآزدا گئدک سونرا گؤرک نه اولور". باشلادیم یئنه اوتوروب دورماغا، 50 دفعه ده اوتوروب دوردوم. یئنه دایاندیم. بازجو همن آردیجا ایچری گیردی و بو دؤنه بیرآز یوخاری سسله دیللندی:

-          دئیه­سن سن سؤز قانمیرسان. من بیر سؤزو ایکی سئری دئمه­رم. دایانما، باشلا. تئز اول. یوخسا دئدیم گلدیلرها. او سون گئتدیکلرینده حساب دییل. یالاندان اوتوروب دوروردون.

دایاندیم و دئدییی آداملاری گؤزله­دیم. دئدیم:

-          گئدنمیرم دیزلریم آغریییر. نه ائدیرسیز ائدین.

آجیماسیزجا (ترحومسوز) بیر چیرکین سسله دئدی:

-          گئدرسن. تئز اول

-          باجارمیرام داها. ائلییه­نمیرم. دئدیکلریوی چاغیر گلسین. منیم دیزلریمین آرتروزو وار.

یئنه­ده همن آجیمازسیز سسله بیر آز داها اوجادان باشیما قیشقیران کیمی دئدی:

-          سنه دئیه­سن سؤز کار سالمیر. آدام دیلی قانمیرسان. دئدیم کی دایانما. من سؤزومو چئویرمرم ها. سن سن بئله ائلیرم. منیم اوبیری اوزومو گؤرمویوبسن. بیلیرسن هئچ من نه­چییم؟

-          شیکنجه مسئولو؟

سویوق بیر سسله دئدی:

-          یوخ، بوردا نه وار کی؟ بوردا شیکنجه هاردایدیر؟ ورزیظ ائلیرسن. ایستیرم قول قیچین آچیلسین. هه دئ گؤروم من نه­چییم بوردا؟

دانیشیغا باشلاماق اوتوروب دورماقدان یاخشیییدی. دئدیم:

-          بیلمیرم، هرحالدا بازجوسان دا

سسین بیرداها اوجالتدی:

-          یاخشی دا اوزون آچیلماسین. استراحت ائله­دین. باشلا دایانما

بو آندا قاپیدا پیچیلتی باشلادی. بیر ایکی نفرینده تاپ تاپ تاپ آیاق سسی گلدی. یورویورجه­سینه اوتاغا یاخینلاشیردیلار. بازجو بیر داها قولاغیما فیسیلدادی:

-          اؤزووو دردیسره سالما، باشلا

بیلیردیم بونلار اویوندو. آنجاق  الیمده اولان باجاردیغیم و اوسته­سیندن گله­بیلدیییم نقد ایشی، نیسیه اولان بیلینمز بیر ایشه یئیبه­دیم (ترجیح ائتدیم). آنجاق  بازجو 15 سایدی. اؤز یانیمدا دوشوندوم کی "اؤلمک اؤلمکدیر، خیریلداماغا گرک یوخدور. داها گئتمییه­جم. گررک نه ائدیرلر". دایاندیم. یئنه بودلاریمی ، دیزلریمی اووشدوردوم کی ، سانکی آغریدان اؤلورم.

قاپی آچیلدی و کار گؤزتچی ایله ایکی نفر باشقاسی ایچری گیردی. کار گؤزتچینین اللی یه یاخین یاشی اولاردی. آنجاق  اوجابوی و چوخ هوندور، زیرپی بیریسییدی. چییینلریندن ایدمانچی کیمی گؤرونوردو. دیلیده پتیییدی اونا گؤره گؤزومه یازیق کیمی گؤرونوردو. آنجاق  او گئجه اونون نه­قدر آجیماسیز، روحسوز اولدوغونو باشا دوشدوم. یئتیریب، انگیمه بیر یومروق، بوینومون دالینا بیریسین ووردو. ییخیلدیم یئره. قارنیما بیر نئچه تپیکده دؤشه­دیلر. قارنیمی سیخابیلمیشدیم، آنجاق  انگیمله بوینومدان ده­ین یومروقلار ده­یدیکده حیس ائله­دیم باشیم داغیلدی. جلاد کیمی گؤزلری قیزارمیشدی. قوللاریمی دارتیب آرخادا باغلاماق ایسته­دیلر. بو شیکنجه‌یه ترسه دستبند دئیرلر، قولون بیرین قاتلاییب چییین‌دن، بوینون یانین‌دان گتیریرلر آرخایا، او بیری قولو دا بوکوب قویورلار بئلین اورتاسینا و فیشارلا بیلک‌لری بیری بیرینه یئتیریب قانداللاییرلار.  بدنیمین قدیمدن انعطافی (اسنکلییی) یوخودو. زورلا دارتیب آرخادا باغلایینجا 20 دقیقه­یه قدر چکدی. قوللاریم دارا چکیلمیشدی، سانکیدامارلاری قیریلماقدایدی. قانداللار (دستبندلر) یئریمیشدی قولومون اتینه. بیلکلریمی ائله سیخمیشدیر کی اللریم قیپ قیرمیزی اولموشدور. دؤشوم آرالانماقدایدی. تؤوشه­یرک یامان دئین ایشکنجه­چیلر هردن بیر تپیک ووروب، "تئز اول دئ، هرنه­یی یازمالیسان، اؤلدورریک یوخسا..." دئییردیلر.

منسه فیشاردان قیشقیریردیم. قیشقیرماقلا هم سسیمی تزه­جه گلن شوکور بی­یه چاتدیرماق ایسته­ییردیم، همده ایشکنجه­چیلره چاتدیرماق ایسته­ییردیم کی باخین من هئچ نه سیزین دئدیکلریزدن بیلمیرم، یوخسا بو فیشارین آلتیندا هرنه­یی دانیشمالییدیم. اونلارسا بو آجیناجاقلی سسلره یا وردیش ائتمیشدیلر، یادا اونونلا لذت آلیردیلار. سانیرام او یازیق کار گؤزتچی کیمیلر، بونونلا اؤز دینی وظیفه­لرین یئرینه یئتیریردیلر. یوخسا بو چیرکین عذاب وئرمه­نین نئجه ویجدان آغریسین چکه­بیلردیلر!

