شما اینجا هستید: Home بخش های اصلی زنـان او قادین کی یئرین‌دن دورمادی! چئویرن: عذرا آذری

او قادین کی یئرین‌دن دورمادی! چئویرن: عذرا آذری

فئورل آیی نین ۴، دونیا اینسان حاقلاری اوغروندا موباریزه‌نین قادین لیدئرلرین‌دن اولان روزا پارکس-ین دوغوم گونودور. آشاغی‌داکی متن تورکییه تورکجه‌سی و اینگیلیزجه متنی قارشیلاش‌دیراراق، ترجومه ائدیلمیش‌دیر.

روزا لوویس پارکس (۴ فئورال ۱۹۱۳ – ۲۴ اوکتیابر ۲۰۰۵)، آمئریکالی اینسان حاقلاری ساوونوجوسو ایدی. 

روزا پارکس آمئریکادا  آلاباما ایالئتین‌ده دوغول‌دو. ۱۹۴۳-ده آمئریکا مد‌نی/سیویل حاقلار حرکاتینا قاتیلدی. ۱۹۵۵-ده آلاباما ایالتین‌ده، قارالارا اویقولانان آیری سئچکی‌لییه قارشی یئنی بیر تشببوث گؤستره‌رک، او حرکاتین اؤنجوللرین‌دن اولدو.

او ایللرده آمئریکانین گونئی ایالتلرین‌ده قارا- دری‌لیلرله آغلار اوتوبوسلارا آیری قاپی‌دان مینیردیلر. هر بیری اؤزونه مخصوص  اولان یئرده اوتوراردی. اوتوبوسلاردا بیرینجی نووبه‌ده آغلارین اوتورما حاققی  وار ایدی، بئله کی بیر آغ گلینجه قارا یئرین‌دن قالخیب و یئرینی آغا بوراخمالی ایدی. روزا پارکس بیر گون مونتگومئری شهرینده اوتوبوسا میندی.  آما روزا پارکس آغلار میندی یینده اوتوردوغو یئردن قالخمادی.  بو مسئله آغلارین اعتراضی و شوفئرین اویاری‌سینا سبب اولسا دا، او یئرین‌دن دورمادی. و بونا گؤره ده توتوقلان‌دی و حبسه آتیلدی.

روزا پارکس-ین بو دیرنیشی قارالارین حرکاتین‌دا بیر دؤنوش نقطه‌سی اولدو. او اولای‌دان سونرا بیر ایل مودتینده قارالار  اوتوبوسلاری بایکوت/تحریم ائد‌رک، مینمه دیلر. چوخ چتین اولسا دا هر یئره یورویه‌رک گئت‌دیلر. روزا پارکس- ین بو اعتراضین‌دان باشلایان حرکت گئت- گئده گئنیشلنیب و گوجله‌ن‌دی. پروتئستو حرکاتی بیر ایل سونرا مئیوه‌سینی وئردی. آمئریکان فئدئرال محکمه‌سی، اوتوبوسلرده‌کی بو اویقولامانی قالدیردی. آما روزا پارکس آلاباما-دا آغلار طرفین‌دن باسقییا معروض قادیغی اوچون قوزئیه کؤچمک زوروندا قالدی. همه‌ن ایللرده آلاباما والی‌سی، قارالارین  اونیوئرسیته‌لره گیرمه‌سینه مانع اولوردو آما  مارتین لوتر کینگ-ین باش‌چی‌لیق ائتدییی  حرکات ۱۹۶۴-ده اوغور قازاندی. آمئریکا سیویل حاقلار قانونو تصویب اولاراق، بوتون ایرق‌چی‌لیق و آیریسئچکی‌لیک یاساقلاندی. روزا پارکس همین حرکاتین سیمبولونا چئوریلدی.

روزا پارکس ۱۹۹۹-دا تایم قازئته‌سی  طرفین‌دن 20- جی یوز ایلیین اینسان حاقلاری ساوونوجوسو سئچیل‌دی. پارکس ۱۹۹۶-دا آمئریکا پرئزیدئنتی طرفین‌دن  آزادلیق میدالینا لاییق گؤرولدو. ۱۹۹۹ ایلین‌ده ده، کونگره‌نین قیزیل میدالی ایله تلطیف اولون‌دو  و بو اؤدولو بیلل کلینتون'اون الین‌دن آلدی.

روزا ۲۰۰۵-جی ایلده ۹۲ یاشین‌دا دونیادان گئت‌دی و کاپیتال هیل (کونگیره) بیناسین‌دا توپراغا وئریل‌دی. او تکجه قارا دری‌لی قادین‌دیر کی، مزاری  او موحتشم بینادادیر.

 

سایت http://yenigamoh.com ارگان رسمی تشکیلات "یئنی گاموح" (جنبش نو بیداری ملی آذربایجان جنوبی) می باشد. نشر مطالب این سایت با ذکر منبع بلامانع است.

جهت ارتباط سریع با ما، می توانید با آدرس زیر تماس بگیرید. info@yenigamoh.com