او گون شوکور بی قهرمانی­نین گلدییین­ده ائشیتمیشدیم. اونونلا دانیشماغا آمان وئرمه­میشدیلر. عهدیه خانیم، یاشار، ماوی و اونلارلا کئچیردیییمیز آنلاری آیاق اوستده اولارکن یادیما سالمیشدیم. بو انسان تکلییینده بیر حرکت یولا سالمیشدی. میللی مساله­میز اونون یاشامینا چئوریلمیشدی. حؤصله­نین داریخمازلیغین تمثیلییدیر. ساعاتلارجا بیر کیچیک مساله­نین اوستونده ایشله­یردی. اونونلادا اورتاق ایشلریمیز چوخودور. او یاخشی پسیکولوقودور. اونو آلدادانمازدیلار. بازجولاری اوینادابیلردی. قیافه­سی ، دانیشماق طرزی، گولوشلری بئینیمده جانلانمیشدی. آلچاق بویو واریدی، اولدوقجا آریغیدی. اوزو آریقلیقدان باتیغیدی. اونا گؤره ده ساققال قویاردی. ایتی گرزلری ایله، درین باخیشلاری واریدی. او قاراداغین خودافرین بؤلگه­سیندن، ساریجالی کندینیدی. 1380-جی ایلدن ائلچین حاتمی نین واسیطه سی ایله ایلگیمیز قورولموشدو. ائلچینین دایی­سیدی. ان یاخین یولداشلاریمدان ساییلیردی. ایللر بویو عایله وی ایلگیمیز سورموشدو. 3-جو دؤنه­یدی اونونلا بیر واختدا توتولوردوق. 1381، 1383-جی ایللر بیرده کی ایندی 1389-جی ایل. اونلار آد چکرک هده­له­دیکلری آداملارین سونونجوندا گتیرمیشدیلر.

آنجاق  اونونلا هئچ اولماسا بیر ایکی کلمه دانیشا بیلسه­یدیم، اوره­ییم آرخایین اولاردی. منیم بو آجی قیشقیرمالاریم، چیغیرمالاریم اونا بلکه ده پیس تأثیر ائده­بیلردی. آنجاق  بیر یانداندا دانیشماغا ایمکان اولماسادا، قیشقیرمالار آراسیندا اونا چاتدیریردیم کی "من هئچ نه دئمه میشم، سنه قارشی هئچ نه یوخدور، اؤزونو راحات ساوونابیلرسن. "

قوللاریما ترسه دستبند باغلایارکن تاپدایانلارین بیری آغزیندان بئله بیر شئی قاچیرتدی کی "اوغرولارا ترسه دستبند باغلایاندا، 20 دیقه­یه هرنه­یی بویون آلیرلار". بیلمیرم نئچه 20 دیقه کئچدی آنجاق  سونوندا قولومو آچدیلار. ایشکنجه­چیلردن بیری تپیکله بیر نئچه­سین آرتیقدان ووراراق چیمخیردی:

-          دور آیاغا ، کؤپی اوغلو، ... دور.... دور

ایندی آیاغا دوروب، سونرادا 500 دفعه آرتیقدان اوتوروب دورماق بیر یومشاق حرکت کیمی گؤرونوردو. جاوان بازجو گلدی یانیما، آرالیق آداملارینین بیرینی آلچاتماسی کیمی یئنه آجیماسیزجا سوردو:

-          هه، دئیه­سن قول قیچین آچیلدی؟ گؤردون دئییرم گرک منیم قدریمی بیلسن. دی دایانما، باشلا. اؤزوده اوجادان سای.

 داها اویونون باشقا پرده­لرینین آچیلماسینا ماراق قالمامیشدی. دوشونمه­دن اوتوروب دورماغا باشلادیم. ندنسه یئنه تام ایسته­دیکلری کیمی حرکت ائتمکدن چکینیردیم. اوجادان سایمادیم. بیر ایکی دؤنه وورغولادی کی "اوجا سایماسان حساب دییل ها". تئز بئینیمده جانلاندی کی بونلار منی اطاعت ائتمه­یه اؤیره­دیرلر. اؤز یانیمدا دئدیم "سایمییاجام آنجاق  هله­لیک قوی اوتوروب دورمانی گئدیم." آیاقلاریم 400-دن سونرا داها تیتره­ییردی. قاباقجالار هئچ واخت بو سایدا اوتوروب دورمامیشدیم. دیزیمی چوخ گؤزله­یردیم. آنجاق  ایندی دیزی داها یوخا قویموشدوم. سونوندا 500 بیتدی. بازجو دایاندیغیمی گؤروب دیللندی:

-          گئنه نه اولدو؟ دئیه­سن سنی بیزله­میینده یئریمیرسن؟

یامان یووزدان قاباقجادا آجیغیم گلردی. خشونته(قابالیغا، کوبودلوغا) سؤزده ده اولسا بئله نفرت ائدیردیم. دئییردیم کاش باشقا دیلده دانیشایدی بو جلاد. دوشونمه­یه ماجال یوخودو. دئدیم:

-          500 قورتاردی. قیچلاریم پارتلاییر آغریدان. اوتورابیلرم؟

مسخره ائدیجی بیر سسله جاوابلادی:

-          50 گوندور اوتوروساندا. اوزانیب کئفه  باخیسان. هله سنه نه ایش گؤرموشوخ سیزیلدییرسان؟ یاخشی گئت دووارین دیبینه بورنوو دایا دووارا ، بیر آیاغیویدا یئردن گؤتور. دئدیییم کیمی ائله ها یوخسا بایاقکیلار گلجک.

دووارا ساری گئتدیم. من اونون آجی، تحقیر ائدیجی سؤزلرینه فیکیر وئرمه­مه­لیدیم. آغریدان ضعفدن دانیشاندا کئف ائله­ییردیلر. آنجاق  بورادا اونلارین ندن کئف ائلمکلری اؤنملی دییلدی. من اؤز ایشیمی گؤرمه­لیدیم. دووارین یانیندا بیر آیاقلی ساعاتلارجا دایاندیم. آرا سشیرا آیاقلاریمی دییشیردیم. آنجاق  بو دییشمه­لرین هر بیرینده یئنه­ده دؤیولوردوم. بئله تاپداییردیلار کی آیاق اوستده دورماغی اونا ترجیح ائدیردیم. آیاق اوستده دورارکن دوشونوردوم­ده. آخی هده­له­دیکلری یولداشلار هامیسی توتولموشدور. دئدیکلریندن یالنیز بیری قالیردی. اونودا گتیره­بیلردیلر. بیر یانداندا یولداشلار ایگیدجه­سینه تشکیلاتیمیزی ساوونوردولار. من هم دانیردیم، دؤیولوردوم، همده اونلار کیمی جسارتله مودافیعه ائده بیلمیردیم. اونا گؤره آرادا وسوسه اولوردوم اؤرگوتو بوینوما آلام. اونلارین بیلدیکلری قدر دانیشام و سونونادک دئدیکلریمین اوستونده اولام. اؤزلریده آغیزلاریندان قاچیرتمیشدیلار. بیلیردیم ده کی بو جاسوسلوق فیلان ایتهامی هامیسی منی قورخودوب،ستلجمه راضی ائتمک اوچوندور. آنجاق  دؤیولرک بونا اعتراف ائتسه­یدیم تسلیم اولماق کیمی دیه­رلنردی. سونرادا اونلار بئله بیر سونوجا چاتابیلردیلر کی کیم دانیشماسا بیر ایکی گون چتین دوروما سالساق، اودا دانیشار. "یوخ من کؤتو بیر اؤرنک اولمامالییام، اونلار بیلمه­لیدیلر کی تاریخده اولدوغو کیمی زورلا کیمسه نی تسلیم ائتمک اولماز" دئیه دوشونوردوم. منطیق بورادا حؤکم ائدیردی کی اونلارین بیلدییی یئره قدر من بوینوما آلام. سونرا یئنه دیره­نم. چون ایندی اونلار یوزده یوز بیلیرلر کی من دانماقدایام. گرک ائله ائدم کی اونلاری بیرآزجا دیرنمه­ییم ایناندیرا بیله. یوخسا بئله­سی اونلار منی سیندیرماغا چالیشاجاقلار. هردن ده ائله دوشونوردوم کی ائله بونلارا گؤستریم کی، سانکی من سینمیشام. اونلاردا دئسینلر بس آرتیق دانیشاجام. سونرا بو دانیشمادا اونلاری یئنه اوینادارام. بوتون بو دوشونجه­لر بئینیمده گزیردی. بیلیردیم کی بئله دوشونجه‌لر، بونلاین وئردیگی شیکنجه‌لردن باش قالدیریب. اصلینده، بئینیمین، بدنیمی موحافیظه ائتمئک ایستییدی و اونون اوچون ده بئله توجیه‌لر دوغور. ماراقلی‌دیر کی فیزیکی فیشارلار آرتدیقجا، بو توجیه‌لر ایدیال‌لاریمی و دیرنیش منطیقیمی زورلاییب باسماغا دوغرو گئدیردی. سونرا‌لار آنلادیم کی بازجولار، باسقی‌لار آراسی، ائله یوموشاق اؤیوت‌لری و منطیق‌لری ایله، بئینیم‌دکی دنگنی توجیه‌لره طرف آغیرلا‌دیرلار. بونا فیزیکی و ذهنی شیکنجه موکممل لییی آد وئرمیشدیم.آنجاق  اونلاری رد ائدجک فیکیرلریمده واریدی. من ائشیکده اولان یولداشلاریما نه دئیه­جکدیم؟ بیرده کی مامورلار منی  سینمیش گؤرسه­لر، سینمیش بیریندن ایسته­دیکلرین مندن ایسته­یه­جکلر. او زامان یا گرک یئنیدن دیره­نه­یدیم، بودا سینمیش بیرینه یاراشماز. یادا منی بیر قالیبه یالاجاقدیلار کی، اورادان عؤمور بویو چیخانمارام. "یوخ دیرنمک لازیمدیر. من اؤزومو سینمیش گؤستره­بیلمرم، منیم بو تصویریمی باشقا یولداشلاریما گؤستره بیلرلر. بلکه هله اونلارین ایچینده مساله نی دانانلار وار. اونلار منیم بو حالیمی گؤرجک چوخ پیس دوروما دوشرلر. بئله دوشونرلر کی من هرنه­یی اورتالیغا قویموشام. اوندا ایندییه قدر گیزلی ساخلادیقلارینین هامیسین تؤکرلر ائشییه. یوخ دیرنمه­لییم." دوشونجه لری بئینیمده فیرلانیردی. سحره­جن آیاق اوستده یوخوسوز ساخلادیلار. یایین ایلک آیی ایدی. سللولدا تهویه فیلان یوخودور، بورکولو (شرجی) هاوا بیر یاندان ، دؤیولمک بیر یاندان ، ترلمک بیریاندان، دیل دوداغیمی قوروتموشدو. ناماز واختی چاتدی. بایاقدان بو واختی گؤزله­ییردیم. آپاردیلار دستماز آلماغا و توالته گئتمه­یه. باجاردیقجا یوبالتدیم آنجاق  5 دقیقه دن چوخ چکمه­دی. آزجادا ایکی رکعت نامازی اوزالتدیم. ناماز بیتجک قاوزادیلار آیاغا. سحر یئمه­یینه قدر یئنه آیاق اوستده قالدیم. یئمکدن سونرا ساعات 10 یاخینلیغیندا رئیس دئییلن بازجو گلدی. گئجه بویودا ایکی بازجو یئر دییشمیشدیلر. بازجو یئیین آددیملارلا یاخینلاشیب، آرخامدا دایاندی. گئجه یوخوسوزلوغون سونوجون آلماق ایسته­ییردی. دؤیوشده اسیر توتدوغو بیری ایله دانیشار کیمی، یوغون سسله سوروشدو:

-          گئجه یاتابیلدین؟

-          یوخ، قویمادیلار

بازجو طعنه ایله جاواب وئردی:

-          اینانمیرام، من گؤرمورم. سنین لاپ کئفین یئرینده دیر. کاغاذ گتیریم یازاسان؟

-          یوخ، فیکر ائلیرسیز بئله لیکله نتیجه آلاجاقسیز؟ منیم دئدیییم دئدیکری. منی ایشکنجه ائتمکله، دؤیمکله نتیجه آلانمازسیز.

بونو دوجک تاپداماق باشلادی. دیک دیک دانیشیردیم. اودا منیمله لاپ ساواش باشلامیشدی سانکی. منی دؤین یاردیمجی لارین ، آرا سیرا قیراغا چکیب اؤزده بیرنئچه­سین انگیمه، بوینوما زوللویوردو. منسه ووردوقجا، بیرآزدا قورورلا باشیمی دیک توتاراق دئییردیم:

-           وورون، یورولاناجان وورون. هامینیز امر آلیرسیز. اربابلارینیزا یاخشی گوزاریش وئرین. ضعیفلیک تؤکولور هر یئریزدن. بئله لیکله کیمسه­نی عقیده­سیندن دؤندره بیلمزسیز. دایانما، وور، ووردا، اؤلدور لاپ بئله.

گؤزلری عصبی­لیکدن قان ایچینده­یدی. بورنو دوه بورنو کیمی آرالانمیشدی. بونو نفسینین گئت گلیندن بیرده سسیندن دویماق اولوردو. آجیقلی آجیقلی هؤنکوردو:

-          اؤلدورمه­یه­جم سنی، ائله ائدجم کی هرلحظه اؤلوم آرزولییاسان.

قوللاریما، بوتونلوکده ووجودوما بیر نئچه قات گوج گلدی. یئنه باشیمی دیکله­ییب اوجادان جاوابلادیم:

-          الیندن گلنی اسیرگمه. منی بئله شئی­لرله سیندیرانمازسیز. باشقا یوللارا ال آتین.

یومولدو اوستومه. اؤزون شیرین سالانلاردا اونونلا بیرلیکده تؤکولدولر باشیما. یئرده ازیشدیردیکدن سونرا، قیراقدا دوروب قوچولار کیمی، قوللاریین  گئن توتوب، مئیدان اوخودو:

-          دئمیشم. دؤز ، بیر بیر بوتون یوللاری امتاحان ائده­جه­ییح. بیری اولمادی اوبیریسی. اوبیریسی اولمادی بوبیریسی. آخیردا دانیشاجاسان. تؤبه ائدجن. آدام ائلییه­جم سنی. سوموهلریوی سیندیراجام.

چیخیب گئتدی.سالوندا یامان دئمکلرین ائشیدیردیم. آرا سیرا "آروادین گتیریب ...." کیمی-ائشیتمه­سی بئله انسانین اوره­یین بولاندیران سؤزلری- سالوندا زینگیلدمکده­یدییدیر. ایکینجی گون آیاق اوستده آییق قالماق باشلامیشدی. یادیمدادیر قاباقجا رشت­ده اؤیرنجی اولان زامان بیر بیلی­یورد تؤره­نین قورماق اوچون، 3 گئجه گوندوز اویاق قالمیشدیم. آنجاق  اوچونجو گون داها آخشام باشی تبریزدن رشته گئدن اوتوبوسا مینجک، رشته قدر یاتمیشدیم. اونا گؤره بیلیردیم کی هئچ اولماسا 3 گون یوخوسوز قالابیلرم. آنجاق  او 3 گون ایله بو 3 گونون یئر گؤی آراسی فرق واریدی. آیاق اوستده یوخوسوز قالیب دؤیولمک هارا، اوتوبوسدا یا ائوده اوتوراراق، یوخوسوز قالماق هارا! من چالیشیردیم 3 گون اولمامیش اؤزومون ظرفییتیمی بیتمیش گؤستریم کی بونلارین اوندان سونراکی مرحله­ده نه ائدجکلرین اؤیرنیم.

او گون آخشاماجان دؤیمکدن خبر یوخودور. آرخامدا منی اویاق ساخلاماق ایسته­ین بازجولار، نئچه ساعاتدان بیر یئرلرین دییشیردیلر. آرالاریندا منی دانیشدیران­دا اولوردو، ساکیت دوروب، هردن یوخومو قاچیرانلاردا. گؤزومو یومجاق یوخو باسیردی. آنجاق  مندن قاباق اونلار یوخویا مئیدان وئرمیردیلر. بیرده هرآن اوستومه یویورنلرین تصوورو سکسکه­لی دوروم یاراتدیغی اوچون یوخو توتجاق ، اؤزومده باشا دوشوردوم، دیک آییلیردیم. شام واختینا قدر بیرتهر کئچیردیک. شامدان سونرا دئدیم:

-          منیم یوخوسوزلوغا داوامیم یوخدور. یاتماق یاسته­ییرم. دئمه­یه­ده هئچ نه­ییم یوخدور. نه­قدر اویاق ساخلایاجاقسیز؟

آرخامداکی بازجو یئنه ده سویوق سسله جاوابلادی:

-          بیر شئی دییل کی، کاغاذی گتیرجم یازاسان، سونرادا قویاجام یاتاسان. گتیریم؟

-          50 گوندور یازیرامدا، نه قالیبدی یازماغا؟

-          اونلارا بیر باغ سووزو وئرمزلر. نه یازیبسان چرت پرتدی. ایسته­سن گتیریم یاز. ائله بیرکلمه یازسان کی گاموحون عضووسن من بیلرم کی سن دوغوردان ایستیسن یازاسان. بدبختسن دا. یئکه باشیز ایندی آمریکادا کئفین چکیر. سیزی وئریب قاباغا. من دئمیرم ها، بو دیل زاد مساله سی پیسدیر، آمما سنین یولون اشتباهدی. ایندی یولداشلارینین هامیسی یا بوراخیلیبلار ائولرینده، ائشیکلرینده­دیلر، یادا هئچ اولماسا سندن یاخجی دورومدادیلار. نئچه­سین بیر اوتاغا سالمیشیق، کیتابلاری، یئمکلری یئرینده. نه فیکر ائلیییسن؟ ایستییسن قهرمان اولاسان؟ رهبرلریسندا هه؟

دئدیم: یوخ نه قهرمانی، نه رهبری، من دئدیکلریمی دئمیشم. آرتیق بیر سؤزوم یوخدور دئمه­یه.

-          یوخ، بوراجان بو نئچه ایلده سندن چیخارلیسی بورا گلمیییب. اونا گؤره بللی دیر سنده بیرشئی لر وار.

اؤز یانیمدا دئدیم "منی .... ائدنمزسن"

اوزاقلاشاراق سون سؤزون دئدی:

-          یولداشلارین سنه گؤره هرنه­یی دئییبلر. من بونلاری دئییرم کی دوز تصمیم توتاسان. بونلاری دئمزلرها!

قاپی آردیجا باغلاندی، بیرآز دؤزدوم، قاپی دالیندا کیمسه نین اولمادیغینی دویدوم.اونا گؤره هم ایسته دیم آزجا دینجه­لیم، همده گؤروم یاتاجاغیم حالدا نه ائدیرلر؟

اوزاندیم یئره و گؤزلریمی یومدوم. چالیشدیم یاتمایام، آنجاق  اؤزومو یوخولولوغا ووردوم. 5 دقیقه کئچمه­میش بیر پیچیلتی اونلارین یاتاجاغیم حاقدا نه ائدجکلریندن خبر وئردی:

             دئیه­سن یاتیب، تئز اولون باشلایین.

4-5 نفر اویان بویاندان یاپیشیب، قاوزادیلار منی. سونرادا وور ها وورا باشلادیلار. داها دوشونمه­یه یئر قالمامیشدی. ساده­جه طبیعی تپکی (رفلکس) اولاراق پوتونلارین ضربه­سینه قارشی قیشقیریب، ال قول آتیردیم: "وای باشیم، آی قولوم سیندی، وای ده ده اؤلدوم ..." بوکس کیسه سی کیمی اؤز گوجلرین اوزه­ریمده سینادیلار. وحشیلیک زیروه­سینده گؤرونوردو. ائله ائتدیلر کی ایندی بوتون کاراتا ، کونگ فو کیمی ایدمانلاردان آجیغیم گلیر. انسانلیغین ان گئری مرحله­لرینین ، یاریم وحشی دؤنه­مینین نیشانی کیمی گؤرونور منه بو ایدمانلار.  اییرنج نفس وورمالارینین زامانی گلدی. آرتیق یورولموشدولار تاپداماقدان. یامان یوووز دئمکده، هده­لمکده بیر بیریلری ایله یاریشا گیرمیشدیلر. سونرادا اؤزونو پسیکولوق کیمی آپاران بازجو ایچری گیردی. اونلارین گئتمک زامانی گلدییینی وورقولادی. سویوق، روحسوز، دویقوسوز سسی ایله کئفیمی سوروشدو:

-          یوخون قاشدی؟ من دئدیم کی ، بورادا گرک دئییلنلردن چیخمایاسان. بولار هله ال قیزیشدیرمادیر. ایندی سنه مخصوص اوتاق دوزلدیرلر، گؤروبسن اونلاردان؟

ائشیکده در دمیر سسی گلیردی. بیر سیرا فیلیملرده گؤردویوم، داریسقال اوتاقلار بئینیمده جانلاندی. اونلارلا منیم یاریشیم، پهلوانلا دئوین بویلاشماسینا بنزییردی. اما منیم گوجوم، بدنیمین تابی بللیدی، اونلارین شیکنجه‌لریسه گئتدیکجه اوزانیردی، اونلارین وحشی‌لیگینه سون یوخودو، اونلار منی اوردا ایستدیک‌لری کیمی ساخلاماغا، ایستدیک‌لری قدر واخت‌لاری واریدی. ناواختسا صبریمین توکنجیین آشیلاماق ایستییردی‌لر. منیم صبریم قانادلاندیقجا، اونلار قارا شیکنجه دووارلارین اوجالتماقداییدی‌لار. ایشین دهشت‌لی‌سی اؤنده ایدی، کؤتک‌لردن آلدیغیم جسارتی سیندیرماق ایستییردی‌لر و سیندیردیغیم قورخونون قات قات یئکه‌سینی جانلان‌دیریردی‌لار.  میللی قورتولوشوموز یولوندا چالیشاراق، آرزولارین گؤرنمه­ین یولداشلاریمیز یادیما دوشدو. "غلامرضا امانی، چنگیز بخت آور،تبریز، اورمو، خییوو و سولدوزداکی شهیدلریمیز. اونلار قوتساللیق زیروه­سینه چاتمیشدیلار. منسه هله یاماجلاردا ائشینمکده­یدیم. نه اولور اولسون، بیز بو گونلری آشماساق، اوغور قازانماریق. بو میللتین یولو بئله­جه آچیلمالیدیر. من بوردان قاچارسام کیمدن اومابیلرم اؤنده گئتمه­یی ..." کیمی دویقوسال فیکیرلر بئینیمدن کئچیردی. گؤزلریمدن سئوگی یاغیردی. بونو اؤزوم دویوردوم. سویولماغا گئدن نسیمی، دوغرانماغا گئدن بابک گؤز اؤنومده­یدیر. آرتیق سئوگی زیروه­سی گؤرونوردو. سونانین، آنامین و تاتارین باخیشلاری گؤز اؤنومده­یدی.

"سنی بو حوسنی جمال و بو کامال ایله گؤروب

قورخدولار حاق دئمه­یه، دؤندولر انسان دئدیلر"

نسیمی نئجه ده گوزل بئینیمین پرده سینده جانلانیردی. آرتیق هرنه­یی گؤز اؤنومده آلمیشدیم. بازجویی یه داها دوشونموردوم. داها هئچ­نه­یی توجیه ائتمک ایسته­میردیم. دفعه لرله اونلارا قورورلا دئدیییم سؤزو ، گئرچکدن بیرداها سون اولاراق دئمک ایسته­ییردیم: "نه ائدجکسیز ائدین"

او گئجه­ده سحره کیمی یانیمدان آیریلمادیلار. تیکرار سورولاری بویودو: "یازیرسان، کاغاذ گتیرک یا یوخ؟". منیمسه جاوابیم دییشمیردی. آیاقلاریمین آلتی یاواش یاواش شیشمه­یه باشلامیشدی. هرگون ایکی دؤنه 500 سایدا اوتوروب دوروردوم.بودلاریم یامانجا خاملامیشدی. ماهیچه­لریم دارا دورموشدو. بئلیمین آغریسی آشاغا مؤهره­لردن یاواش یاواش یوخاری مؤهره­لره گلیب چاتمیشدی، اوره­ییمین اوستونده کی قابیرقالاردا دا آغریلار باشلامیشدی. تئز تئز اییلیب بئلیمی دینجلتمک ایسته­ییردیم. بونادا یول وئرمیردیلر. گئجه­نی بئله­جه سحر ائتدیم. یئنه ده سحر تئزدن رئیس دئییلن بازجو ایچری گیردی:

-          کاغاذ گتیریم یازاسان؟

-          یوخ

-          خداحافظ

 بازجولار ئینه نئچه ساعاتدان بیر دییشیردیلر. بیر سیرالاری اؤزلرین یومشاق آپاریردیلار کی، بلکه منده او فازدان چیخیب، دانیشام. آنجاق  منه هئچ فرق ائتمیردی. جاوابلاریم دییشمیردی. فورصت دوشنده بیزه اولان ظولملردن دانیشیردیم. اونلار منیم منطیقی سؤزلریمین قاباغیندا دووار قورموشدولار. اصلا اونلارا دوشونمک ایسته­میردیلر. اونلارا دانیشماق فایداسیزییدیر. ساده­جه ائله واخت اؤتسون دئیه دانیشیردیم.

"آغا من ایسته­میرم تورک دیلینده مدرسه­میز اولا، نه دئییرسن؟ زورنان بیزه حاق تعریفلییه­جه­سیز؟..." کیمی قانمیرام قال یانا یانا دئییردیلر. بئله دوشونوردولر کی من دوغوردان ایسته­ییرم اونلارا تأثیر ائدم. اونا گؤره لاپ قارد توتوردولار. بیرحالداکی من اونلارین نه سوییه ده اولدوغون بیلیردیم.

3-جو گئجه ، آرتیق بئلیم قوروموشدو. بیر قورو تاختا کیمییدیر. هرآن اووولوب تؤکولجکدی سانکی، بیر یوموروقلا سیناجاقدی، سانکی. بوتون سوموکلریم آغریییردی. اوره­ییمده یاواش یاواش آغری حیس ائدیردیم. ایللر بویو ایدمان ائدیب، ساغلام ساخلادیغیم اورک، ایندی نامردلرین جینایتی ایله، سانکی دلینیردی. بوراخجاق یوخوم توتوردو. دئمک اولار جییارلامیشدی! آیاق اوستده گؤزومو یومجاق یوخو توتوردو، بیر ایکی نفرین یومراقلاری یئنیدن یوخومو باشیمدان قاچیریردی. چوخ ماراقلیسی بویودور کی، گؤزومو یومجاق، یوخو گؤروردوم. 2-3 دفعه او گئجه بوزلو سویلا یوخودان آییتدیلار. بیر نئچه دفعه ده ترسه دستبند و ... ایله.

سحر اولدو. سللولون بیر نئچه یئری ایسلانمیشدی. گئجه نین نئجه کئچمه­یی بللییدیر. رئیس دئییلن بازجو اؤنجه یاش موکتلره باخیب دئدی:

-          بولار نییه یاش اولوب؟

دئدیم:

-          بیلیرسیزدا، سویوق سو ایله یوخوسوز ساخلاییبلار. اوره­ییم آغریییر. دوقتور چاغیرین.

بازجو سایمازجا یئنه طعنه ایله دئدی:

-          اینانمیرام بوردا ائله شئی اولا. منیم خبریم یوخدور. ایندی یازیرسان یا یوخ. ؟

-          یوخ

داها منیم آرتیق دانیشماغیما او حالدا دؤزمک ایسته­مه­دی. اونون یالانچی قورورو باشقالارینین یانیندا سینیردی بئله­ده. 4-جو گون باشلامیشدی. اوره­ییمین سانجیسی یامان اینجیدیردی. اییلیب، اللریمله اوووشدوروردوم. اوره­ییمین سانجیسی بیرداها منطیقی دوشونمه­یه چاغیردی منی. "سن یئترینجه دیره­نیبسن. دیمز بوندان آتریق. یولداشلارین دئدییینی سنده دئ، دور اوستونده، سونوناجان بیر آددیم دا پئشمانام فیلان دئمه. نه ائدجکلر کی؟ زینداندی دا سونو. بوردا ساغلاملیغینی ایتیرمکدن یاخشیدیر کی..."

بیر نئچه دفعه اوره­ییمین سانجیسیندان چیغیردیم. دوقتور سونوندا گلیب، باشیمین اوستونده دایاندی. بیر آز اوندان اؤنجه اونلارین قابیرقاما دؤشدیکلری تپیک یوموروغون ضربه­سیندن یئره ییخیلمیشدیم. دوقتورون یانیندا دایانان بازجو آجیماسیزجا اونو باشا سالماق ایسته­ییردی کی من موخوللوق ائدیرم، هئچ نه­ییم دییل. دوقتور داماریمین ووروشون (نبضیمی) توتدو. کاغاذدا بیر نئچه داوانین آدین یازاراق دئدی:

-          هوشدن گئتسه (باییلسا) بونلاری وئررسیز. تئز چاغیرارسیز.

دؤردونجو گئجه­نی ده قاباقکی گونلر کیمی تک قیچلی آیاق اوستده، یوخوسوز کئچیردیم. باشیم، گؤزلریم، اوزوم شیشمیشدی سانکی، ایکی دؤنه یوخودان داشلاندیم او گئجه، ائشیتمیشدیم یوخو شیرین اولار، آنجاق  اورادا بونون تام آنلامیندا قاورادیم. او زیبیللی، کیرلی، یاش موکتین اوستونده بیر دیقه یاتماق نه شیرین گلیردی. بئلیمین ، آیاقلاریمین آغریسیندان ، بیرده یوخوسوزلوقدان یئره ییخیلدیم بیر آن. اؤزومو تئز اله سالسامدا، بازجونون یوخلوغون دویوب، ائله بیر دقیقه ده اولسا یاتماق ایسته­دیم. ائله همن یوخو توتدو. بو انصافسیزلاردا ائله بونو گؤزله­ییرمیش، یایین او ایستیسینده یاریم بوز اولموش سویو وئدیره ایله (دولچا ایله) باشیما تؤکدولر. یوخودان داشلاندیم. یوخودان داشلانماغین آنلامین اورادا باشا دوشدوم. گئرچکدن بوتون ماهیچه­لریم (قاسلاریم) داش کیمی بیرآندا برکیدی. سونرا تیترتمه دوشدو جانیما. بونو او گئجه ایکی دؤنه یاشادیم، بیر دقیقه چکمه­ین بو یوخونو اونلار بوزلو سو ایله داشا چئویریردیلر. اوره­ییم بیر آندا دایانیردی سانکی. بونون خفیف شکیلده، بیردن بوزلو سویون آلتینا گیرمکله تجروبه ائتمک اولار. نفس بیرآندا سویوق سویون اثرینده دایانیر. آنجاق  یوخولو اولارکن تجروبه ائتمه­یی تانری هئچ کسه گؤسترمه­سین! داشلانماق بو دئمکدیر. بو ضربه ایله اؤلمکده اولار. 3-جو گوندن سونرا ندنسه حیس ائدیردیم، گئجه­لر باشقا یئرده­یم. سانکی او گؤردویوم، 50 گوندن چوخ قالدیغیم سالوندا دییلدیم. گئجه باشقا یئرده­یدیم ائله بیل، اوشاقلاردان تام اوزاق بیر یئرده. هئچ کسین سسیمی ائشیتمه­دییی بیر یئرده.

5-جی گونوده یوخوسوز آیاق اوستده کئچیردیم. داها کیمسه­یی دیندیرمه­یه گتیرمیردیلر. 5 گونودور یئدیکلریمده قارنیمدایدی. توالئتیم یالنیز سیدیک اولوردو. ندن آجلیق ائتمه­دیم دئیه، پئشمانلیق حیسسیم واریدیر. "کاش آجلیق آکسییاسی کئچیرردیم، هئچ اولماسا ایندی بئینیمین قندی آزالاجاقدی، هوشدن گئدجکدیم، بونلاردا ال چکه­جکدیلر" دئیه پئشمانجا دوشونوردوم. بئلیمین دیسک احتمالی، اوره­ییمده سکته ائتمک اولاسیلیغی داها آرتیق سون نئچه گونون ایچینده هردن بئینیمدن کئچنلره منطیق قازاندیریردی. "آرتیق بیر یول تاپمالییام، بوندان آرتیق دیمز. آچیلمیش مساله لری گیزلتمه­یه و اوستونده بئله بیر هزینه وئرمه­یه نه منطیق وار" دئیه دوشونوردوم. او گئجه ائله بو دوشونجه­لردن سونرا یئنه­ده ترسه دستبند ووردولار. آغریدان اینیلده­دیییم زامان، قوجا گؤزتچی باشیمین اوستونده خائین خیطاب ائدرک وورا وورا دئییردی:

-           دئییرسن؟ یازیرسان؟ آچیم اؤتوروم

بیردن آغزیمدان چیخدی کی : هه دئییرم

تئز بازجو اؤزون یئتیردی:

-          یاخجی دئ آچاق. تئز دئ یوباتما. قوللارین قیریلیرها.

قوجا گؤزتچی مندن اونون سؤزونه جاواب گلمه­دییین گؤردوکده، اؤزو ایشه گیردی. قولومو آچاراق دئدی:

-          قوی آچیرام، منهقول وئردی. اؤزو دانیشاجاق.

قولومو آچدیلار، تئز کاغاذ قلم گتیردیلر. بیر صندلده گتیریب، منی اوستونده اوتورتدولار. بازجونون کئفی چیلتیک چالیردی. فورصتی قاچیرمادان دئدی:

-          یاز. بیر صفحه یاز اساس سؤزلری. قالانین صاباح یازارسان. بو گئجه­نی بوراخاق یاتاسان.

بیرآنلیغا سانکی دیلیمدن بیری بیر شئی توتموش، سؤز آلمیش دورومونا دوشدوم. آنجاق  سونرا دوشوندوم کی :"یوخ ، بونلار کیمدیر کی من بونلارا سؤز وئریم، هله اوسته­لیک آلتیندا قالیم". بیرآز داها آرتیق دوشونمک ایسته­دیم. من قرارا گلمه­میش آغزیمدان سؤز چیخمیشدی. بلکه­ده بو قراری بئینیمین آلت یاپیسیندا وئرمیشدیم، او آجی دوروم بونون اوزه چیخارتمیشدی. آنجاق  بئله اولمازدی، من گرک هرنه­یی سالیب، چیخایدیم. دئدیم:

-          ایندی بئینیم ایشله­میر، 5 گئجه گوندوزدور یوخوسوزام. قویون بو گئجه­نی یاتیم صاباح یازارام.

بونو دئجک بازجونون اوماجی اووولو قالدی، آجیقلانماسین گیزلده­نمه­ییب، دئدی:

-          من بیلیردیم سن بیزی آللادیرسان. ایسته­دین بیرآز دینجه­لسن. یوخ اولماز. شاللاغی، پابندی (آیاق قاندالی- باداغی)گتیرین. او دستگاهیدا حاضیرلایین. بونون محبته لیاقتی یوخدور .

سونرادا دؤنوب منی تحریک ائتمک اوچون دئدی:

-          سن آغ ساققال کیشینی اویونا توتوسان. او منه اؤل دئسه اؤلرم. آنجاق  سنده هئچ اوتانماقدا یوخدور. اونو آللادیب، قوللارینی آشدیریرسان. سونرادا اونو بووضعییته سالیسان. بیلیرسن هئچ صاباح اونا نه ائلییه­جه­لر؟

-          نه ائدیرسیز ائدین، من صاباح دانیشاجام.

قوجا گؤزتچی بازجو و باشقالارین ائشییه گؤندریب اؤزو منله دانیشدی:

-          باخ اوغول، اؤز فیکرینده اول. اوبیری­لریاؤتور. ایندی هره اؤز فیکرینده­دیر. بیر کلمه دئدیکلرین یاز. قالانین دا سونرا یازارسان.

-          حاجی صاباح یازاجام

قوجا گؤزتچی مندن سؤز آلیب، گئتدی. آنجاق  بازجو بونونلا راضی اولمازدی. چاغیردی صندلی گؤتوردولر. یئنه آیاق اوستده دوردوم. یوغون کابل ایله توخونموش قارا بیر شاللاق گتیردیلر. ائشیکده یئنه­ده اؤزل بیر سللول دوزلتمک سسلری گلدی. منیم قراریمین دییشمه­دییینی گؤروب، اویونلارین دایاندیردیلار. اؤتن گئجه­لر یوخو یامان کیریخدیرسادا، بو گئجه یوخوم تامامی ایله قاچمیشدی.آنجاق آیاقلاریم باشماغا یئرلشمیردی، آرتیق آیاق یالین دایانمیشدیم، سانکی قانیمین هامیسی آیاقلاریما دولموشدور. اؤزوده ایریلمیشجه سینه شیشمیشدی. بالدیرلاریم، توپوغومون یان یؤره­سی، بودومدان یوغون اولموشدو. آیاق‌لاریمین خیردا قان دامارلاری بیر بیر شیشیب پارتلاییردیردی‌لار و قانی دری‌نین آلتینا سوزدوروردولر. قان آیاق‌لاریمین آلتیندا ائله تولوقلانمیشدی کی بدنیمین ان ائنلی یئری آیاق‌لاریم اولموشدو. سانکی او حالدا همشه کی گوجلو اورییم، گوجنمک‌دن پارتلاماق ایستییردی، چونکو آرتیق قان قیچلاریمدان‌ یوخاری دیرمانا بیلمیردی. بیر ساعات اؤنجه­سی آیاغیمی یئره قویانمیردیم سانجیدان، آلتدان سانکی تیکان باتیردی آیاغیما، سوموکلریمی ائله بیل ازمیشدیلر، بئلیم دارا دورموشدو. آنجاق  ایندی باشقا هاوادایدیم. بونلارین هئچ بیرینه دوشونموردوم. منی دوشوندورن دانیشیم یوخسا یئنه دیره­نیم مساله­سییدیر. بو مساله حاقدا ساعاتلارجا دوشوندوم. او دار سللولون ایچینده بؤیوک بیر مئیدان آچمیشدیم، هر نه­یه دوشونوردوم. اؤزومله راضیلاشانمیردیم کی، یارین او مئیدان اوخویان بازجویا دانیشیرام دئییم. آرادا قالمیشدیم، بیر یاندان منطیق حؤکم ائدیردی کی آرتیق آچیلان مساله لری سنده قبول ائت، قالانین یئنه دانارسان. باشقا یاندان ایسه سیننماق حیسسی ووجودومو سارسیدیردی. دوشونوردوم کی "یانی من سینیرام؟، یوروش تسلیم اولاجاق؟ ایشکنجه قاباغیندا دؤزه بیلمیرم؟ یوخ بو آومایاجاق. یارین یئنه دیرنمک لازیم. قوی اونلارین توتدوغو تویو باشلارینا